بھاونگر کے تمام پیاروں کو نوراتری کی بہت بہت مبارک باد۔ سب سے پہلے مجھے بھاونگر سے معافی مانگنی ہے، میں ماضی میں اتنے لمبے عرصے تک کبھی بھاونگر آنے سے نہیں چوکا، اس طرح کا یہ پہلا واقعہ ہے۔ میں بیچ میں نہیں آ سکا، لہذا میں معذرت خواہ ہوں۔ اور پھر بھی میں اس آشیرباد کو کبھی نہیں بھولوں گا جو آپ نے آج نچھاور کیے ہیں، جو محبت آپ نے دی ہے۔ دور دور تک میں دیکھ رہا ہوں، اتنی بڑی تعداد میں اور وہ بھی اتنی گرمی میں، میں آپ سب کو سلام کرتا ہوں۔

آج بھاونگر سے میری ملاقات خاص ہے۔ جہاں ملک نے آزادی کے 75 سال پورے کر لیے ہیں، وہیں اس سال بھاونگر اپنے قیام کے 300 سال پورے کرنے جا رہا ہے۔ 300 سال کے اس سفر میں بھاونگر نے پائیدار ترقی کے لیے سوراشٹر کی ثقافتی راجدھانی کے طور پر اپنی پہچان بنائی ہے۔ اس ترقیاتی سفر کو ایک نئی جہت دینے کے لیے آج یہاں کروڑوں روپے کے کئی پروجیکٹوں کا افتتاح کیا گیا اور سنگ بنیاد رکھا گیا ہے۔ ان پروجیکٹوں سے بھاونگر کی شناخت مضبوط ہوگی، سوراشٹر کے کسانوں کو آبپاشی کا ایک نیا تحفہ ملے گا، خود کفیل بھارت مہم کو مزید تقویت ملے گی۔ علاقائی سائنس مرکز کی تعمیر کے ساتھ، تعلیم اور ثقافت کے شہر کے طور پر بھاونگر کی شناخت کو مزید تقویت ملے گی۔ ان تمام منصوبوں کے لیے آپ سب کو بہت بہت مبارکباد۔

بھائیو اور بہنو،

میں جب بھی بھاونگر آیا ہوں، تو میں ایک بات ضرور کہتا رہا ہوں۔ گذشتہ ڈھائی تین دہائیوں سے سورت، وڈودرا اور احمد آباد کی جو گونج رہی ہے، وہ اب راجکوٹ، جام نگر، بھاونگر کی ویسی ہی گونج ہونے والی ہے۔ سوراشٹر کی خوشحالی میں میرا بھروسہ مضبوط ہوا ہے کیونکہ یہاں صنعت، کھیتی باڑی، سیاحت، تینوں کے لیے بے مثال امکانات ہیں۔ آج کا پروگرام اس سمت میں تیزی سے بڑھتی ہوئی ڈبل انجن حکومت کی کوششوں کا جیتا جاگتا ثبوت ہے۔ بھاونگر ایک سمندر کے کنارے آباد ضلع ہے۔ گجرات میں ملک کی سب سے لمبی ساحلی پٹی ہے۔ لیکن آزادی کے بعد کئی دہائیوں میں ساحلی ترقی پر زیادہ توجہ نہ دینے کی وجہ سے یہ بہت بڑا ساحل ایک طرح سے لوگوں کے لیے ایک بڑا چیلنج بن گیا تھا۔ سمندر کا کھارا پانی یہاں کے لیے ایک لعنت بنا ہوا تھا۔ ساحل سمندر پر واقع گاؤں کے گاؤں خالی ہوگئے تھے۔ لوگ ادھر ادھر ہجرت کرنے لگے تھے۔ بہت سے نوجوان سورت جاتے تھے، ایک ہی کمرے میں 10-10، 15-15، 20-20 لوگ رہتے تھے۔ یہ صورت حال انتہائی افسوسناک تھی۔

ساتھیو،

گذشتہ دو دہائیوں میں ہم نے گجرات کی ساحلی پٹی کو بھارت کی خوشحالی کا گیٹ وے بنانے کے لیے مخلصانہ کوششیں کی ہیں۔ روزگار کے بہت سے نئے مواقع پیدا ہوئے ہیں۔ گجرات میں ہم نے بہت سی بندرگاہوں کو ترقی دی، کئی بندرگاہوں کو جدید بنایا، گجرات میں آج تین بڑے ایل این جی ٹرمینل، پیٹرو کیمیکل ہب ہیں اور یہ ملک کی پہلی گزرنے والی ریاست تھی جہاں پہلا ایل این جی ٹرمینل تعمیر کیا گیا تھا۔ ریاست کے ساحلی علاقوں میں، ہم نے سینکڑوں ساحلی صنعتوں، بہت سی چھوٹی اور بڑی صنعتوں کو تیار کیا۔ ہم نے صنعتوں کی توانائی کی مانگ کو پورا کرنے کے لیے کوئلے کے ٹرمینلز کا ایک نیٹ ورک بھی بنایا ہے۔ آج گجرات کے ساحلی علاقوں میں بہت سے پاور پلانٹس ہیں جو نہ صرف گجرات بلکہ پورے ملک کو توانائی فراہم کرتے ہیں۔ اپنے ماہی گیر بھائیوں اور بہنوں کی مدد کے لیے ہم نے ماہی گیری کی بندرگاہیں، فش لینڈنگ سینٹرز بنائے اور فش پروسیسنگ کو بھی فروغ دیا۔ ماہی گیری کی بندرگاہوں کا مضبوط نیٹ ورک جو ہم نے بنایا ہے اسے بھی مسلسل بڑھایا جارہا ہے، جدید بنایا جارہا ہے۔ گجرات کے ساحلی علاقے میں مینگروو جنگلات کو ترقی دے کر ہم نے ساحلی ایکو سسٹم کو زیادہ محفوظ اور مضبوط بنایا ہے، اور اس وقت جو حکومت ہند میں وزیر ہوا کرتے تھے، انھوں نے ایک بار کہا تھا کہ بھارت کی ساحلی ریاستوں کو گجرات سے یہ سیکھنا چاہیے کہ مینگرووز کو کس طرح ترقی دی جائے۔ یہ کام گجرات میں آپ سب کے تعاون سے ہوا ہے۔

ہم نے آبی زراعت کو بھی مسلسل فروغ دیا۔ گجرات ملک کی ان سرکردہ ریاستوں میں سے ایک ہے جہاں سمندری گھاس کی کاشت کے لیے بڑی کوششیں کی گئی ہیں۔ آج گجرات کی کوسٹ لائن نے ملک کی امپورٹ اور ایکسپورٹ میں بہت بڑا رول ادا کیا ہے اور لاکھوں لوگوں کے لیے روزگار کا ذریعہ بھی بن گئی ہے۔ آج، گجرات کی ساحلی پٹی، دوبارہ قابل تجدید توانائی اور ہائیڈروجن ایکو سسٹم کے متبادل کے طور پر ابھر رہی ہے۔ ہم نے سوراشٹر کو توانائی کا ایک اہم مرکز بنانے کی بھی کوشش کی ہے۔ گجرات اور ملک کی توانائی کی ضروریات، اس کی جو ضروریات ہیں، آج یہ علاقہ اس کا بڑا مرکز بنتا جا رہا ہے۔ اب اس علاقے میں شمسی توانائی کے بہت سے منصوبے بھی لگائے جا رہے ہیں۔ آج پالیتانا میں شمسی توانائی کے منصوبے کا افتتاح کیا گیا ہے جس سے علاقے کے بہت سے کنبوں کو سستی اور کافی بجلی فراہم ہوگی۔ ایک وقت تھا، جو لوگ آج 20-22 سال کے ہوں گے، انھیں یہ باتیں بھی معلوم نہیں ہوں گی، ہمارے گجرات میں ایک وقت تھا، جب شام کے کھانے کے وقت بجلی آتی تھی تو خوشی کا دن ہوتا تھا۔ اور مجھے یاد ہے، جب میں وزیر اعلیٰ بنا تھا، تب سے ہی لوگ کہا کرتے تھے کہ کم از کم شام کو کھانا کھاتے وقت بجلی تو مل جاتی ہے۔ وہ تمام دکھ بھرے دن ختم ہوگئے دوستو۔

آج یہاں وافر مقدار میں بجلی ہونے کی وجہ سے کاروبار کے نئے مواقع پیدا ہو رہے ہیں، صنعتیں پھل پھول رہی ہیں۔ دھولیرا میں دوبارہ قابل تجدید توانائی، خلائی اور سیمی کنڈکٹر صنعت میں کی جانے والی سرمایہ کاری سے بھاونگر کو بھی فائدہ ہونے والا ہے۔ کیونکہ ایک طرح سے بھاونگر کا پڑوس کا علاقہ ترقی کر رہا ہے اور وہ دن زیادہ دور نہیں جب احمد آباد سے لے کر دھولیرا، بھاونگر تک یہ پورا علاقہ ترقی کی نئی بلندیوں کو چھونے والا ہے۔

بھائیو اور بہنو،

بھاونگر آج بندرگاہ والی ترقی کے ایک اہم مرکز کے طور پر ابھر رہا ہے۔ یہ بندرگاہ ملک بھر کے مختلف صنعتی علاقوں کے ساتھ ملٹی ماڈل رابطے کو یقینی بنائے گی۔ اس بندرگاہ کو مال گاڑیوں کے لیے بچھائے جانے والے علیحدہ ٹریک سے بھی جوڑا جائے گا اور دیگر شاہراہوں، ریلوے نیٹ ورک کے مقابلے میں بہتر کنکٹیویٹی ہوگی۔ وزیر اعظم گتی شکتی نیشنل ماسٹر پلان ان کنیکٹوٹی پروجیکٹوں کو ایک نئی تحریک دینے جا رہا ہے۔ یعنی بھاونگر کی یہ بندرگاہ خود کفیل بھارت کی تعمیر میں بڑا رول ادا کرے گی اور یہاں روزگار کے سینکڑوں نئے مواقع پیدا ہوں گے۔ اسٹوریج، نقل و حمل اور لاجسٹکس سے متعلق تجارتی کاروبار یہاں توسیع کرنے جا رہا ہے۔ یہ بندرگاہ ٹرینوں کی اسکریپنگ، کنٹینروں کی تیاری اور دھولیرا اسپیشل انویسٹمنٹ ریجن جیسے بڑے منصوبوں کو بھی پورا کرے گی۔ اس سے یہاں نئی ملازمتیں پیدا ہوں گی، خود ملازمتی کے مواقع پیدا ہوں گے۔

ساتھیو،

النگ دنیا کے سب سے بڑے شپ بریکنگ یارڈ میں سے ایک کے طور پر جانا جاتا ہے۔ شاید ہی کوئی ایسا ہو جو النگ کو نہ جانتا ہو۔ مرکزی حکومت نے نئی وہیکل اسکریپنگ پالیسی یعنی پرانی گاڑیوں کو اسکریپ کرنے کے لیے جو پالیسی بنائی تھی، جب یہ نافذ  ہوگی، تو میں دعوے کے ساتھ کہتا ہوں، ساتھیو پورے بھارت میں اگر کسی کو اس وہیکل اسکریپنگ پالیسی کا پہلا اور سب سے زیادہ فائدہ ملنے والا ہے تو آپ لوگوں کو ملنے والا ہے۔ اس کی وجہ یہ ہے کہ النگ کو اسکریپنگ سے متعلق مہارت حاصل ہے۔ وہ جانتے ہیں کہ کس طرح بڑے جہازوں کو اسکریپ کیا جاتا ہے۔ ایسے میں جہازوں کے ساتھ ساتھ دیگر چھوٹی گاڑیوں کو بھی اسکریپ کرنے کے لیے یہ ملک کا ایک بڑا مرکز بن سکتا ہے۔ بھاونگر کے میرے ہونہار کاروباری افراد کو مجھے یہ یاد دلانے کی ضرورت نہیں ہے کہ وہ بیرون ملک سے ان چھوٹی گاڑیوں کے اسکریپ کا کام بھی شروع کریں گے۔

ساتھیو،

یہاں بحری جہازوں کو اسکریپ کرکے جو لوہا نکلتا ہے وہ تعمیراتی شعبے میں آج بھی بہت مفید ہے۔ حال ہی میں ہم نے دیکھا ہے کہ کنٹینرز کے لیے کسی ایک ملک پر حد سے زیادہ انحصار کرنے سے کتنا بڑا بحران پیدا ہوسکتا ہے۔ بھاونگر کے لیے یہ ایک نیا موقع اور ایک بڑا موقع بھی ہے۔ ایک طرف عالمی تجارت میں بھارت کا حصہ بڑھ رہا ہے اور دوسری طرف دنیا کنٹینرز کے معاملے میں بھی قابل اعتماد سپلائر کی تلاش میں ہے۔ پوری دنیا کو لاکھوں کنٹینرز کی ضرورت ہے۔ بھاونگر میں بنائے جانے والے کنٹینرز خود کفیل بھارت کو بھی توانائی فراہم کریں گے اور یہاں روزگار کے بہت سے مواقع بھی پیدا کریں گے۔

ساتھیو،

جب ذہن میں لوگوں کی خدمت کا جذبہ ہو، تبدیلی لانے کی امنگ ہو تو بڑے سے بڑے مقصد کا حصول بھی ممکن ہوجاتا ہے۔ آپ لوگ اچھی طرح جانتے ہیں کہ سورت سے بھاونگر آنے والی گاڑیوں کی کیا حالت تھی۔ گھنٹوں کا سفر، سڑک حادثات، پٹرول اور ڈیزل کے اخراجات، کتنی مشکلات تھیں۔ اب زندگی کا بحران بھی کم ہو گیا ہے، کرائے کے پیسے اور وقت کی بھی بچت ہو رہی ہے۔ تمام تر رکاوٹوں کے باوجود ہم نے گھوگھا دہیج فیری کا آغاز کیا اور اس خواب کو پورا کیا۔ گھوگھا-ہجیرا رو-رو فیری سروس نے سوراشٹر اور سورت کے درمیان فاصلہ تقریباً 400 کلومیٹر سے 100 کلومیٹر سے بھی کم کردیا ہے۔ بہت ہی کم وقت میں اس سروس سے تقریباً 3 لاکھ مسافروں نے سفر کیا ہے۔ یہاں سے 80 ہزار سے زائد گاڑیاں وہاں تک پہنچائی جا چکی ہیں اور رواں سال اب تک 40 لاکھ لیٹر سے زائد پیٹرول اور ڈیزل کی بچت ہو چکی ہے جس کا مطلب ہے کہ آپ کی جیب میں اتنا پیسہ بچا ہوا ہے۔ آج سے اس روٹ پر بڑے بڑے جہازوں کے لیے بھی راستہ صاف ہوا ہے۔

ساتھیو،

آپ سمجھ سکتے ہیں کہ اس علاقے کے عام لوگوں، کسانوں اور تاجروں کے لیے یہ کتنی بڑی خدمت ہے۔ لیکن یہ سب بغیر کسی شور شرابے کے، بڑے بڑے اشتہارات کے پیچھے پیسے ضائع کیے بغیر، یہ سب کچھ کیا جا رہا ہے، ساتھیو کیونکہ ہمارا محرک اور مقصد کبھی بھی اقتدار کا سکھ پانا نہیں رہا ہے۔ ہم ہمیشہ اقتدار کو خدمت کا ذریعہ سمجھتے ہیں۔ یہ ہماری خدمت کا یگیہ چل رہا ہے۔ اس خدمت کی وجہ سے اتنی محبت، اتنی آشیرباد مسلسل مل رہے ہیں، جو بڑھتے ہی جا رہے ہیں۔

ساتھیو،

ہماری کاوشوں کی وجہ سے اس علاقے میں نہ صرف آمدورفت، نقل و حمل  بلکہ سیاحت کو بھی فروغ ملا ہے۔ گجرات کے ساحلی علاقوں میں ہمارے بحری ورثے کو بچانے اور اسے سیاحت کی طاقت بنانے کے لیے بے مثال کام کیا جارہا ہے۔ لوتھل میں بحری میوزیم شاید آپ میں سے بہت کم لوگوں کو معلوم ہوگا، لوتھل میں ایک بحری میوزیم تعمیر کیا جا رہا ہے تاکہ یہ دنیا میں نام کما سکے۔ اسٹیچو آف یونٹی نے جو اپنی شناخت بنا ئی ہے، لوتھل کا بحری میوزیم بھی بنائے گا۔ کیونکہ یہ ہمارے لیے فخر کی بات ہے۔ لوتھل، دنیا کی سب سے پرانی بندرگاہ، ہمارے گجرات کی سرزمین پر ہے، یہ ہمارے بھاونگر کے کنارے پر ہے۔ لوتھل ہمارے ورثے کا ایک اہم مرکز رہا ہے جسے پوری دنیا کے سیاحتی نقشے پر لانے کے لیے سخت محنت کی جا رہی ہے۔ لوتھل کے ساتھ ساتھ ویلاودر نیشنل پارک میں ایکو ٹورزم سے متعلق سرکٹ سے بھاونگر کو بھی فائدہ ہونے والا ہے، خاص طور پر چھوٹے تاجر، چھوٹے کاروباری، تاجر، ان کو خصوصی فائدہ ہونے والا ہے۔

بھائیو اور بہنو،

گذشتہ دو دہائیوں میں سوراشٹر کے کسانوں اور ماہی گیروں دونوں کی زندگیوں میں بڑی تبدیلی آئی ہے۔ ایک وقت تھا جب معلومات کی کمی کی وجہ سے ماہی گیروں کی زندگیاں اکثر خطرے میں رہتی تھیں۔ جب میں یہاں کا وزیر اعلیٰ تھا، تو ماہی گیروں کو ایک سرخ ٹوکری دی جاتی تھی، جس میں مختلف بٹن ہوتے تھے۔ کسی حادثے کی صورت میں، بٹن دبانے سے کوسٹ گارڈ کے دفتر کو براہ راست الرٹ پہنچ جاتا تھا۔ جس سے فوری مدد فراہم کرنا ممکن ہوا۔ 2014 کے بعد ہم نے اس جذبے کو پورے ملک میں پھیلایا گیا ہے۔ ماہی گیروں کی کشتیوں کو جدید بنانے کے لیے سبسڈی دی، کسانوں کی طرح ماہی گیروں کو بھی کسان کریڈٹ کارڈ دیے۔

ساتھیو،

آج جب میں سونی اسکیم سے ہونے والی تبدیلی کو دیکھتا ہوں تو مجھے بہت اطمینان ہوتا ہے۔ مجھے یاد ہے کہ جب میں نے اپنے سوراشٹر میں سونی یوجنا کے بارے میں بات کی تھی، تو میں نے راجکوٹ آ کر اس کی شروعات کی تھی۔ میڈیا کے سبھی لوگوں نے لکھا کہ دیکھو الیکشن آ گیا ہے، اس لیے مودی جی نے اعلان کر دیا ہے۔ الیکشن چلے جائیں گے، آپ بھول جائیں گے۔ لیکن میں نے سب کو غلط ثابت کر دیا۔ آج، سونی اسکیم نرمدا میا کو لے کر تیز رفتاری سے پہنچ رہی ہے، جہاں تک پہنچانے کا عزم کیا گیا تھا، بھائیو، ہم بات کے پکے لوگ ہیں، ہم وہ لوگ ہیں جو سماج کے لیے جیتے ہیں۔

ساتھیو،

اس سونی پروجیکٹ کے ایک حصے کا آج افتتاح کیا گیا اور دوسرے حصے پر کام شروع ہوتا ہے۔ ہم کام کو رکنے نہیں دیتے۔ آج بھی جس حصے کا افتتاح کیا گیا ہے وہ بھاونگر اور امریلی اضلاع کے کئی باندھوں تک پانی پہنچا رہا ہے۔ اس سے بھاونگر کے گریادھر، جیسر اور مہووا تعلقہ کے کئی گاوؤں اور امریلی ضلع کے راجولا اور کھابھا تعلقہ کے کسانوں کو فائدہ ہونے والا ہے۔ بھاونگر، گیر سومناتھ، امریلی، بوٹاڈ، جوناگڑھ، راجکوٹ، پوربندر کے سینکڑوں گاوؤں اور درجنوں شہروں کو پانی فراہم کرنے کے لیے بھی آج نئے سرے سے کام شروع کیا گیا ہے۔

بھائیو اور بہنو،

کمی دور کرنا اور ترقی میں پیچھے رہ جانے والوں کا ہاتھ پکڑ کر آگے بڑھانا ڈبل انجن حکومت کا عزم ہے۔ جب غریب سے غریب کو وسائل ملتے ہیں، جب حکومت اسے وسائل فراہم کرتی ہے تو وہ اپنی تقدیر بدلنا شروع کر دیتا ہے۔ وہ دن رات محنت کرتا ہے اور غربت سے لڑ کر غربت کو شکست دیتا ہے۔ گجرات میں، ہم اکثر غریب کلیان میلوں کا انعقاد کرتے تھے۔ ایسے ہی ایک پروگرام کے دوران، میں نے یہاں بھاونگر میں ایک بہن کو تین پہیوں والی سائیکل دی۔ ایک معذور بہن تھی، تو اس نے مجھ سے کیا کہا۔ آپ دیکھیں، بھاونگر کے لوگوں کے مزاج کو دیکھیں، گجراتیوں کا جذبہ دیکھیں، مجھے بھی اتنا ہی یاد ہے۔ بہن نے کہا کہ مجھے سائیکل چلانا نہیں آتی۔ مجھے الیکٹریکل ٹرائی سائیکل دیں۔ یہ مزاج میرے گجرات کا ہے، یہ مزاج میرے بھاونگر کا ہے اور اس بہن کے ذہن میں جو بھروسہ تھا، وہ بھروسہ میرا سب سے بڑا اثاثہ بھی ہے۔ غریبوں کے یہ خواب، یہ امنگیں مجھے لگاتار کام کرنے کی توانائی دیتی ہیں۔ یہ توانائی آپ کے آشیرباد کے ساتھ رہے، اور آپ کی محبت بڑھتی رہے۔ اور میں آج ضرور کہوں گا کہ مجھے آنے میں چند سال لگے، میں دیر سے آیا، لیکن میں خالی ہاتھ نہیں آیا۔ میں پچھلے برسوں کے بقایا جات بھی لے کر آیا ہوں۔ اور ویسے بھی بھاونگر کا مجھ پر حق ہے بھائی، آپ بھاونگر آئیں اور نرسیباپا کا گانٹھیا، داس کے پیڑے، اور جب گانٹھیا اور پیڑے یاد آتے ہیں تو مجھے اپنے ہری سنگھ دادا کی یاد آتی ہے۔ کئی سال پہلے، میں ایک چھوٹے سے کارکن کے طور پر سیاست میں بھی نہیں تھا۔ اگر کسی نے مجھے گانٹھیا کھانا سکھایا تو ہری سنگھ دادا نے سکھایا ہے۔ جب وہ احمد آباد آئے تو گانٹھیا لے کر آئے، وہ ہماری فکر کرتے تھے۔ آج جب میں بھاونگر آیا ہوں تو نوراتری کا ورت چل رہا ہے، اس لیے اس وقت یہ سب کسی کام کا نہیں ہے۔ پھر بھی بھاونگر کی گانٹھیا ملک اور دنیا بھر میں مشہور ہے، یہ کوئی چھوٹی سی بات نہیں ہے دوستو۔ یہ بھاونگر کی طاقت ہے۔ ساتھیو، آج میں ترقی کے بہت سے پروجیکٹ لے کر آیا ہوں۔ میں بہت سے منصوبوں کے ساتھ آیا ہوں۔ یہ بھاونگر کی نوجوان نسل کے مستقبل کا فیصلہ کرنے کے منصوبے ہیں۔ بھاونگر کے مستقبل میں اضافہ کرنے کا منصوبہ ہے۔ کوئی تصور بھی نہیں کر سکے گا، یہ بھاونگر کی تیز رفتاری سے ترقی کے منصوبے ہیں۔ اور پورے سوراشٹر کو اس کا فائدہ ملے گا، پورے گجرات کو اس کے پھلوں کا مزہ چکھنے کو ملے گا اور ملک کو بھی اس کے پھلوں کا مزہ چکھنے کو ملے گا۔ بھائیو اور بہنو، جو محبت آپ نے نچھاور کی ہے، جو آشیرباد آپ نے نچھاور کیے ہیں۔ آپ اتنی بڑی تعداد میں آئے ہیں، میں آپ کا تہہ دل سے مشکور ہوں۔ میرے ساتھ دونوں ہاتھوں کو اوپر اٹھاکر پوری طاقت کے ساتھ بولیے،

بھارت ماتا کی جئے،

بھارت ماتا کی جئے،

بھارت ماتا کی جئے۔

بہت بہت شکريہ۔

نوٹ: وزیر اعظم کے خطاب کے کچھ اقتباسات گجراتی زبان میں بھی ہیں، جن کی یہاں تشریح کی گئی ہے۔

***

(ش ح – ع ا – ع ر)