জুন ২১ ২০২২দা কর্নাতকাগী মাইসুরুদা ৮শুবা মালেমগী য়োগ নুমিৎকী মরুওইবা দেমোন্সত্রেসন পাংথোক্কনি। ৮শুবা মালেমগী য়োগ নুমিৎকী মীয়াম হুপ্না য়োগ শান্নবা উৎনবগী মফম ওইনা মাইসুরু খল্লে হায়না ঙসি অয়ুস মিনিস্তর শ্রী সর্বানন্দ সোনোৱালনা লাউথোকখি।

চহি অসিদা পাংথোক্লিবা “অজাদি কা অমৃত মহোৎসব”তা চহি অসিগী মালেমগী য়োগ নুমিৎ থোকপা অসিগা ইরোইন্না, লৈবাক্কী অখন্নবা মফম ৭৫দা থৌরম অসি পাংথোক্নবা মিনিস্ত্রিনা থৌরাং তৌরে অমসুং মালেমগী থাক অমদা ভারত মশক তাক্নবা মিৎয়েং থম্লি।

পাউমীশিংদা ৱা ঙাংবদা শ্রী সোনোৱালনা হায়খি মাইসুরুদা পাংথোক্কদৌরিবা মরুওইবা থৌরম অসিগী মথক্তা, মপান লৈবাকশিংদা লৈবা ভারতকী মিসনশিংনা শীনবা মালেমগী য়োগ নুমিৎকী থৌরমশিংগী অপুনবা দিজিতেল ফিদ অমসুং রিলে য়োগ স্ত্রিম্মিং, গার্জিয়ান রিংনা চহি অসিগী জুন ২১গী অতোপ্পা নুংঙাইবা থৌরম অমা ওইগনি। থৌরাং অসিগী শরুক অমা ওইনা নুমিৎ থোকফম লৈবাক জপান্দগী অয়ুক্কী পুং ৬তগী স্ত্রিম্মিং তৌবা হৌগনি।

মিনিস্তরনা হায়খি মালেমগী য়োগ নুমিৎ ফাওবগী মমাঙদা পাংথোক্কদবা থৌরম কয়া লেংদুনা লৈরে অমসুং মে ২৭দা হায়দ্রবাত্তা নুমিৎ ২৫গী কাউন্তদাউন থৌরম হৌদোকপা ওইনা মফম অদুদা য়োগ পামজবা মীওই লিশিং ১০ রোম য়োগ দেমোন্সত্রেসন শরুক য়াগনি।

থৌরম অদুদা কর্নাতকাগী রাজ্যপাল, য়ুনিয়ন মিনিস্তরশিং, ফিল্ম স্তারশিং, শান্নরোয়শিং, শক্নাইরবশিং, মমিং চৎলবা য়োগ গুরুশিং, য়োগ এক্সপার্তশিং, মফম অদুগী য়োগ ইন্সতিতুৎশিং অমসুং য়োগ পামজবশিং শরুক য়াগনি।

মমাঙদা অচৌবা কাউন্তদাউন থৌরমশিং সিবদোল(মে ২দা ৫০শুবা নুমিৎকী কাউন্তদাউন) অমসুং রেদ ফোর্ততা(এপ্রিল ৭দা ৭৫শুবা কাউন্তদাউন নুমিৎ) পাংথোকখ্রে।

*****