প্ৰধানমন্ত্ৰী শ্ৰী নৰেন্দ্ৰ মোদীয়ে তাপীৰ ভায়াৰাত ১৯৭০ কোটি টকাৰো অধিক মূল্যৰ একাধিক উন্নয়নমূলক পদক্ষেপৰ আধাৰশিলা স্থাপন কৰে। প্ৰকল্পসমূহৰ ভিতৰত আছে সপুতাৰাৰ পৰা ষ্টেচু অব্ ইউনিটিলৈ যোৱা পথৰ উন্নতিৰ লগতে মিচিং লিংক নিৰ্মাণ, আৰু তাপী আৰু নৰ্মদা জিলাত ৩০০ কোটি টকাৰ অধিক মূল্যৰ পানী যোগান প্ৰকল্প।

অনুষ্ঠানত উপস্থিত থকা জনসাধাৰণৰ উৎসাহ আৰু মৰমৰ কথা স্বীকাৰ কৰি প্ৰধানমন্ত্ৰীয়ে কয় যে তেওঁ দুটা দশক ধৰি তেওঁলোকৰ মৰম লাভ কৰি ধন্য অনুভৱ কৰিছে। তেওঁ কয়, "আপোনালোক সকলো দূৰদূৰণিৰ পৰা ইয়ালৈ আহিছে। আপোনালোকৰ শক্তি, আপোনালোকৰ উৎসাহ দেখি, মন সুখী হয় আৰু মোৰ শক্তিৰ স্তৰ বৃদ্ধি পায়"। "মই চেষ্টা কৰি আছোঁ", "আপোনালোকৰ বিকাশৰ বাবে আন্তৰিকতাৰে কাম কৰি এই ঋণ পৰিশোধ কৰিবলৈ" তেওঁ এইদৰে কয়। আজিও তাপী আৰু নৰ্মদাকে ধৰি এই সমগ্ৰ জনজাতীয় অঞ্চলটোৰ উন্নয়নৰ সৈতে সম্পৰ্কিত শ শ কোটি টকাৰ প্ৰকল্পৰ আধাৰশিলা স্থাপন কৰা হৈছে।"

প্ৰধানমন্ত্ৰীয়ে কয় যে জনজাতীয় স্বাৰ্থ আৰু জনজাতীয় সম্প্ৰদায়ৰ কল্যাণ সন্দৰ্ভত দেশখনে দুই ধৰণৰ ৰাজনীতি দেখিছে। এফালে, এনে কিছুমান দল আছে যিয়ে জনজাতীয় স্বাৰ্থৰ প্ৰতি গুৰুত্ব নিদিয়ে আৰু জনজাতীয় লোকসকলক মিছা প্ৰতিশ্ৰুতি দিয়াৰ ইতিহাস আছে আনহাতে বিজেপিৰ দৰে এটা দল আছে, যিয়ে সদায় জনজাতীয় কল্যাণক সৰ্বাধিক অগ্ৰাধিকাৰ দিয়ে। "যদিও পূৰ্বৰ চৰকাৰসমূহে জনজাতীয় পৰম্পৰাক উপহাস কৰিছিল, আমি জনজাতীয় পৰম্পৰাক সন্মান জনাইছো, ''তেওঁ কয়, "জনজাতীয় সম্প্ৰদায়ৰ কল্যাণ আমাৰ সৰ্বাধিক অগ্ৰাধিকাৰ আৰু আমি য'তেই চৰকাৰ গঠন কৰিছো, আমি জনজাতীয় কল্যাণক সৰ্বাধিক অগ্ৰাধিকাৰ দিছো।"

জনজাতীয় সম্প্ৰদায়ৰ কল্যাণ সন্দৰ্ভত ভাষণ প্ৰদান কৰি প্ৰধানমন্ত্ৰীয়ে লগতে কয়, "মোৰ জনজাতীয় ভাই-ভনীসকলৰ বিদ্যুৎ, গেছ সংযোগ, শৌচালয়, ঘৰলৈ যোৱা পথ, ওচৰৰ চিকিৎসা কেন্দ্ৰ, ওচৰৰ উপাৰ্জনৰ মাধ্যম আৰু শিশুসকলৰ বাবে এখন বিদ্যালয় থকা উচিত।" তেওঁ লগতে কয় যে গুজৰাটত অভূতপূৰ্ব উন্নয়ন দেখা গৈছে। প্ৰধানমন্ত্ৰীয়ে কয় যে গুজৰাটৰ প্ৰতিখন গাঁৱত আজি ২৪ ঘণ্টাই বিদ্যুৎ উপলব্ধ, কিন্তু প্ৰথমখন স্থান য'ত প্ৰতিখন গাওঁ বিদ্যুতৰ সুবিধাৰ সৈতে সংযুক্ত আছিল, সেইখন আছিল জনজাতীয় জিলা ডেং। "প্ৰায় ডেৰ দশক আগতে জ্যোতিৰ্গ্ৰাম যোজনাৰ অধীনত ডেং জিলাৰ ৩০০ খনতকৈও অধিক গাঁৱত ১০০ শতাংশ বৈদ্যুতিকীকৰণৰ লক্ষ্য প্ৰাপ্ত কৰা হৈছিল। ডেং জিলাৰ এই অনুপ্ৰেৰণাই আমাক দেশৰ সকলো গাঁৱৰ বৈদ্যুতিকীকৰণৰ কাম তৈয়াৰ কৰিবলৈ প্ৰেৰিত কৰিছিল", প্ৰধানমন্ত্ৰীয়ে কয়।

প্ৰধানমন্ত্ৰীয়ে জনজাতীয় অঞ্চলৰ কৃষিক নতুন জীৱন প্ৰদানৰ বাবে হাতত লোৱা ৱাদি যোজনাৰ ওপৰত আলোকপাত কৰে। শ্ৰী মোদীয়ে পূৰ্বৰ পৰিস্থিতিৰ কথা স্মৰণ কৰে যেতিয়া জনজাতীয় অঞ্চলসমূহত বাজৰা-মাকৈ খেতি কৰা আৰু ক্ৰয় কৰা কঠিন আছিল। "আজি জনজাতীয় অঞ্চলত আম, মধুৰিআম আৰু নেমুৰ দৰে ফলৰ লগতে কাজু খেতিও কৰা হয়", প্ৰধানমন্ত্ৰীয়ে এইবুলি উল্লেখ কৰে। তেওঁ এই ইতিবাচক পৰিৱৰ্তনৰ বাবে ৱাদি যোজনাক কৃতিত্ব প্ৰদান কৰে আৰু জনায় যে এই আঁচনিৰ জৰিয়তে জনজাতীয় কৃষকসকলক অনুৰ্বৰ ভূমিত ফল, চেগুন আৰু বাঁহ খেতি কৰাত সহায় কৰা হৈছে। "আজি গুজৰাটৰ বহুতো জিলাত এই কাৰ্যসূচী চলি আছে", তেওঁ কয়। প্ৰধানমন্ত্ৰীয়ে স্মৰণ কৰে যে ৰাষ্ট্ৰপতি ড০ আব্দুল কালামে ভালচাদ জিলাত এয়া চাবলৈ আহিছিল আৰু তেওঁ প্ৰকল্পটোৰ যথেষ্ট প্ৰশংসা কৰিছিল।

শ্ৰী মোদীয়ে গুজৰাটৰ পৰিৱৰ্তিত পানীৰ পৰিস্থিতিৰ বিষয়েও কয়। গুজৰাটত, বিদ্যুত গ্ৰীডৰ আৰ্হিত পানীৰ গ্ৰিড স্থাপন কৰা হৈছিল। তাপীকে ধৰি সমগ্ৰ গুজৰাটত এটা খাল আৰু উত্তোলন জলসিঞ্চন নেটৱৰ্ক নিৰ্মাণ কৰা হৈছিল। ডাবা কণ্ঠ খালৰ পৰা পানী উঠোৱা হৈছিল আৰু ইয়াৰ পিছত তাপী জিলাৰ পানীৰ সুবিধা বৃদ্ধি পাইছিল। তেওঁ জানিবলৈ দিয়ে যে উকাই আঁচনিখন শ শ কোটি টকাৰ বিনিয়োগেৰে নিৰ্মাণ কৰা হৈছে আৰু আজি যিবোৰ প্ৰকল্পৰ বাবে আধাৰশিলা স্থাপন কৰা হৈছে সেইবোৰে পানীৰ সুবিধা আৰু উন্নত কৰিব। "এটা সময় আছিল যেতিয়া গুজৰাটৰ মাত্ৰ এক চতুৰ্থাংশ পৰিয়ালৰ পানীৰ সংযোগ আছিল। আজি গুজৰাটৰ ১০০% পৰিয়ালে পাইপ যোগে খোৱা পানী লাভ কৰিছে", প্ৰধানমন্ত্ৰীয়ে কয়।

বনবন্ধু কল্যাণ যোজনাৰ ওপৰত আলোকপাত কৰি প্ৰধানমন্ত্ৰীয়ে কয় যে গুজৰাটৰ জনজাতীয় সমাজৰ প্ৰতিটো মৌলিক প্ৰয়োজনীয়তা আৰু আকাংক্ষা পূৰণ কৰাৰ বাবে ইয়াক ধাৰণা আৰু ৰূপায়ণ কৰা হৈছে। "আজি আমি দেখিছো যে তাপী আৰু অন্যান্য কাষৰীয়া জনজাতীয় জিলাৰ বহু ছোৱালীয়ে ইয়াত বিদ্যালয় আৰু মহাবিদ্যালয়লৈ গৈ আছে। এতিয়া জনজাতীয় সমাজৰ বহু পুত্ৰ আৰু কন্যাই বিজ্ঞান অধ্যয়ন কৰি আছে, চিকিৎসক আৰু অভিযন্তা হৈ পৰিছে", তেওঁ কয়। প্ৰধানমন্ত্ৰীয়ে স্মৰণ কৰে যে যেতিয়া ২০-২৫ বছৰ পূৰ্বে এই যুৱক-যুৱতীসকলৰ জন্ম হৈছিল, তেতিয়া উমৰগামৰ পৰা অম্বাজীলৈকে সমগ্ৰ জনজাতীয় অঞ্চলত খুব কম বিদ্যালয় আছিল আৰু বিজ্ঞান অধ্যয়নৰ বাবে পৰ্যাপ্ত সুবিধা নাছিল। প্ৰধানমন্ত্ৰীয়ে জানিবলৈ দিয়ে যে গুজৰাটত কালি উদ্বোধন কৰা মিছন স্কুল অব্ এক্সিলেঞ্চৰ অধীনত জনজাতীয় তালুকৰ প্ৰায় ৪,০০০ বিদ্যালয়ৰ আধুনিকীকৰণ কৰা হ'ব।

বিগত দুটা দশকত প্ৰধানমন্ত্ৰীয়ে জনজাতীয় অঞ্চলত ১০ হাজাৰৰো অধিক বিদ্যালয়, একলব্য আদৰ্শ বিদ্যালয় আৰু কন্যাসকলৰ বাবে বিশেষ আৱাসিক বিদ্যালয় স্থাপন কৰা হৈছে বুলি জানিবলৈ দিয়ে। নৰ্মদাৰ বিৰচা মুণ্ডা জনজাতীয় বিশ্ববিদ্যালয় আৰু গোধৰাৰ শ্ৰী গোবিন্দ গুৰু বিশ্ববিদ্যালয়ে জনজাতীয় যুৱক-যুৱতীসকলক উচ্চ শিক্ষাৰ সুযোগ প্ৰদান কৰিছে। জনজাতীয় শিশুসকলৰ বাবে বৃত্তিৰ বাজেট এতিয়া দুগুণতকৈও অধিক হৈছে। প্ৰধানমন্ত্ৰীয়ে উল্লেখ কৰে, "একলব্য বিদ্যালয়ৰ সংখ্যাও বহুগুণে বৃদ্ধি পাইছে।" আমাৰ জনজাতীয় শিশুসকলৰ বাবে, আমি শিক্ষাৰ বাবে বিশেষ ব্যৱস্থা কৰিছিলো আৰু বিদেশত পঢ়িবলৈ আৰ্থিক সহায়ো কৰিছিলো", তেওঁ কয়। প্ৰধানমন্ত্ৰীয়ে খেলো ইণ্ডিয়াৰ দৰে অভিযানৰ জৰিয়তে ক্ৰীড়াক্ষেত্ৰত স্বচ্ছতা অনাৰ লগতে জনজাতীয় শিশুসকলক তেওঁলোকৰ সম্ভাৱনা বৃদ্ধি আৰু বিকাশৰ বাবে নতুন সুযোগ প্ৰদান কৰাৰ সুবিধাৰ কথাও দোহাৰে।

প্ৰধানমন্ত্ৰীয়ে কয় যে গুজৰাট চৰকাৰে বনবন্ধু কল্যাণ যোজনাৰ বাবে এক লাখ কোটি টকাতকৈও অধিক ব্যয় কৰিছে। এতিয়া এই আঁচনিৰ দ্বিতীয় পৰ্যায়ত গুজৰাট চৰকাৰে পুনৰ এক লাখ কোটি টকাৰ অধিক ব্যয় কৰিবলৈ গৈ আছে বুলি তেওঁ জানিবলৈ দিয়ে। ইয়াৰ সৈতে, জনজাতীয় শিশুসকলৰ বাবে বহুতো নতুন বিদ্যালয়, বহুতো হোষ্টেল, নতুন চিকিৎসা মহাবিদ্যালয় আৰু নাৰ্চিং মহাবিদ্যালয়ো নিৰ্মাণ কৰা হ'ব। "এই আঁচনিৰ অধীনত চৰকাৰে জনজাতীয় লোকসকলৰ বাবে ২.৫ লাখতকৈও অধিক ঘৰ নিৰ্মাণৰ প্ৰস্তুতি চলাই আছে। যোৱা কেইবছৰমানত জনজাতীয় অঞ্চলৰ প্ৰায় এক লাখ জনজাতীয় পৰিয়ালক ৬ লাখতকৈও অধিক ঘৰ আৰু ভূমি লীজত দিয়া হৈছে", তেওঁ কয়।

প্ৰধানমন্ত্ৰীয়ে কয়, "আমাৰ সংকল্প হৈছে জনজাতীয় সমাজক পুষ্টিহীনতাৰ সমস্যাৰ পৰা সম্পূৰ্ণৰূপে মুক্ত কৰা। সেয়েহে কেন্দ্ৰীয় চৰকাৰে এক বৃহৎ 'পোষণ অভিযান' আৰম্ভ কৰিছে যাৰ জৰিয়তে গৰ্ভধাৰণৰ সময়ত মাতৃসকলক পুষ্টিকৰ খাদ্য খোৱাত সহায় কৰিবলৈ হাজাৰ হাজাৰ টকা দিয়া হৈছে।" মাতৃ আৰু শিশুসকলক সময়মতে টীকাকৰণ কৰাটো নিশ্চিত কৰিবলৈ মিছন ইন্দ্ৰধনুষৰ অধীনত এটা বৃহৎ অভিযান চলি আছে। এতিয়া আঢ়ৈ বছৰতকৈও অধিক সময় জুৰি সমগ্ৰ দেশৰ দৰিদ্ৰ লোকসকলক বিনামূলীয়া ৰেচন দিয়া হৈছে। কেন্দ্ৰীয় চৰকাৰে ইয়াৰ বাবে ৩ লাখ কোটি টকাতকৈও অধিক ব্যয় কৰিছে।  এতিয়ালৈকে, আমাৰ মাতৃ আৰু ভগ্নীসকলক ধোঁৱাৰ ফলত হোৱা ৰোগৰ পৰা ৰেহাই দিবলৈ দেশত প্ৰায় ১০ কোটি বিনামূলীয়া গেছ সংযোগ দিয়া হৈছে। লাখ লাখ জনজাতীয় পৰিয়ালে আয়ুষ্মান ভাৰত আঁচনিৰ অধীনত প্ৰতি বছৰে ৫ লাখ টকালৈকে বিনামূলীয়া চিকিৎসাৰ সুবিধা লাভ কৰিছে।

ভাৰতৰ স্বাধীনতা আন্দোলনৰ ইতিহাসত জনজাতীয় সম্প্ৰদায়ৰ পাহৰি যোৱা উত্তৰাধিকাৰীক পুনৰুদ্ধাৰৰ ক্ষেত্ৰত চৰকাৰৰ প্ৰচেষ্টাৰ কথা উল্লেখ কৰি প্ৰধানমন্ত্ৰীয়ে মন্তব্য কৰে যে জনজাতীয় সম্প্ৰদায়ৰ এক অতি সমৃদ্ধ উত্তৰাধিকাৰী আছে। তেওঁ কয়, "এতিয়া প্ৰথমবাৰৰ বাবে দেশখনে ১৫ নৱেম্বৰত ভগৱান বিৰচা মুণ্ডাৰ জন্ম জয়ন্তী জনজাতীয় গৌৰৱ দিৱস হিচাপে উদযাপন কৰিছে।" তেওঁ লগতে কয় যে জনজাতীয় স্বাধীনতা সংগ্ৰামীসকলৰ অৱদান সমগ্ৰ দেশৰ সংগ্ৰহালয়ৰ জৰিয়তে সংৰক্ষণ আৰু প্ৰদৰ্শন কৰা হৈছে। জনজাতীয় মন্ত্ৰালয়ৰ অস্তিত্ব নোহোৱা সময়ৰ কথা স্মৰণ কৰি প্ৰধানমন্ত্ৰীয়ে উল্লেখ কৰে যে অটলজীৰ চৰকাৰেই প্ৰথমবাৰৰ বাবে জনজাতীয় মন্ত্ৰালয় গঠন কৰিছিল। "গ্ৰাম চড়ক যোজনা অটলজীৰ চৰকাৰৰ সময়ত আৰম্ভ কৰা হৈছিল, যাৰ ফলত জনজাতীয় অঞ্চলসমূহ লাভান্বিত হৈছিল।" আমাৰ চৰকাৰে জনজাতীয় লোকসকলৰ প্ৰতি কৰা অন্যায়ৰ সমাপ্তিৰ কাম কৰিছে", তেওঁ লগতে কয়।

"উন্নয়নৰ এই অংশীদাৰীত্ব নিৰন্তৰে শক্তিশালী কৰিব লাগে", প্ৰধানমন্ত্ৰীয়ে কয় যে তেওঁ জনজাতীয় যুৱক-যুৱতীসকলৰ সম্ভাৱনা বৃদ্ধিৰ বাবে ডাবল ইঞ্জিন চৰকাৰৰ প্ৰচেষ্টাত যোগদান কৰিবলৈ সকলোকে আহ্বান জনায়। "সবকা প্ৰয়াসৰ সৈতে আমি এখন উন্নত গুজৰাট আৰু উন্নত ভাৰত গঢ়ি তুলিম" প্ৰধানমন্ত্ৰীয়ে এইদৰে ভাষণৰ সামৰণি মাৰে।

গুজৰাটৰ মুখ্যমন্ত্ৰী শ্ৰী ভূপেন্দ্ৰ পেটেল, মধ্যপ্ৰদেশৰ ৰাজ্যপাল শ্ৰী মংগুভাই পেটেল, সাংসদ শ্ৰী চি আৰ পাটিল, শ্ৰী কে চি পেটেল, শ্ৰী মনসুখ বাসৱা আৰু শ্ৰী প্ৰভুভাই বাসৱা আৰু গুজৰাট চৰকাৰৰ মন্ত্ৰী শ্ৰী ৰুশিকেশ পেটেল, শ্ৰী নৰেশভাই পেটেল, শ্ৰী মুকেশভাই পেটেল, শ্ৰী জগদীশ পাঞ্চাল আৰু শ্ৰী জীতুভাই চৌধুৰীও অনুষ্ঠানটোত উপস্থিত আছিল।

*****

DS/TS/MANN