ভারত ইমানা য়াইফরে, মীয়াম্না য়াবা গুজরাতকী মুখ্য মন্ত্রী, শ্রী ভুপেন্দ্র ভাই পতেল, কেন্দ্র মন্ত্রী মন্দলদা লৈবা ঐহাক্কী মরুপ, অমিৎ ভাই শাহ, মনশুখ ভাই মন্দাবিয়া, পার্লিয়ামেন্ততা লৈবা ঐহাক্কী খোঙলোই, সি.আর. পতেল, গুজরাত সরকারগী মন্ত্রী, জগদিশ ভাই বিশ্বকর্মা, এম.পি., এম.এল.এ., গুজরাত সরকারগী মন্ত্রী পুম্নমক, সহকারিতা অন্দোলনগা মরী লৈনবা সেনিয়র পুম্নমক! ইফকোগী মফমদসু থৌরম অসিগা মান্নবা থৌরম অমা হৌজিক চত্থরি। মফমসিদা লৈবীরিবা ইফকোগী চেয়রমেন দিলিপ ভাই, ইফকোগী মরুপ পুম্নমক, লৈবাক শিনবা থুংবগী লৌমী লাখ কয়ানা ঙসি গান্ধীনগরগী মহাত্মা মন্দিরগা মরী লৈনরি। ঐহাক্না লৌমীশিং অসিগী মফমদসু নোল্লুকচরি। ঐখোয়না ঙসি মফমসিদা কো-ওপরেসন্দগী নুংঙাই য়াইফবা হায়বগী মতাংদা খন্নরি। কো-ওপরেসন হায়বসি খুঙ্গং অমগী মরোমদোম লেপচবা ঙমবগী অফবা পাম্বৈ অমনি, মসিদা আত্মানির্ভর ভারতকী পাঙ্গলসু য়াওরি। আত্মানির্ভর ভারত অমা ওইহন্নবগীদমক্তা খুঙ্গংশিংনা আত্মানির্ভর ওইবগী মথৌ য়াম্না তাই। মরম অদুনা, পুজ্য বাপু অমসুং সরদার সাহেবনা ঐখোয়দা লম্বী তাকপীরম্লিবনি অমসুং মসিগী মখা পোন্না ঐখোয়না ঙসি মোদেল কোওপরেতিব ভিলেজ অমগী মাইকৈদা খোঙদারি। কোওপরেতিবকী থৌওং পুম্নমক পাংথোক্কদবা গুজরাতকী খুঙ্গং ৬ ঐখোয়না খনগৎলে।

মরুপশিং,

ঙসি, মরোমদোম লেপচবা ঙম্না লৌউবা ঙম্নবগীদমক্তা লৈবাক্কী খ্বাইদগী অহানবা নেনো য়ুরিয়া (লিক্বিদ) প্লান্ত অমা শঙ্গাবা অসিদা ঐহাক্না ফোংদোকপা ঙমদবা হরাওবা অমা ফাওই। লৌমী অমনা য়ুরিয়া লৌবা চৎপগী শক্তম অমুক্তা নীংশিংবীয়ু। য়ুরিয়া বোরা তংখাইগী মপাঙ্গল অদু হৌজিক্তি লিতর তংখাইগী লিক্লিদা চলহন্দুনা পুথোক-পুশিন তৌবা অমসুং থম্বগী থৌওংশিংদা শেল য়াম্না কনবা ঙমহল্লে। মসিনা অপীকপা লৌমীশিংদা কান্নবা কয়া য়াম্না পীগনি হায়বা অদোমসু অমুক্তা খন্থবীয়ু।

মরুপশিং,

মসিগী মতমগা চুনবা প্লান্ত অসি কালোলদা লৈরে, মসিগী কেপাসিতীনা নোংমদা এম.এল. ৫০০গী বোত্তল লাখ ১.৫ পুথোকপা ঙমগনি। মসিনা য়ুরিয়াগী মতাংদা মীরমদা মীখা পোনবা হন্থহল্লগনি অমসুং লৈবাক শেল কয়া তুংশিনবা ঙমগনি। মসিগী ইন্নোভেসন অসিনা য়ুরিয়াদগী হেন্দোকপা ঙমগনি হায়বগী ঐহাক্না থাজবা থম্মি। তুংগী মতমদা। লৌমীশিংগী নাক্তা অতোপ্পা নেনো ফর্তিলাইজর কয়াসু লৈরগনি। হীরম অসিগীদমক্তা ঐখোয়গী সাইন্তিস্তশিংনা য়াম্না কন্না হোৎনরি।

মরুপশিং,

ফর্তিলাইজরদা অসিগুম্বা নেনো তেক্নোলোজী শিজিন্নবদগী ঐখোয়না আত্মানির্ভরতাগী মাইকৈদা অহেনবা খোঙ্কাপ অমা কাল্লবনি। মসি য়াম্না মরু ওইবনি অমসুং লৈবাক মীয়াম্না মসিগী মতাংদা নীংথিজনা খঙহন্নীংই। ভারতনা মালেমগী ওইনা খ্বাইদগী অনিশুবা য়ুরিয়া শিজিন্নবা অমসুং খ্বাইদগী অহুমশুবদা য়ুরিয়া য়াম্না পুথোকপা লৈবাক্নি। অদুগা, মমাংগী চহি ৭-৮ অসিদা য়ুরিয়াশিংনা লবুক্তা য়ৌবগী মহুত্তা ব্লেক মার্কেত্তা লোইনা চৎনখি অমসুং লৌমীশিংনা মখোয়গী তঙাই ফদবা য়ুরিয়া ফংনবা হোৎনবদা চৈ চারিবনি। ঐখোয়গী লৈবাক্কী য়ুরিয়াগী অচৌবা ফেক্তরীশিংসু তেক্নোলোজী হোংলকপনা মরম ওইরগা লোইনা থিংজিন্নখ্রে। অদুনা, ঐখোয়না ইং ২০১৪দা সরকার শেম্লবা তুংদা য়ুরিয়াবু নীম কোতিং ১০০%গী চাংদা তৌখি। মসিদগীদি লৈবাক্কী লৌমীশিংনা মশাগী ফংফম থোকপা য়ুরিয়া ফংবা ঙমখি। মসিগা লোয়ননা, য়ু.পি., বিহার, ঝার্খন্দ, ওরিশা অমসুং তেলঙ্গানাদা লৈবা থিংজিল্লুরবা ফর্তিলাইজর প্লান্ত ৫ নৌনা হাংদোকপগী থবক পায়খৎপা হৌখি। য়ু.পি. অমসুং তেলঙ্গানাগী ফেক্তরিনা হৌনা পোত্থোক পুথোকপা হৌরে অমসুং অতোপ্পা অহুমসু অথুবা মতমদা মথৌ পাংথোকপা হৌরগনি।

মরুপশিং,

ঐখোয়গী তঙাই ফদবা হারগী চাং ফংনবগীদমক্তা ভারতনা দিকেদ কয়াদগী মীরমগী মখা পোনখি, ঐখোয়না ইম্পোর্ত অয়াম্বা তৌরম্মি। ঐখোয়না ইশাগী তঙাই ফদবগী শরুক মরি থোকপগী শরুক অমা ইম্পোর্ত তৌই, অদুবু পোতাশ অমসুং ফোস্ফেতকী মতাংদদি চাউরাক্না ১০০% ইম্পোর্ত তৌরম্মি। মমাংগী ভহি ২দা কোরোনা লাইচৎনা মরম ওইরগা, কৈথেলদা হারগী মমল য়াম্না হেনগৎখি। মসিগী মথক্তা লান অমুক থোকখি। লানগী মরম্না মার্কেত্তা হার ফংবগী চাং অমুক্কা হন্থখি অমসুং মমলসু অঙকপা ফংনা হেনগৎখ্রে।

মরুপশিং,

ঐখোয়গী সরকারনা মীয়ামগী অপাম্বা খঙলবা তুংদা মালেমগী ফিভম অসি তসেংনা পাখৎনীংঙাই ওইরে হায়না লৌনখি। হারগীদমক্তা মালেম শিনবা থুংবদা চৎনরি। খুদোংচাদবা অমসুং শিংনবা কয়া লৈরে। অদুবু, ঐখোয়না হোৎনবদি লেপখিদে। খুদোংচাদবা পুম্নমক থেংনগনি অদুবু লৌমীশিংদা অৱাবা খক তাহল্লোই হায়না ঐখোয়না ৱারেপ লৌখি। মরম অদুনা, ফিভম য়াম্না শোকপা ওইরবসু ভারত্তা ইরাং অসিগী মমি তাহনখিদে।

মরুপশিং,

ভারতনা মীরমদগী য়ুরিয়া লৈবা মতমদা কিলো ৫০গী বেগ অমদা লুপা ৩৫০০দা লৈ। বেগ অমদা লুপা ৩৫০০, নীংশিংবীয়ুকো। অদুবু, ঐখোয়না বেগ অমদা লুপা ৩৫০০দা লৈদুনা লৈবাক্কী খুঙ্গংগী লৌমীশিংদা শুপ্নগী লুপা ৩০০দা ফংহল্লি। হায়বদি, য়ুরিয়া বেগ অমদা ঐখোয়না লুপা ৩২০০ পুথোক্লিবনি। মতৌ অসুম্না, দি.এ.পি. বোরা অমদা মমাংগী সরকারনা লুপা ৫০০ পুথোক্লম্বগা চাংদম্নবদা ঐখোয়গী সরকারনা লুপা ২৫০০ পুথোক্লি। কেন্দ্র সরকারনা মমাং চহিদা লুপা লাখ ১গা লিশিং ৬০গী পীখি, হন্দক্কী চহিদদি, হায়রিবা সবসিদী অসি লুপা করোর লাখ ২দগী হেনগনি। লৈবাক্কী লৌমীশিংগী অপাম্বগীদমক্তা তঙাই ফদবা থবক খুদিংমক পাংথোক্কনি অমসুং ঐখোয়না লৈবাক্কী লৌমীশিংগী মপাঙ্গল মখা তানা হাপখিগনি।

মরুপশিং,

ৱাহং অসিদি সরকার খুদিংনা মখোয়গী হৌখিবা মতমদা থেংনখিবা ঙাক্তনি। হীরম খুদিংমক ঐহাক্কী মাংদা লোইনা লাকই হায়বা নত্তে। মমাংগী মতমদদি, মতমদুগী শিংনবা খক্কী ৱারোইশিন খক পুথোক্লম্মি, তুংদা করি থোক্লকপা য়াই হায়বগী মতাংদদি য়াম্না অকক্নবা হোৎনবা ঙাক্তনি। হৌখিবা চহি ৮ অসিদা ঐখোয়না খুদক্কী ওইবা ৱারোইশিন খক নত্তনা মতম কুইনা চৎকদবা ৱারোইশিনসু পুথোক্নবা হোৎনখি। কোরোনাগুম্বা লাইচৎনা থোকহনবা ফিভম্বু তুংগী মতমদা থোকহন্দনবা হায়দুনা ঐখোয়না ইনফ্রাস্ত্রকচরদা অহেনবা মিৎয়েং চঙলি। অচা থাউগী খুদোংচাদবা য়ারিবমখৈ হন্থনবা ঐখোয়না মিসন ওইল পাল্ম হৌদোকখি। মীরমদগী থাউগী মখা পোনবা হন্থহন্নবা ঐখোয়না বাইও-ফুএল, গ্রীন হাইদ্রোজেন অমসুং অতোপ্পা পাম্বৈ কয়া থীদোকপগী থবক অৱাংবা থাক্তা পায়খৎলি। নেনো তেক্নোলোজীদা ঐখোয়না হৌজিক মায় ওনশিল্লবা অসিসু পনখ্রিবা ফিভম অসিগীনি। মতৌ অসুম্না, নেচরেল ফার্মিংগী মাইকৈদা লৌমীশিংগী পুক্নিং থৌগৎনবা লৈবাক শিনবা থুংবগী থবক পায়খৎলি। মসিসু মতম পুম্বদা চৎনগদবা ৱারোইশিন অমনি। অদুগা ঐহাক্না গুজরাতকী লৌমীশিংবু অখন্নবা ওইনা থাগৎলি। গুজরাতকী লৌমীশিংনা নিংহন্নবা লৈতে, অপীকপা লৌমী ওইরবসু থৌনা লৈনা হোৎনগনি হায়বগী ৱাখল্লোন চেল্লি। গুজরাতকী অপীকপা লৌমীশিংনা নেচরেল ফার্মিংগী মাইকৈদা খোঙদাবা হৌরে হায়বগী পাউ কয়া ঐহাক্না তাবা ফংলি। গুজরাত্তা নেচরেল ফার্মিংগী মাইকৈদা মায় ওন্সিল্লিবা অসি মীওই লাখকী চাংদনি। ঐহাক্না লৌমীশিং অসিবু থম্মোই শেংনা থাগৎপগা লোয়ননা ইকায় খুম্নবা উৎচরি।

মরুপশিং,

আত্মানির্ভরতা হায়বসিদা ভারতকী শিংনবা কয়াগী ৱারোইশিন য়াওরি। আত্মানির্ভরতাগী খ্বাইদগী ফবা মোদেল অমদি কো-ওপরেতিবনি। ঐখোয়না মসিনা মায় পাকপসি গুজরাত্তা ফজনা উরে অমসুং অদোম খুদিংনা মসিগী লান্মীনি। গুজরাতকী কোওপরেতিব সেক্তরগা মরী লৈনবা শক্নাইবা মীওইখৈ মফমসিদা লৈরে। ঐহাক্না অদোম খুদিংগী মাইথোং ফম্না-ফম্না য়েংলিবনি। অরিবা মরুপশিং অদোম্না ঙসিদি গুজরাতকী কোওপরেতিব সেক্তরগী চাউখৎ-থৌরাংগী লম্বীদা মাংজিল থানা চৎলি। অনীংবা অমগা লোয়ননা অদোম্না পাংথোক্লিবা অসি উবদা নুংঙাইবা ফাওই। কোওপরেতিবকী ইথিলগা লোয়ননা অদোম্না মাংজিল থানা চৎলি।

মরুপশিং,

গুজরাতনা পুজ্য বাপু অমসুং সর্দার সাহেবকী লুচিং পুরেল ফংখিবনা মরাইবক ফবা ওইজৈ। কোওপরেসনগী খুত্থাংদা ইশানা ইশাবু তেংবাংজবগী বাপুনা তাকপীরম্বা থবকশিংবু মখা তানা চত্থবগী থৌদাং সর্দার সাহেবনা পাংথোকখি। কোওপরেতিবকী ৱারী লাকপা মতমদা, হৌজিক অমিৎ ভাইনা হায়খিবগুম্না, ভেঙ্কত ভাইবু নীংশিংবা হায়বসি মতিক চাবনি। ঙসিদি, ভারতকী কোওপরেতিবকী অচৌবা ইন্সতিত্যুত অমা মহাক্কী মমিংদা চলায়রিবনি। অদুবু মহাকপু তপ্না তপ্না কাওথোকপীবা হৌরক্লে। হন্দক্কী চহিগী বজেত্তা ঐখোয়না লুপা করোর ২৫ কাইথোক্তুনা মসিবু হেন্না মপাঙ্গল লৈহন্নবা হোৎনরি। মসিদা নত্তনা, ঐখোয়গী সিদদি, হাউজিংগী মতাংদসু সোসাইতী, কোওপরেতিব সোসাইতী হায়বা ৱাহৈ শিজিন্নরি। ঐখোয়গী পালরেদীদা প্রিতম্নগর লৈরিবা অসি মসিমক্কী খুদম্নি। লৈবাক্কী অহানবা সহকারী অৱাস য়োজনা অসি মসিগী অহিংবা খুদম অমনি।

মরুপশিং,

কোওপরেতিব সেক্তরদা অমুলনা মশাগী শক্তাক অমা শেমখ্রে। অমুল হায়রিবা ব্রান্দ অসি গুজরাতকী কোওপরেতিব ইহৌগী পাঙ্গলবু মালেমদা শক্তাকপা ব্রান্দ অমনি। গুজরাতকী দাইরী, চিনি অমসুং বেকিং অসি সহাকারী আন্দোলনগী মায় পাকপগী খুদম অমনি। হৌখিবা চহি খরসিদা উহৈ অমসুং মনা-মশিং য়াওশিল্লক্তুনা সহকারীগী পাক চাউবা হেনগৎলক্লি।

ইচিল ইনাওশিং,

কোওপরেতিবপু মায় পাক্না শিজিন্নবগী এক্সপেরিমেন্ত ওইনা লৈবাক্কী খুঙ্গংগী শেন্মিৎলোন  মপাঙ্গল লৈহনবগী চাউরবা মোদেল অমা ঐখোয়গী মাঙদা লৈরি। দাইরী সেক্তরগী কোওপরেতিব মোদেলগী খুদম্না ঐখোয়গী মাঙদা লৈরে। ভারতনা ঙসি মালেমগী শঙ্গোম খ্বাইদগী য়াম্না পুথোকপা ওইরিবসিদা গুজরাতকী চাউরবা শরুক য়াওরি। দাইরী সেক্তরনা মমাংগী চহি খরদগী য়াম্না য়াঙনা চাউখৎলক্লি অমসুং খুঙ্গংগী শেন্মিৎলোন্দা চাউনা তেংবাংলি। ঙসিদি, ভারতনা চহিদা চাউরাক্না লুপা করোর লাখ ৮গী শঙ্গোম পুথোক্লি। লুপা করোর লাখ ৮গী শঙ্গোম অমসুং কারবার অসিবু মপুং ওইনা শেন্নরিবদি ঐখোয়গী ইমা, ইচে-ইচলশিংনি। ঐখোয়না গেহু অমসুং ফৌ পুথোকপগী চাং য়েংলুরবদি, মসিনা শঙ্গোমদগী হেন্না তারিবনি। ঐখোয়গী লৈবাক্না শঙ্গোম পুথোকপগী হীরমদা মপাঙ্গল কয়া য়াম্না শেম্লে হায়বা অদোম্না অমুক্তা খনবীয়ু। মতৌ অসুম্না, ঐখোয়না য়েন-ঙানু লোইবগী সেক্তরদা য়েংলুবা মতমদা, মখোয়গী মমল অসি লুপা করোর লাখ ৯ মখাইনি। মসিদি ভারতকী অপীকপা লৌমী, লম লৈজদবা শিন্মীশিংগী চাউরবা মতেং অমনি।

মরুপশিং,

হৌখিবা দিকেদশিংদা গুজরাতকী খুঙ্গংশিংনা নুংঙাই য়াইফবগী মতৌ উবা ফংলিবা অসিগী মরমদি দাইরী সেক্তরগা মরী লৈনবা কোওপরেতিবনি। ঐখোয়না করিগুম্বা অমবু নীংশিংদুনা ৱারী শাবা মতমদুদা হীরম অদুগী মতাংদা ঐখোয়না করেম্নবনি হায়না খল্লি। করেম্নবা নত্তেকো। অদুগা, করিগুম্বা অমস নীংশিংগে হায়বা তারবদি, ঐখোয়না করি নিংশিংগনি। ঐখোয়গী লৈবাক, ঐখোয়গী গুজরাতকী কৎচ সৌরাস্ত্রদা দাইরী পুরকপা, দাইরীগী থবক হৌদোকপদা অথিংবা কয়া য়াম্না থমখি। হায়বদি, মসিবু আইনগী ৱাংমগী থবক্নি হায়বা ৱাফমগী মনুং চলহনখি। অমুল চাউখৎলিবনিনা দাইরীসু চাউখৎপা য়াই হায়না ঐহাক্না মফমসিদা লৈরিঙৈ মতমদা হায়খিবনি। অমরেলীগী দাইরীসু চাউখৎপা য়াই। ঐখোয়না মসিবু থিংদুনা করিগী লৈরিবনো? অদুগা, গুজরাত্তা মাইকৈ খুদিংদা দাইরীগী সেক্তরনা অচৌবা পাঙ্গল ওইরকখিবনি। গুজরাত্তা শঙ্গোমগা মরী লৈনবা কারবার চাউখৎপগী মরমদি হীরম অসিদা সরকারগী অথিংবা য়াম্না লৈতবননি। সরকারগী মখুৎ কয়া য়াওদনা কোওপরেতিব সেক্তরনা চাউখৎনবা মনীং তমহনখি। মতাং অসিদা, সরকারনা খুদোংচাবা পীবগী শক্তম লাংলি, মখা তাবা অতোপ্পশিংনা কোওপরেতিব নত্ত্রগা লৌমীশিংনা পাংথোকপনি। শঙ্গোম পুথোকপা অমসুং শঙ্গোমগী কারবার তৌবা প্রাইভেত অমসুং কোওপরেতিব সেক্তর অনিমক্না অমত্তা ওইনা অউনখি অমসুং সপ্লাই অমসুং ভেল্যু চেন মপাঙ্গল লৈবা অমা শেমখিবনি।

মরুপশিং,

ঐখোয়না সবকা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্রগা লোয়ননা চৎলি। মন্ত্রা অসিমক কোওপরেতিবকী থৱাইমক্নি। মন্ত্রা অসি কোওপরেতিবকী পনখৈ মনুংদা লৈবনি। মরম অদুনা, অমগা-অমগা তেংবাংনবগী ইথিলগা অমৃত কালগী ইথিলগা পুন্সিনহন্নবা সরকারনা লেপ্তনা থবক পায়খৎলি। পান্দম অসিগা লোয়ননা, কোওপরেতিবকী তোঙানবা মন্ত্রালয় অমা কেন্দ্রদা শেমখ্রে। লৈবাকসিদা কোওপরেতিবতা য়ূম্ফম ওইবা শেন্মিৎলোনগী মোদেল অমা চাউখৎহন্নবা কন্না হোৎনরি। মরম অদুনা ঐখোয়না অনৌবা খোঙথাং অমা চত্থরি। কোওপরেতিব সমিতী, লুপ কয়াগী মরক্তা মার্কেত্তা অফবা চাংয়েংনবগী ফিভম অমা লৈহন্নবসু ঐখোয়না হোৎনরি। মমাংগী চহিশিংদা, ঐখোয়না কোওপরেতিব সোসাইতীগা মরী লৈনবা তেক্স হন্থহন্নবা ৱারেপ লৌদুনা মখোয়দা খুদোংচাবা পীখি। অমিৎ ভাইনা য়াম্না শম্নবুদি তাকপীরম্লে, অদুবু ঐখোয়না অফবা থবক অমদি পাংথোকখিবনি। মহাক্না সর্চার্জকী ৱারী শাখি, মসিগী মতাংদদি হান্না য়াম্না ৱাকৎনরম্বনি। মসিদসু ঐখোয়না শেমদোক্তুনা কোওপরেতিব সমিতীশিংবু ফার্মর প্রদ্যুসর ওর্গনাইজেসনশিংগা মান্নবা থাক্তা থমখি। মসিনা কোওপরেতিব সমিতীশিংনা চাউখৎপদা অচৌবা মতেং ফংগনি।

মরুপশিং,

মসিদা নত্তনা, কোওপরেতিব সমিতী, কোওপরেতিব বেঙ্কশিংবু মতমগা চুনবা দিজিতেল তেক্নোলোজীগা মরী লৈনহন্নবা ঐখোয়না অচৌবা খোঙথাং অমসু পায়খৎলি। মসিগী মতাংদা য়াম্না থাগৎনীংঙাই ওইবা থবকশিং গুজরাত্তা হৌখ্রে। মসিদা নত্তনা, ঐহাক্না মুখ্য মন্ত্রী ওইরিঙৈ মতমদা, ইমিৎ ভাইনা তাকপীখ্রে, কোওপরেতিব সেক্তরদা তেক্স লৈরম্মি, মদুদগী ঐহাক্না সরকারদা চিথী ইখিবনি। অদুগা ভারত সরকারগী মরী লৈনবা বিভাগতা থবক তৌরিবশিংসু মশামক কোওপরেতিব অন্দোলনগী মনুং চনবা মীওই ঙাক্তনি। অদুবু, মখোয়না গুজরাতকী ৱা তাখিদে, লৈবাক্কী কোওপরেতিব সেক্তরগী ৱা তাবীখিদে। ঐহাক্না হৌজিক্তি শিংনবা অসিগী ৱারোইশিন পুথোক্লে।

মরুপশিং,

দিস্ত্রিক্ত কোওপরেতিব বেঙ্কশিংনা চাউরাক্না লৌমী লাখ ৮গী রুপে কিসান কার্দ চৎনবা হৌহনখ্রে হায়না ঐহাক্কী ইফমদা পাউদম্লক্লি। অতোপ্পা বেঙ্কশিংদা লৈবগুম্না, মসিদসু লৌমীশিংনা ওনলাইন বেঙ্কিংগী খুদোংচাবা ফংনরি। অমিৎ ভাইনা হৌজিক্তা তাকপীখিবগুম্না, লৈবাক্কী প্রাইমারী এগ্রিকলচর ক্রেদিত সোসাইতী – পি.এ.সি.এস. লিশিং ৬৩ কম্প্যুতরাইজ ওইরগনি। মসিবু পাংথোক্লবদি, ঐখোয়গী কোওপরেতিবকী মশক অসি পুমহোং হোংলগনি। মসিদগী ঐখোয়গী লৌমীশিংনা কান্নবা য়াম্না ফংগনি, মরমদি সোসাইতী অসিগী মেম্বর অয়াম্বদি লৌমী ঙাক্তনি। কোওপরেতিব সেক্তরগা মরী লৈনবা মীওই কয়ানা পোৎ লৈবা মতমদা সরকারগী জি.ই.এম. পোর্তেলদগী লৈ তাবদা ঐহাক্না নুংঙাইবা ফাওই। মসিনা মরম ওইরগা, নুং-পান ফাওনা উবগী ফিভম অমা লৈহল্লে, খোঙজেল থুরে, মমলসু হন্থরে অমসুং চাদিংসু য়াম্না তৌদ্রে। ভারত সরকারগী জি.ই.এম. পোর্তেলবু কোওপরেতিবনা য়ারে, শিজিন্নরে। মসিগীদমক্তা ঐহাক্না কোওপরেতিব সেক্তরবু থাগৎচরি।

মরুপশিং,

কোওপরেতিবকী খ্বাইদগী চাউবা মপাঙ্গলদি থাজবা, তেংবাংনবা অমসুং অপুনবগী পাঙ্গলগা লোয়ননা লুপ অমগী তৌবা ঙম্বগী মতিক হেনগৎহনবনি। মসিনা অমৃত কাল মনুংদা ভারতনা মায় পাক্কনি হায়বগী গেরেন্তীনি। অপীকপনি অমসুং অশোনবনি খল্লম্বা অমবু অমৃত কাল অসিদা চাউরবা শক্তি অমা ওইহন্নবা সরকারনা থবক পায়খৎলি। ঙসিদি, অপীকপা লৌমীশিংবু হীরম খুদিংদা মপাঙ্গল লৈহল্লি। মান্নবা ওইনা, স্মোল স্কেল ইন্দস্ত্রী অমসুং এম.এস.এম.ই.শিংবু ভারতকী মরোমদোম লেপচবা ঙম্বা সপ্লাই চেনগী মপাঙ্গল লৈবা শরুক ওইহল্লি। ঐখোয়গী দুকান্দার অপীকপা, কারবার পীক্না তৌবশিংগী ও.এন.দি.সি.- ওপন নেতৱর্ক ফোর দিজিতেল কম্মর্স কৌবা দিজিতেল তেক্নোলোজীগী প্লেৎফোর্ম অমা শিজিন্নবা ফংহল্লে। মসিদগী দিজিতেল স্পেস্তা অফবা মওংদা চাংয়েংনবা য়ারগনি, কারবার পীক্না তৌজবা লৈবাক্কী মীওইশিংদা মান্নবা খুদোংচাবা ফংলগনি। মসিনা ভারতকী ই-কম্মর্স মার্কেতকী ওইথোকপা য়াবা কয়াবু তেংবাংগনি অমসুং মসিনা গুজরাতকী কারবার পীক্না তৌজবশিংদা য়াম্না কান্নবা পীগনি।

মরুপশিং,

গুজরাত্তী কারবারগী চৎনবীগা মরী লৈনদুনা লাক্লবা রাজ্যনি। কারবার তৌবা হৌবা মীগী শিংথাননীংঙাই ওইবা ৱাফমদি, মহাক্না অরুবা মতমদসু কারবার নীংথিজনা শেন্নবা ঙম্বা অসিনি। অরুবা মতমদা শিংনবশিংগী ৱারোইশিন পুথোকপা হায়বসিসু সরকারগী ৱাখল্লোন্নি। ঐখোয়না হৌখিবা চহিশিংদা পাংথোক্লিবা রিফোর্ম, খুদোংচাবা পীরিবশিং অসি শিংনববু খুদোংচাবদা ওন্থোক্নবা হোৎনবগী শরুক অমনি। কোওপরেতিবকী ইথিলনা ঐখোয়গী ৱারেপশিংবু অশেংবা ওইহনবদা তেংবাংগনি হায়না ঐহাক্না থাজবা থম্মি। অদুগা, ঐখোয়গী ভুপেন্দ্র ভাইনা হৌজিক্তা য়াম্না নুংঙাইবা ৱাফম অমসু তাকপীখ্রে, নীংতম্বগী খ্বাইদগী অহানবা খুৎলাইদি মতেং পাংদবা অসিনি। নিংতম্বা মতুংগী য়াইফনা পানবগী খুৎলাইনা তেংবাংনবনি। তেংবাংদবদগী তেংবাংবা ফাওবগী খোঙচৎ অসিনা য়াইফ য়ুম্বালগী থাকপু য়াম্না হেন্না ৱাংহনগনি। ঐখোয়গী মিৎয়েং অসিনা সবকা সাথ, সবকা বিকাস, সবকা বিশ্বাস অমসুং সবকা প্রয়াসপু হেন্না ৱাহন্থোক লৈহনগনি। মিৎয়েং অসিগী মখাদা ইশাদা থাজবা থমদুনা, লৈবাক মীয়াম্না অসিগুম্বা নীংথিরবা থবক অসিদা য়াওশিনবীয়ু, গুজরাতকী কোওপরেতিব ইহৌবু হিন্দুস্তানগী মফম খুদিংদা য়ারিবমখৈ পাকথোক চাউথোকহন্নবা ঐখোয়না হোৎনমিন্নসি। কোওপরেতিব সেক্তরগী শক্নাইরবা মীয়ামগা ঐহাক্না উন্নবা ফংজহনবগীদমক্তা ঐহাক্না গুজরাত সরকারবু থাগৎচরি। মসিগী মরমদি, ঐহাক্না গুজরাত্তা লৈবা মতম খুদিংদা ঐহাক্না মখোয়গী ৱাকৎ পুদুনা অদুম চৎলম্বনি। ঙসিদি, মখোয়না মশাগী রিপোর্ত কার্দ পুদুনা ঐগী নাক্তা লাক্লে। ঐখোয়না তেল্লবা মতমদা মায় পাকপা অসি ফংলিবনি, ঐখোয়না ঐখোয়গী সোসাইতীবু থাক অসিদা পুরক্লে, ঐখোয়বু লুপ্পু থাক অসিদা য়ৌহল্লে। হান্নদি ঐখোয়গী তর্নওবর অসি অদুখক্নি, ঙসিদি ঐখোয়গী তর্নওবর অসি মসি য়ৌরে হায়না মখোয়না তম্লি। অপীকপা সোসাইতীগী মীওইশিংনা উন্নদুনা ঐখোয়দি থবক খুদিংমক কম্প্যুতরদা পাংথোক্লে, ঐখোয়দি ওনলাইন ওইরে হায়না চাউথোক্না তম্নরি। গুজরাতকী কোওপরেতিব সেক্তরদা ঐখোয়না উরিবা অহোংবশিং অসি মশাগী ওইনা য়াম্না চাউথোকচনীংঙাইনি। ঐহাক্না অদোমগী ৱাখল চেৎনা হোৎনবা অসিবু ইকায় খুম্নরি। অসিগুম্বা নীংথিরবা চৎনবী অসিবু নোল্লুকচরি। চৎনবী অসিগী মরা মমাংদা থাখ্রবা মতুংদা ঐখোয়না নীংতম্বগী চহি ৭৫ মপুং ফারকপগী নুংঙাইবা ফোংদোক্লিবা অসিদা, কোওপরেতিবতা মকোক থোংবা, শেন্মিৎলোনগী পথাপকী য়ুমফম ওইবা, গুজরাত মীয়ামগী পুন্সিদা নুংঙাই য়াইফবা পুরকপগী মওংদা মসিগী মহৈ চাবা ফংলে। মসিদি য়াম্না নুংঙাইবা ৱাফম ওইরিবনি। মসিগীদমক্তা ঐহাক্না অদোম পুম্নমকপু থাগৎপগা লোয়ননা ঐহাক্কী ৱারোল লোইশিঞ্জরি। ইশাগী অঙম্বা পাঙ্গলগা লোয়ননা ঐহাক্কা অমুক্তা হায়মিন্নসি, ভারত ইমানা য়াইফরে, ভারত ইমানা য়াইফরে। পুম্নমকপু থাগৎচরি!

***