প্রধান মন্ত্রী শ্রী নরেন্দ্র মোদীনা তাপী, ব্যারাদা লুপা কোতি ১৯৭০ হেনবগী তোঙান-তোঙানবা চাউখৎ-থৌরাংগী থবকশিং উরেপ-উয়ুং তমখ্রে। প্রোজেকশিং অদুগী মনুংদা মিসিং লিঙ্কশিং শেমগৎপগা লোয়ন্না সাপুতারাদগী স্তেচু ওফ য়ুনিতি ফাওবগী লম্বীগী ফিবম ফগৎহনবা অমসুং তাপী অমসুং নর্মাদা জিলাশিংদা লুপা কোতি ৩০০ হেনবগী ঈশিং পীনবা প্রোজেকশিং য়াওরি।

থৌরম অদুদা প্রধান মন্ত্রীনা হায়খি চহি ২০ হেন্না মফম অসিগী মীয়ামগী মীনুংশি ফংবদা মহাক থৌজাল ফংবগুম ফাওরে। ময়াম পুম্নমক অরাপ্পা মফমদগী লাকপনি। অদোমগী শক্তি, থৱায় য়াওবা উবদা হরাওরে অমসুং ঐগী থৌনা হেনগৎলে। থম্মোয় শেংনা চাউখৎ-থৌরাংগী থবকশিং পায়খৎতুনা মসিগী লমন শিংগনি। তাপী অমসুং নর্মাদা য়াওনা ত্রাইবেলশিংগী মফম শীনবা থুংনা ঙসি লুপা কোতি কয়াগী চাউখৎ-থৌরাংগী প্রোজেক কয়া উরেপ-উয়ুং তম্লে।

প্রধান মন্ত্রীনা হায়খি ত্রাইবেলশিংগী য়াইফনবগী মতাংদা লৈবাক অসিদা মখল অনিগী রাজনিতি উবা ফংলে। ত্রাইবেলশিংগী য়াইফনবা খন্দবা অমসুং ত্রাইবেলশিংদা লান্না ৱাশকপা দলশিং লৈরি অমসুং অতোপ্পা অমদা বি.জে.পিগুম্বা দলশিংনা ত্রাইবেলশিংগী য়াইফনবা মতম পুম্নমক্তা থবক পাংথোক্লি। মমাঙগী সরকারশিংনা ত্রাইবেলগী চৎনবীশিং কুহ্মৈ ওইনা লৌখি অমসুং ঐখোয়না ত্রাইবেলগী চৎনবীশিং ইকায়খুম্নরি। ত্রাইবেল ফুরুপশিংগী য়াইফ-থৌরাং পায়খৎপা অসি ঐখোয়গী খ্বাইদগী মরুওইবনি অমসুং ঐখোয়গী সরকার লৈবা মতমদা, ঐখোয়না ত্রাইবেলশিং য়াইফনবা খ্বাইদগী মরুওইনা থবক পায়খৎলি।

প্রধান মন্ত্রীনা হায়খি ঐখোয়গী ত্রাইবেল ইচিন-ইনাওশিং অমসুং ইচলশিং মখোয় মশাগী চেক্কী য়ুম লৈরে, মৈ ফংলে, গ্যাস, তোইলেত লৈরে, য়ুম য়ৌবা লম্বী লৈরে, অনকপদা লায়েংশঙ লৈরে, অনকপদা শেন তানফম লৈরে অমসুং অঙাংশিংগী মহৈলোয়শঙ লৈরে। মমাঙদা ওইখিদ্রিবা মওংদা গুজরাত চাউখৎলে। ঙসিদি গুজরাতকী খুঙ্গং খুদিংমক নোংমদা পুং ২৪ মৈ ফংলে অমসুং খুঙ্গং খুদিংমক মৈ ফংবা অহানবা জিলা অদু ত্রাইবেলগী জিলা দাংনি। চহি ১৫গী মমাঙদা, জয়তিরগ্রাম য়োজনাগী মখাদা, দাং জিলাগী খুঙ্গং ৩০০ হেন্না চাদা ১০০ মৈ ফংহন্নবগী পান্দম ফংবা ঙমখি। দাং জিলাদগী ফংলকপা ইথিল অসিনা লমজিংদুনা অদোম্না ঐহাক প্রধান মন্ত্রী ওইনা দিল্লিদা থাবদগী লৈবাক অসিগী খুঙ্গং খুদিংমক মৈ ফংহন্নবা ঐখোয়না থবক পায়খৎখি।

ত্রাইবেলগী লমশিংদা মমাঙদা মিল্লেত-চুজাক থাবা অমসুং য়োনবগী মতাংদা মায়োক্নখিবা অৱাবশিং শ্রী মোদীনা অমুক হন্না নিংশিংখি। মহাক্না হায়খি ঙসিদি হৈনৌ, পুংদোল অমসুং চম্প্রাগা লোয়ন্না ত্রাইবেলগী লমশিংদা কাজু থারে। মসিগী অফবা অহোংবা অসি ৱারি য়োজনাগী মখাদা পুরকখিবনি অমসুং হায়রিবা স্কিম অসিগী মখাদা ত্রাইবেল লৌমীশিংনা অহাংবা লমদা উহৈ-ৱাহৈ, তিক অমসুং ৱা থাবদা মতেং পাংলে। ঙসিদি মসিগী য়োজনা অসি গুজরাতকী জিলা অয়াম্বদা পায়খৎলে। বালসাদ জিলাদা রাস্ত্রপতি দোক্তর অব্দুল কালাম্না য়েংবা লাক্লম্বা অমসুং প্রোজেক অদু য়াম্না থাগৎলম্বা অদু প্রধান মন্ত্রীনা নিংশিংখি।

গুজরাত্তা ঈশিংগী ফিবমদা অহোংবা লাকপগী মতাংদা শ্রী মোদীনা হায়খি গুজরাত্তা ইলেক্ত্রিসিতি গ্রিদকী লাইনশিংদা ঈশিংগী গ্রিদশিং শেম্লে। তাপী য়াওনা গুজরাত শীনবা থুংনা লিফ ইরিগেসনগী নেতৱার্ক শেমগৎলে। দাবা কান্থা কেনেলদগী চিংখৎলকপা ঈশিংনা তাপী জিলাদা ঈশিং ফংবা হেনগৎলে। উকাই স্কিম অসি লুপা কোতি কয়া থাদদুনা শেমগৎলি অমসুং ঙসি উরেপ-উয়ুং তম্লিবা প্রোজেকশিং অসিনা মখা তানা ঈশিংগী ফিবম ফগৎহনগনি। মতম অমদা গুজরাত্তা য়ুমথোঙশিংগী শরুক মরি থোকপগী শরুক অমা খক তোতি ঈশিং ফংলম্মী। ঙসিদি গুজরাতকী য়ুমথোঙ চাদা ১০০ তোতি ঈশিং ফংলে।

বনবন্ধু কলয়ান য়োজনাগী মতাংদা প্রধান মন্ত্রীনা হায়খি গুজরাতকী ত্রাইবেল ফুরুপকী অনিংবশিং থুংহন্নবা স্কিম অসি শেমখিবনি। ঙসিদি তাপী অমসুং অতোপ্পা থংনবা ত্রাইবেল জিলাশিংগী নুপীমচা কয়া স্কুল অমশুং কোজেল কাবা ঐখোয়না উরে। ঙসিদি ত্রাইবেলগী নুপামচাশিং অমসুং নুপীমচাশিং সাইন্স তম্লে, দোক্তর অমসুং ইঞ্জিনিয়ার ওইরে। হায়রিবা নহারোলশিং অসি চহি ২০-২৫গী মমাঙদা পোকলম্লবদি উমারগ্রামদগী অম্বাজি ফাওবগী ত্রাইবেলগী শরুক অসিদা মহৈলোয়শঙ খর খক লৈরমখি অমসুং সাইন্স তম্নবগী খুদোংচাবা ফংলমদে। ঙরাং হৌদোকখিবা মিসন স্কুল ওফ এক্সলেন্সকী মখাদা ত্রাইবেল তালুকাশিংদা লৈবা চাউরাক্না স্কুল ৪০০০ রোম নৌনা শেমগৎলে।

প্রধান মন্ত্রীনা হায়খি হৌখিবা চহি ২০ অসিদা, ত্রাইবেলগী লমশিংদা স্কুল লিশিং ১০ হেন্না শাখ্রে, নুপীমচাশিংগী একলব্য মোদেল স্কুল অমসুং স্পিসিএল রেসিদেন্সিএল স্কুলশিং লিংখৎলে। নর্মাদাগী বিরসা মুন্দা ত্রাইবেল য়ুনিভর্সিতি অমসুং গোধ্রাগী শ্রী গোবিন্দ গুরু বিশ্ববিদ্যল্যনা ত্রাইবেল নহারোলশিংদা অৱাংবা থাক্কী লাইরিক-লাইশু তম্বগী খুদোংচাবা পীরে। হৌজিক ত্রাইবেল অঙাংশিংদা স্কোলারশিপ পীনবা বজেৎ শরুক অনিদা হেনগৎলে। একলব্য মোদেল স্কুলশিং মশিং হেনগৎলে। ত্রাইবেল অঙাংশিং লাইরিক তম্নবা অখন্নবা থৌরাং পায়খৎলে অমসুং মপান্দা লাইরিক তম্বা চৎপদা শেনগী মতেং পাংলে। খেলো ইন্দিয়াগী মখাদা শান্নবগী থবকশিংদা অরোন-অথুপ লৈহন্দ্রে অমসুং ত্রাইবেল অঙাংশিং মখোয়গী হৈজবশিং ফুদোকহন্নবা অনৌবা খুদোংচাবা কয়া পীরে।

প্রধান মন্ত্রীনা হায়খি বনবন্ধু কলয়ান য়োজনাগীদমক গুজরাত সরকারনা লুপা কোতি কয়া চাদিং তৌখ্রে। হৌজিক স্কিম অসিগী অনিশুবা ফেজ য়ৌরে অমসুং গুজরাত সরকারনা লুপা কোতি লাখ ১ চাদিং তৌগদৌরি। মসিগা লোয়ন্না ত্রাইবেল অঙাংশিংগী হোস্তেল কয়া, অনৌবা মেদিকেল কোলেজশিং অমসুং নর্সিং কোলেজশিং শারে। য়োজনা অসিগী মখাদা সরকারনা ত্রাইবেলশিংগী য়ুম লাখ ২.৫ হেন্না শানবা থৌরাং তৌরে। হৌখিবা চহি খর অসিদা ত্রাইবেলশিংগী লমদা য়ুম লাখ ৬ হেন্না শাখ্রে অমসুং ত্রাইবেল ইমুং লাখ অমরোমদা লম লিজদা ফংহনখ্রে।

প্রধান মন্ত্রীনা হায়খি ঐখোয়গী পান্দমদি ত্রাইবেল ফুরুপ অসি মচি ওইবা চীঞ্জাক চাবা ৱাৎপগী খুদোংচাদবশিং কোকহনবনি। মীরোল্লিঙৈ মনুংদা মমাশিং মচি ওইবা চীঞ্জাক চানবা মতেং পাংনবা পোসান অভিয়ানগী মখাদা কেন্দ্র সরকারনা মমাশিংদা লুপা লিশিং কয়া পীরে। মমাশিং অমসুং অঙাংশিং মতম চানা তিকা থানবা মিসন ইন্দ্রধনুস মিসনগী মখাদা চাউরবা খোঙজং অমা চৎথরি। লৈবাক অসিগী লায়রবা মীওই খুদিংমক্তা লেম্না চেং পীরকপা হৌজিক চহি ২.৫ হেল্লে। মৈখুনা থোকহনবা লায়নাশিংদগী ঙাকথোক্নবা হৌজিক ফাওবদা লৈবাক অসিগী ইমাশিং অমসুং ইচলশিংদা লেম্না গ্যাস কন্নেক্সন কোতি ১০ হেন্না পীখ্রে। অয়ুস্মান ভারত য়োজনাগী মখাদা ত্রাইবেলগী ইমুং লাখ কয়া চহি অমদা লুপা লাখ ৫ ফাওবগী লেম্না লায়েংবগী খুদোংচাবা ফংলে।

ভারতকী নিংতম ইহৌগী পুৱারিদা ত্রাইবেল ফুরুপনা লৌখিবা অকাউ-পরৈ চনখ্রবা থৌদাংগী ৱারিশিং অমুক নৌহৌন্না নিংশিংনবা সরকারনা পায়খৎলিবা থবকশিংগী মতাংদা প্রধান মন্ত্রীনা হায়খি অহানবা ওইনা অতলজিগী সরকারনা ত্রাইবেল মিনিস্ত্রি শেমখিবনি। অতলজিগী সরকারনা হৌদোক্লম্বা গ্রাম সরক য়োজনা অসিনা ত্রাইবেলশিংগী লমশিং কান্নবা ফংলে। ত্রাইবেলশিংদা চৎথরম্বা অরানবশিং লোইশিন্নবা ঐখোয়গী সরকারনা থবক পায়খৎলে। ঐখোয়গী ত্রাইবেল নহারোলশিংদা থবক পীনবা অমসুং মশানা মশাবু থবক পীজনবা অনৌবা খুদোংচাবশিং শেম্নবা হৌখিবা চহি ৮ অসিদা ত্রাইবেলগী য়াইফ-থৌরাংগা মরী লৈনবা বজেৎ শরক অহুমদা হেনগৎলে।

অরোইবদা প্রধান মন্ত্রীনা হায়খি চাউখৎ-থৌরাংগী পুন্না থবক তৌমিন্নবা অসি মখা চৎথগদবনি। ত্রাইবেল নহারোলশিংগী শক্তি হেনগৎহন্নবা দবল ইঞ্জিন সরকারগী থবকশিংদা মী খুদিংমক শরুক য়াবীয়ূ। সবকা প্রয়াসকা লোয়ন্না, ঐখোয়না চাউখৎলবা গুজরাত অমা অমসুং চাউখৎলবা ভারত অমা শেমগৎকনি।

থৌরম অদুদা শরুক য়াখিবশিংগী মনুংদা গুজরাতকী চীফ মিনিস্তর শ্রী ভুপেন্দ্রভাই পতেল, মধ্য প্রদেসকী রাজ্যপাল শ্রী মঙ্গুভাই পতেল, এম.পিশিং শ্রী সি.আর পতিল, শ্রী কে.সি পতেল, শ্রী মনসু ভাসাবা, অমসুং শ্রী প্রভুভাই ভাসাবা অমসুং গুজরাত সরকারগী মিনিস্তরশিং শ্রী রুসিকেস পতেল, শ্রী নরেসভাই পতেল, শ্রী মুকেসভাই পতেল, শ্রী জগদিস পঞ্চাল অমসুং শ্রী জিতুভাই চৌধুরি য়াওখি।

From Vyara, various projects are being launched, which will further Gujarat's growth trajectory. https://t.co/bPtEkZtE6P

— Narendra Modi (@narendramodi) October 20, 2022

*****