প্রধানমন্ত্রীগী লোইশঙ
পি.এম.না নই দিল্লীগী প্রগতী মৈদান্দা পাঙথোকপা ৯০শুবা ইন্তরপোল জেনেরেল এসেমব্লীদা ৱা ঙাঙখ্রে
“লোকেলগী য়াইফনবগীদমক মালেমগী তেংবাংনবা হায়বসি ঐখোয়গী খোল্লাউনি”
“লো এনফোর্সমেন্তনা ঐখোয়দা লৈতবা ফংবদা, ঐখোয়দা লৈরিববু ঙাকথোকপদা, ঐখোয়না ঙাক শেন্দুনা থম্লিববু হেনগৎহনবদা, অমদি মদুবু ফংফম থোকপশিংদা য়েন্থোকপদা মতেং পাংলি”
“ঐখোয়গী পুলিস ফোর্সনা মীয়ামবু ঙাক শেনবদা নত্তনা ঐখোয়গী মীয়ামগী লৈঙাক্কী থৌগলসু তৌরি”
“শিংনবশিং অসি মালেম পুম্বগী ওইরক্লবদা, মদুগী পাউখুম লোকেলখক ওইবা য়ারোই! অসিগুম্বা শিংনবশিং অসিবু মায়থিবা পীননবা মালেমসিনা পুনশিনবা মতম ওইরে”
“মকোন শেমদুনা লৈরিবশিং মুত্থৎখিনবা মালেমগী কম্ম্যুনিতীনা হেন্না খুৎলৈ থুনা থবক তৌবা মথৌ তারে”
“ঈ-পাউ ফাওদোক্নবা, খুৎশম্নবা অমসুং তেংবাংনবনা ক্রাইম, শেঞ্জা থুমজা অমসুং তেরোরিজমবু মায়থিবা পীবা ওইরসনু”
Posted On:
18 OCT 2022 3:52PM by PIB Imphal
প্রধান মন্ত্রী, শ্রী নরেন্দ্র মোদীনা নই দিল্লীগী প্রগতি মৈদান্দা পাঙথোকপা ৯০শুবা ইন্তরপোল জেনেরেল এসেমব্লীদা ৱা ঙাঙখ্রে।
থৌরমদুদা ৱা ঙাঙলদুনা, প্রধান মন্ত্রীনা নই দিল্লীগী প্রগতি মৈদান্দা পাঙথোক্লিবা ৯০শুবা ইন্তরপোল জেনেরেল এসেমব্লীদা শরুক য়ারিবা মীথুংশিংবু তরাম্না ওকখি। প্রধান মন্ত্রীনা ভারতনা নীংতম্বগী চহি ৭৫ ফারকপগী থৌরম পাঙথোক্লি অমদি মসি মীয়াম অমসুং কলচরবু সেলেব্রেৎ তৌবনি হায়না ফোঙদোকখি। ইং ২০২৩দা ইন্তরপোল লিংখৎখিবা চহি ১০০ মপুং ফারগনি হায়নসু প্রধান মন্ত্রীনা পাউদমখি। মতম অসি হৌখিববু নৈনদুনা তুংগী খোঙফম লেপকদবা মতম্নি হায়বা ৱাফম মহাক্না থমখি। মতম অসি নুংঙাইবা ফোঙদোক্নবা, পাঙথোকখিবা থবকশিংগী মমি তাহন্নবা, অ্রশোয়বশিংদগী তম্নবা অমদি তুংলমচত্তা থাজবা অমগা লোয়ননা য়েংনবা চপ চারবা মতম্নি হায়না শ্রী মোদীনা মখা তাখি।
প্রধান মন্ত্রীনা ইন্তরপোলগী ৱাখল্লোনগা ভারতকী কলচরগা লৈনরিবা মরী ফোঙদোক্লদুনা ইন্তরপোলগী খোল্লাউ ‘কন্নেক্তিং পুলিস ৱিথ সেফর ৱর্ল্দ’গা ভেদগী ৱারোল “আনো ভদ্র কর্তবো য়ান্তু বিস্বাতাহ” হায়বদি অফবা ৱাখল্লোন মায়কৈ পুম্নমক্তগী লাকপা ওইরসনু হায়বসিগা মান্নবশিং চাংদম্নরদুনা ৱাফম অসি মালেম অসিবু হেন্না ফবা মফম অমা ওইহন্নবগীদমক পুম্নমক তেংবাংনবগী খোল্লাউনি হায়না মহাক্না শন্দোক্না তাকখি। ভারতকী তোপ তোপ্পা মালেমদা থম্লিবা মীৎয়েঙগী মরমদা পল্লদুনা, প্রধান মন্ত্রীনা ভারত অসি য়ুনাইতেদ নেসন্স পীসকীপিং ওপরেসন্দা থৌনা ফরবা নুপা অমসুং নুপী থাবদা মকোক থংনা থৌদাং য়ারিবশিংগী মরক্তা অমনি হায়বা ৱাফম থমখি। “ভারতনা নীংখা তমদ্রিঙৈগী মমাঙদগী হৌদুনা ঐখোয়না মালেম অসিবু হেন্না ফবা মফম অমা ওইহন্নবগীদমক কত্থোক্তুনা লাকখি”, হায়না শ্রী মোদীনা হায়খি। ভারত মচা লিশিং কয়ানা মালেমগী লাঞ্জাওশিংদা মপুন্সি কত্থোক্তুনা লাকখ্রে হায়না মহাক্না মখা তাখি। কোবিদ ভেক্সিন অমসুং ক্লাইমেৎ তার্গেৎশিংগী মরমদা পল্লদুনা, প্রধান মন্ত্রীনা ভারতনা লাংফম মখল খুদিংদা মাঙজিল থানা লুচিংবা পাম্বগী মতৌ উৎখ্রে হায়না পাউদমখি। “লৈবাক অমসুং খুন্নাই কয়ানা মশাগীতা খন্নরকপা মতমদা, ভারতনা মালেমগী তেংবাংনবগী চাং হেনগৎহন্নবা ৱাফম থম্লি। লোকেলগী য়াইফনবগীদমক মালেমগী ওইনা তেংবাংনবা হায়বসি ঐখোয়গী খোল্লাউনি”, হায়না শ্রী মোদীনা মখা তাখি।
মালেম পুম্বদা লৈরিবা পুলিস ফোর্সনা মীয়ামবু ঙাক শেনবদা নত্তনা খুন্নাইগী য়াইফনবগী থবক থৌরম পায়খৎলি হায়না প্রধান মন্ত্রীনা মখা তাখি। “মখোয় অসি লাংফম খুদিংদা খুন্নাইগী থৌদাং য়ানবা মাঙজিল থানা চৎলিবা কাঙবুনি”, হায়না শ্রী মোদীনা মখা তাখি। প্রধান মন্ত্রীনা কোবিদ লাংফমবু খুদম ওইনা পল্লদুনা পুলিস পর্সোনেলশিংনা মীয়ামবু মতেং পাংনবগীদমক মখোয়গী পুন্সিবু খুদোংথিবা কয়া মায়োক্নখি হায়না ফোঙদোকখি। “মখোয়গী মরক্তা কয়া অমদি মীয়ামগী থৌগলদা মপুন্সি ফাওবা কত্থোকখি”, হায়না মহাক্না হায়খি।
প্রধান মন্ত্রীনা ভারতকী লম অমসুং নাৎকী খেন্নবশিং পল্লদুনা ভারত্তা অসিগুম্বা খেন্নবশিং অসি পাক শন্না লৈরি হায়খি। “ভারতকী পুলিসনা ফেদরেল অমসুং স্তেতকী থাক্তা, লৈবাক্কী লোল ৯০০ হেনবা অমদি স্তেতকী লো লিশিং তরারোম চলাইনবগীদমক তেংবাংনরি। ঐখোয়গী পুলিস ফোর্সনা খেন্নবশিং অমসুং সংবিধান্না পীরিবা মীয়ামগী মঙমবু ইকায়খুম্ননা মথৌ তৌরি। মখোয়না মীয়ামবু ঙাক শেনবদা নত্তনা ঐখোয়গী মীয়ামগী লৈঙাক্কী থৌগলসু তৌরি” হায়না মহাক্না হায়খি। ইন্তরপোলগী মায় পাকপশিংগী মরমদা পল্লদুনা, প্রধান মন্ত্রীনা, ইন্তরপোলনা হৌখিবা চহি ৯৯সিদা লৈবাক ১৯৫গী পুলিস ওর্গনাইজেসনশিংবু মালেমগী থাক্তা শম্নহল্লি, অমদি অসিগুম্বা অচৌবা তাঞ্জা অসিবু পাঙথোকপা ওইনা ভারত লৈঙাক্না নীংশিং খুদম স্তাম্প অমসুং শেনয়েক পুথোক্লি হায়না ফোঙদোকখি।
প্রধান মন্ত্রীনা তেরোরিজম, শেঞ্জা থুমজা, দ্রগ ত্রাফিক্কিং, শা তানবা অমসুং ওর্গনাইজ ক্রাইম্নচিংবা মালেম্না থেংনরিবা মাঙ-তাক্নিংঙাই ওইবা মালেমগী থাক্তা নৌনা থোরক্লিবা শিংনবশিংগী মরমদা নীংশিংখি। “অসিগুম্বা খুদোংথিবশিং অসিগী খোঙজেল হোংলকপগী চাং হান্নদগী হেন্না য়াঙ্খৎলক্লি। শিংনবশিং অসি মালেম পুম্বগী ওইরক্লবদা, মদুগী পাউখুম লোকেলখক্না ওইবা য়ারোই! অসিগুম্বা শিংনবশিং অসিবু মায়থিবা পীননবা মালেমসিনা পুনশিনবা মতম ওইরে”, হায়না মহাক্না হায়খি।
ত্রান্সনেস্নেল তেরোরিজমগী ফত্তবশিংগী মরমদা পল্লদুনা, প্রধান মন্ত্রীনা ভারতনা অসিগুম্বশিং অসিবু মালেমসিনা শকখঙদ্রিঙৈদগী হৌনা চহি কয়াগী মমাঙদগী থেংনদুনা লাক্লি হায়বা ৱাফম থমখি। “ঐখোয়না সেফ্তী অমসুং সিক্যুরিতীগী মমল খঙই। হায়রিবা লান্ফম অসিদা ঐখোয়গী মীওই লিশিং কয়ানা মপুন্সি কত্থোকখ্রে”, শ্রী মোদীনা মখা তাখি। প্রধান মন্ত্রীনা তেরোরিজম অসি হৌজিক্তি ফীজিকেল স্পেসখক্তদা থেংনদ্রেও ওনলাইন রেদিকেলাইজেসন অমসুং সাইবর থ্রেতকী লমদসু খুৎলৈ থুনা শন্দোরক্লি হায়না মচা খায়না থমখি। বত্তন অমখক নম্লগা লান্দাবা য়ারে, সিস্তেম অমবু নমথবা য়ারে হায়না প্রধান মন্ত্রীনা শন্দোকপা ৱাফম থমখি। ইন্তরনেস্নেল স্ত্রেতেজীশিং মখা তানা শেমগৎপগী মথৌ তাবা ৱাফম অমুক হন্না থম্লদুনা, প্রধান মন্ত্রীনা “লৈবাক খুদিংমক মখোয়গী মায়োক্তা লাল্লোং কয়া লাত্তুনা থবক তৌরি। অদুবু ঐখোয়গী ঙমখৈ মনুংদা ঐখোয়না তৌরিবসিনা মপুং ফাবা ওইদ্রে”, হায়না থমখি। ঙন্না খঙদোক্নবা অমদি ৱার্নিং সিস্তেম শেমগৎনবা, ত্রান্সপোর্তেসন সর্ভিসশিং ঙাক শেন্নবা, কম্ম্যুনিকেসন ইনফ্রাস্ত্রকচরশিং ঙাক শেন্নবা, ক্রিতিকেল ইনফ্রাস্ত্রকচরশিং ঙাক শেন্নবা, তেক্নিকেল অমসুং তেক্নোলোজিকেল এসিস্তেন্স পীননবা, ইন্তলিজেন্স এক্সচেঞ্জ তৌনবা অমদি অনৌবা থাক অমদা পুখৎকদবা তোঙান তোঙানবা থৌওংশিং মহাক্না হৌদোকখি।
প্রধান মন্ত্রীনা শেঞ্জা থুমজানা পীরিবা খুদোংথিবগী মতাঙদা মচা খায়বা ৱাফম থমখি। শেঞ্জা থুমজা অমসুং ফাইনেন্সিএল ক্রাইমশিংনা লৈবাক কয়াগী মীয়ামগী য়াইফবা ফীভমদা অমাঙবা পীরি। হায়না মহাক্না হায়খি। “শেঞ্জা থুমজা তৌবশিংনা ক্রাইমদগী তাল্লকপা শেন্ফমশিং মালেমগী মফম কয়াদা থম্নবা লম্বী অমা ফংলি। হায়রিবা শেনফমশিং অসি মখোয়না লৌরুরিবা লৈবাক্তুগী মীয়ামগী শেনফম্নি”, হায়না মহাক্না মখা তাখি। অয়াম্বা মতমদা শেনফম অসি মালেমগী খ্বাইদগী লায়রবা মীওইশিংদগী লৌবনি। মখা তানা, শেনফম অসি মাঙ তাক্নিংঙাই ওইবা হীরম কয়াদা শীজিন্নরি হায়না মহাক্না ফোঙদোকখি।
প্রধান মন্ত্রীনা মকোন শেমদুনা লৈরিবশিং মুত্থৎনবগীদমক মালেমগী ফুরুপশিংনা হেন্না য়াঙনা থবক পায়খৎপগী মথৌ তারে হায়বা ৱাফম থমখি। “শেঞ্জা থুমজা তৌবা, তেরোরিস্ত, দ্রগ কার্তেল, শাদানবা গেং নৎত্রগা ওর্গনাইজ ক্রাইমশিংগী মকোন অমত্তা লৈহল্লোইদবনি। মফম অমদা থোক্লিবা মীয়ামগী মায়োক্তা চত্থরিবা ক্রাইমশিং অসি পুম্নমক্কী মায়োক্তা, মীওইবা খুন্নাইগী মায়োক্তা চত্থবা ক্রাইমনি”, হায়না মহাক্না মখা তাখি। “পুলিস অমসুং লো এনফোর্সিং এজেন্সীশিংনা তেংবাংনবা হেনগৎহন্নবা থৌওং অমসুং চৎন-পথাপ শেমবা মথৌ তাই। ইন্তরপোলনা মীচেন ওফেন্দরশিংগী রেদ কোর্নর নোতিস থোকপদা খোঙজেল য়াঙখৎহনবা য়াই,” হায়না প্রধান মন্ত্রীনা মখা তাখি। “শাফবা অমদি অকি অখং লৈতবা মালেম অমা পুরকপা হায়বসি ঐখোয় পুম্নমক্কী থৌদাংনি। অফবা শাফুশিংনা তেংবাংনরক্লবা মতমদা ক্রাইমগী শাফুশিং মথৌ তৌবা ঙম্লোই”, হায়বা ৱাফম প্রধান মন্ত্রীনা থমখি।
প্রধান মন্ত্রীনা মীথুং পুম্নমক্কী মফমদা নই দিল্লীদা লৈরিবা নেস্নেল পুলিস মেমোরিএল অমসুং নেস্নেল ৱার মেমোরিএলদা চত্তুনা ভারতপু শাফনা থম্নবগীদমক মপুন্সি কত্থোকখ্রবা অথৌবশিংগী মফমদা শ্রদ্ধাঞ্জলি কৎনবগী ৱাফম খন্নবিনবা ৱাফম থমখি। প্রধান মন্ত্রীনা ৯০শুবা ইন্তরপোল জেনেরেল এসেমব্লীনা ক্রাইম, শেঞ্জা থুমজা অমসুং তেরোরিজম লাকশিন্নবা মতিং লৈবা অমদি মায় পাক্লবা ফম্পাক অমা ওইরসনু হায়বা ৱাফমসু ফোঙদোকখি। “ঈ-পাউ ফাওদোক্নবা, খুৎশম্নবা অমসুং তেংবাংনবনা ক্রাইম, শেঞ্জা থুমজা অমসুং তেরোরিজমবু মায়থিবা পীবা ওইরসনু” হায়না ফোঙদোক্লদুনা প্রধান মন্ত্রীগী ৱারোল লোইশিনখি
মফম অদুদা মহাক্না য়ৌরকপা মতমদা, প্রধান মন্ত্রীবু ইন্তরপোল প্রসিদেন্তনা একজেক্যুতিব কম্মিতীগা শকখঙনহনখি। প্রধান মন্ত্রীনা গ্রুপ ফোতাগ্রাফ অমা কাপমিন্নখি অমদি ইন্তরপোল সেন্তিনরী স্তেন্দ য়েংখি। তুংদা প্রধান মন্ত্রীনা রিব্বন কক্তুনা নেস্নেল পুলিস হেরিতেজ দিস্প্লে শঙ্গাখি, অমদি মফমদুদা চত্তুনা য়েংখি।
মহাক্না ফমফম্লাংদা লেঙশিল্লকপা মতমদা, প্রধান মন্ত্রীনা আই.তি.বি.পি. কন্তিঞ্জেন্তনা চৎপা মার্চ পাস্ত – এন্ত্রান্স ওফ দি কলর্স মীৎয়েঙ তাখি। তুংদা ভারতকী নেস্নেল এন্থেম অমসুং ইন্তরপোল এন্থেম শকখি। প্রধান মন্ত্রীগী মফমদা ইন্তরপোলগী প্রসিদেন্তনা বোনসাই পাম্বী অমা খুদোল তমখি। মতুং তারকপদা, প্রধান মন্ত্রীনা নীংশিং পোস্তেল স্তাম্প অমসুং লুপা ১০০গী নীংশিং শেনয়েক ৯০শুবা ইন্তরপো, জেনেরেল এসেমব্লীগী থৌরমগা মরী লৈননা ফোঙখি।
কেন্দ্রগী গৃহ মন্ত্রী, শ্রী অমিত সাহ, ইন্তরপোল প্রসিদেন্ত মিস্তর অহমদ নসের অল রাইস, ইন্তরপোল সেক্রেতরী জেনেরেল, মিস্তর জর্জেন স্তোক, অমসুং সি.বি.আই. দাইরেক্তর, শ্রী সুবোধ কুমার জৈস্বালসু থৌরমদুদা শরুক য়াখি।
বেকগ্রাউন্দ
ইন্তরপোলগী ৯০শুবা জেনেরেল এসেমব্লী অসি ওক্তোবর ১৮দগী ২১ ফাওবা পাঙথোক্কদবনি। মীফম অসিদা ইন্তরপোল মেম্বর লৈবাক ১৯৫দগী মন্ত্রী, লৈবাকশিংগী পুলিস মকোকশিং, নেস্নেল সেন্ত্রেল ব্যুরোশিংগী মকোকশিং, অমসুং মকোক থোংবা পুলিস ওফিসরশিংগী ওইবা দেলিগেসনশিংনা শরুক য়ারি। জেনেরেল এসেমব্লী অসি ইন্তরপোলগী খ্বাইদগী মকোক্তা লৈবা গভর্নং বোদীনি অমদি মখোয়গী মথৌ তৌবগা মরী লৈনবা ৱারেপশিং লৌননবগীদমক চহিদা অমুরক মীফম পাঙথোকপনি।
ইন্তরপোল জেনেরেল এসেমব্লী অসি ভারত্তা চহি ২৫গী মতুংদা পাঙথোকপনি – মমাঙদা ১৯৯৭দা পাঙথোকখিবনি। ভারতকী নীংতম্বগী চহি ৭৫ ফারকপগী হরাও তয়াম্বা পাঙথোক্লিবসিগা চাননা নই দিল্লীদা ইন্তরপোলগী জেনেরেল এসেমব্লী ২০২২দা পাঙথোক্নবা ভারতনা থাঙ্গৎখিবা ৱাফম জেনেরেল এসেমব্লীগী মেজোরিতীনা হরাও হরাও য়ারকখিবনি। থৌরম অসিনা ভারতকী লো এন্দ ওর্দর সিস্তেমগী খ্বাইদগী ফবা থৌওংশিং মালেম পুম্বদা উত্থোক্নবগী তাঞ্জা অমা পীরি।
*****
(Release ID: 1868910)
Visitor Counter : 169
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam