প্রধানমন্ত্রীগী লোইশঙ
পি.এম.না সিম্লাদা পাঙথোকপা ‘গরিব কল্য়ান সম্মেলন’ থৌরমদা ৱা ঙাঙখ্রে
“ভারত মচা করোর ১৩০না ঐগী ইমুংনি, অদোম্না ঐগী পুন্সিগী পুম্নমক্নি অদুগা পুন্সি অসিসু অদোমগীদমক্তনি”
“ভারত মচা খুদিংমক্কী ইকায়খুম্নবা ঙাক্নবগীদমক, ভারত মচা খুদিংমক্কী ঙাকশেলগীদমক, ভারত মচা খুদিংমক্কী য়াইফনবগীদমক, ভারত মচা খুদিংমক্না ইংন-চিক্না পান্নবগীদমক, মীপুম খুদিংগী য়াইফ-থৌরাংগীদমক তৌবা য়াবা থবক খুদিংমক তৌগনি হায়বা ঐগী খোঙফম ঙসিসু লেপ্লি”
“থৌগল, অফবা লৈঙাক্লোন অমসুং লায়রবশিংগী য়াইফনবগীদমক শেমখিবা ঐখোয়গী থৌরাংশিংনা লৈঙাক্কী মফমদা লৈরম্বা মীয়ামগী মীৎয়েঙ হোংহল্লে”
“মমাঙদা কোকপা ঙম্লরোই খন্নরমবা ৱায়েৎশিংগী মতম চুপ্পগী ওইবা পাম্বৈ পুথোক্নবা লৈঙাক অসিনা হোৎনরি”
“ঐখোয়গী লৈঙাক্না অহানবু নুমিত্তগী হৌনা লায়রবশিং মপাঙ্গল কলহন্নবা থবক তৌবা হৌরকখি”
“ঐখোয়না ভেত বেঙ্ককী মহুত্তা অনৌবা ভারত অমা শেম্নবা থবক তৌরি”
“১০০% মপাঙ্গল কলহনবা হায়বদি খেন্নবা অমসুং পেলহনবগী থৌওং মুত্থৎপনি। ১০০% মপাঙ্গল কলহনবা হায়বদি লায়রবা খুদিংমক্না লৈঙাক্কী স্কিমশিংগী কান্নবা মপুং ফানা ফংবদুনি”
“অনৌবা ভারতকী থৌনাগী মমাঙদা পান্দম অমত্তা ওইথোক্তবা লৈতে”
Posted On:
31 MAY 2022 1:21PM by PIB Imphal
প্রধান মন্ত্রী শ্রী নরেন্দ্র মোদীনা হিমাচল প্রদেশকী সিম্লাদা পাঙথোকপা ‘গরিব কল্য়ান সম্মেলন’ থৌরমদা ৱা ঙাঙখ্রে। প্রধান মন্ত্রীনা লুচিংবা লৈঙাক অসিগী চহি নিপান মপুং ফারকপগী থৌরম ওইনা পাঙথোক্লিবা অনৌবা মওংগী মীয়ামগী থৌরম অসি লৈবাক শিনবা থুংনা স্তেতশিংগী কোনুংদা, দিস্ত্রিক্ত হেদক্বার্তরশিংদা অমদি কৃষি ভিজ্ঞান কেন্দ্রশিংদা পাঙথোক্লি। থৌরম অসিনা লৈবাক শিনবা থুংবদগী মীয়ামগী মীহুৎশিংনা মীয়ামগা হকথেংননা ৱারী ৱাতায় শানদুনা লৈঙাক্না চলাইরিবা তোঙান তোঙানবা য়াইফ-থৌরাংশিংগী মরমদা মীয়ামগী ৱাখল্লোন ফংনবা পান্দম থম্লি।
প্রধান মন্ত্রীনা প্রধান মন্ত্রী কিসান সম্মান নিধি (পি.এম.-কিসান) স্কিমগী শেলগী তেংবাংগী ১১শুবা ইন্সতোলমেন্তসু থাদোকখি। মসিনা লৌমী ইমুং বিনিফিসরীকরোর ১০ হেনবদা লুপা করোর ২১,০০০রোমগী শেন্ফম ত্রান্সফর তৌবা য়াহল্লগনি। থৌরম অদুদা প্রধান মন্ত্রীনা লৈবাক শিনবা থুংবদগী পি.এম.-কিসানগী বিনিফিসরীশিংগসু ৱারী ৱাতায় শানখি। সিম্লাদা পাঙথোকখিবা থৌরমদুদা তিনখিবা ময়ামগী মরক্তা হিমাচল প্রদেশকী গভর্নর, শ্রী রাজেন্দ্র অরলেকর, হিমাচল প্রদেশগী মুখ্য মন্ত্রী শ্রী জয় রাম থাকুর, অমসুং কেন্দ্র মন্ত্রী শ্রী অনুরাগ থাকুর য়াওখি।
লদাখতগী বিনিফিসরী শ্রী তাসি তুন্দুপকা ৱারী শারদুনা প্রধান মন্ত্রীনা লদাখতা লম কোয়বা মী লাকপা অমসুং লৈঙাক্কী স্কিমশিংগী মতাঙদা ৱা ঙাঙখি। মহাক্না লান্মী অমা ওইনা লৌরিবা থৌদাংবু প্রধান মন্ত্রীনা থাগৎখি। শ্রী তাসি তুন্দুপ্না পি.এম.এ.ৱাই, তোলেৎ, গ্যাস কন্নেক্সন অমসুং লৌউ-শিংউগা মরী লৈনবা স্কিমশিংগী কান্নবশিং ফংবদা অয়েৎ অপন অমত্তা থেংনবা লৈতে হায়না হায়খি।
বিহারদগী শ্রীমতি ললিতা দেবী জী পি.এম.এ.ৱাই., উজ্জ্বলা, স্বচ্চ ভারত অমসুং জল জীবন মিসনগী বিনিফিসরী অমনি। স্কিম অসিনা কমদৌনা মহাক্কী পুন্সি হিংবদা লায়হনবা অমদি চাউথোকচবা পোকহনবগে হায়বগী মতাঙদা পি.এম.দা পাউদমখি। প্রধান মন্ত্রীনা য়ুম অমা লৈরবদি মহৈ মশিং তমবা অমদি অঙাঙশিং লুহোংবনচিংবা ৱাফম কয়া মশা মথন্তা মওং তারক্কনি হায়না ফোঙদোকখি।
ৱেস্ত ত্রিপুরাদগী এক রাস্ত্র এক রাসন কার্দ, পি.এম. গরিব কল্য়ান, অমসুং অতৌ স্কিম কয়াগী বিনিফিসরী ওইরিবা শ্রী পঙ্কজ সানিনা মহাক্না জে.জে.এম., ও.এন.ও.আর.সি., পি.এম.এ.ৱাই. অমসুং মৈ কন্নেক্সন্নচিংবা স্কিম কয়াগী কান্নবা ফংলে হায়না পাউদমখি। ৱন নেসন ৱন রাসন কার্দনা মরম ওইরগা মহাক্না বিহারদগী য়ুম হোংলক্লবসু করিগুম্বা খুদোংচাদবা অমত্তা থেংনদ্রে হায়নসু মহাক্না পাউদমখি।
কর্নাতকাগী কালবুর্গিদগী আয়ুস্মান ভারতকী বিনিফিসরী মিস সন্তোসিনা স্কিম অসিগী মতাঙদা মহাক্না থেংনরকপশিং পাউদমখি। হেল্থ এন্দ ৱেলনেস সেন্তর অমসুং লেম্না চেকঅপ তৌবা অমদি হিদাক লাংথক ফংবনা মহাক্কী পুন্সিদা অহোংবা কয়া পুরক্লে হায়না মহাক্না ফোঙদোকখি। মহাক্কী ৱারী ৱাতায় নীংথিনা শাবা হৈবা মতৌদা প্রধান মন্ত্রীনা থাগৎলদুনা মহাকপু মীখল থেংনৌ য়াম্না মমীং চৎকনি হায়না ফাগি তৌখি।
গুজরাতকী মেহসনাদগী পি.এম. মুদ্র য়োজনাগী বিনিফিসরী শ্রী অর্বিন্দনা প্রধান মন্ত্রীগা ৱারী শানবা ফংবদা নুংঙাইবা ফোঙদোক্লদুনা মহাক্কী মান্দপ লৈতেংবগী থবক অসি অসুম চাউথোরক্তুনা মহাক্না হৌজিক দিজিতেল পেমেন্তপুসু পুক্নিং থৌগৎলি হায়না পাউদমখি। মহাক্না মহাক্কী শিন্মীশিংদা লৈঙাক্কী স্কিমশিংগী মরমদা খঙহনবগীদমক অমদি থবক পীবা মীওই অমা ওইবগীদমক প্রধান মন্ত্রীনা মহাকপু থাগৎখি। প্রধান মন্ত্রীনা মহাক্কী মচানুপীবুসু শান্ন-খোৎনবদা থৱায় য়াওবগীদমক য়াইফরোল পীখি।
প্রধান মন্ত্রীনা থৌরম পাঙথোকফমদা হিমাচল প্রদেশকী সিরমোরদগী পি.এম.এ.ৱাই. পি.এম. কিসান সম্মান নিধি, আয়ুস্মান য়োজনা, সি.এম. গ্রহনি সুবিধা য়োজনাগী বিনিফিসরী অমা ওইরিবা সমা দেবীজীগা মহাক্কী ফীভম অমদি লৌউ-শিংউবগী থবক থৌরমশিংগী মতাঙদা ৱারী শানখি।
তিল্লিবা মীয়ামদুদা ৱা ঙাঙলদুনা প্রধান মন্ত্রীনা থৌরম অসিবু হিমাচলদা য়াওবা ফংবদা নুংঙাইবা ফোঙদোকখি। পি.এম. কিসান স্কিমগী খুত্থাঙদা লৌমী করোর ১০ হেনবনা মখোয় মখোয়গী বেঙ্ক একাউন্ততা শেল ফংবদা মহাক্না লৌমীশিংগী মফমদা নুংঙাইবা ফোঙদোকখি অমদি য়াইফ-পাউজেল পীখি। লৈঙাক অসিনা চহি ৮ মপুং ফারকপগী তাঞ্জাসিদা পি.এম. কেয়র্স ফোর চীল্দ্রেন স্কিমগী মখাদা শেন্ফম কয়া থাদোকপদা মহাক্না অপেনবা ফোঙদোকখি। সিম্লাদগী প্রধান মন্ত্রী কিসান সম্মান নিধি (পি.এম.-কিসান) স্কিমগী মখাদা লৈবাক শিনবা থউংনা শেল থাদোকখিবদা মহাক্না নুংঙাইবা ফোঙদোকখি। মীওই করোর ১৩০গী থৌগল তৌনবগী তাঞ্জা পীবিবগীদমক মহাক্না মীয়ামবু থাগৎপা ফোঙদোকখি।
চহি ৮ মপুং ফারকপগা মপা চাননা ঙরাং কোরোনা লাইচরত্তা মমা মপা অনিমক কায়নখ্রবা অঙাঙশিংগীদমক পি.এম. কেয়র্স ফোর চীল্দ্রেন স্কিমগী খুত্থাঙদা থৌদাং লৌবা ফংখিবদা প্রধান মন্ত্রীনা অপেনবা ফোঙদোকখি। থৌরম অসিবু হিমাচল প্রদেশতা পাঙথোক্নবা ৱা হৌদোরকপদা স্তেত অসি মহাক্কী শিনপাংফম ওইবা মরম্না খুদক্তা য়াখিবনি। প্রধান মন্ত্রীনা ফোঙদোকখিবদা মহাক্না মতম পুম্নমক্তা মীওই করোর ১৩০গী ইমুং অসিগী মীওই অমা ওইনা লৌই, প্রধান মন্ত্রী ওইনা লৌদে হায়না হায়খি। ফাইল অমা খুৎয়েক পীরমদাইখক্তদা মহাক্না প্রধান মন্ত্রী অমগী থৌদাং য়াবনি। মহাক্না হায়খিবদা হায়রিবা মীকুপ অদু হেক লোইখিবগা, “ঐ মখা তানা প্রধান মন্ত্রী ওইদ্রে অদুগা অদোমগী ইমুংগী মীওই অমা ওইরে অমদি লৈবাক মীয়াম করোর ১৩০গী প্রধান সেবক ওইরে। ঐনা লৈবাক্কীদমক করিগুম্বা খরা তৌবা ঙম্লিবসি লৈবাকসিগী মীওই করোর ১৩০না পীবিবা থৌজাল অমদি য়াইফ-পাউজেলদুননি।” “মীওই করোর ১৩০গী ইমুংসিগী মঙলান অমদি ৱাখল্লোনগা মরী থমবা ঙমজবা, ইমুং অসিনা ঐগীদি পুম্নমক্নি, মীয়ামসিনা ঐগীদমক্তদি পুম্নমক্নি অদুগা ঐগী পুন্সিসু অদোমগীদমক্তনি,” হায়না প্রধান মন্ত্রীনা পুক্নিং নুংশিনা ফোঙদোকখি। লৈঙাক অসি চহি নিপান মপুং ফারকপগা লোয়ননা ভারত মচা খুদিংমক্কী ইকায়খুম্নবা ঙাক্নবগীদমক, ভারত মচা খুদিংমক্কী ঙাকশেলগীদমক, ভারত মচা খুদিংমক্কী য়াইফনবগীদমক, ভারত মচা খুদিংমক্না ইংন-চিক্না পান্নবগীদমক, মীপুম খুদিংগী য়াইফ-থৌরাংগীদমক তৌবা য়াবা থবক খুদিংমক তৌগনি হায়না প্রধান মন্ত্রীনা ফোঙদোকখি।
ইং ২০১৪গী মমাঙদা হান্না লৈরমবা লৈঙাক্না শেঞ্জা থুমজাবু সিস্তেমগী থাদোক্নবা য়াদ্রবা শরুক অমা ওইনা লৌরম্মি, অদুগা শেঞ্জা থুমজাবু থেংনবগী মহুত্তা লৈঙাক্না মসিগী মখাদা চঙজখি, মদুনা মরম ওইরগা স্কিমশিংগী শেন্ফমশিং ফংফম থোকপশিংদা য়ৌদ্রিঙৈদা লম্মখাংদা হুরানখিবা লৈবাক অসিনা উখি হায়না প্রধান মন্ত্রীনা পেন্দবা ফোঙদোকখি। জন ধন-আধার অমসুং মোবাইল (জে.এ.এম.)গী ফুঙ্গা নুংদুম অহুমসিনা ঙসিদি হায়রিবা শেনফমশিং অসি বিনিফিসরীশিংগী জন ধন বেঙ্ক একাউন্তশিংদা হকথেংননা য়ৌরে। হান্নদি চাকখুমদা মৈখু খাঙদুনা লৈরমবনি, ঙসিদি উজ্জ্বলা স্কিমগী মখাদা এল.পি.জি. সিলিন্দর লৌবা য়ারে। হান্নদি লায়রবশিংনা লমহাংদা খোঙ হামবগী ইকায়বা নংলমবনি অদুবু হৌজিক্তি লায়রবশিংসু খোঙহাম খুৎহাম্ফম লৈরে। হান্নদি লায়েংনবগী শেল তাশিনবদা অৱাবা ওইরমবনি, ঙসিদি লায়রবা মীওই খুদিংমক আয়ুস্মান ভারতকী তেংবাং ফংলে। হান্নদি ত্রিপল তলাক্কী অকিবা লৈরমবনি অদুবু হৌজিক্তি মশাগী হক্কীদমক লান্থেংননবগী থৌনা লৈরে।
থৌগল, অফবা লৈঙাক্লোন অমসুং লায়রবশিংগী য়াইফ-থৌরাং (সেবা, সুসাসন ঔর গরিব কল্য়ান) হায়বসিনা মীয়াম্না লৈঙাক্কী মফমদা থম্লমবা মীৎয়েঙ হোংহনখ্রে হায়না প্রধান মন্ত্রীনা ফোঙদোকখি। হৌজিক্তি লৈঙাক অসিনা মীয়ামগীদমক থবক তৌরি। পি.এম. হাউজিং স্কিম, স্কোলারসিপ নৎত্রগা পেন্সন স্কিম ওইরবসু, তেক্নোলোজীগী মতেংনা শেঞাজা থুমজা তৌবগী মফম হন্থহল্লে। হান্না কোকপা ঙম্লরোই খন্নরমবা ৱায়েৎশিংগী মতম চুপ্পগী ওইগদবা পামবৈ পুৎথোক্নবা লৈঙাক অসিনা হোৎনরি। দাইরেক্ত বিনিফিৎ ত্রান্সফরনা বিনিফিৎ রোলদগী শাজিন্নবা মমিং করোর ৯ লৌথোক্তুনা লম্মখাংদা শেন্ফম কয়া মাঙলমবগী ৱাফম থুপচিনখ্রে।
প্রধান মন্ত্রীনা ফোঙদোকখিবদা লায়রবশিংগী নুংতিগী থেংনরিবা খুদোংচাদবশিং হন্থহল্লবদি, মখোয়দা মপাঙ্গল হাপ্পিরবদি মখোয়গী লায়রবা অদু কোকহন্নবা মশানা অনৌবা থৌনাগা লোয়ননা হোৎনিংবা ফাওহল্লি। হায়রিবা ৱাখল্লোন অসিদা ঐখোয়গী লৈঙাক্না হানবা নুমিত্তগী হৌরগা লায়রবশিং মপাঙ্গল কলহন্নবা থবক তৌদুনা লাকখি। ঐখোয়না মখোয়গী পুন্সিদা থেংনরিবা খুদোংচাদবা খুদিংমক অমমমতা ওইনা কোকহন্নবা হোৎনরি হায়না মহাক্না মখা তাখি। “লৈবাকসিগী ইমুং খুদিংমক স্কিম অমা নৎত্রগা অমগী কান্নবা শোয়দনা ফংলমগনি হায়না ঐনা ইখৌ পোঙনা হায়বা ঙম্মি,” হায়না মহাক্না হায়খি।
খুৎলায় পায়বা লান্মীদা হিমাচল প্রদেশকী ইমুং খুদিংমক্কী থৌদাং শিংথারদুনা চহি ৪০রোম ঙাইরবা মতুংদা ৱন রেঙ্ক ৱন পেন্সন চৎনহন্দুনা হান্নগী লান্মীশিংদা এরিয়র ফংহনখিবদু লৈঙাক অসিননি হায়না প্রধান মন্ত্রীনা ফোঙদোকখি। হিমাচলগী ইমুং খুদিংমক্না মসিদগী কান্নবা কয়া ফংলমগনি। চহি কয়া লৈবাকসিদা ভোত বেঙ্ককী রাজনিতি তৌদুনা লাকখ্রে অমদি মদুনা লৈবাকসিদা অমাঙ অতা কয়া থোকহনখ্রে। হৌজিক ঐখোয়না ভোত বেঙ্ককী মহুত্তা অনৌবা ভারত অমা শেমগৎনবা থবক পায়খৎলি হায়না মহাক্না হায়খি।
কান্নবা ১০০% বিনিফিসরী ১০০%দা য়ৌহন্নবা থৌরাং ঐখোয়না পায়খৎলে হায়না প্রধান মন্ত্রীনা হায়খি। বিনিফিসরীশিং সেচুরেসন ফংবা ঙম্নবা লৈঙাক অসিনা ৱাশক অমা শক্লি। ১০০% মপাঙ্গল কলহনবা হায়বদি খেন্নবা থমবা, ৱাচৎ-ৱানোম অমসুং পেলহন্বগী থৌওং মুত্থৎপনি। ১০০% মপাঙ্গল কলহনবা হায়বদি লায়রবা খুদিংমক্না লৈঙাক্কী স্কিমশিংগী কান্নবা মপুং ফানা ফংহনবদুবুনি হায়না মহাক্না হায়খি।
লৈবাকসিগী ৱাংখৎলক্লিবা থাক্কী মরমদা পল্লদুনা প্রধান মন্ত্রীনা ঙসিদি ভারতনা নিবগীদমক খুৎ তিংথোকপা লেপ্তুনা তেংবাংগী খুৎ লান্থোক্লি হায়না প্রধান মন্ত্রীনা হায়খি। কোরোনাগী মতমদসু ঐখোয়না লৈবাক ১৫০ হেনবদা হিদাক লাংথক অমসুং ভেক্সিনশিং থাখি হায়না মহাক্না মখা তাখি।
তুংগী মীরোলগী য়াইফনবগীদমক অমসুং ২১শুবা চহিচাগী তরং তরংবা ভারত অমগীদমক, অৱাৎপনা থনবা নত্তবা মতমগা চুনবা থৌওংনা মশক তাকপা ভারত অমগীদমক থবক তৌবা মথৌ তাই হায়না প্রধান মন্ত্রীনা ফোঙদোকখি। ঐখোয়গী তৌবা ঙমবা থৌনাগী মমাঙদা পান্দম অমত্তা ওইথোক্তবা লৈরোই। ঙসি ভারত মালেমগী খ্বাইদগী খোঙজেল য়াঙনা চেনখৎলক্লিবা শেন্মিৎলোনশিংগী মরক্তা অমা ওইরি। ঙসি ভারত্তা রেকোর্দ ওইনা মপান লৈবাক্তগী শেন থাদরক্লি, ঙসি ভারতনা রেকোর্দ ওইনা মপান লৈবাক্তা পোৎ থাদোক্লি। “পুম্নমক থোরক্তুনা ঐখোয়গী লৈবাকসি চাওখৎনবগী খোঙজঙ অসিদা ঐখোয়গী থৌদাং য়ামিন্নফম থোকই,” হায়না মহাক্না মখা তাখি।
***
(Release ID: 1829742)
Visitor Counter : 195
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam