ময়াম পুম্নমকপু খুরুমজরি!

শ্রী নারায়ন ধর্ম শংঘম ত্রস্তকী প্রসিদেন্ত স্বামি সচ্চিদানন্দজী, জেনরেল সেক্রেতরী স্বামী ঋতমভরানন্দজী, কেন্দ্রগী মন্ত্রী-মন্দলদা ঐহাক্কী মরুপ ওইরিবা, কেরালাদগী শ্রী ভি. মুরলীধরনজী, রাজিব চন্দ্রসেকরজী, শ্রী, নারায়ন গুরু ধর্ম সংঘম ত্রসগরকী অতোপ্পা ওফিসিএলশিং। লৈবাক অসিগী অমদি মালেম পুম্বদগী ভক্তা পুম্নমক, তিল্লিবা মীওই খুদিংমক,

ঐহাক্কী য়ুমদা ঋসিশিংনা লাকপা অসিদা ঐহাক্না অদুক্কী মতিক নুংঙাইবা পোকই, নুংঙাইবগী পনখৈ লৈতে।

এল্লা প্রিয়পত্তঅ মলয়ালি-গল্কুম, এন্দে, বিনীতমাবা নমস্কারম। ভারতত্তিন্দে, আধ্যাত্মিক, চেতন্যমান, শ্রীনারায়ন গুরুদেব। অদ্ধেহত্তন্দে, জন্মত্তাল, ধন্য-মাগপত্তঅ, পুন্যবুমি আন কেরলম।।

ঋসিশিং অমসুং শ্রী নারায়ন গুরুগী থৌজালশিংদগী ঐহাক্না মমাংদা নখোয়গী নরক্তা তিনজনবগী খুদোংচাবা ফংখি। ঐহাক্না নখোয়গী থৌজালশিং ফংজনবা শিবগীরিদা লাকপা ফংজখি। অমসুং মফম অদুদা ঐহাক্না লাকপা খুদিংদা ঐহাক্না লাইফমলেন অসিদগী ঐহাক্না মতম চুপ্পদা মঙাল ফংজখি। ঙসি সিবগীরি তীর্থ উৎসব অমসুং ব্রহ্ম বিদ্যালয়গী গোল্দন জুবিলী পাঙথোক্লিবা অসিদা শরুক য়ানবগী খুদোংচাবা অমা পীবীরকপদা ঐহাক্না য়াম্না নুংঙাইবা ফোঙদোকচরি। নখোয়গা ঐহাক্কা করি মরি থোক্নবনো হায়বদি খঙদে অদুবু ঐহাক্না ৱাফম অমা কাওবা ঙমদনা লৈ, মদুদি কেদরনাথজীদা অচৌবা খুদোংথিবা থৌদোক অমা থোকখিবা মতমদা মালেম পুম্বদগী লাকখিবা লমকোইবশিংনা খুদোংথিবা নংখি। মতম অদুদা উত্তরাখন্দ অমসুং কেন্দ্রদা কোংগ্রেস সরকারনা পানখি। কেরালাগী মিস্তর এন্তোনীনা লৈবাক অসিগী ঙাকশেল মন্ত্রী ওইরবসু গুজরাতকী মুখ্য মন্ত্রী ওইরিবা ঐঙোন্দা অহমদাবাদতা সিবগীরি মথতগী ফোন অমা লাকখি, ঋসিশিং পন্দুনা লৈরে পাও ফাওনবা ঙমদ্রে হায়না খঙহল্লকখি।  মোদীজী ঐখোয়গী মতেং পাংবীয়ু হায়না হায়রকখি। চাউখ্রবা সরকার অমা লৈরবসু সিবগীরি মথতগী থবক অসি তৌনবা ঐঙোন্দা য়াথং পীবিরকখি। অমসুং গুরু মহারাজকী থৌজালদগী গুজরাত্তা ঐহাক্না রিসোর্স কয়া লৈজদ্রবসু মসিগী অফবা থবক অসি পাঙথোকপা ঙমখি অমসুং ঋসি পুম্নমক তেক্ত-কাইদনা পুরকপা ঙমখি অমসুং সিবগীরি মথ য়ৌহনবা ঙমজখি। ফোন তৌরকপা অদুদগী হৌরকগা ঐহাক্কী ওইনা মসি য়াম্না পুক্নিং নুংশিবা থৌদোক অমা ওইখি, গুরু মহারাজনা ঐহাকপু অফবা থবক অসি তৌনবা থৌজাল পীবীরকখি। ঙসিগী য়াইফরবা থৌরম অসিদা ঐহাক্না নখোয়গী নরক্তা য়াওজবা ফংজরি। তীর্থদানমগী চহি ৯০গী খোঙচৎ অমসুং ব্রহ্ম বিদ্যালয়গী গোল্দন জুবিলী অসি শুপ্নগী সংস্থান অমগী খোঙচৎ খক্তা নত্তে। মসি তোঙান-তোঙানবা মতমশিংদা তোঙান-তোঙানবা থৌওংশিংগী খুত্থাংদা মাংদা চংশিল্লি ভারতকী অদুগুম্বা ৱাখল্লোনগী অমর ওইরবা খোঙচৎ অমসু ওইরি। ভারতকী ৱাখল্লোন অসি ঙাক্তুনা থম্নবা হোৎনবদা কেরলানকয়না ভারতকী স্পিরিচুএল অমসুং সাইন্তিফিক্কী ওইবা চাউখৎ-থৌরাংগী খোঙচৎ অসোদা মতেং পাংদুনা লাকখি। ‘বর্কলা’ অসি চহিচা কয়াদগী খাগী কাশী হায়না খঙনদুনা লাকখি। কাশী অসি অৱাংবা নত্ত্রগা খাদা লৈরবসু! বারানসীগী শিবকী শহর নত্ত্রগা বরকলাগী শিবগিরী ওইগরে, ভারতকী মঙাল পীবিরিবা মফম খুদিংমক অসি ভারত মচা ঐখোয় পুম্নমক্কী পুন্সিদা অখন্নবা মফম অমা কল্লি। মসিগী মফমশিং অসি শুপ্নগী তীর্থ খক্তা নত্তে, মসি লাইনীংগী ওইবা মফমশিং খক্তা নত্তে, মখোয় অসিনা ‘এক ভারত, শ্রেস্থ ভারত’কী ৱাখল্লোন অসি ঐখোয়দা ফাওহল্লি।  থৌরম অসিদা ঐহাক্না শ্রী নারায়ন ধর্ম সংঘম ত্রস্ত, স্বামী সচ্চিদানন্দজী, স্বামী ঋতমবভরানন্দজী অমসুং স্বামী গুরু প্রসাদজীবু থমোয় শেংনা থাগৎপা ফোদোকচরি। তীর্থদানম অমসুং ব্রহ্ম বিদ্যালয়গী গোল্দন জর্নীগী থৌরম অসিদা তুংইল্লিবা মীওই করোর লাখ কয়াগী থাজবা অমসুং চোকথবা লৈতনা হোৎনখিবশিং অদু বাওখি। ঐহাক্না শ্রী নারায়ন গুরুগী তুং ইল্লিবশিং অমসুং ভক্তা পুম্নমক্তা ইকোক নোন্না খুরুমজরি। ঙসি ঐহাক্না ঋসিশিংনা অমসুং অথোইবা থৱায়শিংগী মরক্তা ৱা ঙাংজবা অসিদা ফোঙদোকচনীংদি খুন্নাইনা শোন্থরকপা মতমদা অমম্বা হেনগৎলকখি, মতম অদুদা অথৌবা মীওইশিং থোরক্তুনা অনৌবা মঙাল পীবা হায়বা অসি ভারতকী অখন্নবা মগুন অমনি। মালেমগী লৈবাক কয়াদা, সভ্যতা কয়াদা মখোয়গী লাইনীংদগী লাপথোরকপা মতমদা মেতরিএলিজমনা স্পিরিচুএলিতীগী মহুৎ শিনখি। অদুবু, ভারতকী ঋসিশিং, লৌশিং লৈবা মীওইশিং, গুরুশিংনা মতম চুপ্পদা ৱাখল্লোন অমসুং থৌওংশিং অসি ফগৎহল্লি অমসুং চাউখৎহল্লি। শ্রী নারায়ন গুরুনা মোদর্নিতীগী মতাংদা ফোঙদোক্লমখি! অদুবু মসিগা ইরোইননা মহাক্না ভারতকী সংস্কৃতি অমসুং কান্নবশিং অসিগী মগুনসু হাপ্পীরমখি। মহাক্না মহৈ-মশিং অমসুং বিজ্ঞানগী মতাংদা ফোঙদোক্লমখি! অদুবু মসিগা ইরোইননা মহাক্না ঐখোয়গী চহি লিশিং কয়া শুরবা চৎনবী অমসুং লাইনীংশিং অসিগী মতিক-মঙাল অদু হেনগৎহন্নবা হোৎনবদা কৈদৌনুংদা তুংহনখিদে। শিবগীরিগী লাইফমলেন অসিগী খুত্থাংদা বিজ্ঞানগী ওইবা ৱাখল্লোনগী অনৌবা লম্বী অমা থোরকখি, অমসুং ইমা রেস্বাতীসু শর্দা মথতা খুরুমলি। নারায়ন গুরুজীনা ধর্মশিং চাউখৎহনখি, মতমগী মতুং ইন্না শেমদোককি। মহাক্না স্তেরিওতাইপশিং অমসুং ফত্তবশিংগী মায়োক্তা খোঙজং চংশিনখি অমসুং মসিগী মরমদা ভারত্তা খঙহনখি। অমসুং মতম অদু ইরাই লাইবা ওইখিদে। ঙসি ঐখোয়না মদুগী মরমদা খনবা ফাওবা ঙম্লোই। অদুবু নারায়ন গুরুজীনা মদু পাঙথোকখি। মহাক্না জাতি-বিজাৎকী মিংদা চত্থরিবা দিস্ক্রিমিনেসন অসিগী মায়োক্তা ৱাখল লৈনা অমসুং চৎনবা য়াবা মওংদা লান্থেংনখি। ঙসি, নারায়ন গুরুজীনা পীবিরম্বা ইথিল অদুগা লোয়ননা লৈবাক অসিনা লায়রবশিং, তুহৎপীরবশিং, শোত্থরবশিংগী শেবা তৌরি অমসুং মখোয়দা মখোয়গী হকশিং ফংহল্লি। অমসুং মসিনা মরম ওইরগা লৈবাক অসিনা ঙসি লৈবাক অসিনা ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’কী মন্ত্রগা লোয়ননা মাংদা চংশিল্লি।

মরুপশিং,

শ্রী নারায়ন গুরুজী অসি স্পিরিচুএল কন্সিয়সনেসকী শরুক অমা ওইবতা নত্তনা মহাক অসি স্পিরিচুএলগী ওইবা ইথিল পীরিবা মশক অমা ওই অমসুং শ্রী নারায়ন গুরুজী অসি সোসিএল রিফোর্মর, থিঙ্কর অমসুং বিজিনরীসু ওইখি। মহাক্না লৈরিবা মতম অদুদগী তুংলমচৎপু হেন্না মীৎয়েং শান্না উবা ঙম্লমখি। মসিনা মরম ওইরগা গুরু রবিন্দ্রনাথ তেগোর অসি রেদিকেল থিঙ্ক অমা ওইবগা লোয়ননা প্রেক্তিকেল রিফোর্মর অমা ওইখি। মহাক্না থবক খুদিংমক নমফু-শাফু তৌদুনা কাবা পামখিদে অদুবু মদু খঙবা, তমশিনবা পামখি। মহাক্না খুন্নাই অসিদা খন্ন-নৈনবা পাঙথোক্তুনা ফগৎহনবা ঙমগনি হায়বা খঙখি। মীয়ামগা লোয়ননা থবক তৌরবা, মীয়ামগী অপাম্বা খঙলবা অমসুং মীয়ামদা ঐখোয়গী অপাম্বা খঙহল্লবা মতমদা খুন্নাই অসি ফগৎলক্কনি। ঐখোয়না কনাগুম্বা অমবু খঙবা হৌরকপগা থুনমক ঐখোয়গী মাংদা লৈরিবা মীশক অদুনসু ঐখোয়বু খঙবা হৌরকই। নারায়ন গুরুজীনসু মতম চুপ্পদা মসি ঙাক্না চৎখি। মহাক্না অতোপ্পা মীওইশিংগী ৱাখল্লোন অদু খঙখি অমদি মহাক্কী ৱাখল্লোন অদু খঙহনখি। অচুম্বা মরমগা লোয়ননা ইশাবু ফগৎচহন্নবা মাইকৈদা চংশিন্না খুন্নাই অসিনা শীজিন্নবা য়াবা অদুগুম্বা মখলগী ফীভম অমা খুন্নাই অসিদা শেম্নবা হোৎনখি।

খুন্নাইদা অহোংবা পুরক্নবা লম্বী অসিদা ঐখোয়না চৎলবা মতমদা খুন্নাই অসিদা ইশাবু ফগৎচহন্নবা শক্তি অমা লাক্কনি। খুদম ওইনা, বেতি বচাও, বেতি পরাও হায়বা কেম্পেন অসি ঐখোয়গী সরকারনা হৌদোকখিবা কেম্পেননু। মমাংদা লোশিং লৈরমখি অদুবু চহি খরা অসিদা খক্তা ইচানুপীশিংনা লাইরিক তম্বগী মশিংদা হেনগৎলকপা ঙমহনখি। মসি সরকারনা অফবা ফীভম অমা শেমগৎপা ঙমখিবনা ফীভমশিংবু খোঙজেল য়াংনা ফগৎলকপা ঙমহনখিবনি। মীয়াম্না সরকারনা তৌরিবা থবক অসি অফবা খঙলবা মতমদা ফীভম অদু লেপ্পা লৈতনা ফগৎলকপা হৌরকই। ‘সবকা প্রয়াস’কী ফলশিং অদু তশেংনা ময়েক শেংনা উবা ফংলে। মসি খুন্নাই চাউখৎহন্নবা অমত্তা ঙাইরবা লম্বীনি। অমসুং শ্রী নারায়ন গুরুগী মরমদা ঐখোয়না হেন্না পাবা, তমশিনবা অমসুং খঙবা মতমদা, মদুগী লম্বেল অদু হেন্না ময়েক শেংলকই।

মরুপশিং,

শ্রী নারায়ন গুরুনা ঐখোয়দা মন্ত্র পীবীরমখি

“ওরু জাথি

ওরু মথম

ওরু দেব মনুস্যানু”।

মহাক্না ৱান কাস্ত, ৱান রিলিজন অমসুং ৱান গোদ হায়না ফোঙদোক্লম্মি। করিগুম্বা ঐখোয়না নারায়ন গুরুজী মসিগী ৱাফম অমসুং মসিগী নুংদা য়াওরিবা পাউজেল অসি মুন্না খঙবা তারবদি মসিগী পাউজেল অসিনা আত্মনির্ভর ভারত অমা ওইনবগী লম্বী য়াৎকনি। ভারত মচা অমা ওইনা ঐখোয় পুম্নমক জাতি অমত্তনি হায়বদি ভারতীয়তা। ঐখোয় পুম্নমক্না ধর্ম অমা খক্তা চৎলি – সেবধর্ম, ঐখোয়গী থৌদাংশিং পাঙথোকপা। ঐখোয় পুম্নমক্কী ঈশ্বর অমা খক্তা লৈ – ভারত ইমাগী করোর ১৩০ হেনবা শুরোলশিং লৈ। শ্রী নারায়ন গুরুজীগী ৱান কাস্ত, ৱান রিলিজন, ৱান গোদ হায়বা ৱাখল্লোন অসিনা ঐখোয়গী লৈবাকনীংবগী ৱাখল্লোন্দা স্পিরিচুএলগী ওইবা মপাঙ্গল হাপ্লি। ঐখোয়গী লৈবাক নীংবা অসি শক্তি উৎথোকপা নত্তে অদুবু মসিনা ইমা ভারতিবু নীংজনি অমসুং লৈবাকমচা অমগী থৌদাং পাঙথোকপনি। করিগুম্বা ঐখোয়না মসি খঙলগা মাংদা চংশিনবা তারবদি অমসুং শ্রী নারায়ন গুরুজীনা পীবিরম্বা পাউজেল অসি ঙাক্না চৎলদি ভারতমচাশিংগী মরক্তা মালেমগী শক্তি অমত্তনা খেন্নবা পুরকপা ঙম্লোই। অমসুং অপুনবা ভারতকীদমক মালেমদা লৈরিবা পান্দম অমত্তা ফংদবা তৌরোই হায়বা ঐখোয়না খঙই

মরুপশিং,

শ্রী নরায়ন গুরুনা নীংতমদ্রিঙৈগী মমাংদা তীর্থদানমগী চৎনবী অসি হৌদোক্লম্মি। মতম অসিদা লৈবাক অসিনসু নীংখা তম্বগী চহি ৭৫শুবগী অমৃত মহোতসব পাংথোক্লি। অসিগুম্বা মতম অসিদা    ঐখোয়না ঐখোয়গী নীংতম ইহৌ অদু য়ানিংদবা উৎপা অমসুং রাজনিতীগী ওইবা লালোংশিং খক্তদা লোইদে হায়বসি নীংশিংগদবনি। ঐখোয়না মীনাই-নাইথাংগী য়োৎলিং অসি থদৎনবা লান্থেংনখি, অদুবু মসিগা লোয়ননা নীংতম্লবা লৈবাক অমা করম্না ওইগনি, হায়বগী ৱাখল্লোন অসিসু য়াওখি। মরমদি, ঐখোয়না কনাগী মায়োক্তা লান্থেংনরি হায়বা অসি খক্তা মরু ওইবা নত্তে। ঐখোয়না করম্বা ৱাখল্লোনগী, করম্বা অচুম্বগীদমক পুন্না লেপ্লিবনো হায়বা অসিসু য়াম্না মরু ওইখি। মরম অসিনা ঐখোয়গী নীংতম লানদগী অচৌবা ৱাখল্লোন কয়াগী চৎনবী অসি হৌদোকখ্রিবনি। তাঙ্কক খুদিংদা অনৌবা থিঙ্করশিং থোরকই। ভারতকী ৱাখল্লোন অমসুং মঙলান কয়া থোরকখি। লৈবাক অসিগী তোঙান-তোঙানবা শরুকশিংদগী লুচিংবা অমসুং অথোইবা মীওই কয়া থোরক্তুনা মখোয়না অমগা অমগা উনখি অমদি অমনা অমদগী তমশিনবা য়াবা তমশিনখি।

ঙসিগী তেক্নোলোজীগী চহিচা অসিদা ঐখোয়না পুম্নমক অসি য়াম্না লায়না লৌরম্বা য়াই। অদুবু মতম অদুদসি সোসিএল মেদিয়া অমসুং মোবাইল ফোনশিংগী খুদোংচাবশিং অমত্তা লৈরমখিদে লুচিংবশিং অসিনা পুনশিন্দুনা ৱা খন্নখি অমসুং অনৌবা ভারত অমা শেমগৎখি। অদোম্না লৈবাক অসিগী নোংপোক থংবা শরুক্তগী গুরুদেব রবিন্দ্রনাথ তেগোরনা খাদা লাক্তুনা ১৯২২দা নারায়ন গুরুগা উনখি। নারায়ন গুরুগা উনরবা মতুংদা গুরুদেবনা হায়খি – “ঙসি ফাওবদা ঐহাক্না নারায়ন গুরু গুম্বা অথোইবা স্পিরিচুএল পর্সনেলিতী উখিদ্রি”। ১৯২৫দা মহাত্মা গান্ধীনা লৈবাক অসিগী নোংচুপ থংবা শরুক, গুজরাত্তগী সবরমতি তোর্বান্দগী মফম অসিদা লাকখি অমসুং শ্রী নারায়ন গুরুগা উনখি। মহাক্কা লোয়ননা খন্ন-নৈনখিবা অদুনা গান্ধীবু চাউনা ইথিল পীখি। স্বামি বিবেকানন্দ মশামক লাক্তুনা নারায়ন গুরুগা উনখি। নারায়ন গুরুগী মনাক্তা মশক নাইবা মীওই কয়া লাকখি অমসুং মহাক্কা লোয়ননা ৱা তান্নখি। ব্রেনস্তোর্মিং সেসন কয়া পাঙথোকখি। মসিগী ৱাখল্লোনশিং অসি মীনাই-নাইথাং ওইরুবা চহি চামাগী মতুংদা ওইরকপা লৈবাক অমা ওইনা ভারতপু শেমগৎনবগী মরুশিং ওইখি। সোসিএল, পোলিতিকেল অমসুং স্পিরিচুএলগী মীওই কয়া পুনশিনখি, লৈবাক অসিদা এৱের্নেস শন্দোকখি, লৈবাক অসিবু ইথিল পীখি অমসুং লৈবাক অসিগী মাইকৈ তাক্নবা থবক তৌখি। ঙসি ঐখোয়না উরিবা ভারত, নীংতম্বগী চহি ৭৫ অসুদা ঐখোয়না উরিবা খোঙচৎ অসি অসিগুম্বা অথোইবা মীওইশিং অসিগী ৱাখলশিং ব্রেন্দস্তোর্মিং তৌবদগী ফংখিবা মহৈনি।

মরুপশিং,

ঙসি ভারতনা মাগী নীংতম্বগী মতমদা ঐখোয়গী লৌশিং লৈবা মীওইশিংনা তাকপীরম্বা লম্বেল অদুগী মতুং ইন্না পান্দমশিং অদু ফংনবা মাইকৈদা নকশিল্লক্লি। হৌজিক ঐখোয়না অনৌবা পান্দমশিং থম্বা অমসুং অনৌবা ফিরেপশিং লৌবা তাই। ঙসিদগী চহি ২৫গী মতুংদা লৈবাক অসিনা মাগী নীংতম্বগী চহি ১০০ শুবগী থৌরম পালন তৌরগনি, অমসুং মদুগী চহি তরাগী মতুংদা ঐখোয়না তীর্থদানমগী খোঙচৎ চহি ১০০ শুবগী পালন তৌগনি। মসিগী চহি চামাগী খোঙচৎ অসিদা ঐখোয়না মাইপাক্লকপা অদু গ্লোবেল ওইহনগদবনি অমসুং মসিগীদমক ঐখোয়গী বিজন অদুসু গ্লোবেল ওইহনবা তাই।

ইচিল-ইনাওশিং.

ঙসিগী মালেম অসিনা মান্নবা শীংনবা অমসুং অৱাবা কয়া মায়োক্নরি। ঐখোয়না কোরোনা লাইচৎ মনুংদা মসি ঐখোয়না উবা ফংখ্রে। ভারতকী এক্সপরিয়েন্সশিং অমসুং ভারতকী কলচরেল পোতেন্সিএলগী খুত্থাংদা মীওইবা খুন্নাইগী মাংদা লৈরিবা তুংলমচৎকী ৱাহংশিংগী পাউখুমশিং ফংগনি। মসিদা ঐখোয়গী স্পিরিচুএল গুরুশিংগী অচৌবা চৎনবী অসিনা য়াম্না চাউবা থৌদাং অমা লৌরি। ঐখোয়গী অনৌবা মীরোনশিংনা ইন্তেলেকচুএল দিসকোর্সশিং অমসুং সিবগীরি তীর্থয়াত্রাদগী তমশিনবা য়াবা কয়া ফংগনি। সিবগীরি তীর্থয়াত্রাগী খোঙচৎ অসি অসুম্না মখা চত্থগনি হায়না ঐহাক্না থাজৈ। মসিগী তীর্থয়াত্রাশিং অসি চাউখৎপা, অমত্তা ওইবা অমসুং দাইনামিজমগী খুদমশিংনি, মসিনা ভারতপু মাগী পন্থুংফমশিংদা য়ৌহন্নবা শক্তি অমা চেল্লি। মসিগী ৱাখল্লোন অসিগা লোয়ননা নখোয়না মফম অসিদা লাকপীবগীদমক ঐহাক্না তৌবীমল খঙবা উৎচরি। নখোয়গী মঙলানশিং অমসুং ফিরেপশিংগা লোয়ননা মরী থম্বা ফংজবা অসি ঐহাক্কী ওইনা লাইবক ফবনি। ময়ামবু তরাম্না ওকচরি, অমুক্ক হন্না থাগৎচরি।

*****