প্রধান মন্ত্রী, শ্রী নরেন্দ্র মোদীগী মিৎয়েং শানবা লুচিং মখাদা কেন্দ্র সরকারনা লেপ্তনা পায়খৎপা থবক থৌরমগী মনুং চন্না অৱাং নোংপোক রাজ্যশিংদা অসিগুম্বা খোঙথাং কয়া পায়খৎখি অমসুং মসিনা মরম ওইরগা সেক্যুরিতীগী ফিভমদা অচৌবা অহোংবা পুরকখি অমসুং চাউখৎ-থৌরাংগী খোঙজেল য়াঙখৎহনখি। ইং ২০১৪গা চাংদম্নবা মতমদা, ইং ২০২১দা লালহৌবগী ইরাংদা চাদা ৭৪গী চাংদা হন্থখি। মান্নবা ওইনা, সেক্যুরিতী মীওই অমসুং মীচম শিবগী চাংদা ৬০% অমসুং ৮৪% মথংশিৎনা হন্থখি।

প্রধান মন্ত্রী, শ্রী নরেন্দ্র মোদীগী মিৎয়েং শানবা লুচিং মখাদা ভারত সরকারনা পায়খৎপা মশক থোকপা খোঙথাং অমসুং অৱাং নোংপোক্কী সেক্যুরিতীগী ফিভমদা মশক থোক্না ফগৎলকপদগী দিকেদ কয়াগী মতুংদা নাগালেন্দ, অসম অমসুং মনিপুরগী আর্ম্দ ফোর্স স্পিসিএল পাৱর্স এক্ত (এ.এফ.এস.পি.এ.)গী মখাদা ইরাং লৈবা মফমশিং হন্থহনবগী শীংথান্নীংঙাই ওইরবা থৌওং পাংথোকখ্রে।

প্রধান মন্ত্রী, শ্রী নরেন্দ্র মোদীগী শান্তি লৈবা অৱাং নোংপোক্কী লমদম অমা হায়বা মঙলানবু মঙফাওনহন্নবগীদমক্তা, কেন্দ্রগী গৃহ মন্ত্রী, শ্রী অমিৎ শাহনা অৱাং নোংপোক রাজ্যশিংগা চাং নাইনা ৱারী শাদুনা লাকখি। মসিনা মরম ওইদুনা, লালহৌবা কাঙলুপ কয়া অমনা খুৎলায় থাদোক্তুনা ভারতকী সংবিধান অমসুং মোদী সরকারদা থাজবা থম্মি হায়না ফোংদোকখি। ঙসিদি, হায়রিবা মীওইশিং অসি গনতন্ত্রগী থৌওং কয়াগী শরুক অমা ওইরে অমসুং লমদমসিগী শান্তি অমসুং চাউখৎ-থৌরাংগী থবকশিংদা শরুক য়ারি। মমাংগী চহি ৭কী মনুংদা, চাউরাকপা লালহৌবা ৭০০০না খুৎলায় থাদোকখি।

প্রধান মন্ত্রী, শ্রী নরেন্দ্র মোদীগী শান্তি লৈবা অৱাং নোংপোক্কী লমদম অমা হায়বা মঙলানবু মঙফাওনহন্নবগীদমক্তা ভারত সরকারনা হৌখিবা চহি অহুম অসিদা অৱাং নোংপোক রাজ্যশিংদা লালহৌবগী ইরাং লোইশিন্নবা অমসুং শান্তি পুরক্নবা য়ানচে কয়াগী খুৎয়েক পীনখি। খুদম ওইনা হায়রবদা, জনুৱারী ২০২০গী বোরো এক্কোর্দনা দিকেদ মঙা চত্থরকপা অসমগী বোরোগী শিংনবা লোইশিনখি; সেপ্তেম্বর ৪, ২০২১গী কার্বী-আংলোং এগ্রীমেন্তনা অসমগী কার্বী লমগী মতাংদা মতম কুইনদগী লৈরক্লবা চয়েৎনবা লোইশিনখি। মান্নবা ওইনা, ত্রিপুরাগী লালহৌবশিংবু মীয়ামগী পুন্সিদা পুরক্নবগীদমক্তা ওগস্ত ২০১৯দা এন.এল.এফ.তি. (এস.দি.) য়ানচেগী খুৎয়েক পীনখি, মসিগী মতুংদা, চহি ২৩ শুরবা ব্রু-রিয়াং রেফ্যুজী ইরাং লোইশিন্নবগীদমক্তা পুৱারী ওইরবা য়ানচে অমা জনুৱারী ১৬, ২০২০দা খুৎয়েক পীনখি। অমসুং মসিগী মখাদা ময়ুম-মকৈ ঙাওচৎনরগা লৈবা মীওই ৩৭০০০বু ত্রিপুরাদা নীংথিনা খুন্দা লৈতাহনখি। ইং ২০২২গী মার্চ ২৯দা অসম অমসুং মেঘালয়গী ঙমখৈগা মরী লৈনবা অতোপ্পা মরু ওইবা য়ানচে অমগীসু খুৎয়েক পীনখি।

প্রধান মন্ত্রী, শ্রী নরেন্দ্র মোদীনা অৱাং নোংপোক্কী অপুনবা মফমবু লালহৌবগী ইরাংদগী মনীং তমহন্নবা খোঙফম চেৎলি। হীরম অসিগা মরী লৈননা, কেন্দ্র সরকারনা রাজ্য সরকার অমসুং অতোপ্পা স্তেকহোলদরশিংগা মতমগী মতুং ইন্না চাং নাইনা ৱারী শারি। শ্রী নরেন্দ্র মোদীনা লুচিংবা সরকারগী মখাদা সেক্যুরিতীগী ফিভমদা মশক থোক্না ফগৎলকপনা মরম ওইরগা, এ.এফ.এস.পি.এ.গী মখাদা লৈরম্বা দিস্তর্ব এরিয়া নোতিফিকেসনবু ত্রিপুরাদগী ইং ২০১৫ অমসুং মেঘালয়দগী ইং ২০১৮দা মপুং ফানা লৌথোকখি।

দিস্তর্ব এরিয়া নোতিফিকেসন অসি অসমদা ইং ১৯৯০দগী হৌদুনা মপুং ফানা লৈরি। শ্রী নরেন্দ্র মোদীনা ইং ২০১৪দা প্রধান মন্ত্রী ওইরবা মতুংদা লমদমসিগী ফিভমদা চাউনা ফগৎলকপদগী, এ.এফ.এস.পি.এ. অসি হৌজিক্তি অসমগী জিলা ২৩দা মপুং ফানা অমসুং জিলা অমদা শরুক খরা ১/৪/২০২২দগী লৌথোক্লগনি।

দিস্তর্ব এরিয়া নোতিফিকেসন অসি মনিপুরগী ওইনদি ইং ২০০৪দগী হৌনা মপুং ওইনা লৈরি (ইম্ফাল ম্যুনিসিপালগী মফমদা লৈতবা নত্তনা)। শ্রী নরেন্দ্র মোদীগী মখাদা পায়খৎপা মরু ওইবা খোঙথাং অমা ওইনা, ১/৪/২০২২দগী হৌদুনা দিস্তর্ব এরিয়া নোতিফিকেসন অসি মনিপুরগী জিলা ৬কী পুলসি স্তেসন ১৫দগী লৌথোক্লগনি।

অরুনাচল প্রদেশকী অসমগী ঙমখৈগা তাইনবা কিলোমীতর ২০গী পরিংদা লৈবা জিলা ৩ অমসুং রাজ্য অসিগী অতোপ্পা জিলা ৯গী পুলিস স্তেসন ১৫তা ইং ২০১৫দগী হৌনা এ.এফ.এস.পি.এ. অসি চৎনদুনা লাকখিবনি। মসিবু তপ্না হন্থরকখি অমসুং দিস্তর্ব এরিয়া নোতিফিকেসন অসি হৌজিক্তি জিলা ৩ অমসুং অতোপ্পা জিলা ১গী পুলিস স্তেসন ২ খক্তা চৎনরে।

দিস্তর্ব এরিয়া নোতিফিকেসন অসি নাগালেন্দগী ওইনা ইং ১৯৯৫দগী মপুং ফানা চৎনদুনা লাকখিবনি। রাজ্য অসিদগী এ.এফ.এস.পি.এ.বু তাঙ্কক নাইবা মওংদা লৌথোকপগী ৱাফম অমা হীরম অসিগা মরী লৈননা শেমখিবা কম্মিতীনা হায়জববু কেন্দ্র সরকারনা অয়াবা পীরে। দিস্তর্ব এরিয়া নোতিফিকেসন অসি ১/৪/২০২২দগী হৌনা জিলা ৭কী পুলিস স্তেসন ১৫দগী লৌথোক্লগনি।

গৃহ মন্ত্রী, শ্রী অমিৎ শাহনা মোদীনা খোঙফম চেৎপনা মরম ওইরগা ঐখোয়গী অৱাং নোংপোক্কী লমদম, দিকেদ কয়াদগী মিৎয়েং চঙবীদনা লাকখিবা, অসিদা হৌজিক্তি তংদু লৈতাবা অমসুং চাউখৎ-থৌরাংগী অনৌবা য়ুগ অমা উবা ফংলি হায়না ফোংদোকখ্রে।

মসিগুম্বা মশক থোকপা মিৎকুপ অসিদা ঐহাক্না অৱাং নোংপোক্কী মীয়াম্বু থাগৎচরি

***