ভারত ইমানা য়াইফরে!

ভারত ইমানা য়াইফরে!

সুরতকী মীয়ামবু নবরাত্রীনা লাকপদা য়াইফ-পাউজেল পীখ্রে। ঐহাককুম্বা মীওই অমনা নবরাত্রী মনুংদা সুরত্তা লাকপা ফংজবা অসি য়াম্না নুংঙাই অদুবু নবরাত্রীগী চরা হেল্লিঙৈ মনুংদা তাবা অসিদি খরা নুংঙাইতে। সুরত্তা লাক্লগা সুরতকী অহাওবা মথেলশিং চাদনা হনখিবা হায়বা অসি অৱাবগী মশক্নি।

নবরাত্রীগী য়াইফরবা থৌরম অসিদা ঐহাক্না ঙসিদগী হৌরগা নুমিৎ নিনি অসিদা গুজরাতকী লমদম অসিদা ইনফ্রাস্ত্রকচর, স্পোর্তস, কলচর অমসুং লাইনীংগা মরী লৈনবা মরু ওইবা থৌরমশিংগী শরুক য়াবা ফংজবা অসি ঐহাক্কী লাইবক ফবনি। গুজরাতকী মীংচৎ হেনগৎহনবা, নখোয়গী নরক্তা লাকপা অমসুং নখোয়গী থৌজাল অমসুং মীনুংশিং ফংজবা অমসুং নোংমা নোংমগী ঐঙোন্দা থাজবা থম্বা হেনগৎলকপা হায়বা অসি ঐহাক্কী লাইবক ফবনি। গুজরাত অমসুং সুরতকী মীয়ামদা ঐঙোন্দা উৎপীরিবা মীনুংশি অসি ৱাহৈনা ফোঙদোকপা ঙম্লরোই।

সুরতকী য়ুমথোং খুদিংদা চাউখৎপগী ৱারীশিং উবা অমসুং তাবা ফংজবা মতমদা ঐহাক্কী নুংঙাইবগী পনখৈ লৈতে। মসিগী শরুক ওইনা ঙসি সুরত্তা চাউখৎ-থৌরাংগী প্রোজেক্ত কয়া শঙ্গাখি নত্ত্রগা উরেপ-উয়ুং তমখি। অয়াম্বা প্রোজেক্তশিং অসিনা সুরতকী মীয়াম, মিদল ক্লাস অমসুং বিজিনেস ক্লাসতা খুদোংচাবা অমসুং কান্নবা কয়া পীরগনি। সুরত্তা অমৃত সরোভর (পুখ্রি) ৭৫ শাবগী থবকশিং খোঙজেল য়াংনা পাইখৎলি হায়না ঐঙোন্দা পাউদমবীখি। জিলা, এদমিনিস্ত্রেসনগী মরুপশিং সুরতকী মীয়ামবু থাগৎফম থোকই।

মরুপশিং,

সহর অসি মীয়ামনা অমত্তা ওইনা লেপ্পা অমসুং জন ভাগীদারীগী ফজরবা খুদম অমনি । সুরতকী লমদম অসিদা ভারতকী লমদম অমত্তদগী মীওই অমত্তা লৈতবা য়াওরম্লোই। মসি মিনি ইন্দিয়া অমনি। সুরতকী খ্বাইদগী শীংথানীংঙাই ওইবা মগুন অসি সহর অসিনা শিন্মীশিংবু ইকাই খুম্নবা অসিনি অমসুং মসিগীদমক ঐহাক্না মতম চুপ্পদা চাউথোকচবা পোকই। মফম অসিদা তেলেন্ত অসি মমল লৈনা লৌই, চাউখৎপগী অনীংবা-অপাম্বশিং অসি থুংহল্লি অমসুং মাংদা চংশিনবগী মঙলানশিং অসি মঙফাওনরি। অমসুং মরু ওইনা সহর অসিনা চাউখৎ-খোঙজেলদা তুংদা লৈহৌরবা মীওইশিংদা খুদোংচাবা হেন্না পীরি অমসুং মহাকপু খুৎ শম্নদুনা মাংদা পুখৎনবা হোৎনরি। সুরতকী মসিগী ৱাখল্লোন অসিনা নীংতম্বগী ‘অমৃত কাল’দা চাউখৎপা ভারত অমা ওইহন্নবা অচৌবা ইথিল ওইরি।

মরুপশিং,

চহিচা অসিগী অঙনবা মতমগী দিকেদশিংদা মালেমদা পি ৩ হায়দি পব্লিক-প্রাইবেৎ পার্তনরশিপ হায়বা অসিগী মরমদা ঙাংনরম্মি। অদুবু ঐহাক্না হায়জনীংবদি সুরত অসি পি ৪গী খুদম অমনি। পি ৪ হায়বগী ৱাহন্থোক্তি পিপল, পব্লিক, প্রাইবেৎ পার্তনরশিপ হায়বনি। মসিগী মোদেল অসিনা সুরতপু অখন্নবা অমা ওইহনখি। লাইচৎ অমসুং ঈশিং ঈচাওগী মরমদা অরানবা পাউশিং শন্দোকখিবা মতম অদু সহরকী মীয়াম্না কাউরোই। মতম অদুদা ঐহাক্না মফম অসিগী বিজিনেস কম্ম্যুনিতীদা ৱাফম অমা থমজখি। ঐহাক্না হায়খি করিগুম্বা সুরতকী সহর অসিগী নীংথিনা ব্রেন্দিং তৌবা তারবদি সেক্তর খুদিংমক, কম্পনী খুদিংমক্না ওতোমেতিক ব্রান্দিং ফংগনি। অমসুং ঙসি নখোয় পুম্নমক্না মদু সুরত্তা পাঙথোকপা ঙমহনখি। ঙসি সুরত অসি মালেমগী খ্বাইদগী খোঙজেল য়াংনা চাউখৎলক্লিবা সহরশিংগী মনুংদা মফম অমা কল্লি। অমসুং মফম অসিদা তৌবা বিজিনেস অমসুং ত্রেদ খুদিংমক্না মসিদগীচাউনা কান্নবা ফংলি।

ইচিল-ইনাওশিং,

হৌখিবা চহি ২০দা সুরতনা লৈবাক অসিগী লেমহৌরিবা সহরশিংদগী হেন্না খোঙজেল য়াংনা খুমাং চাউশিল্লি। ঙসি লৈবাক অসিদা ঐখোয়না সুরত অসি খ্বাইদগী লুনানবা সহরশিংগী মনুংদা মমিং পাবদা য়াওরি। মসি সুরতকী মীয়াম্না লেপ্পা লৈতনা কন্না হোৎনবগী মহৈনি। ঐখোয়গী কিলোমিতর কয়াগী অনৌবা দ্রেনেজ নেৎৱার্কশিং অসিনা সুরতকী পুন্সিদা অনৌবা মহাও অমা পীরি। দিকেদ অনিদা সহর অসিদা শাখিবা সিৱেজ ত্রীৎঞেন্ত কেপাসিতী অসিনা সহর অসি লুনান্না থম্বদা মতেং পাংখি। ঙসি ভাকর অমসুং বমরোলীদা অনৌবা কেপাসিতী হাপচিনখ্রে। চহি ২০ হেন্না মফম অসিদা থবক শুরিবা মরুপশিংনা মসিগী অহোংবা অসি উবা ফংলি। সুরত্তা লৈবা স্লমশিংগী মশিং অসি চহি খরা অসিদা শীংথানীংঙাই ওইনা হন্থরকখি। হৌখিবা দিকেদ অনি অসিদা লায়রবা অমসুং স্লমদা লৈবা মীওইশিংগীদমক য়ুম ৮০,০০০ হেন্না শাখি। মসিনা সুরতকী সহরগী মীওই লাখ কয়াগী হিংবগী থাক হেনগৎহনখি।

মরুপশিং,

গুজরাত্তা দবল-ইঞ্জিন সরকার শেমখ্রবা মতুংদা সুরতকী লায়রবা অমসুং মিদল ক্লাসকী মীয়ামগীদমক শাখিবা য়ুমশিং অমসুং অতোপ্পা খুদোংচাবা কয়া শীংথানীংঙাই ওইনা মশিং হেনগৎলকখি। হৌজিক ফাওবদা লৈবাক অসিদা লৈরিবা লায়রবা অনাবা মিলিয়ন ৪০রোমনা লেম্না লায়েং ফংখি। মসিদা গুজরাত্তগী অনাবা লাখ ৩২ হেন্না অমসুং সুরত্তগী লাখ ১.২৫রোম ওইখি।

মতৌ অসুম্না পি.এম. স্বনিধি য়োজনাগী মখাদা হৌজিক ফাওবদা গরেন্তী য়াওদনা বেঙ্কশিংদগী শেল চংদনা স্ত্রীৎ ভেন্দর লাখ ৩৫না লোনশিং লৌরি। মালেমগী মমিং লৈরবা দোনর, বিল গেতসকী ইবা অনৌবা আর্তিকল অমা ময়াম্না পাবীরম্লগনি। মদুদা মহাক্না হীরম অসিগী মতাংদা পনখি। মহাক্না ৱাফম পুম্নমক অসি য়াওবা আর্তিকল অমা ইখি। মরুপশিং স্কিম অসিনা গুজরাতকী মীওই লাখ ২.৫ হেন্না অমসুং সুরতকী মীওই ৪০,০০০দা মতেং পাংখি।

মরুপশিং,

রনদর, অরায়ন, পাল, হজিরা, পালনপুর, জহাঙ্গিরপুরাগুম্বা সুরতকী সহরগী নোংচুপ থংবা শরুকশিং অমসুং অতোপ্পা মফমশিংদা নীল খোঙলিবা অসি চহি ২০ লেপ্পা লৈতনা কন্না হোৎনখিবগী মহৈনি।  ঙসি সহর অসিগী তোঙান-তোঙানবা শরুকশিংদা তাপী তুরেলদা থোং কয়া শাখ্রে, মসিনা সহর অসিগা ফাওনহল্লি অমসুং সুরত মীয়ামগীদমক চাউখৎপা পুরক্লি। অসিগুম্বা থাক্কী ইন্তরসিতী কন্নেক্তিবিতী অসি তাংনা উবা ফংই। সুরত অসি মীওইবা জাতি, জাতি, অমসুং চাউখৎপগী লৈরিবা অহোবশিংবু মেনখৎলিবা তশেংনমক থোংশিংগী সহরনি।

ইচিল-ইনাওশিং,

ঙসি উরেপ-উয়ুং তমখিবা নত্ত্রগা শঙ্গাখিবা প্রোজেক্তশিং অসিনা সুরতকী লৈরিবা মীংচৎ মপাঙ্গল কনখৎহল্লগনি। সুরতকী সুরতকী তেক্সতাইল অমসুং দাইমন্দ বিজিনেসনা লৈবাক শিনবা থুংবদা লৈরিবা ইমুং কয়াগী পুন্সি পুরি। দ্রীম সিতী প্রোজেক্ত অসিনা মপুং ফানা লোইশিল্লিবা মতমদা সুরত অসি মালেমগী খ্বাইদগী শাফবা অমসুং খ্বাইদগী খুদোংচারবা দাইমন্দ ত্রেদিং হবশিংগী মনুংদা অমা ওইবা ঙম্লগনি। সুরতপু মালেমগী দাইমন্দ ত্রেদর অমসুং কম্পনীশিংগী মোদর্ন ওফিস স্পেস ওইনা মশক খঙনগদবা নুমিৎ অদু পংলাপ-লাপত্রে।

থা খরগী মমাংদা কেন্দ্র সরকারনা সিওন অমসুং ওলপাদকী মফমশিংদা লৈরিবা পাৱর লুমশিংদা থেংনরিবা সমস্যাশিং হন্থহন্নবা সুরত পাৱর লুম মেগা ক্লস্তর। মসি খক্তা নত্তনা, পোলুসনগী মরী লৈনবা সমস্যাশিংসু কোকহনগনি।

মরুপশিং,

সুরতকী মীয়ামগী অখন্নবা অসি মখোয় অসি হরাও-তয়াম্বা মীওইশিং ওই অমসুং মখোয়না মপালদগী লাকপা মীওইদা ফাওবা ইথিল পোকহল্লি। ঐহাক কাশি এম.পি.গী অমনি অমসুং মীয়াম্না ঐঙোন্দা সুরতকী মথেংলগী মরমদা তোইনা পাওদমখি। নুমিৎ তারকপা মতমদা মীয়াম হংচিৎ লাক্নবা তাপতি তুরেলগী অকোইবদা মীয়াম্না চৎলি অমসুং চাক চারবা মতুংদতা ময়ুমদা হল্লকই। তাপতি তুরেলশিং য়াওনা  সুরতপু হেন্না মোর্দন ওইহন্নবা খোঙথাংশিং লৌখৎপগীদমক ঐহাক্না ভপেন্দ্রভাই, সি.আর. পাতিল, লোকেল কোর্পোরেসন অমসুং এম.এল.এ.শিংবু থাগৎপা ফোঙদোকচরি। বাইওদাইভর্সিতী পার্ক প্রোজেক্ত শেমগৎপগা লোয়ননা সুরত্তা লৈরিবা ৱাকিং চৎপগী হৈনবী লৈরিবা মীয়াম্না হেন্না ফজবা খুদোংচাবা ফংলগনি।

ইচিল-ইনাওশিং,

সহর অসিদগী এয়রপোর্ত তম্না চৎলিবা লম্বী-থোং অসিদা সুরতকী নাৎ, চাউখৎপা অমসুং মতমগা চুনবা মতৌ অদুগী মমি তারি। অদুবু এয়রপোর্ত অসিগীদমক মতম শাংনা হোৎনরকখিবা অদু উখিবা মরুপ কয়া লৈরমগনি। ঐখোয়না দিল্লীদা লৈরিবা সরলারদা সুরতকী মতিক-ময়াই অসিনা মরম ওইরগা এয়রপোর্ত অমা তঙাই ফদে হায়না হায়দুনা লাকখি। য়েংঙু ঙসি মফম অসিগী ফ্লাইৎ কয়া ওপরেৎ তৌরি, নুমিৎ খুদিংগী মফম অসিদা মীওই কয়া থুংলরি। ফীভম অসিগা চপ মান্ননা মেত্রোগী মতাংদসু থেংনখি। অদুবু ঙসিদি দবল ইঞ্জিন সরকার অসি লৈরবা মতমদা প্রপোজেলশিং খোঙজেল য়াংনা অয়াবা পীরি অমসুং চপ মান্নবা খোঙজেলদা থবক পাইখৎলি।

ইচিল-ইনাওশিং,

সুরতকী মীয়াম্না বিজিনেস তৌবা লোজিস্তিক্সকী মরু ওইবা অদু নীংথিনা খঙই। সুরতনা অনৌবা নেস্নেল লোজিস্তিক্স পোলিসীদগী চাউনা কান্নবা ফংলগনি। মলতি-মোদেল কন্নেক্তিবিতীগীদমক সুরত্তা থবক পাইখৎপা হৌখ্রে। সুরতকী বিজিনেস হবকা সৌরসস্ত্রাগী এগ্রিকলচরেল হবকী কন্নেক্ত তৌবদা ঘোঘা-হজরি রোপেক্স ফেরী সর্ভিসনা য়াম্না মরু ওইবা থৌদাং লৌরি। হজারি ঘোঘা রোপেক্স ফেরী সর্ভিসনা রোপেক্সকী খুত্থাংদা পুং ১০-১২দগী পুং ৩-৪দা কিমি ৪০০গী লম্বী অশাংবা শীংথানীংঙাই ওইনা হন্থহন্দুনা মতম অমসুং শেল মাংহনদবা ঙমখি। মসিগী খেন্না খুদোংচাবা অসি কদাইদা লৈগনি? ভাবনগর, অমরেলী অমসুং সৌরস্ত্রাগী অতোপ্পা শরুকশিংদগী সুরত্তা লাকপা মীয়ামদা ফেরী সর্ভিস অসিনা চাউনা কান্নবা ফংহনখি। পর্মিনেন্ত তর্মিনেল শাবগা লোয়ননা তুংদা লাক্কদবা মতমশিংদা রুতশিং হেন্না হাংদোকপগী ওইথোকপা য়াবা হেনগৎলগনি। মসিনা মমাংদগী হেন্না ইন্দস্ত্রী অমসুং লৌমীশিংদা কান্নবা পীরগনি।

মরুপশিং,

ঐখোয়গী সুরতকী ত্রেদর অমসুং বিজিনেসকী মথৌ তাবা খুদিংমক য়েংলগা সরকারনা থবক পাইখৎলি। ঐহাক্না খুদম অমা পীজগে। সুরতকী তেক্সতাইলশিংগীদমক অচীবা মার্কেৎ অমা কাশি অমসুং নোংপোক থংবা উত্তর প্রদেশতা লৈ। হৌজিক ফাওবদা নোংপোক থংবা য়ু.পি. ফাওবা ত্রকশিংগী খুত্থাংদা পোৎচৈশিং পুথোক-পুশিন তৌরি। হৌজিক রেলৱে অমসুং কোস্তেল বিভাগশিংনা শিপমেন্তশিংগী মশিং হেনগৎহন্নবা তোপ-তোপপ্পা অনৌবা পাম্বৈশিং পুথোক্লি। রেলৱেজনা কার্গো লায়না চনগদবা মওং অমদা মাগী কোচশিংগী দিজাইন শেমদোক্লি। মসিগীদমক তন অমগী কন্তেনরশিং অখন্ননা শেমখি। কন্তেনরশিং অসি লায়না লোদিং অমসুং অনলোদিং তৌবা য়ারি। অহানবগী মাইপাকখ্রবা মতুংদা হৌজিক সুরত্তগী কাশী ফাওবা অনৌবা ত্রেন চেলহন্নবা খোঙথাং অমা পাইখৎলি। ত্রেন অসিনা সুরত্তগী কাশী ফাওবা পোৎচৈশিং পুরগনি। মসিনা সুরতকী ত্রেদর, বিজিনেসমেন অমসুং শিন্মীশিংদা চাউনা কান্নবা পীরগনি।

অথুবদা সুরতপু ইলেক্ত্রিক ভেহিকলশিংগীদমক মশক খঙনগনি। য়াম্না তোইনা সুরতকী অনৌবা আইদেন্তিতী অমা হাপচিনখি। সিল্ক সিতীদগী দাইমন্দ সিতীদা, মসিদগী সেতু সিতী হায়না খঙনৈ অমসুং হৌজিক্না ইলেক্ত্রিক ভেহিকল সিতী হায়না খঙনরগনি। ঙসি কেন্দ্র সরকারনা লৈবাক শিনবা থুংবদা ইলেক্ত্রিক ভেহিকলশিং চেলহন্নবা সরকারশিংগী মতেং পাংলি অমসুং সুরতনা হীরম অসিদা লৈবাক অসিগী অতোপ্পা সহরশিংগা চাংদম্নবদা মাংজিল থারি। ঙসি সুরতকী সহরদা চার্জিং স্তেসন ২৫ শঙ্গাখ্রে অমসুং চপ মান্নবা মশিংগী স্তেসনশিংগী উরেপ-উয়ুং তমখ্রে। মসি তুংলমচৎতা সুরত্তা চার্জিং স্তেসন ৫০০ লিংখৎনবা মাইকৈদা চংশিল্লিবা অচৌবা খোঙথাং অমনি।

মরুপশিং,

সুরত্তা হৌখিবা দিকেদ অনিদা চাউখৎ লম্বীদা খোঙজেল য়াংশিল্লক্লিবা অসি তুংদা লাক্কদবা চহিশিংদসু হেনগৎলগনি। মসিগী চাউখৎপা অসি ঙসি দবল-ইঞ্জিন সরকারদা থাজবা থম্বগী মওংদা মমি তারি। থাজবা হেনগৎলক্লবা মতমদা, শাহৌ লৈরকই অমসুং জাতিগী চাউখৎ খোঙজেল অসি সবকা প্রয়াসনা শাহৌ পী। থাজবা অসিগা লোয়ননা ঐখোয়না খোঙজেল য়াংশিনহনখিগনি, সুরতকী মীয়ামদা ঐহাক্না তৌবীমল খঙবা উৎপচবা অসি ৱাহৈনা ফোঙদোকপা ঙম্লরোই। সুরত অসি চাউখৎপগী খুদম অমনি। মরুপশিং ভারত্তা সুরতকী থাক মান্নবা সহর কয়া লৈ অদুবু সুরতনা পুম্নমক মাইথিবা পীরমখি। অমসুং মসিগী মতিক-ময়াই অসি গুজরাত্তা খক্তা লৈ। মরুপশিং গুজরাততকী মীয়াম্না খোঙফম চেৎপা অমসুং অখাং কনবা অসিনা গুজরাতপু চাউখৎ লম্বীদা তুংহনবা ঙমলোই। থাজবা অসিগা লোয়ননা ঐহাক্না পুম্নমকপু থাগৎপা ফোঙদোকচরি।

ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

থাগৎচরি!

খঙহঞ্জবা: মসি পি.এম.গী ৱারোলগ চাউরাকপা ৱাহন্থোক্নি। তশেংবা ৱারোলদি হিন্দী অমসুং শরুক খরনা গুজরাতি মরোলদা পীখিবনি।

****