প্রধানমন্ত্রীগী লোইশঙ
জাপানগী প্রধান মন্ত্রীগী ভারত খোঙচৎকী মনুংদা প্রধান মন্ত্রী, শ্রী নরেন্দ্র মোদীনা থাদোকপা প্রেস স্তেৎমেন্তকী মনিপুরী ৱাহন্থোক
Posted On:
19 MAR 2022 10:55PM by PIB Imphal
ইকায় খুম্ননীংঙাই ওইরবা প্রধান মন্ত্রী কিশিদা
শক্নাইরবা মীথুংলেনশিং,
খুরমজরি!
প্রধান মন্ত্রী কিশিদাবু জাপানগী প্রধান মন্ত্রী অমা ওইনা মহাক্কী ভারতকী অহানবা খোঙচৎ অসিদা তরাম্না ওকপা ফংজবদা ঐহাক্না য়াম্না নুংঙাইবা ফাওই।
নুমিৎ খরনিগী মমাংদা থোকখিবা য়ুহা হাবগী থৌদোক্তা পুন্সি কয়া মাঙখিবা অমসুং লন-থুমদা অকায়-অতোয় নঙখিবগীদমক্তা ঐহাক্না ভারত পুম্বগী মহুৎ শিন্দুনা নুংঙাইতবা ফোংদোক্লি অমসুং অদোমগী অৱাবদা শরুক য়াজরি।
মরুপশিং,
প্রধান মন্ত্রী কিশিদানা মতম কুইনদগী ভারতকী মরুপ ওইদুনা লাক্লি। মহাক্না ফোরেন মিনিস্তর ওইরিঙৈদা ভারত্তা কয়ারক হন্না লাক্লম্লে অমসুং ঐহাক্না মহাক্কা ৱারী শাবগী খুদোংচাবা কয়াসু ফংজখি। ভারত-জাপান স্পিসিএল স্ত্রেতজিক অমসুং গ্লোবেল পার্ত্নরশিপ অসিদা হৌখিবা চহি খরসিদা হান্নগা মান্নদবা হেন্না চাউখৎপগী ফিভম অমা উবা ফংলিবা অসিদা প্রধান মন্ত্রী কিশিদাগী মরু ওইবা থৌদাং য়াওরি।
ঙসিগী সম্মিৎ অসিসু য়াম্না মরু ওইবা মতম অমদা শীন-লাঙলি। মালেম অসিনা কোবিদ-১৯ অমসুং মসিগী চৈথেংদগী মপুং ওইনা থোক্লকপা ঙমদ্রি।
মালেমগী শেন্মিৎলোন্না হান্নগুম্না ফগৎলকপগী থৌওংসু অদুমক অয়েৎপনা থল্লি।
জিও-পোলিতিকেল ওইবা থৌদোক কয়ানা অনৌবা শিংনবা কয়াসু পীরি।
ফিভম কয়া অসি য়েংলুরগদি, ভারত-জাপানগী মরীবু হান্নদগী হেন্না চেৎশিলহনবা হায়বসি লৈবাক অনিসিগী য়াম্না মরু ওইবা খোঙথাং অমা ওইবতা নত্তনা মসিনা ইন্দো-পেসিফিক অমসুং মালেম পুম্বগী থাক্তা তংদু-লৈতাবা, শান্তি অমসুং নুংঙাই য়াইফবগী মতৌবু হেন্না খুমাং চাউশিলহনগনি।
ঐখোয় মশেলগী মরক্তা থাজনবা লৈরিবা, সিভিলাইজেসনগী মরী, গনতন্ত্রা, নীংতম্বা অমসুং আইনগী কাংলোন্নচিংবা ঐখোয়গী মরক্তা লৈরিবা ভেল্যুশিংনা ঐখোয়গী মরীগী ফম্বাক ওইরি অমসুং পাঙ্গলসু হাপ্লি।
ঐখোয়না ঙসি শান্নখিবা ৱারী ৱাতাইশিংনা ঐখোয়না তেংবাংনরিবশিংবু অনৌবা থাক্তা পুখৎপগী লম্বী য়াৎখ্রে।
ঐখোয়গী লৈবাক অনিগী মরীগী মথক্তা রিজনেল অমসুং মালেমগী শিংনবা কয়াগী মতাংদসু ঐখোয়না ইশা-ইশাগী ৱাখল্লোন ফোংদোক্নখি।
ঐখোয়গী তেংবাংনবগী থৌওংবু য়ুনাইতেদ নেসন্স অমসুং মালেমগী অতোপ্পা ফম্বাকশিংদসু হেনগৎহন্নবা ঐখোয়না ৱারেপ লৌখি।
মরুপশিং,
ভারত-জাপান ইকোনোমিক পার্ত্নরশিপ্না মমাংগী চহি খরসিদা মমাংগী মতমদগী হেন্না য়াম্না চাউখৎপা পুরকখি। হৌজিক্তি। লৈবাক অনিমক্কী কারবারশিংদা হান্নদগী হেনবা থাজনবা অমসুং থৱাই য়াওবগী মতৌ লৈরে। জাপান্না ভারতকী খ্বাইদগী চাউবা ইনভেস্তর অমসুং মালেমগী থাক্তা লৈবা খোঙলোই অমা ওইরিবনি।
অসিগুম্বা তেংবাং অসিগীদমক্তা ঐখোয়না জাপানবু থাগৎচরি।
মুম্বাই-অহমেদবাদ হাই স্পীদ রেল প্রোজেক্তসু নীংথিজনা চত্থরি। লৈবাক অনিমক্না ‘ৱান তীম ৱান প্রোজেক্ত’কী ৱাখল্লোনগা লোয়ননা প্রোজেক্ত অসিদা থবক তৌমিন্নরি। মসিগী প্রোজেক্ত অসিদি ভারত-জাপান মরীগী মশক নাইবা খুদম অমনি।
ইং ২০১৪দা থমখিবা জাপানিজ য়েন ত্রিলিয়ন অহুমগা দশমিক মঙাগী ইনভেস্তমেন্তকী পান্দম্বু হেনখিবা অসিদা ঐহাক্না য়াম্না নুংঙাইবা ফাওই।
ঐখোয়গী অপাম্বশিংবু অনৌবা থাক্তা পুখৎনবা ৱারেপ লৌদুনা লাক্লিবা চহি মঙাসিদা ত্রিলিয়ন য়েন মঙা, হায়বদি চাউরাক্না লুপা করোর লাখ অহুমগা লিশিং কুনগী অনৌবা পান্দম অমসু থমখ্রে।
হৌখিবা চহি খরসিদা ভারতনা ইকোনোমিক রিফোর্ম কয়া পাক-শন্না পাংথোকখিবা অমসুং কারবার তৌবদা লাইহন্নবা চাউরবা খোঙথাং থাংখিবসি অদোম খুদিংনা খঙনরবা ঙাক্তনি।
ঙসিদি, ভারতনা “মেক ইন ইন্দিয়া ফোর দি ৱর্ল্দ”গীদমক্তা লোইবা নাইদ্রবা খুদোংচাবা কয়া পীরি।
হীরম অসিগী মতাংদা, জাপানগী কম্পেনীশিংনা মতম কুইনদগী ঐখোয়গী ব্রান্দ এম্বেসেদর ওইদুনা লাক্লি।
তেক্নোলোজী অমসুং ইন্নোভেসন সেক্তরদা লৈরিবা ঐখোয়গী পার্ত্নরশিপ অসিদসু অনৌবা মতিক কয়া অমা হাপচিল্লে।
ঐখোয়না ভারত্তা লৈরিবা জাপানগী কম্পেনীশিংগী কান্নবা অমসুং নুংঙাইবা অকোয়বগী ফিভম অমা পীনবা খোঙফম চেৎলি।
ঙসি হৌদোক্লিবা ভারত-জাপান ইন্দস্ত্রীএল কম্পিতিতিবনেস পার্ত্নরশিপ রোদমেপনা হীরম অসিগী য়াম্না কান্নবা মেকানিজম অমা ওইরগনি।
ঐখোয়গা জাপানগা লৈনরিবা স্কিল পার্ত্নরশিপ্না মাইকৈ অসিদা য়াম্না মরু ওইবা থৌদাংসু য়াগনি।
মরুপশিং,
ভারত অমসুং জাপান অনিমক্না তেক্ত-কায়দবা, থাজবা য়াবা, মাংজৌননা হায়বা ঙম্বা অমসুং স্তেবল ওইবা ইনর্জী সপ্লাইগী মরু ওইবা খঙই।
হায়রিবা অসি তুং কোইনা চৎকদবা শেন্মিৎলোনগী শাহৌ লৌবগী পান্দম ফংনবা অমসুং অইং-অশা হোংবগী শিংনববু মাইয়োক্নবা ঙম্নবগীদমক্তা য়াম্না মরু ওই।
ঐখোয়গী ক্লিন ইনর্জী পার্ত্নরশিপ্না মাইকৈ অসিগী খ্বাইদগী তঙাই ফদবা খোঙথাং ওইগনি।
ঐখোয়না ঙসি মরু ওইবা হীরম কয়াদা য়ানবা পুরকখি অমসুং মরী লৈনবা হীরম কয়াসু লাউথোকখ্রে।
প্রধান মন্ত্রী কিশিদাগী হন্দক্কী খোঙচৎ অসিনা ভারত-জাপান স্পিসিএল স্ত্রেতজিক অমসুং গ্লোবেল পার্ত্নরশিপ্তা অনৌবা মতিক কয়া হাপচিনবদা মায় পাক্লে।
ঐহাক্না প্রধান মন্ত্রী কিশিদা অমসুং মহাক্কী দেলিগেসনবু ভারত্তা অমুক্কা হন্না তরাম্না ওকচরি।
থাগৎচরি!
দিস্ক্লেমরঃ মসিদি প্রধান মন্ত্রীনা থমখিবা ৱারোলগী চাউরাকপা পাউদম্নি। অশেংবা ৱারোলদি হিন্দিদা থমখিবনি।
***
(Release ID: 1807402)
Visitor Counter : 139
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam