এজুকেসনগী কেন্দ্রগী মন্ত্রী শ্রী ধর্মেন্দ্র প্রধান্না ঙসি প্রধান মন্ত্রী, শ্রী নরেন্দ্র মোদীনা মালেম শিনবা থুংবদগী মহৈরোয়শিং, ওজাশিং অমসুং মমা-মপাশিংগা লোয়ননা এপ্রিল ১, ২০২২দা পাঙথোক্কদবা পরিক্ষা পে চর্চাগী ৫শুবা ইদিসন্দা ৱারী-ৱাতায় শাগনি হায়না ফোঙদোকখ্রে। পরিক্ষা পে চর্চা অসি প্রধান মন্ত্তৌনা লাইব প্রোগ্রাম অমদা মহাক্কী তোপ-তোপ্পা এঙ্গেজিং স্তাইলদা মহৈরোয়শিংনা এগজামিনেসনগী ৱাখল ৱাবা অমসুং মরী লৈনবা হীরমশিংগী মতাংদা হংলকপা ৱাহংশিংদা পাউখুম পীবগী খৌরাংনা ঙাইনরিবা চহিগী ওইবা থৌরম অমনি, হায়না মহাক্না মখা তাখি।

পরিক্ষা পে চর্চা অসিবু মীয়ামগী ইহৌ অমা ওইনা লৌরদুনা, মন্ত্রী প্রধান্না লৈবাক অসিনা কোবিদ-১৯ লাইচৎতগী ফগৎলকপা ঙম্বা অমসুং এগজামশিং ওফলাইন মোদতা অমুক ওন্থোরকপা অসিগী মতাংদা চহি অসিগী পি.পি.সি.গী মরু ওইবা অদু থমখি। ২১শুবা চহিচাগী লৌশিংদা য়ুম্ফম ওইবা শেন্মীৎলোন শেমগৎপদা পি.পি.সি.গুম্বা থৌরাংগী মরু ওইবা অদু থম্লদুনা, মহাক্না হায়খি মদুদি পি.পি.সি. অসি প্রধান মন্ত্রূনা মহৈরোয়শিংগা হকথেংননা ৱারী-ৱাতায় শানবা ফোর্মেল ইন্সতিত্যুসন অমা ওইরক্লি। লৈবাক শিনবা থুংবদগী খনগৎলবা মহৈরোয়শিংনা রাজ্যগী রাজ্যপালশিংগা য়াওদুনা থৌরম অসি য়েংনবগীদমক রাজ ভবনশিংদা চৎকনি হায়না মহাক্না ফোঙদোকখি। লৈবাক শিনবা থুংনা লৈরিবা রাজ্য সরকারশিংনা মহৈরোয়শিং, ওজাশিং অমসুং মমা-মপাশিংবু মসিদা শরুক য়ানবা পুক্নিং থৌগৎকনি হায়না মহাক্না থাজবসু ফোঙদোকখি। পি.পি.সি. অসি ভারত খক্তদা নত্তনা অতোপ্পা লৈবাকশিংদা স্ত্রীম তৌদুনা ইন্দিয়ন দাইস্পোরাদা য়ৌহনগনি হায়না মহাক্না ফোঙদোকখি। মহাক্না প্রোগ্রাম অসিবু মীয়ামগী ইহৌ অমা ওইহন্নবা অমসুং মহৈরোয়শিংগীদমক এগজামশিংদা ৱাখল ৱাবা কোকহন্নবা মেদিয়ানা মতেং পীবীনবসু হায়খি।

শ্রী প্রধান্না পরিক্ষা পে চর্চা অসি নহারোলশিংগীদমক স্ত্রেস-ফ্রী ওইবা ফীভম অমা শেমগৎনবা প্রধান মন্ত্রী নরেন্দ্র মোদীনা লুচিংবা – ‘এগজাম ৱারিয়র্স’ – হেন্না চাউবা ইহৌ অমগী শরুক অমনি হায়না ফোঙদোকখি। মসি অঙাং অমমমদা চেল্লিবা অখন্নবা মগুন অদু খঙবীনবা, পুক্নিং থৌগৎনবা অমসুং মদু মশানা মপুং ফানা ফোঙদোকচবা ঙমজনবা ফীভম অমা শেমগৎনবা মহৈরোয়শিং, মমা-মপাশিং, ওজাশিং অমসুং খুন্নাই অসি অমত্তা ওইনা পুনশিন্নবা প্রধান মন্ত্রী নরেন্দ্র মোদীগী খোঙথাংশিং অসিনা লমজিংবা ইহৌ অমনি।

মন্ত্রীনা ৫শুবা ইদিসন অসি অয়ুক পুং ১১ তাবা মতমদা তালকতোরা স্তেদিয়মদগী তাউন-হোল ইন্তরেক্তিব ফোর্মেৎ অমদা নই দিল্লীদা পাঙথোক্কনি। ভারত অমসুং মপালদগী মহৈরোয়, ওজা, অমদি মমা-মপা করোর কয়না শরুক য়াগনি হায়না মহাক্না মখা তাখি।

শ্রী প্রধান্না প্রধান মন্ত্রীদা ৱাহংশিং হংগদবা মহৈরোয়শিং, ওজাশিং অমসুং মমা-মপাশিং অদু থীম কয়াদা পাঙথোকখিবা ওনলাইন ক্রিএতিব রাইতিং কম্পিতিসন অমদা য়ুম্ফম ওইরগা শোর্ত-লিস্ত তৌখি হায়না ফোঙদোকখি। কম্পিতিসন অসি মাইগোব প্লেৎফোর্মদা ২০২১গী দিসেম্বর ২৮দগী ২০২২গী ফেব্রুৱারী ৩ ফাওবা পাঙথোকখি। মন্ত্রীনা ক্রিএতিব রাইতিং কম্পিতিসনগীদমক চহি অসিদা মীওই লাখ ১৫.৭না রেজিস্তর তৌরকপদা অপেনবা ফোঙদোকখি।

মাইগোবকী খুত্থাংদা কম্পিতিসনশিং অসিদা খনখিবা পার্তিসিপেন্তশিংদা সর্তিফিকেৎ ওফ এপ্রিসিএসন অমা অমসুং প্রধান মন্ত্রীনা ইবা এগজাম ৱারিয়র্স বুক য়াওবা অখন্নবা পরিক্ষা পে চর্চা কিৎ অমা খুদোল তমগনি।

থৌরম অসি হৌখিবা চহি মরি অসিদা এজুকেসন মন্ত্রালয়গী দিপার্তমেন্ত ওফ স্কুল এজুকেসন এন্দ লিতরেসীনা মাইপাক্না শিন্দুনা লাকখি। পি.পি.সি.গী ইদিসন অহুমদি নই দিল্লীদা তাউন-হোল ইন্তরেক্তিব ফোর্মেৎ অমদা পাঙথোকখি। প্রধান মন্ত্রীগী ৱারী-ৱাতায় শাবগী প্রোগ্রাম ‘পরিক্ষা পে চর্চা ১.০’ অসি ২০১৮গী ফেব্রুৱারী ১৬তা পাঙথোকখি। হায়রিবা ৱারী-ৱাতায় শাবগী ২শুবা ইদিসন অসি স্কুল অমসুং কোলেজ মহৈরোয়শিংগা লোয়ননা “পরিক্ষা পে চর্চা ২.০” অসি ২০১৯গী জনুৱারী ২৯দা পাঙথোকখি অমসুং ৩শুবা ইদিসন্না ২০২০গী জনুৱারী ২০দা পাঙথোকখি। কোবিদ১৯ লাইচৎনা মরম ওইদুনা মরিশুবা ইদিসন অসি ২০২১গী এপ্রিল ৭তা ওনলাইন ওইনা পাঙথোকখি।

থৌরম অসি দুরদর্শন (দি.দি. নেস্নেল, দি.দি. ন্যুজ, দি.দি. ইন্দিয়া), রেদিও চেনেলশিং, তি.ভি. চেনেলশিং, ইদুমিনওফইন্দিয়া, নরেন্দ্রমোদী, পি.এম.ও.ইন্দিয়া, পি.আই.বি.ইন্দিয়া, দুরদর্শন নেস্নেল মাইগোবইন্দিয়া, দি.দি. ন্যুজ, রাজ্যসভা রি.ভি., স্বায়ম প্রভা য়াওনা দিজিতেল মীদিয়াদা লাইব তেলিকাস্ত তৌগনি।

*****