ভবনাগরগী মীপুম খুদিংবু ঐহাক্না থাগৎলি। শাংলবা মতমগী মতুংদা ঐহাক্না লমদম অসিদা লাকপগীদমক্তা ঐহাক্না খ্বাইদগী অহানবদা ভবনাগরগী মফমদা ঙাকপীনবা হায়জরি। অসুম্না মতম শাংনা লাকখিদবসি হন্দক্কী অসিনা অহানবা থৌওংনি। মরক্তা লাকপা ঙমখিদবগীদমক্তা ঙাকপীনবা হায়জরি। অদু ওইরবা ফাওবদা, অদোম্না থৌজানবীরিবা, নুংশিবীরিবা অসি ঐহাক্না কৈদৌনুংদা কাওরোই। ঙসিগী শারবা নুংশা অসিদা অদোম মশিং য়াম্না লাকপীবা, য়েংলু-য়েংলু খুদিংদা অদোমগী অদোম ঙাক্তা উরিবা অসিগীদমক্তা পুম্নমকপু ঐহাক্না ইকায় খুম্নজরি।

অদোমগা ঙসি উন্নরিবা অসি য়াম্না মরু ওইবা অমসুং অখন্নবা থৌরম্নি। নাকল অমদা লৈবাক্না নীংতম্বগী চহি ৭৫ মপুং ফারকপগী নুংঙাইবা ফোংদোক্লি, অদুগা নাকল অমদা, ভবনাগরনা লমদম অমা ওইনা মশাগী চহি ৩০০ মপুং ফারি। ভবনাগরগী মশাগী চহি ৩০০গী খোঙচত্তা লেপ্পা লৈতনা চাউখৎখি অমসুং সাউরাস্ত্রগী নাৎকী কোনুং ওইনা মশক লেপখি। ঙসি শঙ্গারিবা অমসুং উরেপ উয়ুং তম্লিবা প্রোজেক্তশিংনা মরম ওইরগা ভবনাগরগী চাউখৎ-থৌরাংদা অনৌবা শাফু পীরগনি। প্রোজেক্তশিং অসিনা ভবনাগরদা অনৌবা শক্তাক পীগনি, লৌমীশিংদা ইরিগেসনগী খুদোংচাবা পীগনি, আত্মানির্ভর ভারতকী খোঙজংদসু অনৌবা পাঙ্গল হাপকনি। রিজনেল সাইন্স সেন্তর লৈরকপা অসিনা মহৈ-মশিং অমসুং সংস্কৃতীগী শহর অমা ওইনা ভবনাগরগী শক্তাকপু হেন্না মশক থোকহল্লগনি। প্রোজেক্তশিং অসিগীদমক্তা অদোম পুম্নমকপু থাগৎচরি।

ইচিল ইনাওশিং,

ঐহাক্না ভবনাগরদা লাকপা খুদিংগী ৱাফম অমা অদুম থম্বনি। রাজকোত-জাম্নগর-ভবনাগরগী লমদম অসিনা মমাংগী দিকেদ কয়াদা লৈরক্লিবা সুরত-বদোদরা-অহমেদবাদকী মান্নবা মঙাল য়াম্না থুনা লৈরগনি হায়বগী থাজবা লৈ। ঐহাক্না থাজবা লৈরিবসিগী মরমদি লমদমসিদা ইন্দস্ত্রী, লৌউ-শিংউ অমসুং তুরিজমগী চাউরবা মতিক লৈবগীনি। ঙসিগী থৌরম অসিনা দবল সরকার অসিনা মাইকৈ অসিদা খোঙফম চেৎপগী খুদম অমনি। ভবনাগর অসি সমুদ্র তোর্বান্দা লৈবা জিলা অমনি অমসুং গুজরাতনা লৈবাক অসিদা খ্বাইদগী শাংবা সমুদ্র তোর্বানগী মফম লৈ। অদুবু, নীংতম্বা ফংলবা মতুংগী দিকেদশিংদা সমুদ্র তোর্বানগী লমদম চাউখৎনবা নীংথিনা হোৎনখিদবনা মরম ওইরগা, মসিগী শাংলবা সমুদ্র তোর্বান অসি মীয়ামগী অচৌবা শিংনবা ওইদুনা লাকখি। সমুদ্রগী থুমহী চেনবা ঈশিংনা লমদমসিগী মীয়ামগী অভিশাপ ওইখি। সমুদ্র তোর্বান্দা লৈবা খুঙ্গংশিং পুমহাঙ হাঙলম্লবনি। মীয়াম্না মফম কয়াদা হোংদোক্নবা হৌরম্লবনি। নহা কয়ানা সুরত্তা চৎনখি, মফমদুদা মখোয়না কা অমদা মীওই ১০-১৫, ১৫-১৫, ২০-২০ লৈনরম্মি। মসি য়াম্না নুংঙাইতবা ৱাফম অমনি।

মরূপশিং,

মমাংগী দিকেদ অনিদা, গুজরাতকী সমুদ্র তোর্বান পরিংবু ভারতকী য়াইফ য়ুম্বালগী থোঙ ওইহন্নবা সরকারনা পুকচেল শেংনা হোৎনখি। থবক পীনবা অনৌবা খুদোংচাবা কয়া শেমখি। ঐখোয়না গুজরাত্তা হিথাংফম কয়া শারে, কয়া অমনা মতমগা চুনবা খুদোংচাবা লৈহল্লে। গুজরাত্তা ঙসিদি চাউরবা এল.এন.জি. তর্মিনেল অহুম, পেত্রোকেমিকেল হব লৈরে অমসুং লৈবাক্কী খ্বাইদগী অহানবা এল.এন.জি. তর্মিনেলসু গুজরাতনা ভারতকী অহানবা রাজ্যনি। রাজ্যসিগী সমুদ্র তোর্বানগী মফমশিংদা ঐখোয়না কোস্তেল ইন্দস্ত্রী কয়া, অচৌবা অমসুং অপীকপা ইন্দস্ত্রী কয়া শেমগৎখি। ইন্দস্ত্রীশিং অসিগী ইনর্জীগী তঙাই ফদবা মনিং থুংহন্নবগীদমক্তা ঐখোয়না কোয়লা তর্মিনেল নেতৱর্ক শেমগৎখি। ঙসিদি, গুজরাতকী সমুদ্র তোর্বানগী মফমশিংদা লৈরিবা য়াম্লবা পাৱার প্লান্তশিংনা গুজরাত খক্তা নত্তনা লৈবাক পুম্বদা ইনর্জী পীরি। ঐখোয়গী ঙামী খুন্নাইগী ইচিল ইনাওশিংগী মতেং পাংনবগীদমক্তা ফিশিং হার্বর কয়া শাখি অমসুং ঙামীশিংগী খুন্নাইবু চাউখৎহন্নবগীদমক্তা ফিশ প্রোসেসিংগী থবকশিংসু খুমানফ চাউশিলহনখি। ঐখোয়না শেম্লিবা মপাঙ্গল লৈরবা ফিশিং হার্বরগী নেতৱর্ক অসিবু লেপ্তনা পাকথোক চাউথোকহল্লি, মতমগা চুন্নহন্নবা হোৎনরি। গুজরাতকী সমুদ্র তোর্বান মফমশিংদা ঐখোয়না মেংগ্রুব জংগলসু শেমগত্তুনা কোস্তেল ইকোসীস্তেম্বু তেক্ত কায়দবা ওইহল্লি, মপাঙ্গল হাপ্লি। মতমদুদা লৈরম্বা কেন্দ্র সরকারনা গুজরাত্তগী সমুদ্র তোর্বান চাউখৎপগী মতাংদা তমজবা য়াম্না য়াই হায়না ফোংদোক্লমখিবা লৈ। হায়রিবা থবকশিং অসি অদোমগী মতেংদগী পাংথোকপা ঙমখিবনি।

ঐখোয়না এক্বাকলচর চাউখৎহন্নবা মরু ওইবা খোঙথাং কয়া পায়খৎখি। সী-ৱিদ ফার্মিংগী মরী লৈননা চাউনা হোৎনখিবা লৈবাক্কী রাজ্যশিংগী মরক্তা গুজরাতসু অমনি। ঙসিদি, গুজরাতকী কোস্তলাইন্না লৈবাক্কী এক্সপোর্ত অমসুং ইম্পোর্ত্তা মরু ওইবা থৌদাং লৌবগা লোয়ননা মীওই লাখ কয়াগী থবক্কী পাম্বৈসু ওইরি। ঙসিদি, গুজরাতকী সমুদ্র তোর্বান পরিংনা রিন্যুএবল ইনর্জী অমসুং হাইদ্রোজেন ইকোসীস্তেমগী ৱাহন্থোক পীরে। ঐখোয়না সাউরাস্ত্রবু ইনর্জীগী ময়োল ওইহন্নবা হোৎনখি। ঙসিদি, লৈবাক্কী ইনর্জীগী তঙাই ফদবা খুদিংমক্কী মতাংদা লমদম অসিনা মরু ওইবা হব অমা ওইরে। হৌজিক্তি, লমদম অসিদা সোলর ইনর্জীগী প্রোজেক্ত কয়াসু পায়খৎলে। পালিতানাদা ঙসি শঙ্গাখিবা সোলর পাৱর প্রোজেক্তনা লমদম অসিগী ইমুং কয়াদা ইলেক্ত্রিসিতী হোঙনা অমসুং মরাং কায়না ফংহল্লগনি। মতম অমা লৈরম্মি। হৌজিক হৌজিক চহি ২০-২২ শুরবশিংনদি মসি খঙলরোই। নুমিদাংগী চাক চাবা মতমদা মৈ লাক্লবদি, হরাওবগী ঙমখৈ নাইরমদে, য়াম্না নুংঙাইবা নুমিৎ হায়বদু ওইরম্মি। ঐহাক্না ঙসিসু নিংশিংলি, ঐহাক্না মুখ্য মন্ত্রী ওইবগী অহানবা নুমিত্তা মীয়াম্না নুমিদাংগী চাক চাবা মতমদা ফাওবদি মৈ লাকহনবীয়ু হায়খিবনি। মদুগুম্বা অৱাবা মতমশিং লোইরে, মরূপশিং।

ঙসিদি, মফমসিদা মৈ মরাং কায়না ফংবনা মরম ওইরগা, কারবারগী অনৌবা খুদোংচাবা লৈরিবনি, ইন্দস্ত্রীনা চাউখৎলিবনি। ধোলেরাদা রিন্যুএবল ইনর্জী, স্পেস অমসুং সেমিকন্দক্তর ইন্দস্ত্রী লিংখৎকদৌরিবা অসিদগী ভবনাগরগী মীয়াম্নসু কান্নবা ফংগনি। ভবনাগরগী য়ুম্লোন্নবা জিলানা চাউখৎলকপা মতমদা, অহমেদবাদতগী ধোলেরা, ভবনাগরগী মফম খুদিংনা চাউখৎ-থৌরাংগী অনৌবা থাক কয়া ফংলকপগী মতম কুইদ্রবনি।

ইচিল ইনাওশিং,

হিথাংফম্না মরম ওইরগা চাউখৎপা পুরকপা হায়বসিগী মতাংদা ভবনাগরনা মরু ওইবা সেন্তর অমা ওইরক্লগনি। হিথাংফমশিং অসিনা তোঙানবা ইন্দস্ত্রীগগী মরক্তা মলতি মোদেল কন্নেক্তিবিতী লৈহনগনি। মালগারীগীদমক্তা তোঙানবা ত্রেক শেম্লিবা অসিনা হিথাংফমগসু শম্নহনগনি অমসুং অতোপ্পা হাইৱে অমদি রেলগসু নীংথিনা শম্নহনগনি। পি.এম. গতিশক্তী নেস্নেল মাস্তর প্লান্না মসিগুম্বা কন্নেক্তিবিতীগী প্রোজেক্তশিংদা য়াম্না তেংবাংগনি। মসিনা হায়বদি, ভবনাগরগী হিথাংফম অসিনা আত্মানির্ভর ভারতকী খোঙজংদা অচৌবা থৌদাং লৌগনি অমসুং থবক্কী মশিং থীঙমদ্রবা খুদোংচাবা কয়া লৈহনগনি হায়বনি। মফম অসিদা হৌজিক স্তোরেজ, ত্রান্সপোর্তেসন অমসুং লোজিস্তিক্সকা মরী লৈনবা কারবার কয়া পাকথোক চাউথোক্লগনি। হিথাংফম অসিনা ভেহিকল স্ক্রেপ্পিং, কন্তেনর শাবা অমসুং ধোলেরা স্পিসিএল ইনভেস্তমেন্ত রিজনগুম্বা অচৌবা প্রোজেক্ত কয়াদা তেংবাংগনি। মসিদগী থবক্কী অহেনবা খুদোংচাবা কয়া অমুক লৈরক্কনি।

মরূপশিং,

অলং অসি মালেমগী খ্বাইদগী শিপয়ার্দ হায়না খঙনৈ। অলং খঙদবা মীওই অমত্তা লৈরম্লোই হায়না খল্লি। কেন্দ্রনা সরকারনা ভেহিকল স্ক্রেপিং পোলিসী অনৌবা অমা পুথোক্লে। মদুনা থবক্তা পাংথোকপা হেক হৌবগা, পোলিসী অসিগী খ্বাইদগী য়াম্না হেন্না কান্নবা ফংগদৌরিবা অসি ভবনাগরনা ওইগনি হায়না ঐহাক্না য়াম্না থাজনা হায়রি। মসিগী মরমদি করিগীনো হায়বদা, অলংদা স্ক্রেপিংগা মরী লৈনবা তঙাই ফদবা পুম্নমক লৈবননি। অচৌ-অচৌবা জহাজ করম্না স্ক্রেপ তৌই হায়বগী অকুপ্পা লৌশিং লৈ। মসিনা জহাজখক নত্তনা অতোপ্পা অপীকপা গাড়ি কয়া স্ক্রেপিং তৌবগী মফমসিনা চাউরবা সেন্তর অমা ওইবা য়াই। মালেমগী অতোপ্পা মফমদগীসু অতোপ্পা গারীশিং পুরক্তুনা মফমসিদা স্ক্রেপিং তৌসি হায়না ঐহাক্না ওন্তোপ্রিনরশিংগী মফমদা হায়দ্রবসু য়ারে হায়না খল্লি।

মরূপশিং,

মফমসিদা জহাজশিং থুগাইদুনা ফংবা য়োৎশিংবু কন্সত্রক্সন সেক্তরদা য়াম্না কান্ননা শিজিন্নবা য়াই। কন্তেনরগীদমক্তা লৈবাক অমগী মখা পোন্দুনা লৈবদা শিংনবা কয়া য়াম্না থেংনখি হায়বা ঐখোয়না হন্দক্তা ইকুই কুইদনা উরে। মসিদি ভাবনাগরগী অচৌবা খুদোংচাবা অমনি। নাকল অমদা, মালেমগী কারবারদা ভারতকী শরুক হেনগৎলগনি, অদুগা নাকল অমদনা, মালেম্না কন্তেনরগা মরী লৈননা থাজবা য়াবা খোঙলোই থিরিবনি। মালেম পুম্বনা কন্তেনর লাখ কয়াগী মথৌ তারিবনি। ভাবনাগরদা শাগদৌরিবা কন্তেনরশিংনা ভারতকী পাঙ্গল হাপকনি অমসুং মফমসিগী মীওইশিংগী থবক্কী খুদোংচাবা কয়াসু পীগনি।

মরূপশিং,

মীয়ামগী সেবা তৌনীংবগী ৱাখল্লোন্দা অপাম্বা লৈরবা, অহোংবা পুরক্নিংবগী অনীংবা লৈরবা, চাউর-চাউরবা পান্দম ফাওবা ফংবা ঙমগনি। সুরত্তগী ভাবনাগরদা লাকপা গারীশিংগী করি ফিভম ওইরম্মি হায়বা ঐখোয়না নীংথিনা খঙলবনি। পুং য়াম্না চঙবা খোঙচৎ, এক্সিদেন্ত কয়া থোকপা, পেত্রোল-দিজলগীদমক্তা শেল পুথোকপা, নুংঙাইতবগী নুংঙাইতবা ঙাক্তা থেংনরম্বনি। হৌজিক্তি পুন্সিদা অমাঙ অতা থোকপগী চাংসু হন্থরে, ভারা অমসুং মতমসু য়াম্না কনবা ঙম্লে। ঐখোয়না খুদোংচাদবা কয়া মাইয়োক্নদুনা ধোধা-দহেজ ফেরী হৌদোক্তুনা উৎলে, মসিগী মঙলান মঙফাওনহল্লে। ধোধা-হজীরা রো-রো ফেরী সর্ভিসনা মরম ওইরগা সাউরাস্ত্রা অমসুং সুরতকী মরক্কী অথাপ্পবু চাউরাক্না কিলোমীতর ৪০০ হেন্না হন্থহন্দুনা হৌজিক্তি অথাপ্পসি কিলোমীতর ১০০দগী তানা লৈরে। সেবা অসিদা তেল্লবা মতমদা চাউরাকপা য়াত্রী লাখ ৩না খোঙচৎ চৎখরে। গাড়ি লিশিং ৮০ হেনববু মফম অমদগী মফম অমদা পুখি, অদুগা হন্দক্কী চহিগী ওইনা, মসিনা হৌজিক ফাওবদা পেত্রোল-দিজল লীতর লাখ ৪০ হেন্না কনবা ঙমখ্রে। মসিনা হায়বদি, শেলশিং অসি অদোমগী ফুরিৎখাওদগী চত্ত্রে হায়বনি। অদুগা জহাজ কয়াগী লম্বীসু রুত অসিনা হাঙহল্লে।

মরূপশিং,

ঐখোয়গী হোৎনজমন্দগী সেক্তর অসিদা ত্রান্সপোর্তেসন খক নত্তনা তুরিজমগী সেক্তরদসু কান্নবা য়াম্না ফংলে, পুক্নিং য়াম্না থৌগৎলে। ঐখোয়গী সমুদ্রগী হেরিতেজ ঙাক শেন্দুনা তুরিজমগী পাঙ্গলদা ওন্থোক্নবা গুজরাতকী সমুদ্র তোর্বানগী মফমশিংদা থবক কয়া অমা পায়খৎলি। লোথলদা লৈগদৌরিবা মেরিতাইম ম্যুজিয়মগী মতাংদা মীওই মশিং য়াম্বনা খঙলমদবা য়াই। লোথলনা মালেমগী মফমদা মমিং তানবা ঙমগদবা অদুগুম্বা মখলগী মেরিতাইম ম্যুজিয়ম অমা হৌজিক শারি। স্তেচ্যু ওগ য়ুনিতীনা মশাগী শক্তাক অমা শেম্বগুম্না, লোথলগী ম্যুজিয়ম্নসু মশাগী শক্তাক শেম্লগনি। মসি ঐখোয়গী ওইনা য়াম্না চাউথোচনীংঙাইনি। মালেমগী খ্বাইদগী অরীবা হিথাংফম অসি ঐখোয়গী গুজরাতকী লোথলদা লৈরিবনি, ভাবনাগরগী সমুদ্র তোর্বানসিদা লৈরিবনি। লোথল অসি ঐখোয়গী হেরিতেজকী য়াম্না মরু ওইবা মফম্নি। মসিবু মালেমগী লমকোয়বগী মেপ্তা য়াম্না থুনা পুরক্নবগীদমক্তা খোঙজেল য়াঙনা থবক পায়খৎলি। লোথলগা লোয়ননা, ভেলাভদার নেস্নেল পার্ক্কী ইকো-তুরিজম সর্কিৎনা ভবনাগরবুসু, মরু ওইনা মসিগী অপীকপা কার্বারশিংবুসু কান্নবা ফংহনগনি।

ইচিল ইনাওশিং,

মরী লৈনবা ই-পাউ খঙদবনা মরম ওইরগা, ঙামীশিংনা পুন্সি মাঙবা য়াবা শিংনবা কয়া থেংনরম্বা মতম অমা লৈরম্মি। হৌখিবা দিকেদ অনিদা ফিভম অসিদা অচৌবা অহোংবা অমা লাক্লে। ঐহাক্না গুজরাতকী মুখ্য মন্ত্রী ওইরিঙৈগী মতমদা, বত্তন কয়া য়াওবা অখন্নবা অঙাংবা বাস্কেত অমা ঙামীশিংদা খুৎশিন্নখিবনি । ইমর্জেন্সী থোকপা মতমদা, ঙামীশিংনা বতন অদুবু নমদুনা কোস্ত গার্দপু তেংবাংগীদমক্তা কৌবা য়াহল্লি। ঙামীশিংগী হিশিংগী ফিভম হেন্না ফগৎহন্নবগীদমক্তা মখোয়গী মফমদা সবসিদী কয়াসু পীখি। লৌমীশিংবু মপাঙ্গল হাপ্পগী থৌওংগা মরী লৈননা, ঙামীশিংগী মফমদা ক্রেদিত কার্দ য়েন্থোকখ্রে।

মরূপশিং,

ঐহাক্না রাজকোত্তা লাক্তুনা হৌদোকখিবা সাউনি য়োজনাবু থবক ওইনা পাংথোক্লবা মতুংদা পুরক্লিবা অহোংবা কয়া অসিদা ঐহাক্না নুংঙাইবা ফাওই। মীখল লাক্লবনিনা মোদীজীনা ৱাফম লাউথোকপা হৌরে হায়না মীদিয়াগী মীওইশিংনা হায়খিবনি। মীখল মতুংদা কাওখ্রগদবনি হায়খি। অদুবু, ঐহাক্না মখোয় লাল্লে তাক্লে। নর্মদা ইমাবু মফম খুদিংদা য়ৌহন্নবা সাউনী য়োজনানা থমখিবা পান্দম ঙসিদি থবক ওইনা পাংথোক্লে, খোঙজেল য়াঙনা পাংথোক্লি। ঐখোয়দি ৱাশক ঙাকপা মীওইনি, ঐখোয়গী খুন্নাইগীদমক্তা হিংবা মীওইনি।

মরূপশিং,

মসিগুম্বা সাউনী প্রোজেক্তকী উরেপ উয়ুং তম্বা মতমদা, নাকল অমদনা মসিগী থবক পাংথোকপসু হৌরে। ঐখোয়না থবক অসিবু কৈদৌনুংদা লেপহনখিদে। ঙসি মীয়ামদা খুৎশিন্নরিবা শরুক অসিনা ভাবনাগর অমসুং অমরেলীগী দাম কয়াদা ঈশিং ফংহল্লি। মসিনা ভবনাগরগী গরিয়াধর, জেসর অমসুং মাহুবা তালুকাগা লোয়ননা অমরেলি জিলাগী রাজুলা অমসুং খমভা তালুকাগী লৌমীশিংদা মশক থোক্না কান্নবা ফংহনগনি। ভবনাগর, গির সোম্নাথ, অমরেলি, বোতার, জুনাগর, রাজকোত অমসুং পোর্বন্দর জিলাগী খুঙ্গং অমসুং শহর কয়াদা য়ৌনবা মরী লৈনবা থবকশিংসু ঙসি হৌখ্রে।

ইচিল ইনাওশিং,

শিংনবশিংগী ৱারোইশিন পুথোকপা, অমসুং চাউখৎ-থৌরাংগী লমদা মনিঙদা লৈহৌরবশিংবু খুৎ শমদুনা চত্তুনা চাউখৎহন্নবা ঙসিগী দবল ইঞ্জিন সরকার অসিনা খোঙফম চেৎনা হোৎনরি। খ্বাইদগী লাইরবদগী লাইরবশিংনা রিসোর্স অমসুং দিগ্নিতী লৈরকপা মতমদা, মখোয়না মশাগী হোৎনজমন্না লাইরবা অমসুং অৱাবা তাববু মাইথীবা পীবা ঙম্মি।ঐখোয়না গুজরাত্তা গরীব কলয়ান মেলা কয়া য়াম্না তোয়না শীল্লি। মসিগুম্বা থৌরম অমদা, ঐহাক্না ভবনাগরগী ইচল অমগী মফমদা ত্রাইসাইকল অমা খুৎশিন্নখি। ইচল অদুনা মহাক্তি ত্রাইসাইকল অমুক ফাওবা থৌদ্রি, অদুনা ইলেক্ত্রিক ত্রাইসাইকল খক ওইনা পীবিয়ু হায়রকখি। লাইরবশিংগী থাজবা অমসুং অপাম্বনা ঙসিসু ঐহাক্কী পাঙ্গল ওইরি। লাইরবশিংগী অনীংবা অপাম্বনা ঐহাক্কী ইফমদা লেপ্পা লৈতনা থবক তৌনবা পাঙ্গল হাপ্লি। ঐহাক্না মফমসিদা লাকপদা মতম খরদি চঙখ্রে, অদুবু খুৎ হাঙনদি লাক্তবনি।

মমাঙগী চহিশিংদা ৱাৎহৌবা কয়াসু ঐহাক্না ঙসি পুদুনা লাক্লবনি। ঐহাক্কী ইফমদা ভাবনাগরগী য়াথং খরসু লৈরিবনি, অদোম্না ভাবনাগরদা লাকপদা নর্সীবাপাগী গন্তিয়া অমসুং দাস কে পেরে নিংশিংই, অদুগা ঐহাক্না গন্তিয়াবু নিংশিংবা মতমদা ঐহাক্না হরিশিংহ দাদাবুসু নিংশিংই। চহি কয়াগী মমাঙদা ঐহাক্না কার্য়করতা অপীকপা অমা ওইনা ফাওবা পার্তী অসিদা থবক তৌদুনা রাজনিতী য়াওদ্রিঙৈ মতমদা গন্তিয়াগী চিঞ্জাক চাবা কনানা তম্বীরম্মি খঙবরা? হরসিংহ দাদানা তম্বীখিবনি। অহমেদবাদতা লাকপা মতমদা, মহাক্না গন্তিয়া পুদুনা লাকখি, ঐখোয়গীদমক্তা য়াম্না খনবীবনি। অদুগা ঙসি, ভাবনাগরদা লাকপা অসিদদি, নবরাত্রীগী চরা হেনবগী মতম তারে, অদুনা মসি চাবদি য়াদ্রে। অদুবু, ভাবনাগরগী গন্তিয়াবু লৈবাক পুম্বনা খঙলিবা অসি ইচম চম্বা ৱাফমদি নত্তে। মসিসু ভাবনাগরগী পাঙ্গলনি। মরূপশিং, ঙসি চাউখৎ-থৌরাংগী প্রোজেক্ত কয়া ঐহাক্না পুদুনা লাক্লি। মসিনা লমদমসিগী লাক্কদৌরিবা চারোন শুরোনশিংগী মপাঙ্গল হাপকনি। ভাবনাগরগী তুংগী মতম্বু য়াম্না য়াইফহনগদবা প্রোজেক্তশিংনি। সাউরাস্ত্র, গুজরাত অমসুং লৈবাক পুম্বনা মসিগী কান্নবা ফংগনি। ইচিল ইনাওশিং, অদোম্না ঐহাকপু নুংশিবীবগীদমক্তা অমসুং মশিং য়াম্না লাকপীবগীদমক্তা ঐহাক্না পুম্নমকপু থাগৎচরি। অদোম পুম্নমক্না খুৎ অনি থাংত্তুনা অমুক্তা লাওমিন্নসিঃ

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

হন্না হন্না থাগৎচরি।

দিসক্লেমরঃ প্রধান মন্ত্রী ৱারোল অসি গুজরাতীদা ঙাঙবনি, অমসুং মসিনা ৱাহন্থোক্নি।

*****