ইকাইখুম্নজরিবা উপ্প-রাস্ত্রপতি, ঙসি তিনবীরিবা সেনিয়র মেম্বরশিং, শক্নাইরবা পার্লিয়মেন্তরিয়ন অমসুং অতৈ মীথুংলেন পুম্নমক্কী মফমদা।

ভেঙ্কৈয়জিবু ঐহাক্না খঙজবা ফাওবদদি বিদাই পীবা হায়বসি ওইথোক্কনি হায়না খনজদে। ১১গী মতুংদা ফাউবদা, করিগুম্বা থবক খরগীদমক, নৎত্রগা ঈ পাউ খরগীদমক নৎত্রগা অদোমগী পুন্সিগী ওইবা মতাংদা লৈবা মরুওইবা পাউগীদমক ওইরবসু কোল অমদি অদুম্মক লাক্কনি হায়না থাজৈ। নাকল অমরোমদা মহাক্তি মতম চুপ্পদা এক্তিব ওইদুনা লৈবা মীশকনি। মহাক্তি মীকুপ খুদিং মীয়াম মরক্তা অদুমক তিন্দুনা লৈ, অমসুং মসিনা মহাক্কী খ্বাইদগী ৱাংবা ইকাইখুম্নফম ওইরি। মহাক্কী পুন্সিবু হংগৎনা য়েংবা মতমদা, ঐহাক্না পার্তীগী সংস্থান্দা য়াওদুনা থবক তৌরিঙৈ অমসুং অতলজিগী সরকার শেম্বা মতমগী মতাংদা ৱাফম খরা ফোংদোকচনিংই। মন্ত্রীশিংগী কাউন্সিল শেম্লিঙৈ মনুংনি। ঐহাক্না সংস্থানগী ওইবা থবক খরা পায়রিঙৈ, ঐহাক্কা ভেঙ্কৈয়জিগগী মরক্তা ৱারী শানবা হৌখিবসি তপ্না তপ্না হেনগৎলকখি। খারোমদগী ভেঙ্কৈয়জিগুম্বা মকোক থোংবা লুচিংবা অমনা মন্ত্রী অমা ওইরকপা য়াই হায়বসি অদুমক উবা ঙমখ্রে। মহাক্না ঐহাক্কী ইফমদা ফোংদোকপীখি মদুদি কনানা মন্ত্রী ওইগদগে অমসুং মন্ত্রীশিং অসিনা করম্বা মখলগী থবক অমসুং বিভাগ পায়গদগে হায়বসি প্রধান মন্ত্রীগী থৌশিল মখাদা লৈবা তারবসু মহাক্তি হিদান্নফম ওইবা বিভাগ অমত্তা পামখিদে। মহাক্না হায়বীখি মদুদি করিগুম্বা প্রধান মন্ত্রীনা ৱারৌবীদবা তারবদি, মহাক্তি খুঙ্গং চাউখৎনবা থবক ওইনা পায়বা পামজৈ। খুঙ্গং চাউখৎহনবনা মহাক্কী ৱাখলদা লৈখি। মসিগী অপাম্বসিমকসু য়াম্না চাউবা মগুন অমনি।

অতলজিগী মফমদা ভেঙ্কৈয়জিগী ওইবা থবক অমা লৈজরম্মি, অদুবু ভেঙ্কৈয়জিগী ৱাখলদদি অসুম্না লৈবনা অতলজিনা তঙাইফদবা ৱারেপ অদু লৌখি অমসুং ভেঙ্কৈয়জিনা থবক অদুবু নীংথিনা পায়খৎখি। হৌজিক্তি মহাক্না হোৎনজরকপনি হায়গদবা অমসু লৈরি। ভেঙ্কৈয়জি খুঙ্গং চাউখৎ থৌরাং মন্ত্রালয়বু য়েংশিনবা অমা ওইবদা নত্তনা শহর চাউখৎ থৌরাংসু য়েংশিনখি। মসিনা, করিগুম্বা হীরম অমদা, চাউখৎ থৌরাংগী ওইবা হীরম অনিমক্তা হৈথোই শিংথোইবগী চাং অদু উৎলে।

মহাক্না রাজ্য সভাগী মেমবর ওইবা অহানবা উপ্প-রাস্ত্রপতি অমসুং অহানবা রাজ্য সভাগী চীয়রমেনসু ওইখি। অসিগুম্বা লাইবক অসিদি মীওই খরখক্তগী ৱারীনি। ভোঙ্কৈয়জিনা অসিগুম্বা মফম অমা ফংবা অমত্তা ঙাইরবা মীশক অমা ওইরম্বা য়াই। রাজ্য সভাদা মতম কুইনা লৈরম্লবা অমসুং পার্লিয়মেন্তকী ওইবা থবক কয়া পায়রম্বা মীওই অমা হায়বসি মহাক্না হাউজ অসিদা করি থোক্লিবগে, 'মনুংদা করি লৈরি', তোঙান-তোঙানবা পার্তীশিংনা তৌনরিবশিং অমসুং ত্রেজরি বেঞ্চতগী লাক্কদবা থবকশিংনা করিনো হায়বা পুম্নমক খঙলম্বা য়াই। অসিগুম্বা পুম্নমক অসি মহাক্না মুন্না খঙই অমসুং মরম অসিনা চীয়রমেন অমা ওইনা নাকল অনিমকপু মহাক্না মমুৎ তানা খঙই। অতোপ্পা অমদনা, থেংনরকখিবা কয়া অসি ত্রেজরি বেঞ্চতদি অদুক্কী মতীক কান্নবা ফংই, অদুগা অতোপ্পা অমদনা মসিনা ওপোজিসন্দা লৈরিবা মরুপশিংদদি অৱাবা মাইয়োক্নৈ। অদুম ওইনমক, মহাক্তি হাউজ অসিবু মতৌ করম তৌনা নীংথিনা চৎহনগদগে অমসুং লৈবাক অসিগীদমক কদাইফাওবা হাউজ অসিনা তৌবা ঙম্বগে হায়বদুতমক খনখি। মহাক্না পার্লিয়মেন্তরী কম্মিতীবু অফবা মওংদা চৎনবা অমসুং ওইরক্লিবা পুম্নমক মমল লৈহন্দবা য়াদে হায়না হোৎনখি। ভেঙ্কৈয়জিনা পার্লিয়মেন্তরী কম্মিতীগী মথৌশিংবু চেকশিন্না য়েংশিঞ্জবা অহানবা চীয়রমেনসু ওইরম্বা য়াই। মহাক্না মহাক্কী অপাম্বা অমসুং পামদবশিং ফোঙদোক্লদুনা মসিবু হেন্না ফগৎনবা লেপ্পা লৈতনা হোৎনখি।

ঙসি ঐখোয়না ভেঙ্কৈয়জিনা তৌবীরম্বা থবকশিংবু শিংথাজবা মতমদা, মহাক্না চীয়রমেন ওইরিঙৈদা পার্লিয়মেন্তকী মীহুৎ অমা ওইনা ঐখোয়গী ইফমদগী পামজরম্বশিং অদু মঙফাওনহনগদবনি হায়বা ৱারেপ অসি লৌমিন্নগদবনি হায়না থাজৈ। করিগুম্বা ঐখোয়না ঐখোয়গী পুন্সিদা মহাক্কী পাউতাকশিং ইনবা তারবদি অফবতমক ওইগনি হায়না ঐহাক্না থাজৈ।

ভেঙ্কৈয়জিগী অয়াম্বা মতমদি চৎপনা ওইখি। মহাক্না তোঙান-তোঙানবা মফম কয়া অমা খোঙশাল্লুরে। হৌখিবা চহি য়াংখৈরোমগী মনুংদি অসুম্না লেনখি। কোরোনাগী মনুংদা, নোংমা ঐখোয় ইচম চম্না ফমদুনা ৱারী শান্নরম্মি। কোরোনা লাইচৎ অমসুং লোকদাউন অসিনা মরম ওইদুনা কনানা খ্বাইদগী হেন্না ৱাগদগে হায়না ঐহাক্না হংখি। মীপুম খুদিংমক ঐহাক্কী ৱাহং অসিনা চঙক্নহনখি। ঐহাক্না অমুক্কা হংখি, কনানা খ্বাইদগী হেন্না ৱাগদগে? কনা অমত্তনা পাউখুম পীরকখিদে। মদুদগী ঐহাক্না হায়খি, "অসিগুম্বা ফিভম অসিদা, খ্বাইদগী ৱাগদবা মীশক অদুদি ভেঙ্কৈয় নাইদুজিনি"। মরমদি, মহাক্তি করিগুম্বা থবক অমা নৎত্রগা অমা হোৎনদুনা মতম চুপ্পদা লৈজবনি। মফম অমদা ফমদুনা লৈথোকপা হায়বসে মহাক্কীদি খ্বাইদগী অৱাবা দন্দি অমনি। অদুবু, মহাক্তি অনৌবদা পুথোকপা মীওই অমসুনি। কোরোনাগী মনুং অসিবু মহাক্না হৈশিংনা শীজিন্নখি। মহাক্না "তেলি-ত্রাভেল" তৌখি। ৱাহৈ অসি চুম্লিব্রা নৎত্রগা লাল্লিব্রা হায়বা ঐহাক চপ চানা খঙজদে। মহাক্তি অয়ুক্তা মহাক্কী তেলিফোন দাইরীগা ফমগনি অদুগা নুমিৎ খুদিংগী হৌখিবা চহি ৫০মুক অসিদা মহাক্না লৈবাক অসিদা চৎখিবা মতমদা খঙনখিবা মীওইশিং অমসুং মহাক্কী পব্লিক অমসুং পোলিতিকেল লাইফতা থেংনখিবা মীওই ৩০, ৪০ নৎত্রগা ৫০দা কোল তৌগনি। মহাক্না মখোয়গী মতাংদা কমদৌরি হংগনি, ঈ পাউ লৌগনি, কোরোনানা মরম ওইদুনা পীবা চৈথেংগী মতাংদা হংগনি অমসুং ঙম্লবদি মতেং পাংগনি।

মহাক্না মতম্বু মরীক চুম্না শীজিন্নখি। অথাপ্পা মফমশিংদা লৈবা ইচম চম্বা শিন্মীশিংদা কোল তৌবা মতমদা মখোয়দা হরাও তয়াম্বনা লাংতক্নহল্লি। মসিগী মথক্তা, কোরোনা মনুংদা ভেঙ্কৈয়জিদগী কোল লাক্তবা এম.পি. অমত্তবু লৈরম্লোই। মহাক্না মখোয়গী হকচাংগী ফিভম হংগনি অমসুং ভেক্সিন কাপ্লে নৎত্রগা কাপত্রি হায়বগী মতাংদা লাংতক্নজগনি। মহাক্তি ইমুংগী মপী মপা অমগুম্না ময়াম পুম্নমকপু নুংশিনা শেন্নজৈ। মসিনি মহাক্না কয়াম হোৎনজরকই হায়বদু। ভেঙ্কৈয়জিগী মফমদা অতোপ্পা ইকাইখুম্ননিংঙাই অমসু লৈরি। ঐহাক্না হঞ্জিন হঞ্জিন্না মহাক্তি ঐখোয়দগী কৈদৌনুংদা লাপথোক্লোই হায়না হায়জৈ। মসিগী খুদম অমতং পীজগে। ইলেক্সন কেম্পেন অমগীদমক মহাক বিহারগী খোঙচৎ অমখক চৎলম্মি। খঙহৌদনা মহাক্কী হেলিকোপতর অদু খুদক্তা লমহাং অমদা তাদবা য়ারমদে। হায়রিবা মফম অদুমকসু সেক্যুরিতীগী খুদোংচাদবা খরা লৈবা মফম অমনি। অদুবু অনকপদা লৈরম্বা লৌমী অমনা চেনশিল্লক্তুনা মতেং পাংবীরম্মি অমসুং মহাক্কী মোতোরসাইকলদা মনাক নকপা পুলিস স্তেসন অমদা পুবীখিরম্মি।

ভারত্তা লৈরিবা মহাক্কী পব্লিক লাইফকী মতাংদা য়েংবা মতমদা, ভেঙ্কৈয়জিদি য়াম্না মঙাল লৈবা মীশক অমনি, অদুগা ঙসিমকসু লৌমী অদুগী ইমুং মনুংগা চান্নবা মরুপ অমা ওইনা লৈরি। অদুগুম্বা অথাপ্পা বিহারগী মফম অমদা মহাকপু মতেং তৌবীরকখিবা ইমুং অদুগা। ঙসিমকসু অদুমক ভেঙ্কৈয়জিনা লৌমী অদুগী ৱারী চাউথোক্না লীগনি। মসিনি ভেঙ্কৈয়জিগী খ্বাইদগী চাউবা ইকাইখুম্ননিংঙাই ওইবা মশক অমা।

মসিগী মরম অসিননি ঐহাক্না মতম চুপ্পদা মহাক্তি ঐখোয়গী মরক্তা এক্তিব ওইবা মরুপ মপাং অমগুম, লমজিংবীদুনা লৈগনি হায়না হায়জরিবা। মহাক্না থেংনরকপা কয়াসি ঐখোয়দা অদুক্কী মতীক কান্নগনি। অসিগুম্বা থৌদোক কয়া থেংনরকপগা লোইননা, ভেঙ্কৈয়জিনা খুন্নাইগী ওইবা অনৌবা মাইকৈ অমদা অমুক চঙশিনলগনি। চুম্মি, ঙসিগী অয়ুক অসিদসু মহাক্না ঐগী ইফমদা হায়বীখি মদুদি মহাক্না ফম অসি পায়রকপা মতমদা, মহাক্না ৱাজখিবসি মহাক্না মপুন্সি চুপ্পা অমা লেন্দুনা লাক্লবা পার্তীদগী থাদোকপা তাই হায়বসিনি। মসিদা তৌদবা য়াদবা সংবিধানগী করিগুম্বা খরসু লৈরি। অদুবু ঐহাক্না থাজৈ মদুদি ভেঙ্কৈয়জিনা অদুগুম্বা চহি মঙা মরক শিরুবা অদুবু ঙাকখৎনবা হোৎনরক্কনি হায়বসিনি। মহাক্কী অরিবা মরুপশিংবু ইথিল পীবা, থৌনা হাপ্পা, য়োকখৎপগী থবক্তি মখা চত্থখিগনি। ভেঙ্কৈয়জিগী পুন্সিদি ঐখোয়গী ইফমদা য়াম্না চাউবা লন অমনি। মহাক্কী মফমদগী তমজরকপা খুদিংমক ঐখোয়না অমুক মখা তাবদা পীরমগদবনি।

ইমালোনবু মাংজিল থানা পুখৎনবা হোৎনবীরম্বা অমসুং মহাক্না লোনবু কয়াগী মতীক নুংশিজগে হায়বসিদা হোৎনগদবা কয়াগী মতীক লৈরি।

করিগুম্বা অদোম্না থৱাই য়াওবা তারবদি ঐহাক্না "ভাশিনি"গী মতাংদা করিগুম্বা খরা ফোংদোকচবা পাম্মি। মসি ভারত সরকারনা হৌদোকখিবা ৱেবসাইত অমনি। "ভাশিনি" হায়বসিদা ঐখোয়গী ভারতকী লোলশিংবু হন্দোক্নবা অমসুং হেন্না ফগৎহন্নবা খুদোংচাবা পীরি। মসি ঐখোয়দা অদুক্কী মতীক কান্নগদবা খুৎলাই অমনি। অদুবু ঐহাক্কী ৱাখলদা করিগুম্বা অমদি লৈরি। স্পীকর সার অমসুং হরিভন্সজিনা হীরম অসিদা য়েংশিনবীবা য়াগদ্রা হায়বদু অমুক্তং য়েংহঞ্জনিংই। হীরম অসিগী মতাংদা হরিভন্সজিনা কুপ্না খঙই। মরম অসিনা হীরম অসিগী মতাংদা করিগুম্বা খরদি শোইদনা তৌবা য়াগনি। মালেম অসিদা চৎনবা মচৎ অমখক লৈরি মদুদি দিক্সনরীদা অনৌবা ৱাহৈ হাপচিনবা হায়বসিনি। অদুগুম্বা ৱাহৈ অদুসু অমুক হৌনবী মতুং ইন্না লাউথোক্কদৌরিবনি। করিগুম্বা লৈবাক অমগী অখন্নবা লোল অমদগী অখন্নবা ৱাহৈ অমনা ইংলিশ দিক্সনরীদা য়াওবা হায়বসি য়াম্না শিংথানিংঙাই অমনি। খুদম ওইনা, 'গুরু' হায়বা ৱাহৈ অসি ইংলিশ দিক্সনরীগী শরুক অমা ওইরে। অসিগুম্বা ৱাহৈ কয়া অমা লৈরিবনি।

ইমালোলদা পীবা ৱারোলগী মনুংদা, হাউজ অনিমক্তা, তোঙান-তোঙানবা ঙক্নিংঙাই ওইবা ৱাহৈ কয়া মীয়াম্না ফোংদোক্নৈ। অমসুং অদুগুম্বা লোল অদুবু খঙবা মীওইশিংদদি, অদুগুম্বা ৱাহৈ অদু চুন্নৈ অমসুং হেন্না খঙনিংই। অসিগুম্বা ৱাহৈশিং অসিবু ঐখোয়গী হাউজ অনিমক্তা চহি খুদিংগী খোমজিনবগী থবক অমা হৌবা য়াগদ্রা? অদুগুম্বা ৱাহৈশিং অদুনা ঐখোয়গী লোলদা লৈরিবা মাইকৈশিং অসিবু তাক্লি। করিগুম্বা ঐখোয়না অদুগুম্বা ৱাহৈশিং অদুবু খোমজিনবগী থবক অসি চৎনবা তারবদি, ঐখোয়গী ইমালোলবু নুংশিজবা ভেঙ্কৈয়জিগী মঙলান অসি মাংজিল থানা পুবা ঙমগনি। অমসুং মসিগী থবক অসিবু ঐখোয়না পাঙথোকপা মতমদা, ভেঙ্কৈয়জিগী ৱাহৈশিং নীংশিংদুনা লৈগনি অমসুং মখল মখলগী দোক্যুমেন্তশিং খোমজিনবা ঙমগনি।

অমুক্কা হন্না পুম্নমক্কী মফমদা য়াইফ-মঙ্গোল পীজরি। ভেঙ্কৈয়জি অমসুং মহাক্কী ইমুং মনুংবু হন্না-হন্না থাগৎচরি অমসুং য়াইফবতা ওইরসনু হায়না নিজরি!

খঙহঞ্জবাঃ মসি প্রধান মন্ত্রীগী ৱারোলদগী চাউরাক্না হন্দোকচবনি। অশেংবা ৱারোলদি হিন্দিদা পীবীখি।

***************