জোহর!

নমস্কার!

ঐহাকপু ভারতকী সংবিধানগী খ্বাইদগী ৱাংবা ওফিস্তা থাগৎপীবগীদমক্তা, ঐহাক্না পার্লিয়ামেন্ত অমসুং লেজিস্লেতিব এসেমব্লীগী মেম্বরশিংগী মফমদা থম্মোই শেংনা তৌবীমল খঙবা উৎচরি।

অদোম্না ঐহাক্কী ইফমদা ভোৎ থাদবীখিবসি লৈবাক্কী মীয়াম করোর কয়াগী থাজবা উৎপনি।

ঐহাক্না ভারতকী মীয়াম পুম্বগী থাজবা, অপাম্বা অমসুং হক্কী খুদম ওইরিবা শেংলবা পার্লিয়ামেন্ত অসিদগী ঐহাক্কী লৈবাক মীয়ামগী মফমদা কোক নোঞ্জরি।

অদোমগী নুংশিবা, থাজবা অমসুং শৌগৎপনা ঐহাক্কী থৌদাং নীংথিনা পাংথোকপদা ঐহাক্কী খ্বাইদগী চাউবা পাঙ্গল ওইগনি।

ঐখোয়না ‘নীংতম্বগী অমৃত মহোৎসব’ পাংথোক্লিবা অখন্নবা অমসুং মরু ওইবা মতমসিদা লৈবাক অসিনা ঐহাকপু রাস্ত্রপতি ওইনা খনবীরে।

ঙসিদগী নুমিৎ খরনিগী মতুংদা, লৈবাক অসিনা মশাগী নীংতম্বগী চহি ৭৫ মপুং ফারগনি।

লৈবাক্না মশাগী নীংতম্বগী চহি ৫০ ফাবগী হরাওবা ফোংদোক্লিঙৈ মতমদা ঐহাক্না ইশাগী রাজনিতীগী পুন্সি হৌখিবসিসু য়াম্না তান চাবা থৌওং অমনি।

ঙসিদি, নীংতম্বগী ৭৫শুবা চহিসিদা, ঐহাক্কী ইফমদা অনৌবা থৌদাং অসি অমুক শিন্নবীরে।

ভারতনা মথংগী চহি ২৫গী পান্দম ফংনবগীদমক্তা থাজবনা থল্লিবা পুৱারী ওইরবা মতমসিদা ঐহাক্কী ইফমদা মসিগুম্বা খুদোংচাবা পীবিবসি অসি ঐহাক্কী লাইবক ফবনি।

ঐহাক্না নীংতম্বা ভারত্তা পোকখিবা লৈবাক অসিগী অহানবা রাস্ত্রপতিসু অমুক ওইরিবনি।

ঐখোয়গী নীংতম লান্মীশিংগী মঙলানশিংবু নীংতম্বা ভারতকী মীয়াম্না হোৎনদুনা মঙফাওনহন্নবগীদমক্তা, ঐখোয়না অমৃত কাল অসিদা খোঙজেল য়াঙনা থবক পাংথোকপগী মথৌ তারে।

লাক্কদৌরিবা চহি ২৫সিদা, অমৃতকালগী পান্দম ফংনবগীদমক্তা লম্বী অনি থোক্না চঙশিনগদবনি, মদুদি – সবকা প্রয়াস অমসুং সবকা কর্তব্যা (পুম্নমক্না হোৎনমিন্নবা, পুম্নমক্কী থৌদাং) ওইগদৌরিবনি।

ভারতকী মশেক-মঙাল থোকপা তুংগী মতমগী মাইকৈদা থাংজিনগদবা চাউখৎ-থৌরাংগী অনৌবা খোংথাংশিংদি ঐখোয় পুন্না থাংমিন্নবগদবনি, থৌদাংগী লম্বী ইন্দুনা চৎকদবনি।

ঐখোয়না হয়েং, জুলাই ২৬তা কার্গিল বিজয় দিবস পাংথোক্কদৌরি। নুমিৎ অসিদি ইন্দিয়ন আর্ম্দ ফোর্সকী থৌনা অমসুং লাকশিনবা ঙম্বগী খুদম্নি।

ঐহাক্না ঙসিদি, লৈবাক্কী আর্ম্দ ফোর্স অমসুং মীয়ামদা নুমিৎ অসিগীদমক্তা মাংজৌননা য়াইফ পাউজেল পীজরি।

ইবেম্মা অমসুং ইবুংঙোশিং,

ঐহাক্কী পুন্সিগী খোঙচৎ অসি লৈবাক্কী নোংপোকথংবা মাইকৈদা লৈবা ওরিশাগী ত্রাইবেলগী অপীকপা খুঙ্গং অমদগী হৌরকখিবনি।

ঐহাক্না লাকখিবা পুন্সিগী ফিভম অসিদদি, ইলিমেন্তরী স্কুলগী মহৈ তম্বা ফাওবা মঙলানগুম্বনি।

অদুবু, অয়েৎপা কয়া থেংনরবসু, ঐহাক্কী অনিংবদি চেৎনা অদুমক লৈখি অমসুং ঐহাক্না ঐহাক্কী খুঙ্গংদগী কোলেজ কাবী অহানবা মচানুপী ওইখি।

ঐহাক ত্রাইবেল খুন্নাইগী মীওইনি। ঐহাক্না ৱার্দ কাউন্সিল্লর ওইরম্বদগী ভারতকী রাস্ত্রপতি ওইদুনা চাউখৎচবগী খুদোংচাবা ফংজখি। মসিদি গনতন্ত্রগী মমা ওইরিবা ভারতকী অথোইবা মতৌনি।

য়াম্না মনুং হঞ্জিনবা ত্রাইবেলগী মফম অমদগী ভারতকী সংবিধানগী খ্বাইদগী থাক ৱাংবা ফম অমদা য়ৌবা ঙম্লিবা অসিদি ঐখোয়গী গনতন্ত্রগী শক্তিদা ইকায় খুম্নবনি।

ঐহাক্না রাস্ত্রপতিগী ফমদা য়ৌবা ঙম্লিবসি ঐহাক ইশাগী মায় পাকপা নত্তে, মসিদি ভারতকী লাইরবা খুদিংগী মায় পাকপনি।

ঐহাকপু ফম অসিদা খনবীরক্লিবা অসিদি ভারতকী লাইরবা খুদিংনা মঙলান চাউনা মঙবা য়াই, অমসুং মদুবু মঙফাওনহনবসু ঙম্মি হায়বগী খুদম্নি।

চহি চা কয়াদগী মীরাইবীদুনা লাক্লবা অমসুং চাউখৎ-থৌরাংগী খুদোংচাবা অমত্তা ফংলক্ত্রবা লাইরবা, শোত্থরবা, নাথৈবীরবা অমসুং ত্রাইবেলশিংনা মখোয়গী মমি ঐহাক্কী ইফমদা উবা ঙম্বসিনা ঐহাক্কী খ্বাইদগী পেঞ্জবা থৌওংনি।

লৈবাক্কী লাইরবশিংগী থৌজালদগী ঐহাকপু ফমসিদা খনবীখিবনি। মসিদা লৈবাক্কী নুপীশিংগী মঙলান অমসুং তৌবা ঙম্বা মতিক খুদিংগী মমি তারি।

ঐহাকপু ফমসিদা খল্লিবা অসিনা অনৌবা লম্বীদা চৎনবা শেম-শারবা অমসুং হান্নগী লম্বী কান্থোক্তুনা চৎপা ঙম্লবা ভারতকী নহারোলশিংগী মথৌনা তাক্লি।

মসিগুম্বা মাংজিল থানা চঙশিনবা ভারত অমবু লুচিংবসিদা ঐহাক্না ঙসিদি য়াম্না চাউথোকচরি।

ঙসিদি, ঐহাক্না লৈবাক মীয়াম খুদিং, মরু ওইনা ভারতকী নহারোল অমসুং নুপীশিংগী মফমদা ঐহাক্না ফম অসিগী থৌ পুরিবা মতম খুদিংদা অদোমগী অনীংবা অপাম্বনা খ্বাইদগী মাঙদা থমগনি হায়বগী থাজবা পীজরি।

ইবেম্মা অমসুং ইবুংঙোশিং,

ভারতকী গনতন্ত্রগী ইকায় খুম্নবগী মতৌবু মালেমগী মফমদা ৱাংনা থম্বীরম্বা ভারত রাস্ত্রপতি কয়ানা ঐহাক্কী মাঙদা থৌপুবীরম্লে।

লৈবাক্কী খ্বাইদগী অহানবা রাস্ত্রপতি, দাঃ রাজেন্দ্র প্রসাদতগী হৌরগা শ্রী রাম নাথ কোবিন্দগুম্বা শক্নাইরবা মীওইনা থৌ অসি পুবীরম্মি।

লৈবাক অসিনা ঐহাক্কী ইফমদা ফম অসিখক্তা নত্তনা মসিগুম্বা নীংথিরবা চৎনবী অসিবু মহুৎ শীনবীনবা থৌদাং অমসু পীবিরি।

ঐহাক্না সংবিধান্না সাখী ওইদুনা, ঐহাক্কী ইথৌ পুম্নমক থম্মোই শেংনা পাংথোক্কনি।

ঐহাক্কী ওইনদি, ভারতকী দেমোক্রেতিক-কলচরেলগী ৱাখল্লোন অমসুং মীয়াম পুম্বনা ঐহাক্কী অহেনবা শক্তিগী হৌরকফম ওইগনি।

 ইবেম্মা অমসুং ইবুংঙোশিং,

ঐখোয়গী নীংতম ইহৌনা ভারতকী লৈবাক অমা ওইবগী থৌরাং য়াৎপীরম্মি।

ঐখোয়গী নীংতম ইহৌসিদি মদুগুম্বা হোৎনবা অমসুং কত্থোকপা কয়াগী লেপ্তবা পরিং অমনি, মসিনা নীংতম্বা ভারতকী ৱাখল্লোন অমসুং খুদোংচাবা কয়া শেম্বীরম্মিবনি।

নুংশিরবা বাপুনা স্বরাজ, স্বদেশি, স্বচ্ছতা অমসুং সত্যগ্রহা পাংথগোক্তুনা ভারতকী নাৎকী ওইবা ৱাখল্লন খঙনবা ঐখোয়দা লম্বী পীবিখি।

নেতাজী সুভাস চন্দ্র বোস, নেহরুজী, সর্দার পতেল, বাবাসাহেব অম্বেদকর, ভগৎ সিংহ, সুখদেভ, রাজগুরু অমসুং চন্দ্রসেখর আজাদকুম্বা মশিং থীবদা লোইনাইদ্রবা অথোইবা মীওইশিংনা লৈবাক্কী মমায়বু খ্বাইদগী মাঙদা থমগদবনি হায়বা ঐখোয়দা তাকপীরমখি।

রানি লক্ষ্মি বাই, রানি ভেলু নাচিয়র, রানি গাইদিনল্যু অমসুং রানি চেনম্মাগুম্বী থৌনা ফরবী নুপী আইকোনশিংনা লৈবাক ঙাক-শেনবা অমসুং শেম্বদা লৈবা নুপীগী পাঙ্গলবু অৱাংবা থাক্তা থম্বীরমখি।

সন্থাল ইহৌ, পাইকা ইহৌদগীনা কোল ইহৌ অমসুং ভিল ইহৌ ফাওবদা, ইহৌশিং অসিনা নীংতম ইহৌদা ত্রাইবেলশিংনা শরুক য়াবগী মতৌবু হেন্না মপাঙ্গল হাপ্লমখি।

ঐখোয়না ‘ধর্তী অব্বা’ ভগ্বান বির্সা মুন্দাজীনা খুন্নাইগী ফিভম ফগৎহন্নবা অমসুং মরৈবাক নীংবগীদমক্তা মশাগী থৱাই কত্থোকখিবা থৌওংদগী ইথিল কয়া ফংখি।

ঐখোয়গী নীংতম ইহৌদা ত্রাইবেল খুন্নাইনা শরুক তম্লম্বশিংদা কত্থোকপা ওইনা লৈবাক শিনবা থুংবদা ত্রাইবেল ম্যুজিয়ম কয়া অমা শাগৎলিবা অসিদা ঐহাক্না নুংঙাইবা ফাওই।

ইবেম্মা অমসুং ইবুংঙোশিং,

ভারতনা চহি ৭৫সিদা পার্লিয়ামেন্তরী দেমোক্রেসী অমা ওইনা, চাউখৎপগী ৱারেপপ্পু শরুক য়ামিন্নবা অমসুং ৱাখল মান্নবগী খুত্থাংদা তুংলমচত্তা পুদুনা লাকখি।

তোঙানবা মতৌনা থনবা ঐখোয়গী লৈবাক অসিদা ঐখোয়না লোল, ধর্মা, কাঙলুপ, চিঞ্জাক্কী হৈনবী, পুন্সি মহিং অমসুং চৎনবী কয়া শাগোন্নদুনা ‘এক ভারত, স্রেস্থ ভারত’ অমা শেম্বদা পুম্নমক্না তেংবাংলি।

ঐখোয়গী নীংতম্বগী ৭৫শুবা চহিগা লোয়ননা হৌরিবা অমৃত কাল অসি ভারতকী অনৌবা ৱারেপ কয়াগী মতম্নি।

ঙসিদি, লৈবাক অসিগী পুক্নিং ইথিল য়াম্না ৱাংলে, অমসুং অনৌবা ৱাখল্লোনগা লোয়ননা অনৌবা য়ুগ অসিবু তরাম্না ওক্নবা শেম শাদুনা লৈরিবসি ঐহাক্না উরে।

ঙসিদি, ভারতনা হীরম খুদিংদা চাউখৎ-থৌরাংগী অনৌবা তাঙ্কক হাপ্লি।

কোরোনাগুম্বা মালেমগী ইরাং লান্থেংনবদা ভারতনা উৎখিবা মতিক্না মালেম পুম্বনা ভারত্তা থম্লিবা থাজববু হেনগৎহল্লে।

ঐখোয় ভারত মচাশিংনা মালেমগী ইরাং অসিবু ইশাগী পাঙ্গলনা মাইয়োক্নখিবতা নত্তনা, মালেমগী ওইবা অনৌবা স্তেন্দর্দ অমা শেম্লে।

নুমিৎ খরনিগী মমাঙদসু, ভারতনা কোরোনা ভেক্সিন দোজ করোর ২০০ কাপ্পগী রেকোর্দ থমখ্রিবনি।

মসিগুম্বা অপুনবা লান অসিদা ভারতকী মীয়াম্না উৎখিবা খাঙবা কনবা, থৌনা অমসুং তেংবাংনবগী মতৌনা ঐখোয়না খুন্নাই অমা ওইনা মপাঙ্গল লৈরক্লিবা অমসুং অতোপ্পগী অপাম-পামদা খঙবা ঙম্বগী খুদম অমনি।

ভারতনা লুরবা তাঞ্জা অসিদা মশা খক্তা চেকশিনখিবতা নত্তনা মালেম্বুসু তেংবাংখি।

কোরোনা লাইচৎনা লৈহনখিবা অকোয়বগী ফিভম অসিদা, মালেম্না ঙসিদি ভারত্তা থাজবগী মিৎয়েংদা য়েংলি।

মালেমগী খুন্নাইনা ভারত্তগী অচৌবা থাজবা থম্লি, মালেমগী শেন্মিৎলোনগী তংদু লৈতারকপা, সপ্লাই চেন অমসুং শান্তিগী ফিভম ভারতনা ফগৎহল্লক্কনি হায়না মখোয়না ঐখোয়দা থাজনা য়েংলি।

লাক্কদৌরিবা থা খরদা, ভারতনা লুচিংদুনা জি.-২০ গ্রুপকী য়ুম্বুসু ওইগদৌরি।

অসিগুম্বা কাঙলুপ অসিদা, মালেমগী অচৌবা লৈবাক ২০না ভারতকী লুচিং মখাদা মালেমগী শিংনবা কয়াগী মতাংদা কুপ্না খন্ন-নৈনগদৌরি।

মসিদগী থোক্লক্কদবা ৱারোইশিন অমসুং পোলিসীনা লাক্কদৌরিবা দিকেদশিংগী মাইকৈ তাক্কনি।

 ইবেম্মা অমসুং ইবুংঙোশিং,

দিকেদ কয়াগী মমাংদা, ঐহাক্না রাইরংপুরগী শ্রী ঔরোবিন্দো ইন্তিগ্রেল স্কুলদা ওজা ওইবগী খুদোংচাবা ফংজখি।

নুমিৎ খরনিগী মতুংদা, ঐখোয়না শ্রী ঔরোবিন্দোগী ১৫০শুবা মপোক কুমওন পাংথোক্লগনি।

শ্রী ঔরোবিন্দোগী এজুকেসনগী ৱাখল্লোন্না ঐঙোন্দা লেপ্তনা ইথিল পীবি।

ঐহাক্না মীয়ামগী মীহুত অমসুং মতুং তারকপদা রাজ্যপাল ওইনা মীয়ামগী সেবা তৌখিবদা, এজুকেসনগী ইন্সতিত্যুসনশিংগা অনকপা মরী লৈনদুনা লাকখি।

ঐহাক্না লৈবাক্কী নহারোলশিংগী থৱাই য়াওবা অমসুং মশাদা থাজবগী মতৌবু য়াম্না কুপ্না য়েংশিনখি।

ঐখোয়গী নুংশিজরবা অতলজীনা লৈবাক্কী নহারোলনা চাউখৎলকপা মতমদা, মখোয়না মশাগী পুন্সি শেমজবতা নত্তনা লৈবাক্কী লাইবকসু লেপ্পি হায়রম্মিবনি।

ঙসিদি, ঐখোয়না ৱাফম অসিনা তসেংনা ওইথোকপগী ফিভম উবা ফংলি।

হীরম খুদিংদা মাংজিল থানা চত্তুনা – ‘ভোকেল ফোর লোকেল’দগী ‘দিজিতেল ইন্দিয়া’ ফাওবদা – ঙসিগী ভারতনা মালেমগা লোয়ননা চৎলি অমসুং ‘ইন্দস্ত্রীএল রিভোল্যুসন ৪.০’গীদমক্তা নীংথিনা শেম-শাবসু লোইরে।

তোঙানবা ইন্নোভেসন কয়াগীস্তার্ত-অপশিংগী রেকোর্দ ওইবা মশিং শেম্বদা অমসুং অথাপ্পা মফমশিংদা তেক্নোলোজী শিজিন্নহনবদা ভারতকী নহারোলশিংগী চাউরবা থৌদাং য়াওরি।

মমাংগী চহি খরসিদা, নুপীশিংবু মপাঙ্গল থৌনা হাপ্পগীদমক্তা লৌখিবা ৱারেপ অমসুং শেমখিবা পোলিসী কয়ানা মরম ওইরগা লৈবাক অসিদা অনৌবা শক্তি অমা লৈরক্লি।

ঐহাক্না ঐখোয়গী ইচেল-ইচল অমসুং ইচানুপীশিংবু পাঙ্গল হেন্না লৈহন্নীংই, লৈবাক শেম্বগী থৌওংদা মখোয়গী থৌদাং লেপ্তনা হেনগৎহন্নীংই।

ঐহাক্না লৈবাক্কী নহারোলশিংদা অদোম্না ইশাগী তুংগী পুন্সি শেম্বা খক্তা নত্তনা লৈবাক্কী তুংগী ফম্বাকসু শেম্লিবনি হায়জনীংই।

ঐহাক্না লৈবাক অসিগী রাস্ত্রপতি অমা ওইনা, অদোমগীদমক্তা মতম পুম্বদা তেংবাংনবা লৈগনি।

ইবেম্মা অমসুং ইবুংঙোশিং,

চাউখৎপা অমসুং শাহৌ লৌবা হায়বদি তুংলমচত্তা লেপ্তনা চঙশিনবা হায়বনি, অদুবু হৌখ্রবা মতমগী মতাংদা খঙবা হায়বসিসু মান্ননা মরু ওই।

মালেম্না ঙসি সস্তেনেবল প্লানেত হায়না ঙাংনরিবা অসিদা ভারতকী অরিবা চৎনবী অমসুং পুন্সি মহিংগী থৌদাংগী মরু ওইবা হেনগৎলক্লি।

ঐহাক্তি মহৌশা ইমাগা চহি লিশিং কয়াদগী নুংশি চান্ননবা লৈমিন্নরক্লবা ত্রাইবেলগী চৎনবীদা পোকপনি।

উমং অমসুং ঈশিং তুংফমশিংগী কান্নবদি ঐহাক্না পুন্সি অসিদা নীংথনা খঙলে।

ঐখোয়না মহৌশা ইমাদগী তঙাই ফদবা রিসোর্সশিং লৌরি অমসুং মহৌশা ইমানসু ঐখোয়দা কোন্নগদবা চাংদা মান্ননা পীবিরি।

মসিগুম্বা ৱাখল্লোন অসি হৌজিক্কী মালেমগী খ্বাইদগী তঙাই ফদবা ওইরবনি।

ভারতনা ইনভাইরনমেন্ত ঙাক শেনবগী হীরমদা মালেম্বু লমজিং-লমতাক্লিবা অসিদা ঐহাক্না নুংঙাইবা ফাওই।

 ইবেম্মা অমসুং ইবুংঙোশিং,

ঐহাক্কী হৌজিক ফাওবগী পুন্সি অসিদা, পুন্সিগী ৱাহন্থোক অসি মীয়ামগী সেবা তৌবগী খুত্থাংদখক খঙবা ঙমখি।

জগন্নাথ খেত্রগী মমিং লৈরবা কবি, ভিম ভোইজীগী শৈরেংদগী পরিং অমা হায়জগে -

“মো জীবন পাছে নার্কে পরি থাউ, জাগতো উধর হেঊ”।

মসিনা হায়বদি, মালেমগী য়াইফ য়ুম্বালগীদমক্তা থবক তৌবনা ইশাগী নুংঙাইবগী থবক তৌবদগী য়াম্না হেন্না নুংঙাইবা ফাওই।

মালেমগী য়াইফ য়ুম্বালগী মসিগুম্বা ইথিলগা লোয়ননা, ঐহাক্না অদোম্না থম্লিবা থাজবদুমক পাংথোকপা ঙম্নবগীদমক্তা থম্মোই শেংনা অমসুং কত্থোকপগা লোয়ননা ইশাগী থৌদাং পাংথোক্কনি।

ঐখোয় পুম্নমক অমত্তা ওইসি অমসুং নুংঙাই য়াইফবা অমদি মরোমদোম লেপচবা ঙম্বা ভারত অমা শেম্নবগীদমক্তা ইশাগী থৌদাং খঙনা অমসুং কত্থোকপগী ইথিলগা লোয়ননা তুংলমচত্তা খোঙদামিন্নসি।

থাগৎচরি!

জয় হিন্দ!

***