প্রধানমন্ত্রীগী লোইশঙ
“ঐগী ইমাদি ইচম চমবতা নত্তনা তোপ তোপ্পা মীশক অমসুনি”: পি.এম. মোদীনা মহাক্কী মমানা চহি চাম্মা চঙশিল্লকপদা পুক্নিং নুংশিনিংঙাই ওইবা ব্লোগ
Posted On:
18 JUN 2022 8:29AM by PIB Imphal
মহাক্কী মমানা হন্দক্কী চহিসিদা চহি চাম্মা চঙশিল্লকপগা লোয়ননা, পি.এম. নরেন্দ্র মোদীনা পুক্নিং নুংশিনিংঙাই ওইরবা ব্লোগ অমা ইরকখি। মহাক্না অঙাঙ ওইরিঙৈদা মমাগা লোয়ননা লেনখিবা অখন্নবা মীকুপ খরা নীংশিংখি। মহাক্না অসুম চাউখৎলকপা মতমদা মহাক্কী মমানা কত্থোকখিবা কয়া নীংশিংখি অমদি মহাক্কী পুক্নিং, পর্সনেলিতী অমসুং মশানা মশাবু থাজবগী ফীভম শেমখিবা মহাক্কী মমাগী মতিক কয়াবু মহাক্না পনখি।
“ঙসি, ঐগী ইমা শ্রীমতি হীরাবা মোদীনা চহি চাম্ম চঙশিল্লক্লে হায়বা ৱাফমসি ময়ামগী মফমদা থমজবদা হরাউবা অমদি লাইবক ফবা ফাওজরি। হন্দক্কী অসি মহাক্কী চহি চাম্ম শুবগী কুমওন ওইগদৌরিবনি।” হায়না পি.এম. মোদীনা ইখি।
খাঙবা কনবগী খুদম অমা
মহাক্না অঙাঙ ওইরিঙৈদা মমানা থেংনখিবা অৱাবা ফীভমশিং নীংশিংলদুনা পি.এম. মোদীনা হায়খি, “ঐগী ইমাদি ইচম চমজবতা নত্তনা তোপ তোপ্পা মীওই অমসুনি। মমা অতৈগী মতৌগুম্বনি।” মহাক্না চহি নৌরিঙৈ মতমদা, পি.এম. মোদীগী মমানা মহাক্কী মমা নৌনা কায়নখি। মহাক্না হায়খিবদা, “মহাক্না ঐগী ইবোক্কী শক্তম অমদি মহাক্কী মতম্বাক্তা শান্নখিবা মীকুপ অমত্তা নীংশিংবা ঙমখিদে। মহাক্কী অঙাঙ ওইরিঙৈ মতম মমা য়াওদনা লেল্লকখিবনি।”
মহাক্কী মমা মপা অমসুং মচিন মনাওশিংগা লোয়ননা লৈমিন্নখিবা বদনগরদা লৈবা লৈখোম্না তাবা ফক্লাং অমসুং লৈবাক্কী তাইলনা য়ুমথক্তা কুপ্পা পীক্লবা য়ুমবু মহাক্না নীংশিংখি।
মহাক্কী মমানা য়ুমগী কুপ্নোম মথন্তনা হোৎনবতা নত্তনা মহাক্কী ইমুংগী পীক্লবা শেন্থোক অদুবু মতেং পাংননবা থবকসু তৌখি। মহাক্কা য়ুম খরগী কোন ফেংলম্মী অমদি য়ুমগী শেঞ্জং কোন্ননবগীদমক্তা লংচাক চাক্লম্মি।
“নোংজু মতমদা, ঐখোয়গী য়ুম নোং য়ুরম্মি, অমদি য়ুম মনুংদা ঈশিং থুম্লম্মি। ইমানা নোং য়ুরিবা মপাদুনা বাল্তিন অমসুং কোন থমদুনা য়ারম্মি। খ্বাইদগী খুদোংথিবা ফীভমদসু ইমানা খাঙবা কনবগী মতৌ উত্তুনা হোৎনরকখি,” হায়না পি.এম. মোদীনা নীংশিংখি।
লু-নানবগী লমদা থবক তৌবিরিবা মীওইশিংগীদমক্তা ইকায় খুম্নবা
লু-নানবা হায়বসি মহাক্কী মমানা মতম পুম্নমক্তা পামখিবা ৱাফম অমনি হায়না পি.এম. মোদীনা হায়খি। মহাক্কী মমানা লু-নানবা পামজবগী মওং মতৌ অমদি শক্তম কয়া মহাক্না পাউদমখি।
পি.এম. মোদীনা ফোঙদোকখিবদা মহাক্কী মমানা লু-নানবগী লমদা থবক তৌরিবা মীওইশিংবু মতম পুম্নমক্তা ইকায়-খুম্নরম্মি। কনাগুম্বা মীওই অমনা মখোয়গী বদনগরদা লৈবা য়ুম মনাক্তা খোঙলম শেংদোকপা লাকপা খুদিং মহাক্কী মমানা চা পীথক্তনা হলহনখিবা নোংমতা য়াওদে।
অতোপ্পগী নুংঙাইবদা নুংঙাইবা ফাওবা
মহাক্কী মমানা অতোপ্পা মীওইগী নুংঙাইবদা তশেংনা নুংঙাইবা ফাওজরম্মি হায়না পি.এম. মোদীনা পনখি। “ঐগী ইপাগী লুনা তিন্নবা মরূপ অমা নক্নবা খুল অমদা লৈরম্মি। মহাক্না মনুং মতম চানা লৈখিদ্রবা মতুংদা, ঐগী ইপানা মহাক্কী মরূপকী মচা অব্বাসবু ঐখোয়গী য়ুমদা পুরকখি। মহাক্না ঐখোয়গা পুন্না লৈদুনা মহাক্কী মহৈ মশিং তমবা লোইশিনখি। ইমাসু ঐখোয় ইচিল ইনাওশিংদা উৎলিবা মিনুংশি অদু চপ চানা অব্বাসকী মফমদা উৎখি। চহি খুদিং ইদ কুমহৈদা ইমানা মহাক্কী পামজবা মথেল থোংবিরম্মি। কুমহৈগী মতমদা কৈরোই লৈকায়গী অঙাঙশিং ঐখোয়গী য়ুমদা লাক্তুনা ইমানা শেম শাবা মথেলশিং হরাওনা চারম্মি,” হায়না মহাক্না নীংশিংখি।
পি.এম. মোদীগী মমানা থৌরম অনিদা মহাক্কা লোয়ননা চৎখি
ব্লোগ পোস্ত অদুদা, পি.এম. মোদীনা মহাক্কী মমানা মীয়াম তিনবা থৌদোক অনিখক্তা মহাক্কা লোয়ননা চৎমিন্নখিবা পনখি। অহানবদা মহাক্না এক্তা য়াত্রা লোইশিল্লকপদা লাল চৌক্তা লৈবাক্কী ফিরাল চিংখৎলম্লগা স্রিনগরদগী হল্লক্লবা মতুংদা অহমদবাদতা পাঙথোকপা মীয়াম তিনবা থৌরম অমদা মহাক্কী মমানা মহাক্কী লাইবক্তা চন্দন থিনবিখি। অনিসুবা থৌরমদুনা পি.এম. মোদীনা ২০০১দা গুজরাতকী মুখ্য মন্ত্রী ওইনা অহানবা ওইনা ৱাশক লৌখিবা নুমিত্তুনি।
পি.এম. মোদীগী মমানা মহাক্কী মফমদা তমবিরমবা পুন্সিগী পরা অমা
মহাক্কী মমানা ফোর্মেল ওইনা মহৈ মশিং তমদ্রবসু তমশিনবা য়াই হায়বা খঙহনবিরম্মি হায়না পি.এম. মোদীনা ইখি। মহাক্কী খ্বাইদগী ফবা ওজা – মহাক্কী মমা য়াওনা মহাক্কী ওজা পুম্নমকপু মীয়াম পুনবা থৌরম অমদা মহাক্না ইকায় খুম্নবা উৎপা পামখিবা থৌদোক অমখক মহাক্না পাউদমখি। অদুম ওইনমক মহাক্কী মমানা মদুবু য়াখিদবগা লোয়ননা “য়েংউ, ঐদি ইচম চমবা মীওই অমনি। ঐনা নহাকপু পোকপা ওইরবসু, নহাকপু তাকপি তমবিরকপা অমদি য়োকপিরকপদি মপু মহাক্ননি,” হায়না হায়খি।
মহাক্কী মমানা থৌরম অদুদা শরুক য়াবা লাকখিদ্রবসু, মহাকপু অল্ফাবেৎ তমবিখিবা লৈকায় ওজা জেথাভাই জোসি জীগী ইমুংদগী মীওই অমবু মহাক্না কৌরম্মি হায়না পি.এম. মোদীনা মখা তাখি। “মহাক্কী ৱাখল খনবগী মওং অমদি তুংগীদমক্তা শাংনা উবা ঙম্বগী মতৌনা ঐবু মতম পুম্নমক্তা অঙকপা ফাওহনখি,” হায়না মহাক্না ফোঙদোকখি।
মথৌ মশক খঙবা মীওই অমা
মথৌ মশক খঙবা লৈবাকসিগী মীওই অমা ওইনা মহাক্কী মমানা মীখল পাঙথোকপা হৌরকপদগী হৌনা পঞ্চায়ত্তগী হৌরগা পার্লিয়ামেন্তকী মীখল খুদিংমক্তা ভোৎ থাদখি হায়না পি.এম. মোদীনা পনখি।
য়াম্না চমবা পুন্সি মহিং অমা লেল্লম্মি
মহাক্কী মমাগী য়াম্না চমবা পুন্সি মহিংগী মরমদা পল্লদুনা, ঙসিমকসু মহাক্কী মমাগী মিংদা করিগুমবা লনথুম অমত্তা লৈতে হায়না পি.এম. মোদীনা ইখি। “মহাক্না সনা লিক্কোন অমত্তা শিবা ঐনা উখিদ্রি, অমদি মহাক্না মদুদা মপুক্নিংসু লুপ্লমদে। হান্নগী মতৌগুম্না, মহাক্কী পীক্লবা কানুংদুদা য়াম্না চমবা পুন্সি মহিং অমদা মখা তানা লেল্লি,” হায়না পি.এম. মোদীনা ফোঙদোকখি।
হৌজিক চাওখৎলক্লিবা অসিবু থাগোন্নদুনা চৎপা
মহাক্কী মমানা মালেমগী ওইনা হৌজিক চাওখৎলক্লিবা ফীভমগা থাগোন্নদুনা চৎলি হায়না পি.এম. মোদীনা হায়খি। “কুইদ্রিঙৈদা ঐনা মহাক নোংমদা তি.ভি. কয়াম কুইনা য়েংবগে হায়না হংখি। তি.ভি.দা থোরক্লিবা মীওই অয়ামবা মখোয় মশেল খৎনদুনা লৈবা উই, অদুনা ঐদি মোং হাদনা পাউ পাদুনা ময়ামদা মমুৎ তানা খঙহল্লিবা অদুখক্তা য়েংই হায়না মহাক্না পাউখুম পীরকখি। ঐগী ইমানা মতমগী হোংলক্লিবা ঈ-পাউশিংবু খঙনবা হোৎনরমবা উবদা ঐ হরাউখি অমদি অঙকপসু ফাওখি।”
মহাক্কী চহি মতাঙসিদা নীংশিংবগী পাঙ্গল নীংথিনা লৈরি
মহাক্কী মমানা চহি য়ামজরগসু মীৎকুপ নাহুম শিংনা লৈবগী মতৌ উৎপা ইং ২০১৭দা থোকখিবা থৌদোক অমা পি.এম. মোদীনা পাউদম্লকখি। ইং ২০১৭দা পি.এম. মোদীনা কাসিদগী মহাক উনবা হকথেংননা চৎলম্মি অমদি মহাক্কীদমক প্রসাদসু পুরম্মি। “ঐনা ইমাগা উনবা মতমদা মহাক্না ঐঙোন্দা কাসি বিস্বানাথ মহাদেবতা চঙদুনা খুরুম্লমবা হায়না খুদক্তা হংলকখি। ঐগী ইমানা হৌজিকসু কাসি বিস্বানাথ মহাদেব হায়বা মপুং ফাবা মিং অসি শীজিন্নরি। অদুগা ৱারী শারিঙৈ মনুংদা, হৌজিকসু কাসি বিস্বানাথ লাইশঙ চৎপগী লম্বীদু হান্নগা মান্নরিবরা, মীওই অমগী ইংখোল মনুংদা লাইশঙ অমা লৈশিনবদুসু লৈরিবরা হায়না মহাক্না হংলকখি। ঐ ঙকখি অমদি মহাক্না লাইশঙ অদুদা করমবা মতমদা চৎখিবনো হায়না হংখি। মহাক্না চহি কয়াগী মমাঙদা কাসিদা চৎপনি হায়বা ফোঙদোক্লকখি, অদুবু ঙক্লিবদি মহাক্না পুম্নমক নীংশিংলম্মি,” হায়না পি.এম. মোদীনা হায়খি।
অতোপ্পা ৱাখল্লোনবু ইকায় খুম্নবা
মহাক্কী মমানা অতোপ্পগী অপামবু মতম পুম্নমক্তা ইকায় খুম্নরম্মি অমদি মহাক্কী অপামবা নমদুনা ইনশিন্নবা কৈদৌঙৈদসু হোৎনখিদে হায়না পি.এম. মোদীনা মখা তানা শন্দোক্না তাকখি। “ঐ ইশাগী ওইবা ৱাফমদা হায়রগসু, মহাক্না ঐগী ফিরেপ্পু ইকায় খুম্নখি, কৈদৌঙৈদসু খুরৌ ওইখিদে, অমদি ঐবু পুক্নিং থৌগৎপিরম্মি। অঙাঙ ওইরিঙৈদগী হৌনা ঐগী ইফমদা তোপ তোপ্পা ৱাখল্লোন অমগী মমি তাবা মহাক্না খঙখি,” হায়না পি.এম. মোদীনা পনখি।
মহাক্না ময়ুম থাদোক্তুনা চৎলগে খল্লকপা মীকুপ্তা মহাক্কী ফিরেপ্পু মপুং ফানা শৌগৎখিবসি পি.এম. মোদীগী মমানি। মহাক্কী অপামবা খঙলদুনা মহাকপু থৌজানবিরদুনা মহাক্কা মমানা “নহাক্কী পুক্নিংগী অপামবদু তৌ,” হায়না হায়বিখি।
লায়রবা য়াইফহনবদা পুক্নিং চঙবা
মহাক্কী মমানা মতম পুম্নমক্তা খোঙফম চেৎনবা অমদি লায়রবশিংগী য়াইফনবা থবক থৌরমশিংদা পুক্নিং চঙনবা পুক্নিং থৌগৎপিখি হায়না পি.এম. মোদীনা হায়খি। মহাকপু গুজরাতকী মুখ্য মন্ত্রী ওইনা লাউথোকখিবা মতম ২০০১দা থোকখিবা থৌদোক অমা পাউদমখি। মহাক্না গুজরাত য়ৌরবা মতুংদা মমা উনবা চৎখি। মহাক মথুম মরাং হৌরদুনা, “নংনা লৈঙাক্তা তৌরুগদবা থবক থৌরমশিং ঐনা খঙদে, অদুবু ঐনা হায়গদবদি নহাক কৈদৌঙৈদসু শেল চাগনু” হায়না মহাক্কী মফমদা হায়খি।
মহাক্কী মমানা মাগী মফমদা মহাক্কীদমক্তা করিসু ৱাগনু অমদি মীয়ামগী ওইবা থৌদাংদা পুক্নিং চঙউ হায়না হায়খি। মহাক্না ফোন্দা ৱারী শানবা খুদিং, মহাক্কী মমানা “কনাগুম্বা অমত্তদা অরানবা অমদি ফত্তবা অমত্তা তৌগনু, লায়রবশিংগীদমক্তা হোৎনবা লেপকনু,” হায়না হেক হেক হায়।
পুন্সিগী লাইৱা – শু-নোমবা কনবা
মহাক্কী মমা মপাগী পুকচেল শেংবা অমদি মশানা মশাবু থাক ৱাংনা থাঙ্গৎচবা অসিনা মখোয়গী খ্বাইদগী চাউবা মতিক্নি হায়না পি.এম. মোদীনা হায়খি। লায়রবা অমদি মদুনা মরম ওইরগা খুদোংচাদবা কয়া মায়োক্নজরগসু, মহাক্কী মমা মপানা কৈদৌনুংদসু পুকচেল শেংবা অমদি মশাবু ইকায়খুম্নজবগী লম্বী অদুদি থাদোকখিদে। মতম পুম্নমক্তা হোৎনবা লেপ্তবা হায়বসিনা শিংনবা খুদিংআ মায়োক্ননবগী মখোয়গী লাইৱা ওইখি হায়না পি.এম. মোদীনা হায়খি।
মমা ওইবগী মথৌনাগী খুদম অমা
পি.এম. মোদীনা মখা তাখিবদা, “ঐগী ইমাগী পুন্সি ৱারীদা, লংজখিবা মরালগীদমক পুক্নিং ৱাজখিবা, কত্থোকপা, অমদি ভারতকী মমা ওইবগী মথৌনাগী লমদা লৌখিবা থৌদাংশিং ঐনা উখি। ঐগী ইমা অমদি মহাক্কুমবা নুপী করোর কয়া ঐনা উরুবা খুদিং, ভারতকী নুপীশিংনা তৌবা ঙম্লোইদবা করিসু লৈতে হায়বা ৱাখল অসি ঐঙোন্দা ফাওরকই।”
পি.এম. মোদীনা মহাক্কী মমাগী পুক্নিং থৌগৎনিংঙাই ওইরবা পুন্সি ৱারীবু ৱাহৈ খরদা শমজিন্দুনা ফোঙদোক্লি।
“অৱাৎপনা থল্লবা ৱারী খুদিংগী লংদাইদা, মমা অমগী মতিং লৈরবা ৱারী লৈ,
অৱাবা কয়া থেংনখিবা খুদিংগী লংদাইদা, মমা অমগী অচেৎপা ফিরেপ লৈ।”
*******
(Release ID: 1835003)
Visitor Counter : 165
Read this release in:
Punjabi
,
Kannada
,
Malayalam
,
Gujarati
,
Telugu
,
Odia
,
Urdu
,
English
,
Hindi
,
Assamese
,
Marathi
,
Bengali
,
Tamil