ମହାମହିମ, ରାଷ୍ଟ୍ରପତି ପୁଟିନ୍

ସମ୍ମାନିତ ଅତିଥିଗଣ,

ନମସ୍କାର!

ମୋତେ ଭ୍ଲାଦିଭୋସ୍ତକ ଠାରେ ଆୟୋଜିତ ହୋଇଥିବା ସପ୍ତମ ପୂର୍ବାଂଚଳ ଅର୍ଥନୈତିକ ମଂଚରେ ଆପଣଙ୍କ ସହିତ ଆଭାସୀ ରୂପରେ ଯୋଡି ହେବା ନିମନ୍ତେ ସୁଯୋଗ ମିଳିଥିବାରୁ ମୁଁ ବହୁତ ଖୁସି ଅନୁଭବ କରୁଛି । ଏହି ମାସ ଭ୍ଲାଦିଭୋସ୍ତକ ଠାରେ ଭାରତର କନ୍‌ସୁଲେଟ୍‌ର ସ୍ଥାପନାର ତିରିଶ ବର୍ଷ ପୂରଣ ହେବାକୁ ଚିହ୍ନିତ କରୁଛି । ଏହି ସହରରେ ଏକ କନ୍‌ସୁଲେଟ୍ ଖୋଲିବା କ୍ଷେତ୍ରରେ ପ୍ରଥମ ଦେଶ ଭାରତ ହିଁ ଥିଲା । ଏବଂ ସେବେ ଠାରୁ, ଏହି ସହର ଆମ ସମ୍ପର୍କର ଅନେକ ମାଇଲ୍‌ଖୁଂଟର ସାକ୍ଷୀ ହୋଇ ରହି ଆସିଛି ।

ବନ୍ଧୁଗଣ,

୨୦୧୫ରେ ସ୍ଥାପିତ ହୋଇଥିବା ଏହି ମଂଚ, ଆଜି ସୁଦୂର ପ୍ରାଚ୍ୟ ରୁଷୀୟ କ୍ଷେତ୍ରର ବିକାଶରେ ଅନ୍ତର୍ଜାତୀୟ ସହଯୋଗର ଏକ ପ୍ରମୁଖ ବିଶ୍ୱ ସ୍ତରୀୟ ମଂଚ ହୋଇ ଯାଇଛି । ଏଥି ପାଇଁ ମୁଁ ରାଷ୍ଟ୍ରପତି ପୁଟିନ୍‌ଙ୍କର ଦୂରଦୃଷ୍ଟିକୁ ପ୍ରଶଂସା କରୁଛି, ଏବଂ ତାଙ୍କୁ ବହୁତ ଶୁଭେଚ୍ଛା ଜଣାଉଛି ।

୨୦୧୯ ମସିହାରେ ମୋତେ ଏହି ମଂଚରେ ଅଂଶ ଗ୍ରହଣ କରିବା ନିମନ୍ତେ ସୁଯୋଗ ମିଳିଥିଲା । ସେହି ସମୟରେ , ଆମେ ଭାରତର “ଆକ୍ଟ ଫାର୍ ଇଷ୍ଟ” ନୀତିର ଘୋଷଣା କରିଥିଲେ । ଏବଂ ଏହାର ପରିଣାମ ସ୍ୱରୂପ , ସୁଦୂର ପ୍ରାଚ୍ୟ ରୁଷୀୟ କ୍ଷେତ୍ର ସହିତ ବିଭିନ୍ନ କ୍ଷେତ୍ର ଗୁଡିକରେ ଭାରତର ସହଯୋଗ ଅନେକ ପରିମାଣରେ ବୃଦ୍ଧି ପାଇଛି । ଆଜି ଏହି ନୀତି ଉଭୟ ଭାରତ ଏବଂ ରୁଷିଆର “ସ୍ୱତନ୍ତ୍ର ଏବଂ ବିଶେଷାଧିକାରପ୍ରାପ୍ତ  ରଣନୈତିକ ଭାଗୀଦାରିତା”ର ଏକ ପ୍ରମୁଖ ସ୍ତମ୍ଭ ହୋଇ ଯାଇଛି ।

ବନ୍ଧୁଗଣ,

ଆମେ ଅନ୍ତର୍ଜାତୀୟ ଉତର – ଦକ୍ଷିଣ କରିଡର ପ୍ରସଙ୍ଗ ହେଉ, ଚେନ୍ନାଇ -   ଭ୍ଲାଦିଭୋସ୍ତକ  ମାରିଟାଇମ୍ କରିଡରର ପ୍ରସଙ୍ଗ ହେଉ କିମ୍ବା ଉତର ସାମୁଦ୍ରିକ ପଥ ହେଉ, ଯାହା ବି ପ୍ରସଙ୍ଗ ଉପରେ ଆଲୋଚନା କରିଥାଉ , ଭବିଷ୍ୟତରେ ସଂଯୋଗ ଆମର ସମ୍ପର୍କର ବିକାଶ କ୍ଷେତ୍ରରେ ମହତ୍ୱପୂର୍ଣ୍ଣ ଭୂମିକା ନିର୍ବାହ କରିବ ।

ଭାରତ ଆର୍କଟିକ ପ୍ରସଙ୍ଗ ଉପରେ ରୁଷ ସହିତ ନିଜର ଭାଗୀଦାରୀକୁ ସୁଦୃଢ଼ କରିବା ନିମନ୍ତେ ଇଚ୍ଛୁକ ଅଟେ । ଶକ୍ତି କ୍ଷେତ୍ରରେ ମଧ୍ୟ ଉଭୟ ଦେଶ ମଧ୍ୟରେ ସହଯୋଗର ଅନେକ ସମ୍ଭାବନା ରହିଛି । ଶକ୍ତି ସହିତ, ଭାରତ ଔଷଧ ଏବଂ ହୀରା କ୍ଷେତ୍ରରେ ମଧ୍ୟ ସୁଦୂର ପ୍ରାଚ୍ୟ ରୁଷିଆରେ ମହତ୍ୱପୂର୍ଣ୍ଣ ନିବେଶ କରିଛି ।

ରୁଷିଆ କୋକିଂ କୋଲ (କୋଇଲା)ର ଯୋଗାଣ ମାଧ୍ୟମରେ ଭାରତୀୟ ଷ୍ଟିଲ୍ ଉଦ୍ୟୋଗ ନିମନ୍ତେ ଏକ ମହତ୍ୱପୂର୍ଣ୍ଣ ଭାଗୀଦାର ହୋଇ ପାରିବ । ଆମ ଭିତରେ ପ୍ରତିଭାର ଗତିଶୀଳତା କ୍ଷେତ୍ରରେ ମଧ୍ୟ ଉତ୍ତମ ସହଯୋଗ ରହି ପାରିବ । ଭାରତୀୟ ପ୍ରତିଭା ବିଶ୍ୱର ଅନେକ ବିକଶିତ କ୍ଷେତ୍ର ଗୁଡିକର ବିକାଶରେ ଯୋଗଦାନ ଦେଇଛନ୍ତି । ମୋର ବିଶ୍ୱାସ ରହିଛି ଯେ ଭାରତୀୟ ମାନଙ୍କର ପ୍ରତିଭା ଏବଂ ପେଶାଦାରୀ ମନୋଭାବ ସୁଦୂର ପ୍ରାଚ୍ୟ ରୁଷୀୟ କ୍ଷେତ୍ରରେ ଦ୍ରୁତ ଗତିରେ ବିକାଶ ଆଣି ପାରିବ ।

ବନ୍ଧୁଗଣ,

ଭାରତର ପ୍ରାଚୀନ ସିଦ୍ଧାନ୍ତ “ବସୁଧୈବ କୁଟୁମ୍ବକମ୍‌” ଆମକୁ ସମଗ୍ର ବିଶ୍ୱକୁ ଗୋଟିଏ ପରିବାର ରୂପରେ ଦେଖିବା ନିମନ୍ତେ ଶିକ୍ଷା ଦେଇ ଆସିଛି । ଆଜିର ଜଗତୀକରଣ ବିଶ୍ୱରେ , ଦୁନିଆର କୌଣସି ଏକ ଅଂଶରେ ଘଟୁଥିବା ଘଟଣା ଗୁଡିକ ସମଗ୍ର ବିଶ୍ୱ ଉପରେ ପ୍ରଭାବ ସୃଷ୍ଟି କରିଥାଏ ।

ୟୁକ୍ରେନ୍ ଯୁଦ୍ଧ ଏବଂ କୋଭିଡ୍ ମହାମାରୀ ଦ୍ୱାରା ଅନ୍ତର୍ଜାତୀୟ ଯୋଗାଣ ବ୍ୟବସ୍ଥା ଶୃଙ୍ଖଳା ଉପରେ ବହୁତ ପ୍ରଭାବ ପଡିଛି । ଖାଦ୍ୟଶସ୍ୟ, ସାର ଏବଂ ଇନ୍ଧନର ଅଭାବ ବିକାଶଶୀଳ ଦେଶ ଗୁଡିକ ନିମନ୍ତେ ବହୁତ ଚିନ୍ତାର ବିଷୟ ହୋଇ ଯାଇଛି । ୟୁକ୍ରେନ ଯୁଦ୍ଧର ଆରମ୍ଭ ହେବା ଠାରୁ ହିଁ ଆମେ କୂଟନୈତିକ ମାର୍ଗ ଏବଂ ପାରସ୍ପରିକ ଆଲୋଚନାର ମାଧ୍ୟମକୁ ଆପଣେଇବାର ଆବଶ୍ୟକତା ଉପରେ ଗୁରୁତ୍ୱ ଦେଇ ଆସିଛୁ । ଆମେ ଏହି ଯୁଦ୍ଧକୁ ସମାପ୍ତ କରିବା ନିମନ୍ତେ ସମସ୍ତ ଶାନ୍ତିପୂର୍ଣ୍ଣ ପ୍ରୟାସ ଗୁଡିକୁ ସମର୍ଥନ କରୁଛୁ । ଏହି ସମ୍ବନ୍ଧରେ, ଆମେ ଖାଦ୍ୟଶସ୍ୟ ଏବଂ ସାରର ସୁରକ୍ଷିତ ରପ୍ତାନୀକୁ ନେଇ ନିକଟରେ ହୋଇଥିବା ରାଜିନାମାକୁ ସ୍ୱାଗତ କରୁଛୁ ।

ମୋତେ ଏହି ମଂଚକୁ ସମ୍ବୋଧିତ କରିବା ପାଇଁ ସୁଯୋଗ ଦେଇ ଥିବାରୁ ମୁଁ ପୁଣି ଥରେ ରାଷ୍ଟ୍ରପତି ପୁଟିନ୍‌ଙ୍କୁ ଧନ୍ୟବାଦ ଜଣାଉଛି । ଏବଂ ଏହି ମଂଚରେ ଉପସ୍ଥିତ ସମସ୍ତ ସଦସ୍ୟ ମାନଙ୍କୁ ହାର୍ଦ୍ଦିକ ଶୁଭେଚ୍ଛା ପ୍ରଦାନ କରୁଛି ।

ବହୁତ – ବହୁତ ଧନ୍ୟବାଦ ।

****

SSP