প্রধানমন্ত্রীগী লোইশঙ
প্রধান মন্ত্রীনা গান্ধিনগরদা তোঙান-তোঙানবা কোওপরেতিবশিংগী লুচিংবশিংগী সেমিনারদা ৱা ঙাঙখ্রে
প্রধান মন্ত্রীনা কালোলগী আই.এফ.এফ.সি.ও.দা শাবা নেনো য়ুরিয়া (লিক্বিদ) প্লান্ত শঙ্গাখ্রে
“অমগা-অমগা তেংবাংনবা হায়বসি খুঙ্গংগী অমগী মরোমদোম লেপচবা ঙমজবগী কান্নরবা পাম্বৈ অমনি, মসিদা মরোমদোম লেপচবা ঙম্বা ভারতকী মপাঙ্গল য়াওই”
“লাইচৎ অমসুং লান্না মরম ওইরগা মালেমগী কৈথেলদা মমল হেনগৎপা অমসুং পোত্থোক ফংবা ৱাৎপগী থৌওংনা ঐখোয়গী লৌমীশিংদা অয়েৎপা পীহনখিদে”
“কেন্দ্র সরকারনা লুপা লাখ ১গা লিশিং ৬০গী সবসিদীগা লোয়ননা মমাংগী চহিদা হার পীখি, হন্দক্কী চহিদদি, হায়রিবা সবসিদী অসি লুপা করোর লাখ ২দগী হেনগনি”
“লৈবাক্কী লৌমীশিংগী অপাম্বগীদমক্তা তঙাই ফদবা থবক খুদিংমক পাংথোকখি অমসুং ঐখোয়না লৈবাক্কী লৌমীশিংগী মপাঙ্গল মখা তানা হাপখিগনি”
“ভারতনা মরোমদোম লেপচবা ঙম্বদা থেংনবা শিংনবা কয়া অমগী ৱারোইশিন। কো-ওপরেতিব অসি মরোমদোম লেপচবা ঙম্বগী অফবা মোদেল অমনি”
“অমগা-অমগা তেংবাংনবগী ইথিলগা অমৃত কালগী ইথিলগা পুন্সিনহন্নবা সরকারনা লেপ্তনা থবক পায়খৎলি”
Posted On:
28 MAY 2022 6:00PM by PIB Imphal
প্রধান মন্ত্রী, শ্রী নরেন্দ্র মোদীনা ‘সহাকার সে সামৃধী’গী মতাংদা গান্ধীনগরগী মহাত্মা মন্দিরদা পাংথোকপা তোঙান-তোঙানবা কোওপরেতিবশিংগী লুচিংবশিংগী সেমিনারদা ৱা ঙাঙখ্রে অমসুং মহাক্না মফমসিগী কালোলগী আই.এফ.এফ.সি.ও.দা শাবা নেনো য়ুরিয়া (লিক্বিদ) প্লান্ত অমসু শঙ্গাখ্রে। গুজরাতকী মুখ্য মন্ত্রী, শ্রী ভুপেন্দ্র ভাই পতেল, কেন্দ্র মন্ত্রী, শ্রী অমিৎ শাহ, দাঃ মনশুখ মন্দাবিয়া, এম.পি., এম.এল.এ. অমসুং গুজরাত সরকারগী মন্ত্রী অমসুং কোওপরেতিব সেক্তরগী লুচিংবা কয়াসু ঙসিগী থৌরম অসিদা শরুক য়াখি।
প্রধান মন্ত্রীনা মীতিইন অসিদা ৱা ঙাঙবদা, মহাত্মা মন্দিরদা ঙসি তিনখিবা লৌমী লিশিং কয়াবু তরাম্না ওকখি। অমগা-অমগা তেংবাংনবা হায়বসি খুঙ্গংগী অমগী মরোমদোম লেপচবা ঙমজবগী কান্নরবা পাম্বৈ অমনি, মসিদা মরোমদোম লেপচবা ঙম্বা ভারতকী মপাঙ্গল য়াওই হায়না মহাক্না হায়খি। নুংশিরবা বাপু অমসুং পতেলনা খুঙ্গংদা মরোমদোম লেপচবগী ফিভম পুরক্নবা লম্বী ঐখোয়দা তাকপীরমখি। ঐখোয়না ঙসি ৱাখল্লোন অদুগী মাইকৈদা মাং থানা চঙশিন্দুনা মোদেল কোওপরেতিব ভিলেজ অমা শাবগী লম্বীদা চৎলি। কোওপরেতিবকা মরী লৈনবা থবক খুদিংমক পাংথোক্কদবা গুজরাতকী খুঙ্গং তরুক খনখ্রে হায়না মহাক্না হায়খি।
মান্নবা ওইনা, প্রধান মন্ত্রীনা কালোলগী আই.এফ.এফ.সি.ও.দা শাবা নেনো য়ুরিয়া (লিক্বিদ) প্লান্ত অমা শঙ্গাবা অসিদা হরাওবা ফোংদোকখি। য়ুরিয়া বোরা তংখাইগী মপাঙ্গল অদু হৌজিক্তি লিতর তংখাইগী লিক্লিদা চলহন্দুনা পুথোক-পুশিন তৌবা অমসুং থম্বগী থৌওংশিংদা শেল য়াম্না কনবা ঙমহল্লে। প্লান্ত অসিনা নোংমদা এম.এল. ৫০০গী বোত্তল লাখ ১.৫ পুথোক্কনি হায়না প্রধান মন্ত্রীনা হায়রদুনা লাক্কদৌরিবা মতমশিংদা অসিগুম্বা প্লান্ত ৮ অমসু লৈবাক অসিদা লৈরগনি হায়না মখা তাখি। “মসিনা য়ুরিয়াগী মতাংদা মীরমদা মীখা পোনবা হন্থহল্লগনি অমসুং লৈবাক শেল কয়া তুংশিনবা ঙমগনি। মসিগী ইন্নোভেসন অসিনা য়ুরিয়াদগী হেন্দোকপা ঙমগনি হায়বগী ঐহাক্না থাজবা থম্মি। তুংগী মতমদা। লৌমীশিংগী নাক্তা অতোপ্পা নেনো ফর্তিলাইজর কয়াসু লৈরগনি”, হায়না মহাক্না হায়খি।
ভারতনা মালেমগী ওইনা খ্বাইদগী অনিশুবা য়ুরিয়া শিজিন্নবা অমসুং খ্বাইদগী অহুমশুবদা য়ুরিয়া য়াম্না পুথোকপা লৈবাক্নি হায়না প্রধান মন্ত্রীনা পাউদমখি। ইং ২০১৪দা সরকার শেম্লবা তুংদা, সরকারনা য়ুরিয়াগী ১০০% নীম কোতিং তৌখি। মসিনা লৈবাক্কী লৌমীশিংগী য়ুরিয়া মতিক চানা ফংহনবা ঙমখি। থংন-থংনবা থৌওং অমা ওইনা, য়ু.পি., বিহার, ঝার্খন্দ, ওরিশা অমসুং তেলঙ্গানাদা লৈবা থিংজিল্লুরবা ফর্তিলাইজর প্লান্ত ৫ নৌনা হাংদোকপগী থবক পায়খৎপা হৌখি। য়ু.পি. অমসুং তেলঙ্গানাগী ফেক্তরিনা হৌনা পোত্থোক পুথোকপা হৌরে অমসুং অতোপ্পা অহুমসু অথুবা মতমদা মথৌ পাংথোকপা হৌরগনি হায়না মহাক্না হায়খি।
য়ুরিয়া, ফোস্ফেত অমসুং পোতাশতা য়ুম্ফম ওইবা হারগী মতাংদা মীরমদা মখা পোনবগী মতাংদা হায়বদা প্রধান মন্ত্রীনা লাইচৎ অমসুং লান্না মরম ওইরগা মালেমগী কৈথেলদা পোত্থোক ফংদবা অমসুং মমল ৱাংবগী ৱাফমদা মিৎয়েং চঙখি। মীয়ামগী অপাম্বা খঙবা সরকারনা অসিগুম্বা খুদোংচাদবশিং অসি লৌমীশিংদা য়ৌহন্দনা, মসিনা ফিভম য়াম্না শোকপা ওইরবসু ভারত্তা ইরাং অসিগী মমি তাহনখিদে হায়না প্রধান মন্ত্রীনা ফোংদোকখি। লুপা ৩৫০০ পীবা য়ুরিয়া বোরা অমবু লৌমীশিংদা লুপা ৩০০দা ফংহল্লি অমসুং সরকারনা বোরা অমদা লুপা ৩২০০ পুথোক্লি। মান্নবা অমা ওইনা, দি.এ.পি. বোরা অমদা মমাংগী সরকারনা লুপা ৫০০ পুথোক্লম্বগা চাংদম্নবদা ঐখোয়গী সরকারনা লুপা ২৫০০ পুথোক্লি। কেন্দ্র সরকারনা মমাং চহিদা লুপা লাখ ১গা লিশিং ৬০গী পীখি, হন্দক্কী চহিদদি, হায়রিবা সবসিদী অসি লুপা করোর লাখ ২দগী হেনগনি হায়না প্রধান মন্ত্রীনা পাউদমখি। লৈবাক্কী লৌমীশিংগী অপাম্বগীদমক্তা তঙাই ফদবা থবক খুদিংমক পাংথোক্কনি অমসুং ঐখোয়না লৈবাক্কী লৌমীশিংগী মপাঙ্গল মখা তানা হাপখিগনি হায়না প্রধান মন্ত্রীনা মখা তাখি।
লৈবাক্না থেংনরিবা শিংনবা কয়াগী অশাংবা মতম অমসুং অতেনবা মতমগী ৱারোইশিন পুরক্নবা সরকার মমাংগী চহি ৮ অসিদা থবক তৌখি হায়না প্রধান মন্ত্রীনা হায়খি। মথংদা লাইচৎ থোক্লকপা মতমদা নীংথিনা থেংনবা ঙম্নবা হকশেলগী ইনফ্রাস্ত্রকচর ফগৎহনবা, চাবা য়াবা থাউগী শিংনবশিংগী ৱারোইশিন পুরকপা ঙম্নবা পায়খৎপা মিসন পাল্ম ওইল, থাউগী শিংনবা থেংননবা বাইও-ফুএল অমসুং হাইদ্রোজেন ফুএল, নেচরেল ফার্মিং অমসুং নেনোতেক্নোলোজী খুমাং চাউশিনহল্লিবা কয়াসু ৱারোইশিন কয়া অমনি পল্লদুনা, থৌওংশিং অসি সরকারগী থবক থৌরমশিংগী মহৈনি হায়না মহাক্না ফোংদোকখি। মান্নবা ওইনা, ভারতনা মরোমদোম লেপচবা ঙম্বদা থেংনবা শিংনবা কয়া অমগী ৱারোইশিন লৈ হায়না মহাক্না হায়খি। মহাক্না কো-ওপরেতিব অসি মরোমদোম লেপচবা ঙম্বগী অফবা মোদেল অমনি হায়না পনখি।
গুজরাতনা পুজ্য বাপু অমসুং সর্দার সাহেবকী লুচিং পুরেল ফংখিবনা মরাইবক ফবা ওইজৈ হায়না প্রধান মন্ত্রীনা হায়খি। কোওপরেসনগী খুত্থাংদা ইশানা ইশাবু তেংবাংজবগী বাপুনা তাকপীরম্বা থবকশিংবু মখা তানা চত্থবগী থৌদাং সর্দার সাহেবনা পাংথোকখি। দাইরী সেক্তরগী কোওপরেতিব মোদেলগী খুদম্না ঐখোয়গী মাঙদা লৈরে। ভারতনা ঙসি মালেমগী শঙ্গোম খ্বাইদগী য়াম্না পুথোকপা ওইরিবসিদা গুজরাতকী চাউরবা শরুক য়াওরি। দাইরী সেক্তরনা মমাংগী চহি খরদগী য়াম্না য়াঙনা চাউখৎলক্লি অমসুং খুঙ্গংগী শেন্মিৎলোন্দা চাউনা তেংবাংলি। শঙ্গোমদা য়ুম্ফম ওইবা ইন্দস্ত্রীশিংনা গুজরাত্তা পাক-শন্না লৈ অমসুং মসিগী মরমদি সরকারগী মাইকৈদগী থম্বা অথিংবা য়ামদবননি। মতাং অসিদা, সরকারনা খুদোংচাবা পীবগী শক্তম লাংলি, মখা তাবা অতোপ্পশিংনা কোওপরেতিব নত্ত্রগা লৌমীশিংনা পাংথোকপনি।
অমগা-অমগা তেংবাংনবগী ইথিলগা অমৃত কালগী ইথিলগা পুন্সিনহন্নবা সরকারনা লেপ্তনা থবক পায়খৎলি হায়না প্রধান মন্ত্রীনা পাউদমখি। পান্দম অসিগা লোয়ননা, কোওপরেতিবকী তোঙানবা মন্ত্রালয় অমা কেন্দ্রদা শেমখ্রে। লৈবাকসিদা কোওপরেতিবতা য়ূম্ফম ওইবা শেন্মিৎলোনগী মোদেল অমা চাউখৎহন্নবা কন্না হোৎনরি হায়না মহাক্না হায়খি। “কোওপরেতিবকী খ্বাইদগী চাউবা মপাঙ্গলদি থাজবা, তেংবাংনবা অমসুং অপুনবগী পাঙ্গলগা লোয়ননা লুপ অমগী তৌবা ঙম্বগী মতিক হেনগৎহনবনি। মসিনা অমৃত কাল মনুংদা ভারতনা মায় পাক্কনি হায়বগী গেরেন্তীনি”, হায়না মহাক্না মখা তাখি। অপীকপনি অমসুং অশোনবনি খল্লম্বা অমবু অমৃত কাল অসিদা চাউরবা শক্তি অমা ওইহন্নবা সরকারনা থবক পায়খৎলি। ঙসিদি, অপীকপা লৌমীশিংবু হীরম খুদিংদা মপাঙ্গল লৈহল্লি। মান্নবা ওইনা, স্মোল স্কেল ইন্দস্ত্রী অমসুং এম.এস.এম.ই.শিংবু ভারতকী মরোমদোম লেপচবা ঙম্বা সপ্লাই চেনগী মপাঙ্গল লৈবা শরুক ওইহল্লি। “কোওপরেসন্না ঐখোয়গী পান্দম ফংবদা শোইদনা তেংবাংগনি অমসুং ভারতনা মায় পাকপা অমসুং নুংঙাই য়াইফবগী লম্বীদা মাং থানা চৎকনি হায়বগী ঐহাক্না থাজৈ”, হায়না প্রধান মন্ত্রীনা মহাক্কী ৱারোল লোইশিনখি।
***
(Release ID: 1829047)
Visitor Counter : 123
Read this release in:
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam