প্রধানমন্ত্রীগী লোইশঙ
প্রধান মন্ত্রীনা কোচীদা লুপা করোর ৪৫০০ হেনবা কোচী মেত্রো অমসুং ইন্দিয়ন রেলৱেজকী তোঙান-তোঙানবা প্রোজেক্তশিং উরেপ-উয়ুং তমখ্রে অমসুং জাতিদা খুৎশিন্নখ্রে
“চাউখৎপা ভারতকী রোদমেপ অসিদা মোদর্ন ইনফ্রাস্ত্রকচরনা অচৌবা থৌদাং অমা লৌখি”
“ঐখোয়না ইন্দিয়ন রেলৱেজপু মপুং ফানা অহোংবা পুরকখি। ঙসি লৈবাক অসিদা লৈরিবা রেলৱে স্তেসনশিং অসি এয়রপোর্তশিংগুম্না শেমগৎলি”
“লৌউ-শিংউদগী ইন্দস্ত্রীশিং ফাওবা মোদর্ন ইনফ্রাস্ত্রকচর অসিনা কেরলাদা অনৌবা থবক্কী খুদোংচাবশিং পীরগনি”
“অমৃত কালদা তুরিজম চাউখৎহনবা অসিনা লৈবাক অমা চাউখৎহনবদা চাউনা মতেং পাংগনি”
“কেরলাদা মুদ্রা লোন স্কিমশিংগী শরুক ওইনা অপীকপা ওন্তপ্রিনোরশিংদা লুপা করোর লিশিং ৭০ হেন্না পীখি”
Posted On:
01 SEP 2022 8:24PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি কোচীদা লুপা করোর ৪৫০০রোম ওইগদবা কোচী মেত্রো অমসুং ইন্দিয়ন রেলৱেজকী তোঙান-তোঙানবা প্রোজেক্তশিং উরেপ-উয়ুং তমখ্রে অমসুং জাতিদা খুৎশিন্নখ্রে। ঙসি অঙনবদা প্রধান মন্ত্রীনা কোচীগী কলাদী খুঙ্গংদা লৈবা শ্রী আদী শঙ্কর জন্মভুমি ক্ষেত্রমদা চৎখি।
থৌরম অদুদা ৱা ঙাংলদুনা প্রধান মন্ত্রীনা হায়খি কেরলাগী কাচিন-কোয়া খুদিংমক ওনামগী শেংলবা কুহ্মৈগী নুংঙাইবনা থল্লি। হিংবদা লাইহনবা অমসুং ললোন ইতিক তৌবদা লাইহনবা হেনগৎহনগদৌরিবা প্রোজেক্তশিং অসিগীদমক মীপুম খুদিংমক্তা মহাক্না নুংঙাইবা ফোঙদোকখি। প্রধান মন্ত্রীনা হায়খি, “য়াইফরবা থৌরম অসিদা কেরলাদা লুপা করোর ৪৬০০ হেবগী কন্নেক্তিবিতী প্রোজেক্তশিং খুদোল তমজরি”।
আজাদী কা অমৃত কালগী মতাংদা প্রধান মন্ত্রীনা হায়খি মদুদি ভারত মচাশিংনা লাক্কদৌরিবা চহি ২৫ অসিদা চাউখৎপা ভারত অমা ওইহন্নবা অচৌবা ফিরেপ অমা লৌখি। মহাক্না মখা তারদুনা হায়, “চাউখৎপা ভারতকী রোদমেপতা মোদর্ন ইনফ্রাস্ত্রকচরনা অচৌবা থৌদাং অমা লৌরি। প্রধান মন্ত্রীনা ২০১৭দা মহাক্না কোচী মেত্রো শঙ্গাবগী খুদোংচাবা ফংজখি হায়না নীংশিংখি। ঙসি কোচী মেত্রোগী ফেস I এক্সতেন্সন অসি শঙ্গারি অমসুং কোচী মেত্রোগী অনিশুবা ফেসকী উরেপ-উয়ুং তম্লি। প্রধান মন্ত্রীনা হায়খি কোচী মেত্রোগী অনিশুবা ফেস অসিনা নহারোলশিং অমসুং প্রোফেস্নেলশিংগীদমক্তা খুদোংচাবা অমা ওইরগনি। প্রধান মন্ত্রীনা হায়খি, “চৎথোক-চৎশিনগী পাম্বৈ অমসুং সহরগী চাউখৎ থৌরাংগী মতমদা লাকপদা লৈবাক শিনবা থুংবদা ইম্পেতস-লেদ দিবেলপমেন্ত পাইখৎলি”।
কোচীদা য়ুনিফাইদ মেত্রোপোলিতেন ত্রান্সপোর্ত ওথোরিতী ইমপ্লিমেন্ত তৌবগী মতাংদা প্রধান মন্ত্রীনা হায়খি মদুদি ওথোরিতী অসিনা মেত্রো, বস, ৱাতরৱেজ অসিনচিংবা চৎথোক-চৎশিনগী পাম্বৈ পুম্নমক ইন্তিগ্রেৎ তৌনবা থবক পাইখৎলি। প্রধান মন্ত্রীনা মখা তারদুনা হায়, “মলতিমোদেল কন্নেক্তিবিতীগী মোদেল অসিগা লোয়ননা কোচীগী সহর অসিদা হকথেংননা কান্নবা অহুম পীরগনি। মসিনা সহর অসিগী মীয়ামগী চৎথোক-চৎশিন তৌবগী মতমদা হন্থহল্লগনি, লম্বীশিংদা ত্রাফিক হন্থহল্লগনি অমসুং সহর অসিদা পোলুসন হন্থহল্লগনি। অকোইবগী ফীভম ঙাকশেন্নবা ভারতনা নেৎ জিরোগী অচৌবা ৱাশক অমা লৌখি, মসিনসু হায়রিবশিং অসিদা মতেং পাংলগনি। মসিনা কার্বোন ফুতপ্রিন্ত হন্থহল্লগনি”।
প্রধান মন্ত্রীনা হৌখিবা চহি নিপান্দা কেন্দ্র সরকারনা মেত্রোবু অর্বান ত্রান্সপোর্তকী খ্বাইদগী মাংজিল থারিবা পাম্বৈ অমা ওইহন্নবা লেপ্পা লৈতনা থবক পাইখৎতুনা লাকখি হায়না নৌহৌনা নীংশিংখি। মহাক্না হায়খি মদুদি কেন্দ্র সরকারনা রাজ্য অসিগী অতোপ্পা অচৌবা সহরশিংদা মেত্রো য়ৌহনখি অমসুং মসি কেপিতল খক্তদা লৈবা ওইহনখিদে। প্রধান মন্ত্রীনা হায় ঐখোয়গী লৈবাক অসগী অহানবা মেত্রো অসি চহি ৪০ চেল্লকখি অমসুং অকোনবগী চহি ৩০দা শুপ্নগী মেত্রো রুত কিমি ২৫০ খক্তা হাপচিনখি। হৌখিবা চহি ৮দা পাইখৎখিবা থবক অদুগী মতাংদা প্রধান মন্ত্রীনা হায়খি মদুদি লৈবাক অসিদা মেত্রো রুত কিমি ৫০০ হেন্না হাপচিনখি অমসুং কিমি ১০০০ হেনবগী অনৌবা রুতকী থবক খোঙজেল য়াংনা পাইখৎলি। প্রধান মন্ত্রীনা মখা তারদুনা হায়খি, “ঐখোয়না ইন্দিয়ন রেলৱেজপু মপুং ফানা অহোংবা পুরকখি। ঙসি লৈবাক অসিদা লৈরিবা রেলৱে স্তেসনশিং অসি এয়রপোর্তগুম্না শেমজিল্লি”।
ভক্তা কয়ানা মতম শাংনা তৌদুনা লাক্লবা দিমান্দগী মতাংদা পল্লদুনা প্রধান মন্ত্রীনা হায়খি মদুদি লৈবাক অমসুং মালেম শিনবা থুংবদগী লাইফমলেন অসি লাকপা পাম্বা সবরিমলয়গী ভক্তাশিংগী ওইনা মসি নুংঙাইরবা মীলুপ অমনি। প্রধান মন্ত্রীনা মখা তারদুনা হায়খি, “এত্তুমনুর-চিঙ্গবনম-কোত্তায়ম ত্রেক দব্লিং তৌবা অসিনা ভগৱান অয়প্পা দর্শন তৌবা লাকপদা চাউনা মতেং পাংলগনি”।
কেরলাদা হৌজিক পাইখৎলিবা থবক অসিগী মতাংদা প্রধান মন্ত্রীনা হায়খি মদুদি ঐখোয়না হৌজিক ৱা ঙাংলিঙৈ অসিদা লুপা করোর লাখ ১রোমগী তোঙান-তোঙানবা ইনফ্রাস্ত্রকচর প্রোজেক্তশিং পাইখৎলি। “লৌউ-শিংউদগী ইন্দস্ত্রীশিং ফাইবা মোদর্ন ইনফ্রাস্ত্রকচরনা কেরলাদা অনৌবা থবক্কী খুদোংচাবশিং পীরগনি। কেন্দ্র সরকারনা কেরলাগী কন্নেক্তিবিতীদা চাউনা মীৎয়েং চংলি। ঐখোয়গী সরকারনা কেরলাগী লাইফলাইন হায়না খঙনরিবা, এন.ঐচ. ৬৬ অসি অওনবা পুরক্তুনা লেন ৬তা ওন্থোকখি। মসিদা লুপা করোর লিশিং ৫৫ হেন্না চংখি”, হায়না প্রধান মন্ত্রীনা মখা তাখি।
কান্নবশিং অদু পুথোক্লদুনা প্রধান মন্ত্রীনা হায়খি তুরিজম অমসুং ললোন-ইতিক্না মতমগা চুনবা অমসুং হেন্না ফবা ইনফ্রাস্ত্রকচরদগী চাউনা কান্নবা ফংখি। তুরিজম অসি লায়রবা, মিদল ক্লাস, খুঙ্গং, সহর, মীপুম খুদিংমক্না য়াওরিবা, মীপুম খুদিংমক্না শেল তাল্লিবা ইন্দস্ত্রী অমনি। প্রধান মন্ত্রীনা মখা তারদুনা হায়, “অমৃত কালদা তুরিজম চাউখৎপনা লৈবাক্কী চাউখৎ-থৌরাংদা চাউনা শরুক তমদুনা মতেং পাংগনি”।
কেন্দ্র সরকারনা লৌরিবা থৌদাংগী মতাংদা ফোঙদোক্লদুনা প্রধান মন্ত্রীনা হায়খি তুরিজম সেক্তরদা ওন্তপ্রিনোরশিপকীদমক তোঙান-তোঙানবা ইন্সেন্তিবশিং ফংহল্লি। মহাক্না হায়খি মুদ্রা স্কিমনা লুপা লাখ ১০ ফাওবগী অমসুং গরেন্তী অমত্তা য়াওদনা লায়রবশিংগী মতেং পাংলি। প্রধান মন্ত্রীনা হায়খি, “স্কিম অসিগী মখাদা কেরলাদা তেংবাং ওইনা অপীকপা ওন্তপ্রিনোর লাখ কয়াদা লুপা করোর লিশিং ৭০ হেন্না পীথখি”।
কেরলাগী লৈখিবা অখন্নবা মওং অসিগী মতাংদা প্রধান মন্ত্রীনা হায়খি মীয়াম্না য়েংশিনবা অমসুং খনবীবা হায়বা অসি খুন্নাইগী পুন্সিগী শরুক অমনি। মহাক্না হায়খি, “নুমিৎ খরনিগী মমাংদা ঐহাক্না হরিয়ানাদা মা অমৃতানন্দময়িজীগী অমৃতা হোস্পিতাল শঙ্গাবগী খুদোংচাবা ফংজখি। মীনুংশিনা থনবা অমৃতানন্দময়ী অম্মাগী থৌজালশিংসু ঐহাক্না ফংজখি। ঙসি ঐহাক্না কেরলাগী লমদম অসিদগী অমুক হন্না তৌবীমল খঙবা উৎচরি”।
প্রধান মন্ত্রীনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী তঙাই ফবা লাইৱা অসিগী মতাংদা প্লদুনা সরকার অসিনা ৱাখল্লোনশিং অসিদা য়ুম্ফম ওইরগা লৈবাক অসিবু চাউখৎহল্লি হায়না ফোঙদোক্লদুনা মহাক্কী ৱারোল পীবা লোইশিনখি। প্রধান মন্ত্রীনা অমৃত কালদা চাউখৎপা ভারতকী চাংশিল্লিবা লম্বেল অসি মপাঙ্গল কনখৎহন্নবা ৱাশকখি।
থৌরম অদুদা কেরলাগী মুখ্য মন্ত্রী শ্রী পিনারাই বিজয়ন, কেরলাগী রাজ্যপাল, শ্রী অরিফ মোহম্মদ খান, মপাল থৌরমগী কেন্দ্রগী রাজ্য মন্ত্রী, শ্রী ভি. মুরালীধরন, রাজ্যগী মন্ত্রীশিং, শ্রী পি. রাজীব অমসুং এদভোকেৎ এন্থোনী রাজু, মেম্বর ওফ পার্লিয়ামেন্ত, শ্রী হিবি ইদেন, কোচী কোর্পোরেসনগী মেয়র, এদভোকেৎ এম. অনিলকুমারনা শরুক য়াখি।
প্রোজেক্তশিংগী অকুপ্পা ৱারোল
প্রধান মন্ত্রীনা পেত্তাদগী এস.এন. জঙ্কসন ফাওবগী কোচী মেত্রো রেল প্রোজেক্তকী ফেস I এক্সতেন্সন শঙ্গাখ্রে। প্রোজেক্ত অসিগী অপুনবা শেনফম অসি লুপা করোর ৭০০ হেনখি। কোচী মেত্রো রেল প্রোজেক্ত অসি সোলর পাৱরনা মথৌ তাবা ইনর্জীগী ৫৫%গী ময়া পীবগা লোয়ননা লৈবাক অসিগী খ্বাইদগী সস্তেনেবল ওইবা মেত্রো প্রোজেক্তশিংগী মনুংদা অমা ওইরগনি। প্রধান মন্ত্রীনা জে.এল.এন. স্তেদিয়মদগী ইনফোৱপার্ককী কোচী মেত্রো রেল প্রোজেক্তকী ফেস- IIগী মশাংগী উরেপ উয়ুং তমখি। মসিগী অশাংবা কিমি ১১.২ ওইখি অমসুং স্তেসন ১১ কোনশিল্লি। প্রোজেক্ত অসিগী অপুনবা চংগনি পান্নরিবা শেনফম অসি লুপা করোর ১,৯৫০নি। কোচী মেত্রো রেল প্রোজেক্তকী প্রপোজ তৌখিবা ফেস II কোরিদোর অসিনা কোচী সহরগী ত্রান্সপোর্তেসনগী মথৌ তাবা হেনগৎলক্লিবশিং অসিগী মতেং পাংলগনি অমসুং মসিনা হৌজিক লৈরিবা মেত্রো রেল নেৎৱার্ক্কা লোয়ননা সহর অসিগী দিস্ত্রিক্ত হেদক্বাতরশিং, স্পেসিএল ইকনোমিক জোন অমসুং আই.তি. হবকা শম্নহন্নবা মওং অমদা থৌরাং তৌখি। লোইশিল্লকপদা অপুনবা ফেস I অমসুং ফেস II মেত্রো নেৎৱার্কনা রেলৱে স্তেসনশিং অমসুং বস স্তেসনশিংগুম্নবা মরু ওইবা ত্রাঞ্জিৎ হবশিংগা লোয়ননা সহরদা লৈরিবা মরু ওইবা রেসিদেন্সিএল অমসুং কম্মর্সিএল হবশিংগা শম্নহল্লগনি, মতৌ অসুম্না মলতি-মোদেল ইন্তিগ্রেসন অমসুং লাস্ত-মাইল কন্নেক্তিবিতীগী ৱাখল্লোন নৌহৌনা ফোহল্লগনি।
প্রধান মন্ত্রীনা জাতিদা এত্তুমনুর-চিঙ্গবনম-কোত্তায়ম রেল সেক্সন দব্লিং তৌরবা লুপা করোর ৭৫০গী ময়া চংনা শাখিবা অসি খুৎশিন্নখি। মসিগা লোয়ননা তিরুবনন্তপুরমদগী মেঙ্গলুরু ফাওবগী অপুনবা অশাংবা অসি মপুং ফানা দব্লিং তৌখি, খোঙজেল য়াংবা অমসুং অপনবা লৈতবা কন্নেক্তিবিতী ফংহনখি। সবরিমলয়গী ভগৱান অয়প্পাগী খুভমদা লাকপা ভক্তা লাখ কয়ানা দবল সেক্সন অসিদা কোত্তায়ম নত্ত্রগা চেঙ্গনুর রেলৱে স্তেসনদা নুংঙাইনা কুমথবা য়ারগনি অমসুং মখা আনা গারীদা পম্বা তম্না চৎপা য়ারগনি। প্রধান মন্ত্রীনা নৌনা ইলেক্ত্রিফাইদ তৌখিবা কোল্লম – পুনালুরগী মরক্তা লৈরিবা রেল সেক্সন জাতিদা খুৎশিন্নখি।
প্রধান মন্ত্রীনা কেরলাদা রেলৱে স্তেসন অহুম – ইর্নাকুলম জঙ্কসন, ইরনাকুলম তাৱর অমসুং কোলম হায়রিবশিং অসি নৌনা শেমগৎনবগীদমক উরেপ-উয়ুং তমখি। স্তেসনশিং অসি নৌনা শেমগৎপগী প্রোজেক্ত অসি পুন্না লুপা করোর ১০৫০রোম ওইরবা য়াই। রেলৱে স্তেসনশিং অসিদা স্তেৎ-ওফ-দি-আর্ত এমেনিতীশিং অমসুং মালেমগী থাক্কী ফেসিলিতীশিং খুদম ওইনা দেদিকেতেদ এরাইবেল/দিপার্চর কোরিদোরশিং, স্কাইৱাক্স, সোলর পেনেলশিং, সিৱেজ ত্রীৎমেন্ত প্লান্তশিং, ইনর্জী চাদবা মৈ, নোংগী ইশিং য়োকশিনবা অমসুং ইন্তরমোদেল ত্রান্সপোর্তশিং অসিগুম্বা য়াওরি।
*****
(Release ID: 1856193)
Visitor Counter : 128
Read this release in:
Bengali
,
English
,
Urdu
,
Marathi
,
Hindi
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam