প্রধানমন্ত্রীগী লোইশঙ
স্তেতশিংগী গৃহ মন্ত্রীশিংগী ‘চিন্তন সিবির’দা প্রধান মন্ত্রীনা ৱা ঙাঙখ্রে
“চিন্তন সিবির কোওপরেতিব ফেদরেলিজমগী অথোইবা খুদম অমনি”
“’ৱাশক মঙা’ অসিনা অফবা লৈঙাক্লোনগী লম্বী তাক্কদবা শাফু ওইহনগদবনি”
“স্মার্ত তেক্নোলোজীগী মতেংনা লো অমসুং ওর্দরগী সিস্তেম ফগৎহনবা ঙমগনি”
“লো অমসুং ওর্দর ঙাক্তুনা থম্বা হায়বসি পুং ২৪ চুপ্না তৌগদবা থবক অমনি”
“য়ু.এ.পি.এ.গুম্বা লোশিংনা তেরোরিজমগী মায়োক্তা চত্থরিবা লান্থেংদা সিস্তেমদা পাঙ্গল হাপ্লি”
“’ৱন নেসন, ৱন পুলিস য়ুনিফোর্ম’না লো চৎনহল্লিবশিংদা মান্নবা শক্তাক পীগনি”
“অরানবা পাউ শন্দোকপা থিংনবগীদমক ঐখোয়না তেক্নোলোজীদা খুমাঙ চাওশিনবা ফীভম পুরকপা তাই”
“নোংমৈ শীজিন্নবা নৎত্রগা কলম শীজিন্নবা ওইরবসু, নক্সলিজমগী মওং খুদিংমক মরূ ফুক্তৎপা তাই”
“পুলিসকী গারীশিং মথৌ নীংথিনা তৌবগা মরী লৈনবনা কৈদৌঙৈদসু অরিবা শীজিন্নরোইদবনি”
Posted On:
28 OCT 2022 12:12PM by PIB Imphal
প্রধান মন্ত্রীন, শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা স্তেতশিংগী গৃহ মন্ত্রীশিংগী ‘চিন্তন সিবির’দা ৱা ঙাঙখ্রে।
থৌরমদুদা ৱা ঙাঙলদুনা, প্রধান মন্ত্রীনা কুমহৈগী মতমসিদা ইং তপ্পা ফীভম অমগীদমক লো অমসুং ওর্দর পর্সোনেলশিংনা শেম শারিবা অসিগীদমক থাগৎখি। চিন্তন সিবির অসি কোওপরেতিব ফেদরেলিজমগী অথোইবা খুদম অমনি হায়না মহাক্না হায়খি। লো অমসুং ওর্দর অসি সংবিধানগী মতুং ইন্না স্তেতশিংগী থৌদাং ওইরবসু, মখোয় অসি লৈবাকসিগী লিংজেল মান্নবা অমদি অপুনবগী শক্তমদা চপ চানা মরী লৈনৈ হায়না প্রধান মন্ত্রীনা হায়খি। “স্তেত খুদিংমক্না অমনা অমদগী তমশিনগদবনি, পুক্নিং থৌগৎনগদবনি, লৈবাক্কী য়াইফনবগীদমক থবক পায়খৎকদবনি, মসি সংবিধানগী থৱায়নি অমদি মসি লৈবাক মীয়ামগী মফমদা ঐখোয়গী থৌদাংসু ওইরিবনি”, হায়না মহাক্না হায়খি।
হৌজিক চত্থরিবা অমৃৎ কালগী মরমদা পল্লদুনা, প্রধান মন্ত্রীনা অমৃৎ কাল অসিদা অমৃৎ মীরোল অমনা ‘ৱাশক মঙা’গী থৱায় হাপ্লরগনি হায়খি। “’ৱাশক মঙা’ অসিনা অফবা লৈঙাক্লোন পুরক্নবগী লম্বী তাক্লিবা শাফু ওইহনগদবনি”, হায়না মহাক্না হায়খি।
লৈবাকসিগী মপাঙ্গল হেনগৎলক্লবা মতমদা, মীপুম খুদিংমক্কী মতিং হেনগৎলক্কনি অমদি লৈবাকসিগী ইমুং খুদিংমক্তা য়াইফবা পুরক্কনি হায়না প্রধান মন্ত্রীনা ফোঙদোকখি। “স্তেত খুদিংদা ক্যুগী খ্বাইদগী মনিংদা লেপ্লিবা মীওইদু ফাওবা য়ৌনা কান্নবা ফংহল্লবা মতমদা অফবা লৈঙাক্লোন ওইগদৌরিবনি”, হায়না মহাক্না হায়খি। প্রধান মন্ত্রীনা লো অমসুং ওর্দর সিস্তেম অমদি স্তেতশিংদা চাওখৎলকপগা লৈনরিবা মরীগী মরমদা ৱাফম কয়া থমখি। “লো অমসুং ওর্দর সিস্তেম পুম্বসি থাজনিংঙাই ওইহনবা হায়বসি য়াম্না মরুওই। মীয়াম্না মসিদা থাজবা অমদি থম্লিবা মীৎয়েঙ য়াম্না মরুওই” হায়বা ৱাফম মহাক্না ফোঙদোকখি। মহৌশাগী অমাঙ অতা থোক্লকপাম তমদা এন.দি.আর.এফ. অমসুং এস.দি.আর.এফ.কী শক্লোন হেনগৎলক্লি হায়না মহাক্না হায়খি। মতৌ অসুম্না, ক্রাইম থোকফম অমদা পুলিস লাকপা অসি লৈঙাক য়ৌরকপগুম লৌনরিবনি অমদি কোরোনাগী মতমদসু পুলিসগী মিংচৎ হেনগৎখিবনি, হায়না প্রধান মন্ত্রীনা ফোঙদোকখি। পুলিসকী মথৌ তাবশিং মখা তানা মপাঙ্গল কনখৎহন্নবগী খোঙফম অমদি মীৎয়েঙদা অৱাৎপা লৈতে। হীরম অসিদা মখোয়বু লমজিংবিবা অসি মতম চুপ্পদা চত্থদুনা লৈবা থৌওং ওইগদবনি হায়না মহাক্না ফোঙদোকখি।
ক্রাইম মখা তানা লোকেলাইজ ওইরকত্রে, ইন্তরস্তেৎ, ইন্তরনেস্নেল ক্রাইমগী থৌদোকশিং হেনগৎলক্লি হায়বা ৱাফম প্রধান মন্ত্রীনা থমখি। মরম অসিননি স্তেত এজেন্সীশিংগী মরক্তা, অমদি কেন্দ্র অমসুং স্তেত এজেন্সীশিংগী মরক্তা অমগা অমগা তেংবাংনবা মরু ওইরক্লিবসি। সাইবর ক্রাইম নৎত্রগা খুৎশু খুৎলায় অমদি দ্রগশিং লোন্না পুথোক পুশিন তৌবদা দ্রোন তেক্নোলোজী শীজিন্নবা ওইরবসু, অসিগুম্বা ফীভমশিং অসি লাকশিন্নবগীদমক লৈঙাক্না অনৌবা তেক্নোলোজীশিংগী মায়কৈদা থবক পায়খৎপা মথৌ তাই হায়না মহাক্না হায়খি। “লো অমসুং ওর্দর সিস্তেম অসি স্মার্ত তেক্নোলোজীগী মতেংনা ফগৎহনবা য়াই”, হায়না প্রধান মন্ত্রীনা হায়খি। ৫জি অমদি মসিগী কান্নবশিংনা হেন্না ফবা এলর্তকী মথৌ তাবা লাক্লি হায়না হায়খি। মীয়াম্না সিক্যুরিতীদা থম্লিবা থাজবা অসি তেক্নোলোজীনা হেনগৎহনগদবা মরম্না বজেৎকী পল লান্থোক্তুনা মথৌ তাবা তেক্নোলোজী শীজিন্ননবগীদমক মহাক্না মুখ্য মন্ত্রীশিং অমদি গৃহ মন্ত্রীশিংগী মফমদা হায়খি। প্রধান মন্ত্রীনা কেন্দ্র লৈঙাক্কী পুলিস তেক্নোলোজী মিসনগী মরমদা পল্লদুনা, তোঙান তোঙানবা স্তেতশিংগী খেন্নবা তেক্নোলোজীশংগী মরক্তা পাউ ফাওদোক্নবা ঙমদবনা মরম ওইরগা মান্নবা ফম্পাক অমা মথৌ তাই হায়না ফোঙদোকখি। “ঐখোয়দা ভারত পুম্বগী ওইবা মীৎয়েঙ অমা থম্বা মথৌ তাই, ঐখোয়গী খ্বাইদগী ফবা থৌওংশিং ইন্তরওপরেবল ওইহনবা অমদি মান্নবা লিঙ্ক অমা লৈহনবা মথৌ তাই”, হায়না মহাক্না হায়খি। মহাক্না স্তেত এজেন্সীশিংদা ফোরেন্সিক সাইন্সকী লমদা মতিং হেনগৎন্নবা অমদি গান্ধীনগরদা লৈরিবা নেস্নেল ফোরেন্সিক সাইন্স য়ুনিভর্সিতীগী কান্নবা মপুং ফানা লৌননবা ৱাফম থমখি।
অহোংবা পুরকখ্রবশিং পল্লদুনা, প্রধান মন্ত্রীনা হৌখিবা চহি খরসিদা লৈবাকসিদা ইং তপ্পা ফীভম অমা থম্বদা মতেং ওইখিবা অহোংবা কয়া লো অমসুং ওর্দর সিস্তেম মপাঙ্গল কনখৎহন্নবগীদমক পুরকখ্রে হায়খি। “লো অমসুং ওর্দর ঙাকপা হায়বসি পুং ২৪ চুপ্না তৌগদবা থবক অমনি”, হায়না মহাক্না হায়খি। মসিদা মথৌ তারিবা থবক থৌওংশিং হেন্না খুমাঙ চাওশিলহন্নবা অমদি ফগৎহন্নবা থবক পায়খৎপা মথৌ তাই হায়বা ৱাফমসু মহাক্না থমখি। কম্পেলী লোদা ৱাফম কয়া দিক্রিমিনেলাইজেসন তৌখিবা অসি মায়কৈ অসিদা থাংজিল্লিবা খোঙথাঙ অমনি হায়বা ৱাফম থম্লদুনা, মহাক্না স্তেতশিংদসু মতমগা চুনদ্রবা কাঙলোন অমদি চৎন-পথাপশিং য়েংশিন্দুনা লৌথোকখিনবা হায়খি।
প্রধান মন্ত্রীনা কেন্দ্র লৈঙাক্না শেম্লিবা চৎন-কাঙলোনশিংদা শেঞ্জা থুমজা, অকি তুজুং পোকহনবা অমদি হৱালাগী মায়োক্তা অকনবা থবক লৌখৎনবগী থৌনা অমা ময়েক শেংনা উরি হায়খি। “য়ু.এ.পি.এ.গুম্বা লোশিংনা তেরোরিজমগী মায়োক্তা চত্থরিবা লান্থেং অসিদা সিস্তেমদা মপাঙ্গল হাপ্লি”, হায়না মহাক্না হায়খি।
প্রধান মন্ত্রীনা তিল্লিবশিংদুদা লৈবাক পুম্বদা লৈরিবা স্তেতকী পুলিসশিংগী চপ মান্নবা য়ুনিফোর্ম অমা থম্নবগী ৱাফম খন্ননবা হায়খি। মসিনা লৈরিবা পাক চাউবসিনা মরম ওইরগা অফবা পোত্থোক ফংহনবতা নত্তনা লৈবাক্কী মফম অমা হেক্তদা মীয়াম্না পুলিস পর্সোনেলশিংবু মশক খঙহনগদবনা মরম ওইরগা লো এনফোর্সমেন্ততা মান্নবা শক্তম অমা পীগনি। স্তেতশিংনা মখোয়গী ওইবা মশিং অমদি খুদম চাংদম হাপচবা য়াই হায়না মহাক্না হায়খি। “”’ৱন নেসন, ৱন পুলিস য়ুনিফোর্ম’ হায়বসি ঐনা অদোম্না খন্ননবগীদমক্তা ৱাখল্লোন অমা ফোঙদোকচবা খক্তনি”, হায়না মহাক্না হায়খি। মতৌ অসুম্না, তুরিজমগা মরী লৈনবা পুলিসিংগীদমক অখন্নবা মতিংশিং শেমগৎনবা খন্নবা মথৌ তাই হায়বা ৱাফমসু মহাক্না থমখি। লম কোয়বশিং অসি মফম অমগী মিংচৎকী খ্বাইদগী চাউবা অমদি খোঙজেল য়াঙবা এম্বেসেদরশিংনি হায়না মহাক্না হায়খি।
প্রধান মন্ত্রীনা মীওইবগী ইথিলগী মরুওইবা অমদি মশাগী ওইবা মিনুংসিগী ইহুল অমা শেমগৎপগী মথৌ তাবসু ফোঙদোকখি। লাইচৎ মনুংদা মীয়ামবু, মরুওইনা অহল ওইরবশিংবু তেংবাংনবগীদমক পুলিসনা লাউখিবা খোল্লাউবু মহাক্না খুদম ওইনা পীখি। তেক্নোলোজিকেল ইন্তলিজেন্সকা লোয়ননা হ্যুমেন ইন্তলিজেন্সবু মীরায়বা য়াদবনা মসিবুসু মপাঙ্গল কনখৎহন্নবা প্রধান মন্ত্রীনা হায়খি। প্রধান মন্ত্রীনা ভারতকী ফীভম ফগৎলকপগা লোয়ননা থেংনরক্লিবা অনৌবা শিংনবশিংগী মতাঙদসু মীকুপ নাহুম শিংনা লৈবগী মথৌ তাবা ৱাফম থমখি।
সোসিএল মীদিয়াদা লৈরিবা ওইথোকপা য়াবশিং তাক্লদুনা, প্রধান মন্ত্রীনা মসিবু ঈ-পাউ লৌফমখক্তা ওইনা লৌরোইদবনি হায়খি। অরানবা পাউ অমখক্না লৈবাক্কী ওইবা হীরম অমদা কাংখোং চাইহন্নবগী মতিং লৈ হায়না মহাক্না হায়খি। মমাঙদা থবক্কী রিজর্বেসনগী মতাঙদা শন্দোকখিবা অরানবা পাউশিংনা ভারতনা থেংনখিবা অমাঙ অতাশিংগীদমক প্রধান মন্ত্রীনা নুংনাংবা ফোঙদোকখি। ঈ-পাউ অমা হেক্তা মীয়ামদা শন্দোকত্রিঙৈদা নৈনবা অমদি অচুম্বনি খঙদোক্নবগী লমদা মীয়ামদা খঙহনবগী মথৌ তাবা ৱাফম মহাক্না ফোঙদোকখি। “অরানবা পাউ শন্দোকপা থিংননবা ঐখোয়না তেক্নোলোজীগী লমদা খুমাঙ চাওশিনবা ফীভম পুরকপা তাই”, হায়না মহাক্না মখা তাখি। প্রধান মন্ত্রীনা লৈবাকসিদা সিভিল দিফেন্সকী মথৌ তাবগী মরমদসু ৱাফম কয়া ফোঙদোক্লদুনা ফাইয়রফাইতরশিং অমসুং পুলিসশিংদা হায়রিবা ৱাখল্লোন অসি মহৈরোয়শিংদা চেলহন্নবগীদমক স্কুল অমসুং কলেজশিংদা দ্রিল পাঙথোক্নবা ৱাফম থমখি।
তেরোরিজমগী নেৎৱর্ক মুত্থৎপগী মথৌ তাবা ৱাফম থম্লদুনা, প্রধান মন্ত্রীনা লৈঙাক খুদিংমক্না মখোয়গী ওইবা মতিং অমদি খঙজবগী মতুং ইন্না মখোয়গী থৌদাং লৌনবা হোৎনরি হায়না ফোঙদোকখি। হায়রিবা ফীভম অসি লাকশিন্নবগীদমক অমত্তা ওইনা থবক তৌমিন্নবগী মতম ওইরে হায়না শ্রী মোদীনা হায়খি। “নোংমৈ পায়বা নৎত্রগা কলম পায়বা ওইরবসু নক্সলিজমগী মওং খুদিংমক লৈবাকসিগী নহাশিংবু লান্না লমজিংগদবদগী থিংনবগীদমক মরু ফুক্তৎপা মথৌ তাই হায়না মহাক্না হায়খি। প্রধান মন্ত্রীনা অসিগুম্বা শাফুশিং অসিনা লাক্কদৌরিবা মীরোলশিংগী পুক্নিং ওলহন্নবগীদমক মখোয়গী ৱাখল লৌশিংগী চাং হেনগৎহল্লি হায়না চেকশিনৱা থমখি। লৈবাকসিগী লিংজেল মান্নবা অমদি অপুনবগী শক্তমগীদমক, অমদি সরদার পতেলগী লমজিং তুংইন্না, অসিগুম্বা শাফুশিং ঐখোয়গী লৈবাকসিদা ময়োল চোংহনবা য়াদে। অসিগুম্বা শাফুশিং অসি মালেমগী মফম কয়াদগী অচৌবা মতেংসু ফংলি, হায়না মহাক্না হায়খি।
হৌখিবা চহি নিপানসিদা, লৈবাকসিদা নক্সলনা শোকহল্লবা দিস্ত্রিক্তকী মশিং ফনা য়াম্না হন্থরক্লে হায়না প্রধান মন্ত্রীনা ফোঙদোকখি। “জম্মু অমসুং কাস্মিরদা ওইরবসু নৎত্রগা অৱাং নোংপোক্তা ওইরবসু, ঙসি ঐখোয়না তুং কোইনা ইং তপ্পা ফীভম অমগী মায়কৈদা খোঙজেল য়াঙনা চঙশিল্লি। হৌজিক ঐখোয় ইনফ্রাস্ত্রকচর য়াওনা হায়রিবা সেক্তরশিং অসিদা খুৎলৈ থুনা চাওখৎপা পুরক্নবগীদমক মীৎয়েঙ চঙবা তাই”, হায়না মহাক্না মখা তাখি। প্রধান মন্ত্রীনা, ঙসি কেন্দ্র লৈঙাক্না রিভর্স মাইগ্রেসন থিংননবগীদমক ঙমখৈ অমদি সমুদ্র খোঙবালগী মফমশিংদা চাওখৎপা পুরক্নবগীদমক মিসন মোদতা থবক পায়খৎলি হায়না পাউদমখি। মসিনা হায়রিবা মফমশিং অসিদা খুৎশু খুৎলায় অমদি দ্রগশিং লোন্না পুথোক পুশিন তৌবা থিংবদা চাউনা মতেং ওইগনি হায়বা ৱাফমসু মহাক্না থমখি। প্রধান মন্ত্রীনা হায়রিবা থৌরাংশিং অসি পায়খৎনবগীদমক ঙমখৈ অমদি সমুদ্র খোঙবালগী স্তেতশিংদগী তেংবাং হেনগৎহন্নবা ৱাফম থমখি।
মহাক্কী ৱারোল লোইশিল্লকপদা, প্রধান মন্ত্রীনা হৌখিবা চহি কয়াসিদা দি.জি.পি. মীফমদগী পুথোরক্লিবা সজেসনশিং নীংথিনা খন্নবিনবা ৱাফম থমখি। প্রধান মন্ত্রীনা পুলিস ফোর্সশিংদা মখোয়গী গারীশিং অনৌবা স্ক্রেপেজ পোলিসীগী মতুং ইন্না য়েংশিন্নবা ৱাফমসু থমখি। “পুলিসকী গারীশিং অসি মখোয়গী মতিংগা মরী লৈনবা মরম্না কৈদৌঙৈদসু অরিবা ওইহল্লোইদবনি”, হায়না মহাক্না হায়খি।
করিগুম্বা ঐখোয়না লৈবাক্কী ওইবা মীৎয়েঙ থমদুনা মাঙদা চঙশিল্লবদি, শিংনবা খুদিংমক ঐখোয়গী মাঙদা মাঙখিগনি হায়বা ৱাফম মহাক্না থমখি। “পাঙথোক্লিবা চিন্তন সিবির অসিদা, হেন্না ফবা সজেসনগা লোয়ননা রোদমেপ অমা মাঙদা থোরক্কনি। ময়ামগী মফমদা য়াইফ-পাউজেল পীজরি”, হায়বা ৱাফমগা লোয়ননা প্রধান মন্ত্রীগী ৱারোল লোইশিনখি।
বেকগ্রাউন্দ
চিন্তন সিবির অসি ওক্তোবর ২৭ অমসুং ২৮, ২০২২দা হরিয়ানাগী সুরজকুন্দদা পাঙথোক্কদবনি। স্তেতশিংগী হোম সেক্রেতরীশিং অমসুং দাইরেক্তর জেনেরেল ওফ পুলিস (দি.জি.পি.শিং) অমদি সেন্ত্রেল আর্ম্দ পুলিস ফোর্স (সি.এ.পি.এফ.) অমসুং সেন্ত্রেল পুলিস ওর্গনাইজেসন (সি.পি.ও.)শিংগী দাইরেক্তর জেনেরেলশিংসু চিন্তন সিবির অসিদা শরুক য়াগনি।
গৃহ মন্ত্রীশিংগী চিন্তন সিবির অসি, নীংতম নুমিত্তা প্রধান মন্ত্রীনা পীখিবা ৱারোলদা লাউথোকখিবা পঞ্চ প্রনগী মতুং ইন্না লৈবাক মনুংগী ঙাকশেলগা মরী লৈনবা হীরমশিংদা খুজিল থৌরাং শেম্নবা লৈবাক্কী ওইবা মীৎয়েঙ অমা পীননবগীদমক লৌখৎপা থৌরাং অমনি। কোওপরেতিব ফেদরেলিজমগী ৱাখল পরিংদা, সিবির অসিনা কেন্দ্র অমসুং স্তেতকী থাক্তা তোঙান তোঙানবা স্তেকহোল্দরশিংগী মরক্তা খুজিল থৌরাং য়াৎপা অমদি খুৎশম্ননা চৎমিন্নবদা হেন্না চুশিন্নবা পুরক্কনি।
সিবির অসিনা পুলিস ফোর্স মতমগা চুনহনবা, সাইবরক্রাইম মেনেজমেন্ত, ক্রিমিনেল জস্তিস সিস্তেমদা আই.তি. শীজিন্নবা হেনগৎহনবা, কংফালগী ঙমখৈ ঙাক শেনবা, সমুদ্র খোঙবালগী ঙাকশেল, নুপীশিংগী শাফবা ফীভম, দ্রগ লল্লোনবা অমদি অতৈ হীরম কয়াগী মরমদা মচা খায়না নৈনগনি।
*****
(Release ID: 1871610)
Visitor Counter : 163
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam