প্রধানমন্ত্রীগী লোইশঙ
প্রধান মন্ত্রীনা দিফেন্স সেক্তরগী ওইবা বজেৎ মতুংগী ৱেবিনারদা মশাগী ৱাফম থমখ্রে
“দিফেন্স সেক্তরদা মরোমদোম লেপচবা ঙম্নবা হন্দক্কী চহি খরদা অহেনবা মিৎয়েং চঙখিবশিং অসি বজেৎ অসিদা ময়েক শেংনা মমি তারি”
“অদোমগী ইশাগী লৈবাক্তা খুৎলায় শাবা মতমদতা তোপ-তোপ্পা অমসুং ঙক্নীংঙাই ওইবা থৌওং থোক্কনি”
“হন্দক্কী চহিগী বজেৎ অসিদা লৈবাক অসিগী মনুংদা রিসর্চ, দিজাইন অমসুং দিভেলপমেন্ততগী হৌদুনা মেন্যুফেকচরিং তৌবা ফাওবগী মতিক লৈবা ইকোসীস্তেম অমা শেম্বগী ব্লুপ্রিন্ত য়াওরি”
“লৈবাক মনুংদগী পোত্থোক লৈনবগীদমক্তা লুপা করোর লিশিং ৫৪গী শেনফমগী কন্ত্রেক্তকী খুৎয়েক পীনখ্রে। মসিদা নত্তনা, লুপা করোর লাখ ৪.৫গী শেনফমগী খুৎলায় লৈবগী থৌওংশিংনা তোঙানবা থাক কয়াদা লৈরি”
“ত্রাইএল, তেস্তিং অমসুং সর্তিফিকেসনগী নুং-পান ফাওনা উবা, মতমগী মনুং চনবা, তসেং-তসেংবা অমসুং কাঙলোন চুম্বা পথাপ অসি মতিক লৈবা দিফেন্স ইন্দস্ত্রী অমা ওইরকপদা মথৌ তাবশিংনি”
Posted On:
25 FEB 2022 11:57AM by PIB Imphal
হন্দক্কী চহিগী বজেত্তা লাউথোকখিবগী মখা পোন্না ‘দিফেন্সতা মরোমদোম লেপচবা ঙম্বা – থবক পাংথোকপগী খোল্লাও’ হায়না মিংথোনবা বজেৎ মতুংগী ৱেবিনার অমদা প্রধান মন্ত্রী, শ্রী নরেন্দ্র মোদীনা মশাগী ৱারোল থমখ্রে। ৱেবিনার অসি দিফেন্স মন্ত্রালয়না শীন-লাঙবনি। হায়রিবা অসিনা প্রধান মন্ত্রীনা ৱারোল থমখিবা বজেৎ মতুংগী ৱেবিনার পরিংগী মরিশুবা ৱেবিনারনি।
‘দিফেন্সতা মরোমদোম লেপচবা ঙম্বা – থবক পাংথোকপগী খোল্লাও’ হায়বা ৱেবিনার অসিগী থীম অসিনা লৈবাক্কী অনিঙবা-অপাম্ববু তাক্লি হায়না প্রধান মন্ত্রীনা ফোংদোকখি। দিফেন্স সেক্তরনা মরোমদোম লেপচবা ঙম্বগী থৌওংবু মপাঙ্গল হাপ্নবা হন্দক্কী চহি খরদা অহেনবা মিৎয়েং চঙখিবশিং অসি বজেৎ অসিদা ময়েক শেংনা মমি তারি। ভারতকী দিফেন্স মেন্যুফেকচরিং অসি মীখা পোল্লিঙৈগী মতম অমসুং নীংতম্বা ফংবগা ইকান কান্নদবা মতমশিংদসু মপাঙ্গল য়াম্না লৈরম্মি হায়না মহাক্না নীংশিংখি। ভারত্তা শাবা খুৎশু-খুৎলায়শিংনা মালেমগী অনিশুবা লাঞ্জাওদা মরু ওইবা থৌদাং য়াখি। “মখা তারকপা চহিশিংদা, ঐখোয়গী শক্তি অসিনা হন্থরকখ্রবসু, তৌবা ঙম্বগী মতিক্তদি মতমদুদা অমসুং হৌজিকসু চাং তাদ্রি হায়বা ময়েক শেংলি”, হায়না মহাক্না ফোংদোকখি।
য়েক্নবগী মফমদা অঙকপা ফাওহন্নবগীদমক্তা ঐখোয়গী ঙাক-শেলগী পথাপ্তা তোপ-তোপ্পা মগুন চেলহনবা অমসুং চুনগদবা মওংদা শেমদোকপগী মরু ওইবদা প্রধান মন্ত্রীনা মিৎয়েং চঙখি। “অদোমগী ইশাগী লৈবাক্তা খুৎলায় শাবা মতমদতা তোপ-তোপ্পা অমসুং ঙক্নীংঙাই ওইবা থৌওং থোক্কনি”, হায়না মহাক্না হায়খি। হন্দক্কী চহিগী বজেৎ অসিদা লৈবাক অসিগী মনুংদা রিসর্চ, দিজাইন অমসুং দিভেলপমেন্ততগী হৌদুনা মেন্যুফেকচরিং তৌবা ফাওবগী মতিক লৈবা ইকোসীস্তেম অমা শেম্বগী ব্লুপ্রিন্ত য়াওরি হায়না মহাক্না পাউদমখি। দিফেন্স বজেৎকী চাউরাকপা ৭০%দি লৈবাক্কী ইন্দস্ত্রীগীদমক্তা থম্লি হায়না মহাক্না মখা তানা পনখি।
ঙাক-শেল মন্ত্রালয়না হৌজিক ফাওবগী ওইনা দিফেন্স প্লেৎফোর্ম অমসুং ইক্বিপমেন্ত ২০০ হেনবগী পোজিতিব ইন্দিজেনাইজেসন লিস্ত অমা পুথোকখ্রে। ৱাফম অসি লাউথোকখ্রবা তুংদা, লৈবাক মনুংদগী পোত্থোক লৈনবগীদমক্তা লুপা করোর লিশিং ৫৪গী শেনফমগী কন্ত্রেক্তকী খুৎয়েক পীনখ্রে হায়না প্রধান মন্ত্রীনা ফোংদোকখি। মসিদা নত্তনা, মসিদা নত্তনা, লুপা করোর লাখ ৪.৫গী শেনফমগী খুৎলায় লৈবগী থৌওংশিংনা তোঙানবা থাক কয়াদা লৈরি হায়না প্রধান মন্ত্রীনা মখা তাখি। অমসুং, অহুমশুবা লিস্ত অসিসু য়াম্না থুনা থোক্লগনি হায়না মহাক্না মখা তাখি।
খুৎলায় লৈবগী থৌওংদা মতম শাংনা চঙমনখিদুনা, খুৎলায় অদু ফংবা মতমদা ওইরিবা মতমদুগা চুনদবা ওইবগী থৌওং থোকখিবগী ফিভমশিংবু প্রধান মন্ত্রীনা নুংঙাইতবা ফোংদোকখি। “মসিগী ৱারোইশিন অসিদি ‘আত্মানির্ভর ভারত’ অমসুং ‘মেক ইন ইন্দিয়া’দা লৈরে”, হায়না মহাক্না মিৎয়েং চঙখি। মরোমদোম লেপচবগী ৱাখল্লোনবু লুনা খন্দুনা ৱারেপ কয়া লৌখিবগীদমক্তা প্রধান মন্ত্রীনা আর্ম্দ ফোর্সপু থাগৎপসু ফোংদোকখি। খুৎশু-খুৎলায়গা মরী লৈননা লান্মীশিংগী মশাদা চাউথোকচবা অমসুং ৱাখল্লোনবু ঙাক্তুনা থম্বগী মরু ওইবদা প্রধান মন্ত্রীনা অহেনবা মিৎয়েং চঙখি। হায়রিবা থৌওং অসি খন্নরিবা হীরমশিং অসিদা মরোমদোম লেপচবা ঙম্লবা মতমদা ওইথোক্কনি হায়না মহাক্না মখা তাখি।
সাইবর সেক্যুরিতী হায়বসি দিজিতেল মালেমদা খক্তা অকক্নবা ওইদ্রে অমসুং নেস্নেল সেক্যুরিতীগী হীরম অমসু ওইরক্লে হায়না প্রধান মন্ত্রীনা ফোংদোকখি। “ঐখোয়গী মতিক লৈবা আই.তি.গী শক্তিবু দিফেন্স সেক্তরদা ঐখোয়না শিজিন্নবা হেল্লিঙৈ, লৈবাক্কী ঙাক-শেলগী মতাংদা ঐখোয়না থাজবসু হেনগৎলক্কনি”, হায়না মহাক্না হায়খি।
দিফেন্স মেন্যুফেকচর তৌবা মীওইশিংগী মরক্তা কন্ত্রেক্তকীদমক্তা চাংয়েংনবা লৈরকপনা, শেলদা মিতাবা অমসুং শেঞ্জা থুমজা তৌবগী থৌওং থোকহল্লি হায়না প্রধান মন্ত্রীনা ফোংদোকখি। খুৎলায়গী মগুন অমসুং পাম্বা-পামদবগী মতাংদা খঞ্জান্নবা কয়া অমা মসিনা মরম ওইদুনা থোকহল্লি। হায়রিবা শিংনবা অসিসু আত্মানির্ভর ভারত অভিয়ান্না ৱারোইশিন পীগনি হায়না মহাক্না মখা তাখি।
ওর্দিনান্স ফেক্তরীশিংনা ৱাখল চেৎপগা লোয়ননা চাউখৎপগী ময়েক শেংবা খুদম ওইবগীদমক্তা মখোয়বু প্রধান মন্ত্রীনা থাগৎখি। মমাংগী চহিশিংদা ইনকোর্পোরেত তৌখিবা অনৌবা দিফেন্স অন্দর্তেকিং ৭না মখোয়গী কারবার পাকথোক চাউথোক্তুনা অনৌবা মার্কেত কয়াদা য়ৌবা ঙম্বসিদা নুংঙাইবা ফাওই হায়না প্রধান মন্ত্রীনা ফোংদোকখি। “ঐখোয়না মমাংগী চহি ৫-৬তা দিফেন্স এক্সপোর্তপু শরুক ৬ হেন্না হেনগৎহল্লে। ঙসিদি, ঐখোয়না লৈবাক ৭৫ হেনবদা ভারত্তা শাবা দিফেন্সকী খুৎলায় কয়া অমসুং সর্ভিস কয়া পীরি”, হায়না প্রধান মন্ত্রীনা মখা তাখি।
সরকারনা মেক ইন ইন্দিয়াবু পুক্নিং থৌগৎপনা মরম ওইরগা, মমাংগী চহি ৭কী মনুংদা দিফেন্সকী পোত্থোক শানবগীদমক্তা অনৌবা ইন্দস্ত্রীএল লাইসেন্স ৩৫০ হেন্না পীখ্রে হায়না প্রধান মন্ত্রীনা মিৎয়েং চঙখি। অদুবু, ইং ২০০১দগী ২০১৪ ফাওবগী চহি ১৪গী মনুংদদি, শুপ্নতগী লাইসেন্স ২০০ খক্তমক পীখি। প্রাইভেৎ সেক্তরশিংনা দি.আর.দি.ও. অমসুং দিফেন্স পি.এস.য়ু.গা মান্নবা থাক্তা লৈনবা হোৎনগদবনি, মসিগীদমক্তা, দিফেন্স আর. এন্দ দি. বজেৎকী ২৫% অসি ইন্দস্ত্রী, স্তার্ত-অপ অমসুং একাদমিয়াগীদমক্তা খাক্লিবনি হায়না প্রধান মন্ত্রীনা মিৎয়েং চঙখি। বজেৎ অসিদা স্পিসিএল পর্পজ ভেহিকল মোদেলসু শীন-লাঙলি। “মসিনা প্রাইভেত সেক্তরগী থৌদাংবু ভেন্দর নত্ত্রগা সপ্লাইয়রদগী হেন্দোক্তুনা পার্ত্নর অমা ওইহল্লগনি”, হায়না মহাক্না ফোংদোকখি।
ত্রাইএল, তেস্তিং অমসুং সর্তিফিকেসনগী নুং-পান ফাওনা উবা, মতমগী মনুং চনবা, তসেং-তসেংবা অমসুং কাঙলোন চুম্বা পথাপ অসি মতিক লৈবা দিফেন্স ইন্দস্ত্রী অমা ওইরকপদা মথৌ তাবশিংনি হায়না শ্রী মোদীনা পনখি। মসিগীদমক্তা, মনীং মখা তম্বা পথাপ অমনা শিংনবা কয়াগী ৱারোইশিন পুরকপদা য়াম্না কান্নবা তেংবাংগনি হায়না মহাক্না মখা তাখি।
প্রধান মন্ত্রীনা স্তেকহোলদরশিংনা বজেত্তা য়াওরিবা হীরমশিংবু মতম চানা থবক্তা ওন্থোক্নবগীদমক্তা অনৌবা ৱাখল্লোন পুথোরক্নবা হায়খি। বজেৎ অসিবু হন্দক্তা থা অমা ঙনখৎখিবা অসিগী মপুং ফাবা কান্নবা লৌদুনা বজেৎকী থবক পাংথোকপগী মতম য়ৌরকপদা হান্নদগী থবক পাংথোক্তুনা মখোয়শিংনা লৈনবা প্রধান মন্ত্রীনা হায়খি।
*********
(Release ID: 1801028)
Visitor Counter : 147
Read this release in:
English
,
Urdu
,
Hindi
,
Marathi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam