নমস্কার!

গুজরাতকী মুখ্য মন্ত্রী, শ্রী ভুপেন্দ্র ভাই পতেল, কেন্দ্রগী শেল-থুম মন্ত্রী, শ্রীমতি নির্মলা সিতারামন, ঐহাক্কী কেবিনেতকী অতোপ্পা, মরুপ, কারবার মালেমগী লুচিংবশিং অমসুং থৌরমসিদা শরুক য়াবীরিবা অতোপ্পা মীথুংলেনশিং, ইবেম্মা অমসুং ইবুংঙোশিং!

ঙসিগী নুমিৎ অসিদি মপাঙ্গল হেনগৎলক্লিবা ভারতকী শেন্মিৎলোন অমসুং তেক্নোলোজীগী শক্তি অমসুং ভারতকী তৌবা ঙম্বগী মতিক্তা মালেম্না থাজবা হেনগৎলক্লিবা অসিগী য়াম্না মশক থোকপা নুমিৎনি। ভারতনা “নীংতম্বগী অমৃত মহোৎসব” পাংথোক্লিবা মতমসিদা মসিগুম্বা অনৌবা ইন্সতিত্যুসন অমসুং মতমগা চুনবা হৌজিক্কী ভারতকী অনৌবা পথাপ কয়ানা ভারতপু চাউথোকচহল্লি।

ঙসি, গিফ সিতীদা লৈবা ইন্তর্নেস্নেল ফাইনেন্সিএল সর্ভিস সেন্তর ওথোরিতী (আই.এফ.এস.সি.এ.)গী ময়াই লোইশঙ বিলদিংগী উরেপ উয়ুং তমখ্রে। বিলদিং অসিগী আর্কিতেকচরনা পুক্নিং হুনা নীংথিরিবসিগা মান্ননা বিলদিং অসিনা ভারতপু শেন্মিৎলোনগী সুপরপাৱর ওইহন্নবা লোইনাইদ্রবা খুদোংচাবা কয়াসু শেমগনি হায়বগী ঐহাক্না থাজবা থম্মি। আই.এফ.এস.সি.না ইন্নোভেসন খুমাং চাউশিলহনগনি অমসুং চাউখৎ-থৌরাংদা শাহৌ লৌনবা অকোয়বগী ফিভম শীন-লাঙবগা লোয়ননা থৌওং অসিগী খোঙজেলসু হেন্না য়াঙখৎহনগনি। থৌওংশিং অসি গিফ সিতীদা ঙসি এন.এস.ই. আই.এফ.এস.সি.-এস.জি.এক্স. কন্নেক্ত হৌদোক্লিবা অসিগী খুত্থাংদা পাংথোকপা হৌরবনি।

মরূপশিং,

ইন্দিয়া ইন্তর্নেস্নেল বুলিয়ন এক্সচেঞ্জসু ঙসি হৌদোক্লে। ন্যু দিভেলপমেন্ত বেঙ্ককী ইন্দিয়ন রিজনেল ওফিস, ফোরেন বেঙ্ক ৩ অমসুং ইন্তর্নেস্নেল ত্রেদ ফাইনান্সিং সর্ভিস প্লেতফোর্ম ৪গা লোয়ননা, ঐখোয়না ঙসি মশক থোকপা তাঙ্কক কয়া লান্থোক্লে। মসিনা লৈবাক মীয়াম করোর ১৩০গা মতমগা চুনবা মালেমগী শেন্মিৎলোনগা শম্নহনবদা মখা তানা তেংবাংগনি।

ভারতনা গ্লোবেল ফাইনান্সকী মওং-মতৌ শেম্লিবা য়ু.এস.এ., য়ু.কে. অমসুং সিঙ্গাপোরগুম্বা লৈবাকশিংগা ঙসিদি লেং মান্ননা লেপমিন্নরে। ঙসিগী থৌরমসিদা ঐহাক্না অদোম অমসুং লৈবাক মীয়াম্বু থম্মোই শেংনা থাগৎচরি। ঐহাক্না অখন্নবা ওইনা সিঙ্গাপোরগী মরুপশিংবুসু, মখোয়গা তেংবাংনবদগী লৈবাক অনিগী মফমদা খুদোংচাবা কয়া হাংদোরক্লিবা, থাগৎচরি।

মরূপশিং,

ঐহাক্না গুহরাত্তা লৈরিঙৈদা গিফ সিতীগী ৱাখল্লোন লাকখিবা মতমদা, মরী লৈনবা ৱাখল্লোন্না কারবার, লল্লোন-ইতিক নত্তত্রগা শেন্মিৎলোনগী থবক-থৌরমশিং খক্তদা অকক্নবা লৈখিদে। লৈবাক্কী মীচম মীয়ামগী অনিংবা অপাম্বশিংসু গিফ সিতীগী মিৎয়েংগী শরুক অমনি। ভারতকী হয়েংগী মতমগী পান্দমশিং অসি গিফ সিতীদা শম্নরি অমসুং সনাগী মতমগুম্লবা ভারতকী মমাংগী মতমগী মিৎয়েংগসু মসিগা মরীসু লৈনরি।

জনুৱারী ২০১৩দা ‘গিফ ৱান’ শঙ্গাবগী লাকপা মতমদা, মীয়াম্না মসিবু গুজরাতকী খ্বাইদগী ৱাংবা বিলদিংনি হায়নবা ঐহাক্না ঙসিদু নীংশিংলি। মীওই খরগী ওইনদি, মসিনা বিলদিং অসিগী অমত্তা ঙাইরবা শক্তাক্নি। অদুবু, গিফ সিতী অসিদি মতমদুদগী মাং থাবা হেনখ্রবা ৱাখল্লোন অমনি। অমুক্তা নীংশিংসি। ইং ২০০৮না মালেমগী শেন্মিৎলোনগী ইরাং অমসুং রিসেসনগী শিংনবা কয়া থেংনখিবা মতমদা, ভারত্তনা পোলিসী মথৌ তৌদবগী অকোয়বগী ফিভম লৈখি। মতমদুদা মালেমগী করি ফিভম ওইরম্মি হায়বা অমুক্তা খন্থসি। অদুবু, গুজরাতনা মতমদুদা ফিন্তেক সেক্তরদা অনৌবা অমসুং অচৌবা খোঙথাং থাংজিনখি। ঙসিদি, মদুগী ৱাখল্লোনশিং অদুনা খুমাং য়াম্না চাউশিনবদা ঐহাক্না নুংঙাইজৈ। গিফ সিতীনা কম্মর্স অমসুং তেক্নোলোজীগী হব অমা ওইনা মশাগী মপাঙ্গল লৈবা শক্তাক অমা শেম্লি। ভারতনা গিফ সিতীগী খুত্থাংদা মালেমগী সর্ভিস সেক্তরদা অচৌবা মফম কন্দুনা তুংলমচৎকীদমক্তা চঙশিনবা উবদা ঐহাক্না অপেনবা ফাওই।

মরূপশিং,

গিফ সিতীগী অতোপ্পা অখন্নবা মওং-মতৌ অমনা মসিনা ত্রাই-সিতীগী থৌওংগী মরু ওইবা য়ুম্বী ওইবসিনি। অহমেদাবাদ, গান্ধীনগর অমসুং গিফ সিতী, মফম অহুমসি অমনা অমদগী শুপ্নগী মিনিত ৩০গী অথাপ্পদা লৈনরিবনি। অহুম্মক অসিগী মশাগী তোপ তোপ্পা শক্তাক লৈজৈ। গান্ধীনগরনা এদমিনিস্ত্রেসনগী ময়োল ওইবগা লোয়ননা পোলিসী অমসুং ৱারেপ লৌবগী মরু ওইবা হব অমসু ওই। গিফ সিতীনা শেন্মিৎলোনগী মরু ওইবা ময়োলনি। মসিনা হায়বদি, অদোম্না শহর অহুমসিগী মরক্তা অমদা হেক চৎপদা, অদোম্না হৌখিবা মতম, হৌজিক্কী মতম অমসুং লাক্কদৌরিবা হয়েংগী মতমগা শুপ্নগী মিনিত ৩০ লাপ্না লৈগদৌরিবনি।

মরূপশিং,

গিফ সিতীগা মরী লৈননা পায়খৎলিবা খোঙথাংশিং অসিনা ঐখোয়না ‘কারবার তৌবদা লাইহনবা’ অমসুং ‘পুন্সি মহিং লাইহনবা’গীদমক্তা হোৎনরিবশিংগী শরুক অমসু ওইরি। মতিক লৈবা ফিন্তেক সেক্তর অমা হায়রগা কারবার তৌবদা লাইহনবা অকোয়বগী ফিভম, রিফোর্ম পাংথোকপা অমসুং কাঙলোন নাইবা খক্তদা অকক্নবা লৈতে হায়বসি ঐখোয়না নীংশিংগদবনি। মসিদি, তোঙান-তোঙানবা সেক্তরশিংদা থবক তৌরিবা প্রোফেস্নেলশিংদা হেন্না নুংঙাইবা পুন্সি মহিং অমসুং অনৌবা খুদোংচাবা পীবগী পাম্বৈ অমসু ওইরিবনি।

গিফ সিতী অসিদি লন-থুম তাশিনবগী থোউওং পাংথোক্লিবা অমসুং মালেমগী খ্বাইদগী ফরবা ৱাখল্লোন কয়ানা পুন্সিন্নদুনা মখোয় মশেলদগী তম্নরিবা মফম অমা ওইরে। মসিনা হায়বদি, ভারতকী ফাইনান্স অমসুং কারবারগী লমদা মমাংদা চাউখৎলম্বশিংবু নৌহৌননা অমুক পুরকপগী পাম্বৈ অমসু ওইরি হায়বনি। ভারত মীয়াম্না মালেম শিনবা থুংবদা কারবার অমসুং লল্লোন-ইতিক্কীগীদমক্তা চহি চা কয়াদগী চত্তুনা লাক্লি হায়বসি মফমসিগী ইন্দস্ত্রী ভেতেরেনশিংনা খঙলবনি। মসিনা হায়বদি, ভারত মচানা য়ৌদ্রিবা মফম লৈশিল্লক্ত্রে হায়বনি। ভারতকী কারবার তৌবশিংনা ইন্নোভেতিব ওইবা ফাইনান্সকী থৌওং কয়াসু শিজিন্নরম্মি।

ঐহাক্কী পোকফম, ভাদনগরদা এক্সকেভেসনগী থবক চত্থরি। মফমসিদগী অরিবা মতমগী শেনয়েক কয়াসু ফংলে। ঐখোয়গী লল্লোনবগী পথাপ অমসুং লৈনরম্বা মরীনা কয়া য়াম্না পাক চাউরম্মি হায়বগী মসিনা খুদম ওইরিবনি। অদুবু, নীংতম্বা ফংলবা তুংদা ঐখোয়না ইশাগী হেরিতেজ অমসুং মসিগী পাঙ্গল শকখঙনীংদবগী মওং অমা তৌরক্লি। মসিগী ওইবা য়াবা মরমদি মীখা পোল্লগা লৈরকপগী চৈথেং অমসুং মশাদা থাজবগী চাং নেম্বনা ওইরম্বা য়াই। অদুবু, ‘অনৌবা ভারত’না  হৌজিক্তি মসিগী অরিবা ৱাখল্লোন হোংদোক্লে অমসুং ঙসিদি, ইন্তিগ্রেসন হায়বসিনা খন্ন-নৈনগদবা খ্বাইদগী মরু ওইবা ঐখোয়গী ৱাফম ওইরে। ঐখোয়না গ্লোবেল মার্কেত অমসুং গ্লোবেল সপ্লাই চেনগা খোঙজেল য়াঙনা পুন্সিনহল্লি। গিফ সিতী অসিদি ভারত অমসুং মালেমগী খুদোংচাবশিংগা শম্নবগী য়াম্না মরু ওইবা লম্বী অমনি। অদোম্না গিফ সিতীগা মরী লৈনবা মতমদা, অদোম্না মালেম পুম্বগা মরী লৈনরিবনি।

মরূপশিং,

ভারতনা মালেমগী খ্বাইদগী চাউবা শেন্মিৎলোনশিংগী মনুংদা অমা ওইরে। মরম অদুনা, ঐখোয়গী শেন্মিৎলোননা তুংগী মতমদা ঙসিগী চাংদগী হেন্না চাউরকপা মতম অদুগীদমক্তা ঐখোয়না হৌজিক্তগী শেম শাদুনা লৈগদবনি। মরম অদুনা, মালেমগী শেন্মিৎলোন্দা লৈরিবা ঐখোয়গী ঙসি অমসুং হয়েংগী থৌদাংদা তেংবাংবা ঙম্বা ইন্সতিত্যুসনগী ঐখোয়না মথৌ তারে। ইন্দিয়া ইন্তর্নেস্নেল বুলিয়ন এক্সচেঞ্জ – আই.আই.বি.এক্স. অসিদি মাইকৈ অসিদা থাংজিনবা মরু ওইবা খোঙথাং অমা ওইরি।

ভারতকী মীয়াম্না সনা পাম্বগী মতৌদি কনা অমত্তগী মফমদা লোৎপা য়ারোই। সনানা ভারতকী নুপীশিংগী শেনমিৎলোনগী পাঙ্গলগী মরু ওইবা হৌরকফম অমা ওইদুনা লাক্লি। নুপীশিংনা সনাবু য়াম্না পামজবনা মরম ওইরগা, ধাতু অসিনা ঐখোয়গী খুন্নাই অমসুং চৎনবীগী পথাপকী মরু ওইবা শরুক অমা ওইরিবনি। ভারতনা সনা অমসুং লুপাগী অচৌবা কৈথেল অমা ওইরিবসি মসিনসু মরম ওইরগনি। অদুবু, মসি খক্তনা ভারতকী শক্তাক ওইফম থোকপরা? ভারতকী শক্তাক অমদি মার্কেত শেম্বা হায়নসু ওইগদবনি। আই.আই.বি.এক্স. হায়বসি মাইকৈ অসিদা থাংজিনবা অতোপ্পা মরু ওইবা খোঙথাং ওইরি। মসিনা সনাগী ইন্দস্ত্রীদা লৈরিবা ঐখোয়গী প্লেয়র, মরু ওইনা, সনা শাবশিংদা মখোয়গী কারবার চাউথোকহন্দুনা মখোয়গীদমক্তা অনৌবা খুদোংচাবা কয়া পীনবা শেম-শাবদা য়াম্না তেংবাংগনি। মখোয়না নুং-পান ফাওনা উবা থৌওংগী খুত্থাংদা বুলিয়ন হকথেংননা লৈবা য়ারগনি অমসুং ইন্তর্নেস্নেল প্রাইস দিস্কোভরীদা শরুক য়াবসু য়ারগনি। মসিদগী অহেনবা অমা ওইনা, আই.আই.বি.এক্স.না এক্সচেঞ্জশিংদা সনাদা হকথেংননা ত্রেদ তৌবসু য়াহনগনি। সনাগী ত্রেদিং মার্কেতনা ওর্গনাইজ ওইরক্লিবসিদা, ভারত্তা সনাগী অপাম্বা লৈরিবা অসিনা সনাগী মমলদা লেপ্পগা লোয়ননা মমলদা শাফুসু পীগনি।

মরূপশিং,

তুংগী মতমদা ভারত্তা থোকপা থৌদোক খুদিংনা মালেম শিনবা থুংবদা চৈথেং পীরক্কনি। মসিনা মালেমদা মাইকৈ তাক্লক্কনি। ঐখোয়না লোকেলগী অপাম্ববু য়াম্না লুনা খল্লি অমসুং গ্লোবেল কোওপরেসনগী মরু ওইবসু নীংথিনা খঙই। নাকল অমদা, ঐখোয়না লোকেল ৱেলফিয়রগীদমক্তা গ্লোবেল কেপিতেল লৌশিল্লি। অতোপ্পা নাকল অমদনা, ঐখোয়না গ্লোবেল ৱেলফিয়রগীদমক্তা লোকেলগী প্রদক্তিবিতীগী কান্নবা লৌরি। রেকোর্দ ওইরবা এফ.দি.আই. ঙসিদি ভারত্তা চঙলক্লি। মসিনা লৈবাক মনুংদা অনৌবা খুদোংচাবা কয়া লৈহন্দুনা নহারোলশিংগী অনীংবা-অপাম্বা থুংহল্লি। মসিগুম্বা চাউখৎ-থৌরাংনা ভারতকী পাঙ্গল ওইরকপদা নত্তনা মালেমদসু কান্নবা পীরি। ভারত্তা ইনভেস্ত তৌরিবা ইনভেস্তরশিংনা মরী লৈনবা অফবা রিতর্ন নীংথিনা ফংই হায়বসি অচুম্বনি। অদুবু, মসিগা মরী লৈনরিবা খুদোংচাবশিংদি মসিদগী য়াম্না হেল্লি। ঙসি, ঐখোয়গী এক্সপোর্তনা অনৌবা রেকোর্দকী থাক কয়া য়ৌরি। ঐখোয়গী পোত্থোকশিংনা অনৌবা লৈবাক অমসুং কৈথেলদা য়ৌরে।

তংদু লৈতাদবা কয়ানা মালেমগী সপ্লাই চেন্দা চৈথেং পীবা অমসুং মালেম্না মসিগুম্বা চৈথেং অসিনা হেন্না শোকচিনহল্লকদরা নুংনাংলিঙৈ মতমদা, ভারতনা মালেমদা মগুন লৈবা পোত্থোক অমসুং সেবা লেপ্তনা ফংহন্দুনা লাকখি। মরম অদুনা, মসিদি লোকেল ৱেলফিয়রগী গ্লোবেল কেপিতেল শিজিন্নবা অমসুং গ্লোবেল ৱেলফিয়রগীদমক্তা লোকেল প্রদক্তিবিতী শিজিন্নবগী নীংথিরবা অপুনবগী ফিভম্নি হায়না ঐহাক্না হায়রিবনি। মরী অসিবু হেন্না ফগৎহন্নবগীদমক্তা গিফ সিতীগা মরী লৈনরিবা মীপুম খুদিংনা থবক পাংথোক্কনি। গ্লোবেল ফুতপ্রিন্ত অমসুং লোকেল কন্নেক্সন লৈবা ইন্সতিত্যুসন কয়া অমা লৈ।

মরূপশিং,

ঐহাক্না অনৌবা ভারতকী অনৌবা ইন্সতিত্যুসন, অনৌবা পথাপ অমসুং অদোমগী মফমদগী থাজবা য়াম্না লৈ।  ঙসিগী ২১শুবা চহি-চা অসিদা ফাইনান্স অমসুং তেক্নোলোজীগী মরক্তা অচেৎপা মরী লৈনরি। তেক্নোলোজী, সাইন্স অমসুং সোফৱেয়রগী মতাং খুদিংদা, ভারতকী নাক্তা অতৈদগী হেনবা খুদোংচাবা অমসুং এক্সপেরিএন্স অনিমক লৈ। ঙসিদি, অপুনবা রীএল তাইম দিজিতেল পেমেন্ততা ভারতনা ৪০%গী শরুক কল্লি অমসুং ঐখোয়না হীরম অসিদা লুচিংবসু ওইরি। ফিন্তেক্কী লমদা লৈরিবা ভারতকী পাঙ্গলনা মালেম পুম্বগী পুক্নিং চিংশিল্লি। মরম অদুনা, অদোম্না ফিন্তেক্তা অনৌবা ইন্নোভেসনগী পান্দম থমগনি হায়না ঐহাক্না থাজবা থম্লি। গিফ-আই.এফ.এস.সি.না ফিন্তেক্কী মালেমগী লেবোরেতরী ওইনা থোক্লক্কনি হায়বসু ঐহাক্না থাজবা থম্লি।

মরূপশিং,

ঐহাক্না মরু ওইবা অতোপ্পা হীরম অমদা মীয়ামগী পুক্নিং চিংশিনবা পাম্মি। ভারতকী ওইনা, মায় পাকপা অমসুং সর্ভিস হায়বসি অমগা অমগা চপ মান্নৈ। মীয়ামগী য়াইফ য়ুম্বালদগীনা মালেমগী য়াইফ য়ুম্বাল ফাওবা হায়বসিনা ঐখোয়গী মোত্তোনি। মসিনা মরম ওইরগা, ভারতনা সস্তেনেবল দিভেলপমেন্তকী হীরমদা মালেম্বু লুচিংলিবনি। ঐখোয়না নেত জিরো কার্বন ইমিসনগী ইশাগী পান্দম অমসু থমখ্রে। লৈবাক্কী থাক্তা, ঐখোয়না গতিশক্তি মাস্তর প্লান্দা থবক পায়খৎলি অমসুং রিনুএবল ইনর্জী অমসুং ই-মোবিলিতীগী মতাংদা অনৌবা রেকোর্দ থমখ্রে। মালেমগী থাক্তনা, ভারতনা ইন্তর্নেস্নেল সোলার এলাইএন্স লুচিংলি। হীরম অসিদা ঐখোয়না খোঙফম চেৎপনা খুদোংচাবা কয়া শেম্বা ঙমগনি। তুং কোইনা চৎপা অমসুং অইং-অশাগী প্রোজেক্তশিংগী ওইনা গিফ-আই.এফ.এস.সি.না গ্লোবেল দেত অমসুং ইক্বিতী কেপিতেলগী লম্বী ওইরকপা হায়বসি ঐহাক্কী অপাম্বনি। মান্নবা ওইনা, এয়রক্রাফ লীজ তৌবা, শিপ ফাইনান্সিং, কার্বন ত্রেদিং, দিজিতেল করেন্সী, অমসুং আই.পি. রাইত অমসুং ইনভেস্তমেন্ত মেনেজমেন্ত ফাওবগী থৌওংশিংদা ভারতনা ফাইনেন্সিএল ইন্নোভেসন কয়া অমগী মথৌ তারি। আই.এফ.এস.সি.না মাইকৈ অসিগীদমক্তসু হোৎনগদবনি। আই.এফ.এস.সি.এ.না রেগ্যুলেসন অমসুং ওপরেসন কোস্তপু ভারত খক্তদা কম্পিতিতিব ওইহনবতা নত্তনা, দুবাই অমসুং সিঙ্গাপোরগা চাংদম্নবদসু হেন্না কম্পিতিতিব ওইহনগদবনি। অদোমগী পান্দমদি কাঙলোন শেম্বগী হীরমদা মালেমগী লুচিংবা ওইবনা ওইগদবনি, আইনগী রুলগী অৱাংবা স্তেন্দর্দ থগদবনি, অমসুং মালেম্না খ্বাইদগী পাম্নবা ৱাতাইশিনবগী ময়োল ওইনা চোংথোক্কদবনি।

মরূপশিং,

লৈবাক্না মমাংগী চহি ৮দা ফাইনেন্সিএল ইনক্লুজনগী অনৌবা ৱেব অমা উখি। লাইরবদগী লাইরবা ফাওবনা ঙসিদি ফোর্মেল ফাইনেন্সিএল ইনক্লুজনগী শরুক ওইরে। ঐখোয়গী চাউরবা মীশিং কাঙলুপ অমনা ঙসি ফাইনান্সকী শরুক ওইরকপসিদা, সরকারগী ইন্সতিত্যুসন অমসুং লন্নাইগী প্লেয়রশিংনা মাং থানা পুন্না থোকমিন্নরকপা হায়বসি হৌজিক মতমগী তঙাই ফদবনি। খুদম ওইনা পল্লবদা, বেসিক বেঙ্কিংদগী ৱাংমা লান্থোক্লকপা অসিদা ফাইনেন্সিএল লিতরেসী অমসুং ফাইনেন্সিএল এজুকেসনগী অচৌবা স্কোপ অমা লৈরক্লি। ঙসিদি, গ্রোথকীদমক্তা ইনভেস্ত তৌনীংবা মরু ওইবা এস্পিরেস্নেল ক্লাস অমা ভারত্তা লৈরে। মখোয়গীদমক্তা হায়রিবা ফাইনান্স কোর্সশিং লৈরবদি, মদুনা মখোয়দা মখোয়গী অপাম্বা অসিগা মরী লৈনবা তেংবাং কয়া পীবা ঙমগনি।

ম্যুচুএল ফন্দগী খুদম লৌসি। এসোসিএসন ওফ ম্যুচুএল ফন্দগী মতুং ইন্না, ইং ২০১৪দা ভারতকী ম্যুচুএল ফন্দ ইন্দস্ত্রীগী মেনেজমেন্তকী মখাদা চাউরাকপা লুপা করোর লাখ ১০গী এসেত লৈরম্মি। অদুবু, চহি ৮গী মনুংদা, জুন ২০২২ ফাওবদা, মসিনা ২৫০% হেনগত্তুনা লুপা করোর লাখ ৩৫ য়ৌখ্রে। মসিনা হায়বদি, মীয়াম্না ইনভেস্ত তৌবা পাম্লে হায়বনি। ঐখোয়না মখোয়দা মরী লৈনবা এজুকেসন পীফম থোকই। ঐখোয়গী ফাইনেন্সিএল ইকোসীস্তেমগা নন-ফাইনান্স কোলেজকা মরী লৈনহন্নবা ঐহাক্না ৱাহৌদোক থম্লি অমসুং নহারোলশিংদসু ঐখোয়না এজুকেসন পীগদবনি। লাক্কদৌরিবা মতমশিংদা শেল তানবা অমসুং ইনভেস্তর ওইরক্কদৌরিবা অসিদি মখোয় নহাশিংনি। কোর্সশিং অসিদা মীয়ামগী থাজবা লৈহন্নবা, মখোয়শিংবু নোত-ফোর-প্রোফিত ওইনা চলায়গদবনি। গিফ সিতীনা প্রাইভেত প্লেয়রশিংগী পরফোর্মেন্সতা য়েংদুনা মসিগীদমক্তা রোদমেপ অমসুং গ্রাউন্দ রুল শেম্বগী থবক পাংথোকপা য়াই। ফোরেন য়ুনিভর্সিতী অমসুং গিফ সিতীগা মরী লৈনবা ৱাফম অমা হন্দক্কী বজেত্তা লাউথোকখিবা অদুনসু মসিদগী কান্নবা ফংগনি।

মরূপশিং,

অদোম্না লৈবাক্কী মসিগুম্বা তৌবা ঙম্বগী মতিকপু অদোম্না শিজিন্নগনি অমসুং ‘অমৃত কাল’ অসিদা লৈবাক্কী থাজবা ঙাক্কনি হায়না ঐহাক্না থাজবা থম্লি। অদোম্বু ঐহাক্না থাগৎচরি! গিফ সিতী চাউরবা পান্দম ফংহনবদা গুজরাত সরকারগী পোলিসীনা অচৌবা মতেং পাংলিবা অসিগীদমক্তা ঐহাক্না গুজরাত সরকারবুসু থাগৎচরি। লোয়ন-লোয়ননা, ঐহাক্না গুজরাত সরকারগী খোঙথাংশিংবু থাগৎপগা লোয়ননা গুজরাতকী মুখ্য মন্ত্রীবুসু মসিগীদমক্তা থাগৎচরি।

ঐহাক্না নুং অমসুং সনা-লুপাগী লৈতেংগী মীয়াম মশিং য়াম্না উবা ফংলি। মখোয়না খুদোংচাবশিং নীংথিনা খঙলে হায়না ঐহাক্না থাজৈ। মখোয়গীদমক্তা থোক্ললিবা খুদোংচাবশিং মখোয়না নীংথিনা খঙলে অমসুং মখোয়না শোইদনা লৌগনি। মসিগী থাজবা অসিগা লোয়ননা, ঐহাক্না অদোম মীয়াম্বু অমুক্কা হন্না থাগৎচরি অমসুং পুম্নমক্তা য়াইফ পাউজেলসু পীজরি।

থাগৎচরি!

***