কেন্দ্রগী মন্ত্রী মন্দলদা ঐহাক্কী মরুপ ওইরিবা, শ্রী অশ্বিনি ভৈষ্ণব, শ্রী দেবুসিংহ চৌহান, দা. এল. মুরুগন অমসুং তেলিকোম অমদি ব্রোদকাস্তিং সেক্তরগা মরী লৈনবা লুচিংবা পুম্নমকপু ঐহাক্না খুরুমজরি!

তেলিকোম রিগ্যুলেতরী ওথোরিতী ওফ ইন্দিয়া – ত্রাইগা মরী লৈনবা মীওই পুম্নমকপু সিলভর জুবিলীনা লাকপদা ঐহাক্না নুংঙাইবা ফোঙদোকচরি। ওর্গনাইজেসন অসিদা চহি ২৫ মপুং ফারকপা অসিগা লৈবাক অসিনা আজাদী কা অমৃতকালগী মথংগী চহি ২৫গী রোদমেপ শেম্লিবা, অনৌবা পান্দমশিং থম্লিবা অসিগা চাননা তারিবা অসিদা ঐহাক্না নুংঙাইবা পোকই। মীকুপ খরগী মমাংদা ঐহাক্না জাতিদা ইশানা শাজবা ৫জি তেস্ত-বেদ খুৎশিন্নবগী খুদোংচাবা অমা ফংজখি। মসি তেলিকোম সেক্তরগী ক্রিতিকেল অমসুং মোদর্ন তেক্নোলোজীদা আত্মনির্ভর ওইনবা মাইকৈদা চংশিনবা মরু ওইবা খোঙথাং অমা ওইরি। ঐহাক্না ঐখোয়গী আই.আই.তি.শিং য়াওনা প্রোজেক্তশিং অসিগা মরী লৈনবা মীওই পুম্নমক্তা থাগৎপা ফোঙদোকচরি। অমসুং ঐহাক্না লৈবাক অসিগী নহা ওইরিবা মরুপ, রিসর্চর অমসুং কম্পনীশিংদা ৫জি তেক্নোলোজী শাবদা তেস্তিং ফেসিলিতী অসি শীজিন্নবিয়ু হায়না হায়জরি। মসি মরু ওইনা ঐখোয়গী স্তার্তঅপশিংনা মখোয়গী প্রদক্তশিং চাংয়েং তৌজনবা অচৌবা খুদোংচাবা অমা ওইরি। মসি খক্তা নত্তনা, লৈবাক অসিনা লৈবাক অসিগী মশাগী ৫জি স্তেন্দর্দশিং অসি ৫জি.আই.গী মওংদা শাখি, মসি লৈবাক অসিগী ওইনা য়াম্না চাউথোকচনীংঙাই ওইবা ৱাফম অমনি। মসিনা লৈবাক অসিগী খুঙ্গংশিংদা ৫জি তেক্নোলোজী য়ৌহনবদা অচৌবা থৌদাং অমা লৌরগনি।

মরুপশিং,

কন্নেক্তিবিতীনা ২১শুবা চহিচাগী ভারতকী চাউখৎ খোঙজেল অসি লেপ্লগনি। মরম অসিনা কন্নেক্তিবিতী অসি থাক খুদিংদা মতমগা চুনবা ওইহনবা তাই। অমসুং মসিনা মোদর্ন ইনফ্রাস্ত্রকচর শেমগৎতুনা, মোদর্ন তেক্নোলোজী য়ারিবা মখৈ শীজিন্নদুনা মসিগী য়ুম্ফম ওইরগনি। ৫জি তেক্নোলোজী অসিনা লৈবাক অসিগী গভর্নান্স, ইজ ওফ লিবিং অমসুং ইজ ওফ দুইং বিজিনেসতা অফবা অহোংবশিং পুরক্লগনি হায়খি। মসিনা লৌউ-শিংউ, হকশেল, এজুকেসন, ইনফ্রাস্ত্রকচর অমসুং লোজিস্তিক্স অসিগুম্বা সেক্তর খুদিংমক্তা শাহৌ লৈহল্লগনি। মসিনা খুদোংচাবা হেনগৎলগনি অমসুং থবক্কী খুদোংচাবা কয়া অমা পীরগনি। লাক্কদৌরিবা দিকেদ অমগা তঙ্খাই অসিদা ৫জিনা ভারতকী শেন্মীৎলোন্দা দোলর বিলিয়ন ৪৫০ শরুক তম্লগনি হায়না পান্নরি। হায়বদি মসিনা ইন্তর্নেৎকী স্পীদ হেনগৎহনবা খক্তা নত্তনা মসিনা খুমাং চাউশিনবা অমসুং থবক পীবগী খোঙজেলসু হেনগৎহল্লগনি। মরম অসিনা ৫জি অথুবদা রোল-আউত তৌনবা সরকার অমসুং ইন্দস্ত্রী অনিমক্না হোৎনবা মথৌ তাই। দিকেদ অসি লৌরকপদা ঐখোয়না ৬জি সর্ভিসসু লোঞ্চ তৌবা য়রগনি, মসিগীদমক ঐখোয়গী তাস্ক ফোর্সনা থবক পাইখৎপা হৌখ্রে।

মরুপশিং,

তেলিকোম সেক্তরদা লৈরিবা ঐখোয়গী স্তার্তঅপশিং অমসুং ৫জি তেক্নোলোজী অসি খুমাং চাউশিন্নবা অমসুং গ্লোবেল চেম্পিয়নশিং ওইহনবা শেম শাদুনা লৈবা হায়বা অসি ঐখোয়গী পান্দমনি। ঐখোয়না সেক্তর কয়ামরুমদা মালেমগী খ্বাইদগী চাউবা দিজাইন পাৱরহাউশিংগী মনুংদা অমা ওইরি। ঐখোয়না তেলিকোম ইক্বিপমেন্ত মার্কেৎতা ভারতকী দিজাইন চেম্পিয়ন্সকী তৌবা ঙম্বা অদু খঙই। ঐখোয়না হৌজিক আর এন্দ দি ইনফ্রাস্ত্রকচর অমসুং মসিগী মথৌ তাবা প্রোসেস হেনগৎহন্নবা অখন্নবা মীৎয়েং চংবা মথৌ তাই। অমসুং মসিদা নখোয় পুম্নমক্কী অচৌবা থৌদাং লৈ।

মরুপশিং,

তেলিকোম সেক্তর অসি করম্না মরোলদোম লেপচগনি অমসুং অফবা মওংদা অথোই-অহেন তানবনা খুন্নাই অমসুং শেন্মীৎলোন্দা করম্না কান্নবা কয়ামরুম পীবগে হায়বগী অচৌবা খুদম অমা ওইরি। ঐখোয়না চহি খরগী মমাংদা লৈরম্বা ২জিগী চহিচা অদু য়েংশি, হজি হায়বা অসি নীংবা কাইবা, অমাংবা, শেঞ্জা-থুমজা অমসুং পোলিসী পেরালাইসিস ওইখি অমসুং ঙসি চহিচা অসিদগী থোরক্তুনা লৈবাক অসিদা ৩জি.দগী ৪জি অমসুং হৌজিক্না ৫জি.দদগী ৬জি তম্না লেপ্তনা চংশিল্লি। মসিগী অওনবা অসি য়াম্না নীংথিনা, ত্রান্সপরেন্সী লৈনা পুরক্লি অমসুং মসিদা ত্রাইনা য়াম্না মরু ওইবা থৌদাং অমা লৌখি। ইন্দস্ত্রীগী মাংদা রিত্রোস্পেক্তিব তেক্সেসন, নত্ত্রগা এ,জি,আর, অসিগুম্বা সমস্যাশিং ওইরবসু শীংনবা অমা হেক্তা লাকপা মতমদা ঐখোয়না খোঙজেল য়াংনা কোকহনখি অমসুং ঐখোয়না মথৌ তাবা রিফোর্ম পুরকখি। অসিগুম্বা খোঙথাংশিং অসিনা অনৌবা থাজবা অমা পোকহনখি। মসিনা মরম ওইরগা ২০১৪গী মমাংদা লাকখিবা এফ.দি.আই.গী শরুক অমা তঙ্খাইদি শুপ্নগী চহি ৮ অসিদা লাকখি। ভারতকী তৌবা ঙম্বদা ইনভেস্তরশিংদা থাজবা থম্লিবা অসি মপাঙ্গল কনখৎহনবগী থৌদাং ঐখোয় পুম্নমক্তা লৈ।

মরুপশিং,

হৌখিবা চহি খরা অসিদা সরকার অসিনা অনৌবা ৱাখল্লোন অমসুং থৌশিলগা লোয়ননা থবক তৌরিবা মওং অসি নখোয় পুম্নমক্না খঙলমগনি। হৌজিক লৈবাক অসিনা সিলোশিংগী খনবদগী হেন্দোক্তুনা “হোল ওফ দি গভর্নমেন্ত এপ্রোচ”কা লোয়ননা মাংদা চংশিল্লি। ঙসি ঐখোয়না লৈবাক অসিদা লৈরিবা তেলিদেন্সিতী অমসুং ইন্তর্নেৎ য়ুজরশিংগী মশিংদা মালেমদা খোঙজেল য়াংনা হেনগৎলক্লি, মসিদা তেলিকোম য়াওনা সেক্তর কয়ানা থৌদাং লৌখি। মসিদা খ্বাইদগী চাউনা থৌদাং লৌখিবা অসি ইন্তর্নেৎনা ওইখি। ২০১৪দা ঐখোয়না লাকখিবা মতমদা, ঐখোয়না সবকা সাথ, সবকা বিকাস অমসুং তেক্নোলোজী চাউনা শীজিন্নবা হায়বা অসি মরু ওইনা লৌখি। মসিগীদমক লৈবাক অসিদা লৈরিবা মীওই করোর কয়া, সরকার, সরকারগী য়ুনিৎ পুম্নমক অসিসু অমত্তা ওইনা পুনশিনবা খ্বাইদগী মরু ওইবা ওইখি, কেন্দ্র, রাজ্য, লোকেল স্বারাজ ইন্সতিত্যুসন ওইরবসু পুম্নমক অসিনা ওর্গানিক য়ুনিৎ অমা ওইনা মাংদা চংশিনমিন্নবা মথৌ তাখি। মরম অসিনা ঐখোয়না জন ধন, আধার, মোবাইলগী ত্রিনিতী অসি দাইরেক্ত গভর্নান্সকী মীদিয়ম ওইনবা ৱারেপ লৌখি। লায়রবশিংগী খ্বাইদগী লায়রবা ইমুংশিংদা মোবাইল এক্সেসিবল ওইহন্নবা লৈবাক অসিমক্তদা মোবাইল ফোনশিং শানবগী মতাংদা মীৎয়েং চংখি মসিগী ফলনা মোবাইল মেন্যুফেকচরিং য়ুনিৎশিং অসি ২দগী ২০০গী মথক্তা হেনগৎলকখি। ঙসি ভারত অসি মালেমগী খ্বাইদগী চাউবা মোবাইল ফোন মেন্যুফেকচর্র ওইরি অমসুং হান্না ঐখোয়গী মথৌ তাবশিংগীদমক ইম্পোর্ত তৌরকপা ফোনশিং শীজিন্নরম্বা অদু ঙসিদি মোবাইল ফোন এক্সপোর্ত তৌবদা অনৌবা রেকোর্দশিং থম্লি।

মরুপশিং,

মোবাইল কন্নেক্তিবিতী হেনগৎহন্নবা কোল অমদি দেতা মমল তাংহনদবা হায়বা অসি মথৌ তাখি। মরম অসিনা ঐখোয়না তেলিকোম মার্কেৎতা অফবা মওংদা অথোই-অহেন তানবদা পুক্নিং থৌগৎখি। মসিগী ফল ওইনা ঙসি ঐখোয়না মালেমদা খ্বাইদগী হোংনা দেতা পীবা ঙম্বা ওইরি। ঙসি ভারতনা ওপ্তিকেল ফাইবর শীজিন্নদুনা লৈবাক অসিগী খুঙ্গং খুদিংমক কন্নেক্ত তৌরি। ২০১৪গী মমাংদা ভারত্তা লৈরিবা খুঙ্গংগী পঞ্চায়ৎ ১০ ফাওবা ওপ্তিকেল ফাইবর কন্নেক্তিবিতী পীবা ঙম্লমখিদে হায়বা নখোয় পুম্নমক্না খঙই। ঙসি ঐখোয়না ব্রোদবেন্দ কন্নেক্তিবিতীনা গ্রাম পঞ্চায়ৎ লাখ ১.৭৫দা য়ৌশিনবা ঙমহনখ্রে। মতম খরগী মমাংদা সরকার অসিনা নক্সলনা শোকহল্লবা ত্রাইবেলগী জিলা কয়াদা ৪জি কন্নেক্তিবিতী ফংহন্নবা অচৌবা থৌরাং অমা অয়াবা পীখি। মসি ৫জি অমসুং ৬জি তেক্নোলোজীগীদমক্তসু মথৌ তাবনি অমসুং মসিনা মোবাইল অমসুং ইন্তর্নেৎকী স্কোপ হেনগৎহল্লগনি।

মরুপশিং,

ভারত মচা কয়া-কয়াবু ফোন অমদি ইন্তর্নেৎকী এক্সেস ফংহনবা অসিনা ভারতকী অচৌবা তৌবা ঙম্বা অদু পুথোকপা ঙমহল্লি। মসিনা লৈবাক অসিদা মপাঙ্গল কনবা দিজিতেল ইনফ্রাস্ত্রকচর অমগী য়ুম্ফম থোনখি। মসিনা লৈবাক অসিদা সর্ভিসকী অচৌবা দিমান্দ অমা লাকহনখি। লৈবাক অসিগী কাচিন-কোয়া শিনবা থুংবদা কম্মন সর্ভিস সেন্তর লাখ ৪ হেন্না লৈরক্লিবা অসি মসিগী খুদম অমনি। ঙসি সরকারগী সর্ভিস কয়ানা কম্মন সর্ভিস সেন্তরশিং অসিগী খুত্থাংদা খুঙ্গংগী মীয়ামদা য়ৌশিনবা ঙম্লি। কম্মন সর্ভিস সেন্তরশিং অসি নহারোল লাখ কয়াদা থবক পীনবা পাম্বৈ অমসু ওইরি। ঐহাক্না হন্দক্তা গুজরাত্তা থৌরম অমা য়াওবা চৎখি। ত্রাইবেলনা খুন্দাবা মফম অমা ওইরিবা দাহোদ জিলাগী ত্রাইবেল এক্সতেন্সন অমা লৈ। ঐহাক্না শোইনাইরবা মতৈ-মনাও অমা মফম অদুদা থেংনরকখি। মখোয়না কম্মন সর্ভিস সেন্তর অমা চল্লাইখি। ঐহাক অসি শোইনাইবা ওইরুবনা ঐহাক্না মতেং খজিক ফংজখি মদুদগী ঐহাক্না মসি হাংজবনি হায়না মহাক্না ফোঙদোরকখি, অমসুং ঙসি মহাক্না ত্রাইবেলনা খুন্দাবা মনুং হঞ্জিনবা মফম অসিদা কম্মন সর্ভিস সেন্তর হাংবদগী লিশিং ২৮-৩০ তানবা ঙমজরে। মসিনা তাকপদি ত্রাইবেলনা খুন্দাবা মফমদা লৈরিবা প্রজাশিংনসু সর্ভিস অসিগী মরমদা, সর্ভিস অসি করম্না তৌই, সর্ভিস অসি কয়াম কান্নবগে খঙলে তাকপনি। অপীকপা খুঙ্গং অদুদা শোইনাইরবা মতৈ-মনো অসিনা মসিগী খুত্থাংদা হিংনবগী লম্বী তাল্লি। মসিনা দিজিতেল তেক্নিলোজীনা পুরকপা অওনবা অসি।

মরুপশিং,

ঐখোয়গী সরকারনা তেক্নোলোজী লেপ্পা লৈতনা অপগ্রেদ তৌরি লোয়ননা লৈবাক অসিগী দেলিবরী সিস্তেম লেপ্পা লৈতনা ফগৎহল্লি। মসিনা লৈবাক অসিগী সর্ভিস অমসুং মেনুফেকচরিংদা লৈরিবা স্তার্ত-অপ ইকোসিস্তেমদা শাহৌ পীরি। মসি ভারতপু মালেমগী খ্বাইদগী চাউবা স্তার্তঅপ ইকোসিস্তেমগী অহুমশুবদা লৈহনবগী মরু ওইবা মরম ওইরি।

মরুপশিং,

মসিগী হোল ওফ গভর্নমেন্ত এপ্রোচ অসি হৌজিক্কী অমদি তুংগী শীংনবশিং থংনবদা ত্রাইগুম্বা রিগ্যুলেতরশিংগী ওইনা মরু ওই। ঙসি রিগ্যুলেসন অসি সেক্তর অমা খক্তগী ঙমখৈশিংদা লোইশিন্দ্রে। তেক্নোলোজীনা তোঙান-তোঙানবা সেক্তরশিংবু শম্নহল্লি। মরম অসিনা ঙসি মীপুম খুদিংমক্না কোল্লোবোরেতিব রিগ্যুলেসন মথৌ তাই হায়না ফাওরি। মসিগীদমক রিগ্যুলেতর পুম্নমক্না পুনশিনবা, কম্মন প্লেৎফোর্মশিং দিবেলপ তৌবা অমসুং হেন্না নীংথিজনা কোওর্দিনেসন তৌনবা সোল্যুসনশিং থিবা তঙাই ফদে হায়না ঐহাক্না ফাওই। কনফরেন্স অসিদগী মরু ওইবা সোল্যুসনশিং পুথোকপা ঙমগনি হায়না ঐহাক্না থাজৈ। নখোবনা লৈবাক অসিগী তেলিকোম কঞ্জুমরগী অপাম্বশিং ঙাক্না চৎপা তাই অমসুং মালেমগী খ্বাইদগী চাউখৎপা তেলিকোম মার্কেৎ ওইহন্নবা পুক্নিং থৌগৎপা তাই। ত্রাইগী সিলভর জুবিলী কনফরেন্স অসিনা ঐখোয়গী নীংতম্বা, ইনর্জীদা শাহৌ পীরসনু, অনৌবা থাজবা পোকহনবা, অনৌবা পনখৈ ফংনবা মঙলান শাগৎপা অমসুং মদুবু মঙফাওনবা ঙম্নবা ফিরেপ চেৎশিনহনবা ওইরসনু। অমসুং ময়াম পুম্নমকপু ঐহাক্না থাগৎচরি! পুম্নমক্তা য়াইফ-মঙ্গোল পীজরি, হন্না-হন্না থাগৎচরি!

*****