য়ূনাইতেদ নেসন্সকী সেক্রেতরী জেরেনেল এন্তোনিও গুতেরেসজী, গুজরাতকী মুখ্য মন্ত্রী শ্রী ভুপেন্দ্র ভাই পতেল, ভারতকী ফোরেন মন্ত্রী, দাঃ এস. জয়শঙ্করজী, লৈবাক অমসুং মীরমদগী লাক্লিবা অতোপ্পা মীথুংলেন কয়া, ইবেম্মা অমসুং ইবুংঙোশিংবু শক্নাইরবা লমদমসিদা তরাম্না ওকচরি। এন্তোনিওজীগীদি ভারত অসি অনিশুবা ময়ুম্নি। অদোম্না নহা ওইরিঙৈদা ভারত্তা কয়ারক হন্না লাকখ্রবনি। গোৱাগা অদোমগী ইমুংগী মরী লৈনৈ। ঐহাক্না গুজরাত্তা ইশাগী ইমুংগী মীওই অমবু তরাম্না ওক্লিবনি হায়না ঐহাক্না খল্লি। মফমসিদা লাকপীবগীদমক্তা ঐহাক্না এন্তোনিওজীবু হন্না হন্না থাগৎচরি। মিসন লাইফ হৌদোকপগী মতমদা লৈবাক কয়ানা খোঙথাং অসিগী শরুক ওইবসিদা ঐহাক্না নুংঙাইবা ফাওই। ঐহাক্না ফ্রান্সকী রাস্ত্রপতি, শ্রী মেক্রোন, য়ু.কে.গী প্রধান মন্ত্রী, শ্রী লিজ ত্রুস, গুয়ানাগী রাস্ত্রপতি ইর্ফান অলি, অর্জেন্তীনাগী রাস্ত্রপতি, অল্বর্তো ফর্নান্দেজ, মোরিসস্কী প্রধান মন্ত্রী প্রবিন্দ জগনাউথ, মেদাগাস্কারগী রাস্ত্রপতি এন্দ্রু রাজোএলিনা, নেপালগী প্রধান মন্ত্রী শেরবহাদুরজী, মালদিবকী মরুপ সোলিহজী, জিওর্জিয়াগী প্রধান মন্ত্রী ইরাকলী গরিবাশিলী, ইস্তোনিয়াগী প্রধান মন্ত্রী কজা কল্লাসপু থম্মোই শেংনা ইকায় খুম্নজরি।

মরূপশিং,

ঙসিগী থৌরমসিদি সর্দার বল্লব ভাই পতেলগী চাউরবা মীতম, স্তেচ্যু ওফ য়ুনিতীগী মনাক্তা শীন লাঙলি। অমসুং মসিনা ক্লাইমেত চেঞ্জকী মাইয়োক্তা অমত্তা ওইবগী য়াম্না মরু ওই। মালেমগী খ্বাইদগী চাউবা মীতমসিনা ঐখোয়দা মহৌশাগা মরী লৈনবা অচৌবা পান্দম থম্লিবসি ফংবা ঙম্নবা ইথিল পীবা ওইসনু।

মরূপশিং,

স্তেদর্দনা ৱাংলকপা মতমদা, রেকোর্দসু চাউনা থম্বা ঙম্মি। থৌরম অসিমক গুজরাত্তা পাংথোক্লিবা অসিগীসু মরু ওইবা য়াম্না লৈ। মসি য়াম্না চান্নবসু ওই। রিন্যুএবল ইনর্জী অমসুং ইনভাইরনমেন্ত ঙাক শেনবগী লমদা খোঙথাং থাংজিনবা হৌবা ভারতকী রাজ্যশিংগী মরক্তা গুজরাতসু অমনি। কেনেলদা সোলর পেনেল খিনবা ওইরো, ইকঙ থোক্কনবা মফমশিংদা ঈশিংগী লেভেল হেনগৎহন্নবা ঈশিং য়োকশিনবগী কেম্পেন ওইরো, গুজরাতনা মতম পুম্বদা লুচিংবা অমা ওইনা চৎনবী শেম্বা অমগী শক্তম লৌদুনা লাক্লি।

মরূপশিং,

ক্লাইমেত চেঞ্জ হায়বসি পোলিসীগা মরী লৈনবা থবক্নি হায়বগী থাজনবা অমা শেমবগুম্লে। হীরম অসিদা ঐখোয়না পোলিসীগা মরী লৈনহন্দুনা য়েংবা মতমদা, সরকারনা মসিগী মতাংদা করিগুম্বা অমা শোইদনা পাংথোক্কনি হায়না খঙনা নত্ত্রগা খঙদনা অদুমক খল্লি। মালেমগী ওর্গনাইজেসনশিংনা মসিগী মতাংদা থবক পায়খৎকদবনি হায়না অমুক খল্লি। সরকার, মালেমগী ওর্গনাইজেসনশিংগী থৌদাং য়াম্না চাউই হায়বসি অচুম্বনি, অমসুং মখোয়না মসিগী মতাংদা থবক কয়াসু পাংথোক্লি। অদুবু, হীরমগী মতাংদা ৱারী কয়া শাবদগী মসিবু অসিবু মরু ওই হায়না লৌনবগী ফিভম অমা ঐখোয়না মালেমগী মফম খুদিংদা লৈরকপগী মতৌ উবা ফংলে।

ক্লাইমেত চেঞ্জনা মরম ওইরগা পুরক্লিবা অহোংবা কয়া মীয়াম্না মখোয়গী অকোয়বদা উবা হৌনরক্লি। ঐখোয়না দিকেদ খরগী মমাংদা মসিগী সাইদ ইফেক্ত হেনগৎলকপা অমসুং অমাঙ অতা কয়া থোকপগী ফিভম থেংনখ্রে। ঐখোয়গী তুরেলশিং কংশিল্লক্লি, গ্লেসিয়রশিং শৌদোরক্লি, সমুদ্রগী ঈশিংগী থাক হেনগৎলক্লি। কুমগী মতৌ তম্বা ঙম্লক্ত্রে। মরম অদুনা ক্লাইমেত চেঞ্জকী হীরমসি পোলিসী শেম্বা খক্তদা থাদোকপা য়াদ্রে হায়না মীয়মদা খলহনবা হৌরক্লে। মীয়াম্না মীওইবা, ইমুং মনুং অমসুং খুন্নাইগী অমা ওইনা ইমা লৈবাক অসিগীদমক্তা, গ্রহ অসিগীদমক্তা থৌদাং খরা মশানা পায়খৎফম থোক্লে হায়না মীয়াম্না খনবা হৌনরক্লে। মীয়াম্না মশানা, ইমুংনা নত্ত্রগা খুন্নাইনা হীরম অসিগী মতাংদা করি পাংথোকপা য়াই খঙবা পাম্নরক্লে। মখোয়না গ্রহ অসিবু, পৃথিবী অসিবু কনবা পাম্নরক্লে। 

ৱাহং পুম্নমক অসিগী পাউখুমদি মিসন লাইফনি। মিসন লাইফকী মন্ত্রদি – ‘লাইফস্তাইল ফোর ইনভাইরনমেন্ত’ হায়বনি। ঙসি পৃথিবী অসিদা হিংলিবা মীওই খুদিংগী য়াইফ পাউজেলগা লোয়ননা ঐহাক্না মালেমদা মিসন লাইফ লান্থোকচরি। মিসন লাইফনা পৃথীবি কন্নবগীদমক্তা মীপুম খুদিংগী পাঙ্গল পুন্সিন্দুনা, মদুবু মতৌ করম্না হেন্না ফবা মওংদা শিজিন্নগনি হায়বা তাক্লি। মিসন লাইফনা ক্লাইমেত চেঞ্জকী মাইয়োক্তা থেংনরিবা লানবু দেমোক্রেতিক ওইবা মওংদা থেংনরি। মসিদা মীপুম খুদিংনা মশাগী ঙমজবা থৌদাং পাংথোকপা য়াগনি। অপীকপ অপীকপা হোৎনবা কয়ানা অচৌবা অহোংবা অমা পুরকপা ঙমগনি হায়না মিসন লাইফনা থাজবা থম্মি। ঐখোয়না নোংমগী পুন্সিগী থবক কয়াদা অকোয়বগী ফিভম ঙাক শেনবদা তেংবাংবা য়াবা থৌওং কয়া অমা পাংথোকপা য়াই হায়বা ইথিল পীরি। লাইফস্তাইলদা অহোংবা পুরক্তুনা ইনভাইরনমেন্ত ঙাক শেনবা য়াই হায়না মিসন লাফনা থাজবা থম্মি। ঐহাক্না নুংঙাইরবা খুদম অনিখক থমজগে, য়াম্না কান্নবা ৱাফম ওইগনি। মীওই খরনা মখোয়গী এ.সি.গী তেম্পেরেচরসি দিগ্রী ১৭ নত্ত্রগা ১৮দা থম্বা পাম্মি। অদুগা অসুক য়াম্না ইংহল্লবা মতুংদা তুম্বদা ইংই হায়দুনা ফৈজুপ শুপ্পি। এ.সি.গী দিগ্রী অমা হন্থহনবনা অকোয়বগী ফিভমদা খেৎনবা য়াম্না পী, অদুনা ঐখোয়না মসিগুম্বা থৌওং হোংদোকপা য়াই। হায়বদি, ঐখোয়না লাইফস্তাইল শেমদোকপা মতমদা ইনভাইরনমেন্ততা মতেং য়াম্না তৌই হায়বনি। লাইফস্তাইলগী খুদম অমগা হায়জগে। মীওই খরনা লিতর অমনা কিলোমীতর ৫ চেনবা গাড়ি তৌংদুনা জিম চৎনৈ। অদুগা জিমদা ত্রেদমিলদা অমুক চেল্লি। মসিদা তারিবা হুমাং অসি অদোম্না জিমদা খোঙনা লাক্তুনা নত্ত্রগা সাইকল থৌদুনা তাহল্লদি ইনভাইরনমেন্ততা মতেং কয়া য়াম্না পাংগনি খনথবীয়ু। অদোমগী হকশেলসু ফহল্লে অমসুং ইনভাইরনমেন্তপুসু ফহল্লে।

মরূপশিং,

মীওই অমা নত্ত্রগা খুন্নাইগী অপীকপা হোৎনজমন্দগী লাইফস্তাইলদগী য়াম্না চাউবা মহৈ ফংবা ঙমগনি। মসিগী খুদম অমা পীগে। ঐখোয়না ভারত্তা চহি খরগী মমাংদা মীপুম খুদিংনা এল.ই.দি. বল্ব থান্নবা হায়খি। মীয়ামগী মৈগী বিল হন্থহনবা অমসুং মসিগা লোয়ননা ইনভাইরনমেন্তপুসু ঙাক শেনবগী পান্দম্নি। সরকারনা এল.ই.দি. বল্বকী স্কিম অমা হৌদোকখি অমসুং মসিদা প্রাইভেত সেক্তরসু শরুক য়ারকখি। ভারতকী করোর ১৬০ হেনবা মীপুম খুদিংনা অতেনবা মতমগী মনুংদা এল.ই.দি. বল্বতা পুল্লপ ওন্সিনখিবা অসিদা মফমসিদা লাকপা ইন্তর্নেস্নেল এক্সপর্তশিংনা অঙকপা ফাওখি। মসিগুম্বা অহোংবা অসিনা মরম ওইরগা কার্বোন দাইওক্সাইদ মিলিয়ন তোন ১০০দগী হেনববু থাদোকপা থিংখি, ইমিসন হন্থহনখি। মসি অমুক্তং থোকপা থৌদোক ত্তে, চহি খুদিংগী থোক্লিবনি, চহি খুদিংগী মসিগুম্বা কান্নবা অসি ফংলিবনি হায়বা ৱাফমসি অদোম নীংশিংবীয়ু। এল.ই.দি.না মরম ওইরগা ঐখোয়না চহি খুদিংগী ইমিসন হন্থহল্লি।

মরূপশিং,

গুজরাত অসি মহাত্মা গান্ধীগী লমদম্নি, পোক্নফম্নি। ইনভাইরনমেন্ত ঙাক শেন্দুনা মহৌশা ইমাগা তংদু লৈতানা লৈমিন্নবগী মরু ওইবা খঙখিবা মীওইশিংগী মরক্তা ঐহাকসু অমনি। মহাক্না ত্রস্তীশিপকী চৎনবী হৌদোক্লমখি। মিসন লাইফনা পুম্নমক অসিবু ইনভাইরনমেন্তকী ত্রস্তী ওইহল্লি। রিসোর্সশিংবু মরম চাদনা শিজিন্নবা থিংবশিংবু ত্রস্তী কৌই। ত্রস্তী অমনা শিজিন্নবগী থৌদাং লৌদে, পীবগী থৌদাং লৌই। মিসন লাইফনা পি.৩গী ৱাখল্লোনবু মপাঙ্গল হাপকনি। পি.৩ হায়বদি প্রো প্লানেত পীপল হায়বনি। করম্বা লৈবাক্না করি কাঙলুপ নত্ত্রগা লৈবাক্কী মাইকৈদা লৈ নত্ত্রগা লৈতে হায়না খন্নবা মালেমদা ঐখোয়না ঙসি হিংলি। অদুবু, মিসন লাইফনা পৃথীবীগী মীয়াম্বু প্রো প্লানেত পীপলগী মওংদা অমত্তা ওইহল্লি, মখোয়বু মসিগী ৱাখল্লোন অসিগী মনুং চলহল্লি, অমত্তা ওইহল্লি। মসিনা ‘লাইফস্তাইল ওফ দি প্লানেত, ফোর দি প্লানেত অমসুং বাই দি প্লানেত’কী মতুং ইন্না মথৌ তৌই।

মরূপশিং,

হৌখ্রবা মতমদগী তমদুনা ঐখোয়না অফবা তুংগী মতম শেম্বা ঙমগনি। মহৌশাবু লাতচবগী চৎনবী অমা ভারত্তা চহি লিশিং কয়াদগী পাংথোক্তুনা লাক্লি। ঈশিং, লম, নুংশিৎ অমসুং মহৌশাগী পোৎলম খুদিংমক্কী মরু ওইবসু ঐখোয়গী বেদদা ময়েক শেংনা তাক্লি। খুদম ওইনা, অথর্ববেদনা মাতা ভুমী: পুত্র পৃথীব্যা হায়রম্মি। মসিনা হায়বদি, পৃথীবে অসি ঐখোয়গী ইমানি অমসুং ঐখোয়না মহাক্কী মচানি। ‘রিদ্যুস, রিয়ুজ অমসুং রিসাইকল’ অমসুং সর্ক্যুলর ইকোনোমীনা চহি লিশিং কয়াদগী ঐখোয় ভারত মচাশিংগী শরুক ওইদুনা লাক্লি। মহৌশা ইমাগা নুংশি চাননা লৈয়ু হায়না ইথিল পীবা থবক থৌরম কয়া মালেমগী তোঙানবা মফমশিংদা ঙসিসু চৎনরি। ঐখোয়গী ইপা ইপুশিংনা পাংথোক্লম্বা অমসুং ঐখোয়না ঐখোয়গী লাইফস্তাইলগী শরুক ওইহনবা য়াবা মহৌশা কনবগী থৌওং কয়াবু মিসন লাইফকী শরুক ওইরি।

মরূপশিং,

ঙসিদি, ভারতকী চহিগী কার্বন ফুতপ্রিন্তনা তোন অমগা মখায় ওইরি অমসুং মালেমগীনা চহিগী চাংচৎনা তোন ৪ ওইরি। অদুম ওইনমক, ভারতনা ক্লাইমেত চেঞ্জকুম্বা মালেমগী শিংনবা কয়াগী হীরমদা মাঙ থানা থবক তৌরি। কোয়লা অমসুং শিঙ থাবদগী মৈখু থোকপদুদগী নীংতম্বা ফংহন্নবা লৈবাক অসিনা উজ্বালা য়োজনা স্কিম হৌদোকখি। ঐখোয়না ৱাতর সেক্যুরিতীগীদমক খন্দুনা জিলা ৭৫দা অমৃত সরোবর শানবা ঙসি চাউরবা খোঙথাং অমা পায়খৎলি। ঐখোয়গী লমদমসিদা ফত্ত হৌদীদগী লন্দা ওন্থোকপগী থৌওংদা অহেনবা মিৎয়েং চঙলি। ভারতনা ঙসিদি রিন্যুএবল ইনর্জীগী মতাংদা মালেমগী খ্বাইদগী মরিশুবা মতিক লৈবা লৈবাক ওইরে। ঐখোয়না ঙসি নুংশিৎকী ইনর্জীদা মরিশুবা থাক্তা লৈরে, সোলর ইনর্জীদা মঙাশুবা থাক্তা লৈরে। হৌখিবা চহি ৭-৮দা ভারতকী রিন্যুএবল ইনর্জীগী মতিক্তা চাউরাক্না ২৯০% হেনগৎখি। ঐখোয়না ইলেক্ত্রিক্কী তঙাই ফদবগী ৪০%বু নন ফোসিল ফুএলদগী লৌবগী পান্দমসু লেপখিবা মতমদগী চহি ৯ ঙনখৎনা ফংবা ঙম্লে। ঐখোয়না পেত্রোলদা ১০% ইথানোল ব্লেন্দিং তৌবগী পান্দমসু লেপখিবা মতমদগী থা ৫ ঙন্না ফংবা ঙম্লে। ভারতনা পেত্রোলদা ২০% ইথানোল ব্লেন্দিং তৌবগী পান্দমগীদমক্তা থবক পায়খৎলি। ভারতনা হাইদ্রোজেন ইকোসীস্তেমগীদমক্তা ইকো ফ্রেনলী ওইবা ইনর্জী সোর্সকীদা মায়কৈদা খোঙজেল য়াঙনা চঙশিল্লি অমসুং গুজরাতনা গ্রীন হাইদ্রোজেনগী হব অমা ওইরক্লি। মসিনা ভারত অমসুং অতোপ্পা লৈবাক কয়াদা মখোয়গী নেত জিরোগী পান্দম ফংনবা মশক থোক্না তেংবাংগনি।

মরূপশিং,

ভারতনা ঙসি ইনভাইরনমেন্ত অমসুং চাউখৎ থৌরাংগী হীরমদা খুদম ওইদুনা অনিসিবু চুননা পুন্সিন্দুনা হিংবগী লম্বী য়াৎলি। ভারতনা ঙসিদি মালেমগী খ্বাইদগী মঙাশুবা চাউবা শেন্মিৎলোন ওইরে, ঐখোয়গী ফোরেস্ত কভর হেনগৎলক্লি। ভারতনা ঙসিদি মালেমগা লৈনরিবা পার্ত্নরশিপ্পু হান্নদগী হেনগৎহনবা পাম্লি। ৱান সন, ৱান ৱর্ল্দ, চ্বান গ্রিদকুম্বা খোঙথাংগুম্বগী পান্দমগী মাইকৈদা ঐখোয়না খোঙফম চেৎনা চঙশিল্লি। কোলিএসন ফোর দিজাজতর রেজিলিএন্ত ইনফ্রাস্ত্রকচর লুচিংদুনা ভারতনা ইনভাইরনমেন্ত ঙাক শেনবগী ৱাখল্লোন করিনো হায়বা মালেদা তাকখ্রে। মিসন লাইফনা পরিং অসিদা পায়খৎপা অতোপ্পা খোঙথাং অমনি।

মরূপশিং,

ভারত অমসুং য়ুনাইতেদ নেসন্সনা পুন্না থবক তৌমিন্নবা খুদিংদা, মালেম্বু হেন্না ফগৎহন্নবা লম্বী থোক্লকই হায়বা ৱাফম অসি সেক্রেতরী জেনেরেল এন্তোনিও গুতেরেসনা য়ানীংলমগনি ঐহাক্না থাজৈ। ভারতনা ইন্তর্নেস্নেল য়োগ নুমিৎকী ৱাহৌদোক থমখি, য়ুনাইতেদ নেসন্সনা অয়াবা পীবিবদগী য়োগনা মালেমগী মীওই করোর কয়াগী হকশেল ফনা হিংবগী ইথিল ওইরি। অতোপ্পা খুদম অমসু ইন্তর্নেস্নেল য়র ওফ মিল্লেতকী লৈ। ভারতনা মালেম্বু মশাগী চৎনবীগী মনুং চনবা অমসুং ইকো ফ্রেনলী ওইবা অপৌবা সিরিএলগা মরী লৈনহনবা পাম্মি। য়ুনাইতেদ নেসন্সনা মসিগীসু অয়াবা পীখি। ঐখোয়না মথংগী চহিদা ইন্তর্নেস্নেল য়র ওফ মিল্লেত পাংথোক্কনি, মসিগী মতাংদা মালেম পুম্বনা ৱারী শাবা হৌজিক্তগী হৌরে। য়ুনাইতেদ নেসন্সনা তেংবাংদুনা মিসন লাইফনা মালেমগী কাচিন কোয়া খুদিংদা মায় পাক্না য়ৌগনি হায়বগী ঐহাক্না থাজবা থম্লি। ঐখোয়না “প্রকৃতী রক্সতী রক্সিতা” হায়বা মন্ত্রসি কৈদৌনুংদা কাওরোইদবনি। মসিনা হায়বদি, ইনভাইরনমেন্তপু ঙাক শেনবশিংবু ইনভাইরনমেন্তনা ঙাক শেল্লি হায়বনি। মিসন লাইফকী লম্বীদা চত্তুনা অফবা মালেম অমা শেম্বা ঙমগনি হায়না ঐহাক্না থাজৈ। অদোম পুম্নমকপু ঐহাক্না অমুক হন্না থাগৎচরি। অমসুং য়ু.এন.গী তেংবাং অসিবুসু ঐহাক্না অমুক হন্না থাগৎচদুনা ঐহাক্কী ৱারোল লোইশিঞ্জরী। থাগৎচরি!

****