প্রধান মন্ত্রী, শ্রী নরেন্দ্র মোদী অমসুং ওস্ত্রলিয়াগী প্রধান মন্ত্রী, ইকায় খুম্ননীংঙাই ওইরবা স্কোত মোরিসন্না ২শুবা ভারত-ওস্ত্রেলিয়া ভর্চুএল সম্মিৎ ঙসি ফমখ্রে অমসুং মখোয়না মসিগী মনুংদা, লৈবাক অনিগী মরক্তা লৈনরিবা শক্তম য়াম্বা মরীবু হঙ্গৎনা য়েংশিনবগা লোয়ননা রিজনেল অমসুং মালেমগী চাউখৎ-থৌরাংগী মতাংদা মখোয়গী ৱাখল্লোন ফোংদোক্নখি।

খ্বাইদগী অহানবদা, প্রধান মন্ত্রী মোদীনা ক্বীন্সলেন্দ অমসুং ন্যু সাউথ ৱেল্সতা থোকখিবা শাথীরবা ঈশিং-ইচাউদগী মীওইগী পুন্সি মাঙবা অমসুং লন-থুমদা অমাঙ অতা থোকখিবদা নুংঙাইতবা ফোংদোকখি।

ইং ২০২০গী জুন্দা পাংথোকখিবা অহানবা ভর্চুএল সম্মিত্তা শেমখিবা কম্প্রিহেন্সিব স্ত্রেতজিক পার্ত্নরশিপকী মখাদা পুরকখিবা চাউখৎ-থৌরাংশিংদা লুচিংবা অনিনা নুংঙাইবা ফোংদোকখি। মরী অসিনা পাকথোক চাউথোরক্তুনা ত্রেদ অমসুং ইনভেস্তমেন্ত, দিফেন্স অমসুং সেক্যুরিতী, এজুকেসন অমসুং ইন্নোভেসন, সাইন্স অমসুং তেক্নোলোজী, ক্রিতিকেল মিনরেল, ঈশিং শেন্নবা, ন্যু অমসুং রিন্যুএবল ইনর্জী অমসুং কোবিদ-১৯গা মরী লৈনবা রিসর্চনচিংবা তোঙান-তোঙানবা হীরমশিং হৌজিক মনুং চল্লকপা অসিদা প্রধান মন্ত্রী মোদীনা নুংঙাইবা ফোংদোকখি।

প্রধান মন্ত্রী মোদীনা স্কোত মোরিসনবু মহাক্না ভারত্তা অরিবা পোৎলম ২৯বু হন্দোকপীরকপগী অখন্নবা থৌওং অমা পাংথোকপগীদমক্তা থাগৎপা ফোংদোকখি। মসিগী পোৎলমশিং অসিগী মনুংদা চহি-চা কয়াগী ওইগদবা অমসুং খরা অমদি ৯-১০শুবা চহি-চাগী ওইগদবা মীতম, অয়েকপা লাই অমসুং ফোতোনচিংবা ভারতকী তোঙানবা মফমদগী ওইগদবা কয়া য়াওরি। পোৎলমশিং অসিগী মনুংদা ১২শুবা চহি-চাগী চোলাগী পিথ্রাই, ১১-১২শুবা চহি-চাগী রাজস্থানগী জৈনগী মুর্তী, ১২-১৩শুবা চহি-চাগী গুজরাতকী লাইরেম্বী মহিসাসুরামার্দিনিগী সেন্দস্তোন, ১৮-১৯শুবা চহি-চাগী অয়েকপা লাই অমসুং অঙনবা মতমগী জেলাতিন সিলভর ফোতো য়াওরি।

প্রধান মন্ত্রী মোরিসন্না ভারতকী মহৈরোই য়াওনা ওস্ত্রেলিয়াদা লৈবা ভারতকী খুন্নাইগী মীশিংবুকোবিদ-১৯ লাইচৎ মনুংদা শেন্নবীবগীদমক্তা প্রধান মন্ত্রী মোদীনা থাগৎপা ফোংদোকখি।

লুচিংবা অনি অসিনা নিংতম্বা, পুম্নমক্তা থোঙ হাংবা অমসুং হীরম খুদিংমক মনুং চনবা ইন্দো-পেসিফিক য়াওনা ভেল্যু অমসুং অপাম্বা মান্নবা গনতন্ত্রা চৎপা লৈবাক অমা ওইনা লৈবাক অসিগী মরক্তা স্ত্রেতজিক ওইবা থৌওং হেনগৎলকপা অসিবু থাগৎখি।

মরা চেৎপা হেনগৎলক্লিবা কম্প্রিহেন্সিব স্ত্রেতজিক পার্ত্নরশিপকী তোঙানবা থৌওং কয়া কোনবা অপুনবা ৱারোল অমা পুথোকখি। নাকল অনিমক্না কম্প্রিহেন্সিব স্ত্রেতজিক পার্ত্নরশিপকী মখাদা চহিগী ওইবা সম্মিৎ পাংথোকপা য়ানখি, অমসুং মতৌ অসুম্না, লৈবাক অনিগী মরক্তা অনৌবা অমসুং অখন্নবা হীরম অমসু হাপচিনখি।

***