“ঐখোয় পুন্না মেলরিয়া থেংনমিন্নবদা অমদি লৈবাকসিদগী ২০৩০ ফাওবদা মেলরিয়া মুত্থৎনবা পান্দম ফংনবা হোৎনবদা লাইওং খঙদোকপা অমদি লায়েংবখক নত্তনা ঐখোয় ইশা, অকোয়বগী ফীভম লু-নান্না থমবা অমদি মেলরিয়া লাকশিনবা অমদি ঙাকথোকপগী মতাঙদা মীয়াম পুন্না খঙমিন্নবসু চপ মান্ননা মরু ওই‍।” ৱাফম অসি ঙসি মফমসিদা পাঙথোকপা ৱর্ল্দ মেলরিয়া দে ২০২২ থৌরমদা হকশেল অমসুং য়াইফ-য়ুম্বালগী কেন্দ্র মন্ত্রী দোক্তর মনসুখ মন্দাবিয়ানা ফোঙদোকখিবনি‍। “হেল্থকয়ের দেলিভরী সিস্তেম ইচঙ থৌনা মপাঙ্গল কনখৎহনবা অমদি তোঙান তোঙানবা সেক্তরশিংদা তেংবাংনবা অমদি খুৎশম্নবা হেনগৎহনবদা অহেনবা মীৎয়েঙ চঙবা মথৌ তাই”, হায়না মহাক্না ফোঙদোকখি‍।

চহি খুদিংগী এপ্রিল ২৫বু ‘ৱর্ল্দ মেলরিয়া দে’ হায়না পাঙথোকই‍। চহি অসিগী থীমদি “মালেমগী মেলরিয়া লায়নাগী পোৎলম হন্থহন্নবা অমদি পুন্সি কন্নবা ইনোভেসন শীজিন্নবা’ হায়বসিনি‍।

দোক্তর মন্দাবিয়ানা মেলরিয়া মুত্থৎনবগীদমক নেস্নেল অমসুং সপ-নেস্নেল থাক্তা হোৎনদুনা অহেনবা মীৎয়েঙ চঙলসি হায়বা ৱাফম থমখি‍। তেক্নোলোজী অমসুং ইনোভেসন শীজিন্নবনা মেলরিয়া মুত্থৎনবা অমসুং হকশেল ফগৎহন্নবা, পুন্সি মহিং ফগৎহন্নবা অমদি লায়রবা কোকহন্নবা ভারতকী থৌরাং খুমাঙ চাওশিলহন্নবা মতিং লৈবা পাম্বৈ পুথোকপদা মতেং ওইগনি হায়বা ৱাফম মহাক্না থমখি‍। লাইও খঙদোকপা, মতম চানা মতিং লৈবা লায়েং পীবা অমদি তিন কাঙ লাকশিনবগী মতাঙদা পাক শন্না খঙহন্নবগীদমক অশা, এ.এন.এম. য়াওনা লৈমায়দা কুমদুনা থবক তৌরিবা ফ্রন্তলাইন হেল্থকয়ের ৱর্করশিংগা খোঙবু ওইরিবা লুপশিংগা চাং মান্ননা থবক তৌমিন্নবা মথৌ তাই হায়না মহাক্না মখা তাখি‍। লনাই প্রাক্তিস্নরশিং য়াওনা লনাই সেক্তরনা মখোয়গী মেলরিয়া কেস লায়েংবা অমদি রিপোর্তিংগী থৌওং অমসুং মরী লৈনবা থবক থৌরমশিং লৈবাক্কী লৈরিবা প্রোগ্রামগা চুননা পায়খৎনবা ৱাফমসু মহাক্না হৌদোকখি‍। “ঐখোয়না ইনোভেতিব ওইবা তেক্নোলোজী শীজিন্নদুনা মাঙদা চঙশিনবগা লোয়ননা, ভারতকী “ই-সঞ্জিবনি”না মেলরিয়া য়াওনা তোঙান তোঙানবা হেল্থকয়েরগী প্রোব্লেমশিংগী লাইওং খঙদোকপা অমদি লায়েংবদা পাক শন্না শীজিন্নরিবা তেলি-কন্সল্তেসন অমসুং তেলি-রিফরেন্সিংগী লম্বী তাক্লি:, হায়না মহাক্না ফোঙদোকখি‍।

কেন্দ্রগী হকশেল মন্ত্রীনা মেলরিয়া মুত্থৎপদা ফংবা ঙম্লিবা মায় পাকপগী মতাঙদসু মচা খায়না পাউদমখি‍। “ভারতনা মেলরিয়ানা নাবা অমদি শিবগী মশিং হন্থহনবদা শিংথানিংঙাই ওইনা খুমাঙ চাওশিল্লে‍। ঐখোয়গী থৌরাংনা মরম ওইরগা ২০১৫গা চাংদম্নবদা ২০২১দা মেলরিয়া নাবা মীশিং ৮৬.৪৫% অমসুং মেলরিয়াগা মরী লৈননা শিবা মশিং ৭৯.১৬% হন্থহল্লে‍। লৈবাকসিগী দিস্ত্রিক্ত ১২৪দা ‘জিরো মেলরিয়া কেস’ রিপোর্ত তৌরক্লে‍।” মসি ঐখোয়গী মেলরিয়া মুত্থৎনবগী পান্দমগী মায়কৈদা অচৌবা খোঙথাঙ অমনি, অদুবু মেলরিয়া লৈতবা ভারতকী মঙলান মঙফাওনহন্নবগীদমক তৌগদবা কয়ামরুমদি ৱাৎলি, হায়না দোক্তর মন্দাবিয়ানা হায়খি‍।

কেন্দ্রগী হকশেল অমসুং য়াইফ-য়ুম্বালগী রাজ্য মন্ত্রী দোক্তর ভারতি প্রবিন পৱারনা ফোঙদোকখিবদা, “২০৩০ ফাওবদা মেলরিয়া মুত্থৎনবা থবক মিসন মোদতা পায়খৎলি‍। ইনফ্রাস্ত্রকচর ফগৎহনবা অমসুং লেবোরেতরীগী ঙাক্লৌ য়াওনা মেলরিয়াগী পোৎলুম হন্থহন্নবা থৌরাংশিংগীদমক কেন্দ্র লৈঙাক্না স্তেত লৈঙাকশিংগা পুন্না গ্রাউন্দ লেভেলদা থবক তৌমিন্নরি‍।” তেস্তিং অমসুং লায়েংবগী লমদা অহেনবা খোঙথাঙ লৌখৎলবদি ভারতনা ২০৩০ ফাওবদা মেলরিয়া মুত্থৎনবা মঙলিবা মঙলান অসি মঙফাওনবা ঙমগনি হায়বা ৱাফমসু মহাক্না ফোঙদোকখি‍।

মীয়ামদা পাক শন্না ৱাখল তাবা হেনগৎহন্নবগীদমক, নই দিল্লী, লখনৌ, ভুবনেস্বর অমসুং নাগপুরগী রেলৱে স্তেসনশিং ৱর্ল্দ মেলরিয়া দে ২০২২ পাঙথোকপা ওইনা কোম্লা অমসুং পর্পল মচুগী মৈঙালনা ঙালহনগনি‍।

থৌরমদুদা ইন্তিগ্রেতেদ ভেক্তর মেনেজমেন্ত ২০২২গী খুৎপায় অমসু ফোঙখি‍। থৌরমদুদা শরুক য়াখিবশিংনা সস্তেনেবল দেভেলপমেন্ত গোল ফংনবগী পান্দমগা মপা চাননা ২০৩০ ফাওবদা মেলরিয়া মুত্থৎনবা চপ চাবা লীচৎ অমসুং থৌওংশিং ইন্দুনা চৎনবা ৱাশকখি‍। মেলরিয়া মুত্থৎনবগীদমক শিংথানিংঙাই ওইবা মওংদা থবক পায়খৎলিবা স্তেতশিংসু থৌরমদুদা ওকখি‍।

শ্রী রাজেস ভুসন, কেন্দ্রগী হকশেল সেক্রেতরী; শ্রী বিকাস সীল, এ.এস. এন্দ এম.দি. (এন.ঐচ.এম.); দোক্তর হর্মীত সিংহ গ্রেৱাল, জে.এস. (এম.ও.ঐচ.এফ.দব্লিউ.); দোক্তর অতুল গোয়ল, দিরেক্তর জেনেরেল ওফ হেল্থ সর্ভিসেস; দোক্তর সুজীৎ সিংহ, দিরেক্তর, এন.সি.দি.সি.; দোক্তর তনু জেন, দিরেক্তর, এন.সি.ভি.বি.দি.সি.; অমসুং মকোক থোংবা ওফিসিএলশিংসু থৌরমদুদা শরুক য়াখি‍। দোক্তর রোদরিক ওফ্রিন, দব্লিউ.ঐচ.ও.গী ভারত্তা লৈবা মীহুৎসু শরুক য়াখি‍।

****