থৌরম অসিদা শরুক য়ারিবা গুজরাতকী মীয়াম্না য়াবা মুখ্য মন্ত্রী, শ্রী ভুপেন্দ্র ভাই পতেলজী, শ্রী কলিকা মাতাজী মন্দির ত্রস্তকী প্রসিদেন্ত, শ্রী সুরেন্দ্র ভাই পতেলজী, রাজ্য সরকারগী মন্ত্রী, ভাই পুর্নেশ মোদীজী, মফমসিদা তিনবীরিবা ইকায় খুম্ননীংঙাই ওইরবা সেনিয়র সন্ত, থৱাই হকচাং য়াওনা লাই নীংলিবা মরুপ অমসুং ইবেম্মা অমদি ইবুংঙোশিং!

ঙসিদি, চহি কয়াগী মতুংদা পৱাগরগী ইমা কালীগী খুয়াখাদা লাকচদুনা মতম খরা লেঞ্জবা, থৌজাল ফংবগী খুদোংচাবা ফংলে, ঐহাক্কী পুন্সিগী য়াইফরবা মিৎকুপ অমা ওইরে। ৱাখল্লোনা ৱারেপ ওইরকপা, ৱারেপ্না অশেংবা ওইরকপা মতমদা কয়া য়াম্না নুংঙাইবা ফাওরমগনি হায়বা অদোমসু খঙলমগনি। ঙসিগী মিৎকুপ অসিনা ঐহাক্কী নুংদসু অদুক্কী মতিক নুংঙাইবা ফাওহল্লে। চহি-চা ৫গী মতুং অমসুং নীংতম্বগী চহি ৭৫গী মতুং ফাওবদা ইমা কালীগী মতোন্দা চহি-চা ৫গী মনুংসিদা ফিরাল পায়দ্রি হায়বসি অদোমসু অমুক্তা খন্থবীয়ু। মিৎকুপ অসিনা ঐখোয়দা ইথিল পীবিরি, পাঙ্গল হাপ্পীরি। অদুগা ঐখোয়গী চৎনবী অমসুং সংস্কৃতিদমক্তা থৱাই হকচাং য়াওনা হিংবগীদমক্তা ঐখোয়দা ইথিল পীবিরি। ঙসিদগী নুমিৎ খরনিগী মতুংদা অমসুং থা অসিগী অরোইবা গুপ্তা নবরাত্রী হৌগদৌরে। গুপ্তা নবরাত্রীগী হেক মাংওইননা ইমা কালীগী শক্তিপীথ মহাকালী লাইশঙনা মহাক্কী নীংথিরবা মশেক মঙালগা লোয়ননা ঐখোয়গী মাঙদা পৱাগরদা লেপ্পীরি। পাঙ্গল অমসুং থাজবগী অখন্নবা মতৌদু মসিনি। গুপ্তা নবরাত্রীনি, অদুবু শক্তিদি তুমদুনা লৈতে, শক্তিনা কৈদৌনুংদা মাঙদে। থাজবা, নীংজবা অমসুং কত্থোকপনা মহৈ য়াল্লকপা মতমদা, শক্তিনা মশাগী লৈজবী মপাঙ্গলগা লোয়ননা শাফোংলকই। পৱাগরগী মহাকালীগী থৌজালদগী গুজরাত অমসুং ভারতনা মান্নবা শক্তি শাফোংলকপা অসি উবা ফংজরি। ঙসিদি, চহি কয়াগী মতুংদা মহাকালীগী লাইশঙ অসিনা মশাগী লৈজবী মশেক মঙালগা লোয়ননা অমুক্কা হন্না মতোন্দা ফিরাল পায়ররে। ফিরাল অসিনা ঐখোয়গী থাজবা অমসুং স্পিরিচুএলিতীগী খুদম ওইবতা নত্তনা চহি কয়া হোংই, য়ুগ কয়া হোংই, অদুবু থাজবদি হোংদে হায়বগী ময়েক শেংলবা খুদম অমসু ওইরি।

ইচিল ইনাওশিং,

অদোম্না অয়োধ্য লাকপদা রাম মন্দির লাইশঙনা মশাগী শক্তম অমা লাকপগী মতৌ উরম্লগনি, কাশীগী বিশ্বানাথ ধাম ওইরো, নত্ত্রগা ঐহাক্কী কেদার বাবাগী ধাম ওইরো, ঙসিদি ভারতকী স্পিরিচুএল অমসুং নাৎকী নীংথিরবা শক্তমশিং অমুক্কা হন্না হল্লক্লবনি। ঙসিদি, অনৌবা ভারতনা মতমগা চুনবা মঙলানগা লোয়ননা অরীবা হেরিতেজ, অরীবা শক্তাকপু হান্নগী মতৌগুম্না মান্ননা থৱাই য়াওনা হিংলি অমসুং মসিগীদমক্তা চাউথোকচরি। মসিগুম্বা স্পিরিচুএলগী মফমশিংনা অনৌবা খুদোংচাবা কয়াগী হৌরকফম ওইরক্লি। পৱাগরদা ইমা কলিকা লাইশঙবু নৌনা শেমগৎ-শাগৎপা অসিনা হায়রিবা খোঙচৎ অসিগী শরুক অমা ওইরি। ঐহাক্না ঙসিগী তাঞ্জা অসিদা ইমা মহাকালীগী খুয়াখাদা কোক নোঞ্জবগা লোয়ননা অদোম খুদিংবুসু থম্মোই শেংনা থাগৎচরি। ঙসিগী থৌরম অসিদি সবকা সাথ, সবকা বিশ্বাস অমসুং সবকা প্রয়াসকী খুদম অমসু ওইরিবনি।

মরুপশিং,

ঐহাক্না ঙসি শ্রী ইমা কলিকা লাইশঙগী ফিরাল চিংখৎপা অমসুং লাই খুরুমজবগী খুদোংচাবা ফংজরে। ঐহাক্না ইমাগী খুয়াখাদা চঙজরক্লিবা অসিদা করি নীজসিগে হায়না ঐহাক্না ইমাবু খুরুমজবা মতমদা খল্লম্বনি। পুৱারীনা খুদম্নি, ইমা কালীগী থৌজালদগী স্বামী বিবেকানন্দজীনা মীয়ামগী সেবা তৌরম্বদগী ইশ্বরগী সেবাদা লুপশিনখিবনি। ঐহাকসু পাঙ্গল-থৌনা কয়াগা লোয়ননা, কত্থোকপা অমসুং ৱাখল চেৎপগা লোয়ননা, মীয়াম খুদিংগী সেবক ওইদুনা মখোয়গী সেবা তৌবা ঙম্বা ওইহনবীয়ু। ঐহাক্কী ইফমদা লৈবা পাঙ্গল অমসুং ৱাখল্লোন পুম্নমক্কা লোয়ননা ঐহাক্না লৈবাক্কী ইমা অমসুং ইচে-ইচলশিংগী য়াইফ য়ুম্বালগীদমক্তা কত্থোকপা ঙম্বা ওইজগে।

হৌজিক্কী পুংফমসিদা, মসিগী গর্বী গুজরাতকী লমদমদগী ইমা কালীগী খুয়াখাদা চঙজদুনা, ঐহাক্না লৈবাক্কী নীংতম্বগী অমৃত মহোৎসবপুসু নীংশিংলি।

মরুপশিং,

লৈবাক্কী নীংতম লান্দা গুজরাতনা কত্থোকখিবা কয়াগা মান্ননা লৈবাক্কী চাউখৎ-থৌরাংগীদমক্তসু কত্থোক্লি। গরবী গুজরাতনা ভারতকী চাউথোকচনীংঙাই ওইরবা শক্তাক্কা অমত্তা ওইরি। গুজরাতনা ভারতকী কারবারগী লম্বুসু লুচিংলি, অমসুং ভারতকী স্পিরিচুএলিতীবু য়োকখৎনবা হোৎনফম থোকপা থবক পুম্নমক হোৎনরি।

চহি কয়া লান্থেংনরবা তুংদা ভারতনা নীংতম্বা ফংলবা মতুংদা ঐখোয়না মীখা পোনবা অমসুং মীওৎ মীনৈগী চৈথেংনা অদুমক শোকহল্লমখি। ঐখোয়না লেপ্তুনা লৈরিবা ঐখোয় লৈরি হায়বগী ৱাখল্লোন অমুকহন্না মপাঙ্গল লৈনবা ঐখোয়না হোৎনখি, লান্থেংনখি। অসিগুম্লবা ভারতকী সংস্কৃতীগী মনীং তম্বগী থৌওংসু সর্দার সেহাবকী লুচিং মখাদগী গুজরাত্তগী হৌখি। সোম্নাথ লাইশঙ শেমগৎ-শাগৎপগী ৱাখল্লোন্সু অনৌবা ভারত শেমগৎ-শাগৎকে হায়বগী ৱারেপ ওইনা ঐখোয়গী মাঙদা লাকখি।

গুজরাতপু লৈবাক শিনবা থুংবদা শক্তাক্লিবা পৱাগর অমসুং পঞ্চমহল অমসুং সোম্নাথকী অদুগুম্লবা চৎনবীবু হেন্না খুমাং চাউশিলহন্নবা ঐখোয়না হোৎনরি। ঙসি পায়হনখ্রিবা ফিরাল অসিদি মহা কালী লাইশঙ খক্কী ফিরাল নত্তে, গুজরাত অমসুং লৈবাক্কী সংস্কৃতীগী চাউথোকচবগী ফিরাল অমসু ওইরিবনি। পঞ্চমহল অমসুং গুজরাতকী মীয়াম্না লাইশঙ অসিগী মশেক-মঙালগীদমক্তা চহি কয়াদগী হোৎনদুনা লাক্লি। হৌজিক্তি সনা তোপ্লবা কলশ অসিগা লোয়ননা লাইশঙ অসিগা মরী লৈনবা মঙলান খুদিংমক ফংজরে। ঙসিদি, পৱাগর অমসুং পঞ্চমহলগী নীংজরকপশিং মঙফাওনরে।

পঞ্চমহল অমসুং লমদমসিগী অরিবা চৎনবীদি ঐহাক্না নীংশিংই, অদুবু হৌজিক্কানগী চৎনবীদি কয়া খঙদ্রে। অদুবু ঐহাক্না খঙলিবা অরিবা চৎনবীশিং অসিগী মনুংদা, করিগুম্বা লুহোং-খোংদোংবা থোকপা মতমদা লাইশঙ অসিদা খ্বাইদগী অহানবদা লাক্তুনা লুহোংবগী বার্তোনবু ইমাগী খুয়াখাদা থম্নরম্মি, লাইশঙগী পুজারীশিংনা বার্তোন লাকপা খুদিংবু ইমাগী মফমদা পাথোক্নরম্মি। থৱাই য়াওনা পাথোক্নরম্মিবনি, সুরেন্দ্র কাকাসু থেংনরবনি, হৌজিকসু অদুমক মখা চত্থরিবনি।

বার্তোন পীরকশিংগী মফমদা লাইশঙগী মাইকৈদগী খুদোলসু পীনবনি। কয়াদা চাউনা ইকায় খুম্নরিবনো? চৎনবী অসি মতম শাংনদগী চৎনদুনা লাক্লবনি। অদুবু, ইমানা ঐখোয় খুদিংগী মফমদা ঙসিদি চাউরবা খুদোল অমা পীবিরে। ইমাগী দর্বারবু অমুক হন্না শেমগৎ-শাগৎলিবা, ফিরাল চিংখৎলিবা অসিদগী হেন্না চাউবা করি খুদোল লৈবগে? ইমাগী থৌজাল য়াওদনা ঙসিগী থৌরম অসি ওইথোক্কদরা?

ঙসি শ্রী কলিকা লাইশঙগীদমক্তা পাংথোক্লিবা থৌরম, মসিদসু য়াম্না নুংঙাইবা ৱাফম অমা লৈরি। মহা কালী লাইশঙগী মশক-মতৌদা নীংথিজনা লৈতেংলে, অদুবু অরিবা মতমগী হান্নগী শক্তমদি হোংদ্রি। ঙসিগী সেবা জৈগ্যা অসি গুজরাত সরকার, শেংলবা তীরথ য়াত্রা বিকাস বোর্দ অমসুং ত্রস্তকী মীয়াম্না পুন্না থবক অসি পাংথোকমিন্নবনি। সুরেন্দ্র ভাইনা হৌজিক্তা হায়রিবদুনি, লাইশঙ কমপ্লেক্স অসিবু ইফাও ফাওনহন্নবগীদমক্তা শঙ্গোমগী পুখ্রি অমসুং ছাসিয়াগী  পুখ্রি শম্নহন্নবা লম্বী অমসু শেমগনি হায়বীরে। জৈগ্যা তৌফম, চাক চাফম, লমকোয়বশিংগী লাই নীংফম অমসুং ছসিয়া পুখ্রিদগী লাইশঙ ফাওবগী লিফকুম্বা খুদোংচাবশিংসু য়াম্না থুনা শঙ্গারগনি। মসিদা নত্তনা, মাঞ্চী মনাক্তা গেস্ত হাউস অমসুং মলতিলেভেল পার্কিংসু লৈরগনি।

লাইনীংবশিংনা মফমসিদা য়ৌরকপদা মমাংগী মতমদা শাংলবা মতম চঙলম্মি। সিরি থাক কাবদা লাইনীংবশিংনা অৱাবা কয়া মাইয়োক্নরম্মি। মমাংগী সিরি থাকশিং করম্না তৌরম্মি হায়বসিদি মমাংদা লাকখিবা মীওইশিং খক্তনা খঙগনি। ঙসিগী ফিভম অসি য়াম্না হেন্না ফগৎলে। হৌজিক্তি, লাইশঙ য়ৌনবা নুংগী সিরি থাক অফবা অমা শেম্লে। সিরি থাকসু পংৱাং ৱাংবা নত্তে। কাবশিংনা খুদোংচাদবা থেংনদনবা ৱারোল খল্লগা শারে। মমাংগী মতমদদি, লাইশঙগী মপুং ওইবা মফমদা মীওই দর্জন অনিনা পুন্না অমুক্তা য়ৌরকপা ঙমরম্বা নত্তে। ঙসিদি, মীওই চাম্মদগী হেনবনা পুন্না অমুক্তদা য়ৌরকপা ঙম্লে, নীংথিজনা লাই খুরুম্বা ঙম্লে। মী ইন্নবগী চাং হন্থরবনিনা লাইনীংবা লাকপশিংসু তেক্ত-কায়দরে। লাইশঙ কমপ্লেক্স পাকথোক চাউথোকপদগী মী নেৎশিন্নবগী থৌওং কনবা ঙম্লগনি, অদু ওইরবদি লাইনীংবা লাকপা মীয়ামগী মশিংসু হেনগৎলগনি। অদুগা মফম অসি চত্থোক চৎশিন তৌবদা অরুবা মফম ওইবনা কালী ইমা খুরুম্বা লাকপা মীওই খুদিংদা লাইশঙগী কাঙলোন ইনবীনবা হায়জরি। খুদোংথীবা অমত্তা থোকহন্নীংদে। মমাংদা খুদোংথীবা কয়া থোকপা মতমদা ৱাখল য়াম্না ৱারম্মি, অদুবু থৌজাল লৈবনা থবক থৌরম অদুমক মখা তানা চত্থরম্মি। অৱাংবা মফমসু ওইবনা কাঙলোন ইনবীয়ু হায়না হায়জনীংই। অরুবা ফিভমগী কয়াগী মরক্তা থবক পাংথোক্তবা য়াদবনা পাংথোক্নরম্মিবনি। অদুনা, ঐখোয়না কাঙলোন নীংথিনা ইল্লিবমখৈ লাইনীংবা লাকপা মীওইশিংগী নুংঙাইবা হেনগনি, ইমাগী থৌজাল ফংগদৌরিবনি। চিং মথক্তা পুখ্রি অমা লৈরিবা অসিসু শেমগৎলি। পুখ্রি অসিগী মাইকৈ মরিদা কোইদানবা লম্বী শেম্লি। মসিনা মীয়ামদা য়াম্না খুদোংচাবা পীগনি।

ইমা মহা কালীগী খুয়াখাদা লাকপদা ঐখোয়না ইমাগী থৌজাল হঞ্জিন-হঞ্জিন্না লৌনীংই। অদুবু, পৱাগরগী খোঙচৎ অসি য়াম্না লুবনা পুন্সিদা ইমাবু অমুক্তি খুরুম্বা চৎনীংই হায়নরম্মি। ঙসিগী লৈরক্লিবা খুদোংচাবশিংনা অরুবা কয়াসু লাইথোকহল্লে। ইমা-ইবেন, ইচে-ইচল, অহল-লমন, নহা-অঙাং, দিব্যাং, মীওই খুদিংনা ইমাগী খুয়াখাদা লাক্তুনা, ইমাগী প্রসাদ য়াম্না লাইনা ফংবা য়ারে।

ঐহাক ইশামকসু মফমসিদা তেক্নোলোজীগী খুত্থাংদগী য়ৌরকখি, রোপৱে তোংদুনা লাকই। রোপৱেনা মফমসিদা লাকপদা লাইথোকহনবতা নত্তনা পৱাগরগী পুক্নিং হুনীংঙাই ওইবা ফজবা কয়াসু উবা ফংলে, মদুগী নুংঙাইবা লৌবা য়ারে। ঙসিদি, গুজরাতকী লমকোয়ফম অমসুং লাইনীংফম কয়া অসিগুম্বা রোপৱেনা শম্নহল্লে। পৱাগর, সপুতারা, অম্বাজী অমসুং গির্নারগুম্বা মফমদা রোপৱে লৈবদগী মীয়াম্না খুদোংচাবা কয়া ফংলে।

পৱাগর, ইমা অম্বা অমসুং সোম্নাথ, দ্বার্কেশকী থৌজালদগী গুজরাতনা গর্বী গুজরাত ওইরিবনি। গুজরাতকী শক্নাইরবা কবি নর্মদনা গুজরাতকী সংস্কৃতীগী ফজববু ফোংদোক্তুনা অসুম্না ইবীরম্মি – উত্তরমা অম্বা মাত, পুর্বমা কালী মাত। ছে দকশিন দিশামা কর্তা রক্ষা, কুন্তেশ্বর মহাদেব। নে সোম্নাথ নে দ্বার্কেশ এ, পশ্বিম কেরা দেব ছে সহায়মা সাক্সাত, জয় জয় গর্বী গুজরাত।

(ইমা অম্বানা অৱাংদা, কালী ইমানা নোংপোক্তা, কুন্তেশ্বর মহাদেবনা খাদগী ঙাকপীবা, সোম্নাথ অমসুং দ্বার্কেশনা নোংচুপকী লাইনি, জয় জয় গর্বী গুজরাত...)

ঙসিদি, গুজরাতকী অসিগুম্বা শক্তাক্না মালেম অতিয়া শোক্লি।

কবি নর্মদনা গুজরাতকী শক্তাক ওইনা সংস্কৃতীগা মরী লৈনবা মফমশিং পল্লিবা, হায়রিবা লাইনীংফমশিং অসিনা ঙসিদি চাউখৎ-থৌরাংগী অনৌবা লম্বীদা চঙশিল্লি। থাজবগী মাইকৈগা লোয়ননা তীর্থ অমসুং লাইশঙশিংগী চাউখৎ-থৌরাংদা মতমগা চুনবা তেক্নিক কয়া শিজিন্নরি। তীর্থ মফম খুদিংদা লাইনীংবা লাকপা মীওইশিংগী খুদোংচাবশিংবু হান্নদগী হেন্না হেনগৎহলি। গুজরাতকী তীর্থদা হৌজিক লাইগী ইথিলসু লৈরে, শান্তিসু লৈরে, ৱারোইশিনসু লৈরে অমসুং অপেনবসু পোক্লে, মসিদগী হেন্না নুংঙাইবা করি লৈরিবগে?

করিগুম্বা ইমাগী লাইশঙশিংগী মতাংদা ৱারী খন্নবা মতমদা, শক্তিগী মতাংদা ৱারী শাবা মতমদা, গুজরাতকী মীয়াম অসি লাইবক য়াম্না ফরবনি অমসুং ইমা শক্তিবু নীংজবা মীওইশিংগী মনাক্তা শক্তি চক্রসু লৈরবনি। শক্তি রক্ষা চক্রা অমা লৈ, মসিনা গুজরাতকী ঙাকথোকপগী কুয়োম অমগুম্না মথৌ তৌরি। গুজরাতকী তোঙানবা মফমশিংদা লৈবা ইমাশিংনা গুজরাতপু লেপ্তনা থৌজানবীরি অমসুং ঙাক-শেনবীরি। বনসকন্থাদা অম্বাজী লৈ, পৱাগরদা ইমা কালী, চোতিলাদা ইমা চমুন্দা, উনঝাদা ইমা উমিয়া, আসাপুরা ইমানা কৎচকী মথতা লৈরে, নবসারীগী মনাক্তা উনাই ইমা লৈরে, দেদিয়াপারাগী মনাক্তা দেবমোগ্রা ইমা লৈরে, ভবনগরগী মনাক্কী মাতেলদা খোরিয়ার ইমা লৈরে, মেহসান্দা বহুচারা ইমা লৈরে, খোদলধাম, উনিয়াধাম, গির্নারগী মথক্তা অম্বা ইমা, ইমা কয়া অমা কাচিন কোয়া খুদিংদা লৈ। ঐখোয়দা ইমাশিংগী থৌজাল লেপ্তনা লৈ, অদুনা হায়বদি, ঐখোয়গী নাক্তা শক্তি খুদিংগী থৌজাল লৈরি।

ঐখোয়গী ভুপেন্দ্র ভাই পতেলনা হৌজিক্তসু হায়বীখ্রে, অম্বাজীদা লৈরিবা গব্বর চিংখোংগী ৩.দি. ভিদিও প্রোজেক্সন মেপ্পিংগী থবক পায়খৎপা হৌরে। মসিগা লোয়ননা মহা আর্তীসু হৌখ্রে। কেন্দ্রগী প্রসাদ য়োজনাগী মখাদা গব্বর তীর্থবু নৌহৌননা শেমদোক-শাদোকপগী থবক হৌজিক পায়খৎলি। অম্বাজী লাইশঙ কমপ্লেক্সকী চাউখৎ-থৌরাংগী থবকসু হৌজিক পায়খৎলি। কোতেশ্বর মহাদেব লাইশঙ, রিঞ্ছদিয়া মহাদেব লাইশঙগুম্বা অতোপ্পা মফমশিংদসু চাউখৎ-থৌরাংগী থবক পায়খৎলি।

ঙসিসু, মতম খরগী মমাংদা ঐহাক্না সোম্নাথ লাইশঙগী চাউখৎ-থৌরাংগী থবক কয়া মীয়ামদা খুৎশিন্নবগী খুদোংচাবা ফংজখ্রে। দ্বারকাদসু ঘাত, লাইশঙ ফজথোকহনবা অমসুং পেসেঞ্জরগী খুদোংচাবা হেনগৎহনবগী থবক কয়া পায়খৎলে। পঞ্চমহলগী মীয়ামদা ঐহাক্না হায়নীংবদি, মপানগী লাইনীংবা কয়া মফমসিদা লাই খুরুম্বা লাক্লি, মখোয়গী ঐখোয়গী রাজ্যগী অতোপ্পা মফমশিংদসু চৎনবা শোইদনা হায়বীয়ু। ভগবান কৃষ্ণ অমসুং ইমা রুকমনিগী লুহোংফম মাধবপুর, মফমসিদা ইমা রুকমনীগী লাইশঙবু নৌহৌননা শেমগৎ-শাগৎপগী থবক পায়খৎলগনি। হৌজিক ভুপেন্দ্র ভাইনা হায়খিবগুম্না, ঐখোয়গী রাস্ত্রপতিনা মাধবপুর ঘেদ মেলা শঙ্গাবা এপ্রিল থাদা লাক্লম্মিবদুনি।

তীর্থশিংগী মফমশিংবু চাউখৎহনবা হায়বসিদা লাইনীংবগী থৌওংশিংদা চাউখৎ-থৌরাং পুরকপা খক নত্তে, ঐখোয়গী লাইনীংবগী চৎনবী অসিদি লৈবাক্কী অমত্তা ওইবা অমসুং তোঙানবা মতিক মগুন চেনবগী খুদম অমনি। মফমশিং অসিদা লাইনীংবা মীওই কয়ানা খুদোংচাবা কয়াগা লোয়ননা লাক্লিবনি। মফম অমা হেক্তগী তুরিজম চাউখৎপা মতমদা থবক লৈবা হেনগৎলকই, ইনফ্রাস্ত্রকচর চাউখৎলকই। ঐখোয়গী তীর্থ য়াত্রিশিংনা মফম মফমগী চৎনবীবুদি মীয়ামদা শক্তাক্লি, মসিগী মথতা মফম মফমগী কলা, স্কিল অমসুং খুৎ-শা হৈবগী থবকশিংবুসু হেন্না খুমাং চাউশিলহল্লি। ঐখোয়গী কেবারিয়া, মফমদুগী ঐখোয়গী এক্তা নগর, স্তেচ্যু ওফ য়ুনিতী লাক্লবা তুংদা মফমসিগী তুরিজম য়াম্না চাউখৎলে হায়বসি ঐখোয়না শাখিনি। ঙসিদি মালেমগী লমকোয়ফমশিংগী মনুংদা মসিসু পন্থুংফম অমা ওইনা শকখঙবা হৌরবনি। মালেমগী মশাগী মফম কল্লবনি। মতৌ অসুম্না, খুদোংচাবা হেনগৎলবা তুংদা, কাশী বিশ্বানাথ ধাম অমসুং চার্ধাম য়াত্রাদা লাইনীংবা লাকপা মীওই মশিংনা অনৌবা রেকোর্দসু থমখ্রবনি। হন্দক্কী চতাংদসু শুপ্নগী চয়োল খরগী মমাংদা কেদার্নাথনা রেকোর্দ অয়াম্বা থুগাইরবনি, লমকোয়বা কয়া অমা মফমসিদা লাক্নখ্রবনি।

পৱাগর চাউখৎলকপনা মফমসিদা লাকপা লাইনীংবগী মশিংসু হেনগৎলগনি, মসিদগী বদোদরানা কান্নবা য়াম্না ফংগনি। পঞ্চমহল ওইরো, মফমসিগী জংগলদা লৈবা মীওইশিং ওইরো, ঐখোয়গী ত্রাইবেল ইচিল ইনাওশিং ওইরো, মীওই খুদিংগী পুন্সিদা অচৌবা পাঙ্গল হাপ্পগনি। লাইশঙদা লাকপা লাইনীংবশিংনা মফমসিদগী বিরাস্তবন্দসু শোইদনা চৎকনি। বিরাস্তবনগী মহৌশাগী ফজবা, অকোয়বগী ফিভম, চৎনবী অমসুং অয়ুর্বেদগুম্বা হীরমশিংনা লৈবাক্কী ওইনা য়াম্না চাউনা পুক্নিং চিংশিনবা অমসুং ইথিল পীবা মফম অমা ওইবা য়াগনি। মতৌ অসুম্না, আর্কিওলোজিকেল পার্ক অমসুং পৱাগর কিলাসু মীয়ামগী পুক্নিং চিংশিনবা হৌরগনি। চাউখৎ-থৌরাংগী অসিগুম্বা থবকশিংনা পঞ্চমহলবু লৈবাক্কী মরু ওইবা তুরিজমগী মফম ওইরকপদা মতেংসু পাংগনি।

পৱাগরদা স্পিরিচুএলিতী, পুৱারী, অমসুং কলা সংস্কৃতী লৈ। মফমসিদা ইমা মহা কালীগী শক্তিপীথ অমসু লৈ, অদুগা অতোপ্পা অমদনা, জৈন মন্দিরগী হেরিতেজসু লৈ। মসিনা হায়বদি, পৱাগর অসিদা ভারতকী পুৱারীগী তোঙানবা মগুন চেনবগা লোয়ননা লাইনীং কয়াবু অমত্তা ওইনা য়েংনবগী মতৌসু লৈ হায়বনি। য়ুনেস্কোনা চম্পানেরগী আর্কিওলোজীগী মফমসিবু মালেমগী হেরিতেজকী মফম হায়না লাউথোকখ্রবনি। মফমসিদা লমকোয়বা লাকপগী মশিং হেনগৎলকপনা, মফমসিগী শক্তাকপু হেন্না মপাঙ্গল লৈহল্লগনি।

পঞ্চমহলদা লমকোয়বা কয়া লাকপগী ওইথোকপা লৈবতা নত্তনা মফমসিগী নহারোলশিংগী অনৌবা খুদোংচাবা কয়া মশিং য়াম্না পুরক্লগনি। ঐখোয়গী ত্রাইবেল ইচিল ইনাওশিংনা অখন্নবা ওইনা থবক্কী খুদোংচাবা কয়া ফংলগনি। মখোয়গী কলা সংস্কৃতী অমসুং স্কিলবুসু মীয়াম্না হেন্না শকখঙলগনি।

অদুগা ঐখোয়গী পঞ্চমহলদি বেজু বাওরাগুম্বা শক্নাইরবা শৈশকপগী লমদম্নি। মহাক্কী তেলেন্ত অসি ঙসিসু মফমসিগী লৈহাওদা য়াওরি। হেরিতেজ, সংস্কৃতীনা মপাঙ্গল লৈবা মফম খুদিংদা কলা অমসুং তেলেন্তসু হেন্না চাউখৎলি। অসিগুম্বা তেলেন্তপু ঐখোয়না হেন্না চাউখৎহনগদবনি, অনৌবা শক্তাক পীগদবনি।

চম্পানের হায়বা মফমসি ইং ২০০৬তা গুজরাতকী মমাই পুরক্কদবা জ্যোতিগ্রাম য়োজনা হৌখিবা মফম্নি। ঐহাক্না মুখ্য মন্ত্রী ওইবা মতমদা, নুমিদাংগী চাক্লেন চাবগী মতম ফাওবদি মৈ লাকহনবীয়ু হায়না ৱাকৎলি। মসিগীদমক্তা করিগুম্বা খরা শীনবীয়ু হায়না মীয়াম্না হায়জরম্মি। মদুদগী ঐখোয়না ইমা কালীগী খুয়াখাদা ফমদুনা জ্যোতিগ্রাম য়োজনাগী খুত্থাংদগী গুজরাত অমসুং লৈবাক মনুংদা পুং ২৪ মৈ ফংহনবদা মায় পাকখিবনি, মতমদুদা ঐখোয়গী রাস্ত্রপতি, শ্রী এ.পি.জে. অবদুল কলাম্না থৌরম অসিদা লাকখিবনি, মহাক্কী শেংলবা খুয়াখাদগী য়োজনা অসিবু ঐখোয়না হৌদোকখিবনি। য়োজনা অসিনা গুজরাতকী চাউখৎ-থৌরাংগী ৱারীদা অনৌবা তাঙ্কক অমা হাপ্পীখিবনি। মসিগী মতেংদগী গুজরাতকী মীয়াম্না পুং ২৪ মৈ ফংবা হৌখিবনি।

পৱাগরগী মমিংমক্তদা নুংশিৎকী পাঙ্গল অমসু মওং অমদা য়াওরিবনি। মফমসিদা নুংশিৎকী লাইগী অখন্নবা থৌজাল লৈ। পৱাগরদা শিৎলিবা নাৎ চাউখৎপগী নুংশিৎনা মফমসিগী চাউখৎ-থৌরাংগী মনম্বুসু গুজরাতকী মফম খুদিংদা য়ৌহনগনি হায়না ঐহাক্না থাজবা থম্মি। অসিগুম্বা ৱাখল্লোনগা লোয়ননা, ঐহাক্না ইমা মহাকালীগী খুয়াখাদা অমুক্কা হন্না কোক নোঞ্জরি। অদোম্বুসু ঐহাক্না য়াইফ পাউজেল পীজরি। ইমা কালীগী খুয়াখাদা ঙসি লাকচরিবসিদা, অতোপ্পা রাজ্য অমসুং চাউরবা গুজরাতকী মফমদগী মীওই কয়াসু ইমা কালী খুরুম্বা লাকপীরি। মখোয়বুসু ঐহাক্না থাগৎচরি। মখোয়গী অহল লমনশিংনা মফমসিদা লাকচবা হায়না খঞ্জরম্বা অদুবু অপাম্বা ফংখিদবাম অদুবু ঙসিদি মখোয়গী মচা-মশুশিংনা মখোয়গী মফমদা হৌজিক্তি মফমসিদা অহোংবা য়াম্না লৈহৌরে, হান্নগুম্না অদোম্না থেংনরম্বা অৱাবা থেংনদ্রে হায়না তম্বা য়ারগনি। হৌজিক্তি, ইমা কালীগী হান্নগী মতমগী মশেক মঙালনা ঐখোয়বু অমুক্কা হন্না থৌজানবীরে। ৱাখল্লোন অসিগা লোয়ননা ঐহাক্না অদোম্বু অমুক্কা হন্না থাগৎচরি। ত্রস্তী মন্দল, গুজরাত সরকার অমসুং ভুপেন্দ্র ভাইগী লুচিং মখাদা পায়খৎলিবা চাউখৎ থৌরাংগী থবকশিংবু থাগৎচরি। অদোম্বু অমুক্কা হন্না থাগৎচরি।

*****