প্রধানমন্ত্রীগী লোইশঙ
প্রধান মন্ত্রীনা মহাক্কী নই দিল্লীগী ময়ুমদা সিখ মীহুৎশিংগা উন্নখ্রে
“গুরুদ্বারাদা চৎপা, ‘সেৱা’দা মতম লেনবা, লঙ্গর ফংবা, সিখ ইমুংগী ময়ুমদা লৈবনা ঐহাক্কী পুন্সিগী শরুক অমা ওইদুনা লাক্লি”
“ঐখোয়গী গুরুশিংনা ঐখোয়দা থৌনা অমসুং সেবা তৌবা তম্বীখি”
“অনৌবা ভারতনা অনৌবা পন কয়া লাল্লি অমসুং মালেম পুম্বদা মশক খঙহল্লি”
“ঐহাক্না ঐখোয়গী ভারতকী দাইয়স্পোরাশিংবু ভারতকী ‘রাস্ত্রদুত’নি হায়না মতম পুম্বদা খল্লি। অদোম খুদিংনা ইমা ভারতকী মপাঙ্গল লৈবা খোল্লাও অমসুং মগুন লৈবা শক্তাক অমা মীরমদা ওইরি”
“গুরুশিংগী খুয়াখানা মসিগী মশক নাইরবা লমদম অসিবু শেংদোকহনখি অমসুং মীয়ামদা ইথিল পীরমখি”
“সিখকী চৎনবী অসিদি ‘এক ভারত শ্রেস্থ ভারত’কী অহিংবা চৎনবীনি”
“সিখ খুন্নাই অসি লৈবাক অসিগী থৌনা, পাঙ্গল অমসুং শুবা-নোম্বা কনবগী অতোপ্পা মমিংনি”
Posted On:
29 APR 2022 7:05PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি মহাক্কী ৭ লোক কলয়ান মার্গতা লৈবা ওফিসিএল রেসিদেন্সতা সিখকী মীহুৎ কাঙবু অমগা উন্নখ্রে। কাঙলুপ অসিদা পুন্সিগী তোঙানবা থাক্কী মীওই য়াওরি। কেন্দ্রগী মন্ত্রী, শ্রী হর্দীপ সিংহ পুরীসু থৌরম অসিদা শরুক য়াবশিংগী মরক্তা অমা ওইখি।
প্রধান মন্ত্রীনা থৌরম অসিদা ৱা ঙাংবদা মহাক্কা সিখ খুন্নাইগা মতম শাংনা মরী লৈরকপবু নীংশিংখি। “গুরুদ্বারাদা চৎপা, ‘সেৱা’দা মতম লেনবা, লঙ্গর ফংবা, সিখ ইমুংগী ময়ুমদা লৈবনা ঐহাক্কী পুন্সিগী শরুক অমা ওইদুনা লাক্লি। সিখ লাইনিংবশিংগী খোঙ্গুল কয়া প্রধান মন্ত্রীগী লৈফম ওইরিবা মফমসিদা মতমগী মতুং ইন্না তাদুনা লাক্লি। ঐহাক্না মখোয়গা লোয়নবা ফংবগী নুংঙাইরবা খুদোংচাবা কয়া ফংদুনা লাক্লি”, হায়না প্রধান মন্ত্রীনা হায়খি। প্রধান মন্ত্রীনা মহাক্কী মীরম খোঙচৎশিংদা মালেম শিনবা থুংবদা লৈবা সিখ হেরিতেজকী মফমশিংদা চৎখিবশিংবুসু নীংশিংখি।
প্রধান মন্ত্রী নরেন্দ্র মোদীনা অসুম্না হায়খি, “ঐখোয়গী গুরুশিংনা ঐখোয়দা থৌনা অমসুং সেবা তৌবা তম্বীখি। ভারতকী মীয়াম্না রিসোর্স অমত্তা য়াওদনা মালেমগী তোঙানবা মফমশিংদা চৎলি অমসুং মশাগী হোৎনজমন্না মায় পাকপা ফংই। মসি অনৌবা ভারতকী ইথিল অমনি”।
প্রধান মন্ত্রীনা অনৌবা ভারতকী ৱাখল্লোন থাগৎপবু নীংশিংলদুনা অনৌবা ভারতনা অনৌবা পন কয়া লাল্লি অমসুং মালেম পুম্বদা মশক খঙহল্লি হায়না ফোংদোকখি। কোরোনা লাইচৎকী মতম্না মসিগী খ্বাইদগী চুনবা খুদম অমনি। লাইচৎকী অহৌবদা, অরিবা ৱাখল্লোন চেনবা মীওই কয়ানা ভারতকীদমক্তা ৱাজৈ হায়না ফোংদোক্নখি। অদুবু, কোরোনা লাইচৎ শেন্নবগী মতাংদা মীয়াম্না ভারতপু হৌজিক্তি খুদম ওইনা পীনরে। ভারতকী মীশিং য়াম্বগী মতাংদা মীয়াম্না হান্না ৱানরম্মি অমসুং ভারতকী মীয়ামগী ভেক্সিন কাপ্পদসু থাজবা কয়া ৱাৎনখি। অদুবু, ঙসিদি ভারতনা ভেক্সিন শাবা অমা ওইনা থোক্লক্লে। “তিকা কাপ্পগী ৯৯%গী চাংনা ঐখোয়গী ইশাগী ভারত্তা শাবা ভেক্সিনগী খুত্থাংদা পাংথোকখি হায়বসি তাবদা অদোম্না অঙকপা ফাওগনি”, হায়না মহাক্না হায়খি।
পনখ্রিবা অরুবা মতম অসিদা ভারতনা মালেমগী খ্বাইদগী চাউবা স্তার্ত-অপ ইকোসীস্তেম অমা ওইনা থোক্লকখি হায়না প্রধান মন্ত্রীনা হায়খি। “ঐখোয়গী য়ুনিকোর্ন মশিংনা লেপ্তনা হেনগৎলক্লি। ভারতনা থাক ৱাংখৎলকপা অমসুং মীয়াম্না থাজবা হেনগৎলক্লিবা অসিনা ঐখোয়গী দাইয়স্পোরাশিংদা য়াম্না অপেনবা ফাওহনবগা লোয়ননা চাউথোকচবসু পোকহল্লি”, হায়না মহাক্না মখা তাখি। “ঐহাক্না ঐখোয়গী ভারতকী দাইয়স্পোরাশিংবু ভারতকী ‘রাস্ত্রদুত’নি হায়না মতম পুম্বদা খল্লি। অদোম খুদিংনা ইমা ভারতকী মপাঙ্গল লৈবা খোল্লাও অমসুং মগুন লৈবা শক্তাক অমা মীরমদা ওইরি”, হায়না প্রধান মন্ত্রীনা ফোংদোকখি। ভারতনা শাহৌ লৌবগী মতৌ অসিদা ঐখোয়গী দাইয়স্পোরাশিংনা চাউথোকচরি হায়না মহাক্না হায়খি। “ঐখোয়না মালেমগী মফম অমা হেক্তদা লৈবা মতমদা, ‘ভারতনা অহানবদা’ হায়বসিনা ঐখোয়গী খ্বাইদগী মরু ওইবা থাজবা ওইগদবনি” হায়না মহাক্না মখা তাখি।
প্রধান মন্ত্রীনা গুরুশিংগী মশক নাইরবা তেংবাং অমসুং কত্থোকখিবশিংগী মাঙদা কোক নোল্লদুনা গুরু নানক দেবজীনা লৈবাক পুম্বগী মীয়ামগী ৱাখল্লোন করম্না মিৎকপ থোকহনখি অমসুং অমম্বদগী পুথোক্তুনা মৈঙালগী মাইকৈদা মতৌ করম্না পুবীরমখি হায়বা নীংশিংখি। গুরুশিংনা ভারত শিনবা থুংবদা চৎখি অমসুং মফম খুদিংদা মখোয়গী ইথিল অমসুং পুক্নিং থৌগৎপগী খুদম উবা ফংলি হায়না মহাক্না হায়খি। মখোয়বু মীয়াম্না য়াম্না লুনা খঞ্জখি অমসুং মফম খুদিংদা মখৌবু নীংনখি। “গুরুশিংগী খুয়াখানা মসিগী মশক নাইরবা লমদম অসিবু শেংদোকহনখি অমসুং মীয়ামদা ইথিল পীরমখি” হায়না প্রধান মন্ত্রীনা হায়খি। “সিখকী চৎনবী অসিদি ‘এক ভারত শ্রেস্থ ভারত’কী অহিংবা চৎনবীনি”, মহাক্না হায়খি। নীংতম ইহৌ মনুং অমসুং নীংতম্বগী মতুংদা ফাওবা সিখ খুন্নাইনা তেংবাংখিবশিংবু প্রধান মন্ত্রীনা থাগৎখি। “সিখ খুন্নাই অসি লৈবাক অসিগী থৌনা, পাঙ্গল অমসুং শুবা-নোম্বা কনবগী অতোপ্পা মমিংনি”, হায়না মহাক্না হায়খি।
প্রধান মন্ত্রীনা ভারতকী নীংতম ইহৌগী মতাংদা লৈবা মহাক্কী মিৎয়েংবু অমুক হন্না মীয়ামদা পাউদমখি। মসিগী ইহৌ অসিদি অকক্নবা মতম অমদা থোকপা নত্তে, মসিদি চহি লিশিং কয়াগী ৱাখল তাবা, ৱাখল্লোন, স্পিরিচুএল ওইবা ভেল্যু অমসুং তপস্যা কয়াদগী ওইরকপনি হায়না মহাক্কনা হায়খি।
গুরু তেঘ বহাদুরজীগী ৪০০শুবা প্রকাশ পুরব, গুরু নানক দেবজীগী ৫৫শুবা প্রকাশ পুরব অসুং গুরু গোবিন্দ সিংহজীগী ৩৫০শুবা প্রকাশ পুরবকুম্বা মশক নাইবা থৌরম কয়াগা মরী লৈনবা ফংজবগী য়াইফরবা খুদোংচাবা কয়া ফংবদা প্রধান মন্ত্রীনা নুংঙাইবা ফাওই হায়না ফোংদোকখি। কর্তারপুর কোরিদোর, লঙ্গরবু তেক্স ফ্রী ওইহনবা, হরমন্দির সাহিবকী এফ.সি.আর.এ. পর্মিসন অমসুং গুরুদ্বারাশিংগী ইনফ্রাস্ত্রকচর ফগৎহনবা অমসুং মনাক নকপশিংগী লু-নানবা হেনগৎহনবগী থৌওং কয়াসু মহাক্কী সরকারগী মতমদা পায়খৎখি হায়না মহাক্না ফোংদোকখি।
প্রধান মন্ত্রীনা গুরুশিংনা মীওইবগী থৌদাংদা অহেনবা মিৎয়েং চঙবদা প্রধান মন্ত্রীনা মরু ওইবা পীরদুনা মসিবু অমৃত কালগী মতমদা ইশাগী থৌদাংদা মরু ওইবা পীরিবা অসিগা মরী লৈনহন্দুনা সবকা সাথ, সবকা বিকাস, সবকা বিশ্বাস অমসুং সবকা প্রয়াসকী মন্ত্রা অসিদি পনখ্রিবা ইথিল অসিবু হৌদোকপনি হায়খি। মসিগী ইশাগী থৌদাং খঙবা অসি হৌজিক্কী মতমগী খক্তা নত্তনা ঐখোয়গী তুংগী চারোন-শুরোনশিংগী ওইনসু য়াম্না মরু ওই হায়না মহাক্না হায়খি। অকোয়বগী ফিভম, ন্যুত্রিসন অমসুং কলচরগী ভেল্যু ঙাক-শেনবগী হীরমশিংদা তেংবাংনবগীদমক্তা থৱাই য়াওনা লৈবগীদমক্তা মহাক্না সিখ খুন্নাইবু থাগৎখি। থৌরম অসিদা শরুক য়ারিবা মীওইশিংদা হন্দক্তা হৌদোকখিবা অমৃত সরোবরগী মতাংদসু তেংবাংনবা হায়রদুনা মহাক্কী ৱারোল লোইশিনখি।
****
(Release ID: 1821451)
Visitor Counter : 130
Read this release in:
Kannada
,
English
,
Urdu
,
Marathi
,
Hindi
,
Assamese
,
Bengali
,
Punjabi
,
Gujarati
,
Odia
,
Tamil
,
Telugu
,
Malayalam