প্রধানমন্ত্রীগী লোইশঙ

প্রধান মন্ত্রীনা করিয়প্পা গ্রাউন্দদা পাঙথোকপা এন.সি.সি. পি.এম.গী রেলীদা ৱা ঙাংখ্রে


“এন.সি.সি.দা ঐহাক্না ফংখিবা ত্রেনিং অমসুং তমশিনখিবা অদুনা লৈবাক্কীদমক ঐহাক্কী থৌদাংশিং পাঙথোকপদা চাউনা থৌনা পীখি”

“লৈবাক্কী ঙমখৈগী লোন্নবা মফমশিংদা অনৌবা কেদেৎ লাখ ১ লৈহনখ্রে”

“এন.সি.সি.দা নুপীমচাশিং হেন্না-হেন্না য়াওরক্নবা ঐখোয়না হোৎনগদবনি”

“লৈবাক হান্না হায়বা ফিরেপকা লোয়ননা মাগী নহারোলশিংনা মাংদা চংশিল্লিবা লৈবাকপু মালেমগী শক্তি অমত্তনা অথিংবা পীবা ঙমলোই”

“এন.সি.সি. কেদেৎশিংনা অফবা দিজিতেল হেবিৎশিং শেমগৎপদা অচৌবা থৌদাং অমা লৌবা য়াই অমসুং মীয়ামদা অরানবা পাও অমসুং তোকঙাশিংগী মতাংদা ৱাখল তাহনবা য়াগনি”

“এন.সি.সি./এন.এস.এস.না কেম্পসশিংবু দ্রগ-ফ্রী ওইহনবদা মতেং পাংগদবনি”

Posted On: 28 JAN 2022 2:30PM by PIB Imphal

প্রধান মন্ত্রী শ্রী নরেন্দ্র মোদীনা কারিয়প্পা গ্রাউন্দদা পাঙথোকপা নেস্নেল কেদেৎ কোর্পসকী রেলীদা ৱা ঙাংখ্রে। প্রধান মন্ত্রীনা গার্দ ওফ ওনর য়েংশিনখি, এন.সি.সি. কন্তিঞ্জেন্তশিংগী মার্চ পাস্ত য়েংশিনখি অমসুং এন.সি.সি. কেদেৎশিংনা আর্মী এক্সন, স্লিথরিং, মাইক্রোলাইৎ ফ্লায়িং, পেরাসেলিং লোয়ননা কলচরেল প্রোগ্রামশিংদা মখোয়গী স্কিলশিং উৎখিবা অদু মীৎয়েং তাখি। খ্বাইদগী ফবা কেদেৎশিংনা প্রধান মন্ত্রীদগী মেদল অমসুং বাতোন ফংখি।

মীতিন অদুদা ৱা ঙাংলদুনা প্রধান মন্ত্রীনা লৈবাক অসিনা আজাদী কা অমৃত মহোৎসব পাঙথোক্লিবা অসিগা ইরোইননা থৌরম অসি থৱায় য়াওবগী তোপ-তোপ্পা থাক অমগা লোয়ননা পাঙথোক্নবা হায়খ্রে। প্রধান মন্ত্রীনা মহাক্কী এন.সি.সি.গা লৈনরিবা মরী অদু চাউথোকচবা পোকপগা লোয়ননা নীংশিংখি অমসুং এন.সি.সি.গী কেদেৎ অমা ওইনা মহাক্না ফংখিবা ত্রেনিং অদুনা লৈবাক্কীদমক মহাক্কী থৌদাংশিং পাঙথোকপদা চাউনা থৌনা পীখি হায়না ফোঙদোকখ্রে।

প্রধান মন্ত্রীনা লালা লাজপৎ রায় অমসুং ফিল্দ মার্শেল কারিয়প্পাবু মখোয়না লৈবাক শেমগৎপদা শরুক তমখিবা অদুগীদমক ইকাই খুম্নবা উৎখ্রে। ভারতকী মথৌনা লৈবা মপারি অনিমক্কী মপোক কুমওন ঙসি তারি।

প্রধান মন্ত্রীনা লৈবাক অসিনা অনৌবা ফিরেপকা লোয়ননা মাংদা চংশিল্লিবা মতম অসিদা লৈবাক অসিদা এন.সি.সি.গী মপাঙ্গল কনখৎহন্নবা লৌখৎখিবা খোঙথাংশিংগী মতাংদা ফোঙদোকখি। মসিগীদমক লৈবাক অসিদা অৱাংবা থাক্কী রিভ্যু কম্মিতি অমা শেমখ্রে। হৌখিবা চহি অনি অসিদা লৈবাক্কী ঙমখৈগী লোন্নবা মফমশিংদা অনৌবা কেদেৎ লাখ ১ লৈহনবা ঙমখ্রে, হায়না মহাক্না ফোঙদোকখি।

প্রধান মন্ত্রীনা নুপীমচা অমদি নুপীশিংগীদমক দিফেন্স এস্তাব্লিশমেন্তশিংগী থোংশিং হাংনবা পাইখৎখিবা খোঙথাংশিংগী মতাংদা কুপ্না ফোঙদোকখি। মহাক্না নু্পী কেদেৎশিংগী মশিং হেনগৎলক্লিবা অসিবু লৈবাক অসিগী ৱাখল্লোন্দা অহোংবা লাক্লিবা অসিগী খুদম অমনি হায়খ্রে। “লৈবাক অসিনা অদোমগী মতেং মথৌ তারি অমসুং মদুগীদমক খুদোংচাবা মরাং কাইনা লৈ”, হায়না মহাক্না নুপীমচা কেদেৎশিংদা ফোঙদোকখ্রে। মহাক্না হায়খি হৌজিক লৈবাক অসিগী ইচানুপীশিংনা সাইনিক স্কুলশিংদা মিং চল্লি অমসুং নুপীশিংনা আর্মীদা অচৌবা থৌদাংশিং য়াবা ফংলি। লৈবাক অসিগী ইচানুপীশিংনা এয়র ফোর্সতা ফাইতর প্লেনশিং পাইরি। “অসিগুম্বা ফীভম অমদা, ঐখোয়না এন.সি.সি.দা ইচানুপীশিং হেন্না-হেন্না য়াওহন্নবা হোৎনগদবনি”, হায়না মহাক্না মখা তাখি।

লৈবাক অসিদা অয়াম্বনা পোকপা কেদেৎশিংগী নৌরিবা প্রোফাইল অসি য়েংলগা প্রধান মন্ত্রীনা মখোয়না ২০৪৭দা লৈবাক অসিদা লৌগদবা থৌদাংগী মতাংদা ফোঙদোকখ্রে। “অদোমগী খোঙথাংশিং অমসুং ফিরেপ অমদি ফিরেপশিং অদু থুংহল্লিবা অসিনা ভারতকী মাইপাকপা পুরক্লগনি”, হায়না মহাক্না ফোঙদোকখি। প্রধান মন্ত্রীনা লৈবাক হান্না হায়বা ফিরেপকা লোয়ননা মাগী নহারোলশিংনা মাংদা চংশিল্লিবা লৈবাকপু মালেমগী শক্তি অমত্তনা অথিংবা পীবা ঙমলোই হায়খ্রে। প্লেফীল্দ অমসধং স্তার্তঅপ ইকোস্ফীয়রদা ভারতকী মাইপাকপা অসিনা মসি ময়েক শেংনা তাক্লি হায়না প্রধান মন্ত্রীনা ফোঙদোকখ্রে। অমৃত কাল হায়বদি ঙসিদগী মথংগী চহি ২৫ অসিদা প্রধান মন্ত্রীনা কেদেৎশিংদা মখোয়গী অনীংবা-অপাম্বশিং অমদি এক্সন অসিবু লৈবাক অসিগী চাউখৎ-থৌরাং অমসুং আশাশিংগা লোয়ননা পুনশিন্নবা হায়খ্রে। প্রধান মন্ত্রীনা ঙসিগী নহারোলশিংনা “ভোকেল ফোর লোকেল”গী কেম্পেন্দা অচৌবা থৌদাং লৌনবা হায়খ্রে। “করিগুম্বা ঙসিগী নহারোলশিংনা ভারত মচা অমগী হোৎনজমন অমসুং হুমাং মমলগা লোয়ননা শেম্লকপা পোৎশিং খক্তা শীজিন্নরবদি ভারতকী লাইবাক্তা অহোংবা পুরকপা ঙমগনি”, হায়না মহাক্না ফোঙদোকখ্রে।

প্রধান মন্ত্রীনা ঙসি নাকল অমরোমদা দিজিতেল তেক্নোলোজী অমসুং ইনফোর্মেসগা মরী লৈনবা অফবা ওইথোকপশিং লৈ অদুগা নাকল অমদা অরানবা পাউ শন্দোকপগী খুদোংথিবশিং লৈরি হায়না ফোঙদোকখ্রে। মহাক্না ঐখোয়গী লৈবাক অসিগী মীচম প্রজাশিংবু তোকঙাগী লাংদা থুহন্দবা হায়বা অসি তঙাই ফদে হায়না অকনবা ৱাফম থমখি। মহাক্না এন.সি.সি. কেদেৎশিংনা মসিগীদমক এৱের্নেস কেম্পেন অমা চত্থনবা প্রপোজ তৌখি।

প্রধান মন্ত্রীনা এন.সি.সি. নত্ত্রগা এন.এস.এস. লৈবা স্কুল/কোলেজতা দ্রগশিংনা য়ৌহল্লোইদবনি হায়না অকনবা ৱাফম থমখি। মহাক্না কেদেৎশিংদা মখোয় মশাবু দ্রগশিং শীজিন্নদনবা অমসুং মসিগা ইরোইননা মখোয়গী কেম্পসপু দ্রগ-ফ্রী ওইনা থমগদবনি হায়না পাউতাক পীখি। এন.সি.সি.-এন.এস.এস.তা য়াওদবা মরুপশিংবু ফত্তবা হৈনবী অসি থাদোক্নবা মতেং পাংগদবনি হায়না মহাক্না অকনবা ৱাফম থমখি।

প্রধান মন্ত্রীনা কেদেৎশিংবু লৈবাক অসিগী অপুনবা থৌরাংদা অনৌবা ইনোৎ হাপ্নবা হোৎনরিবা সেল্ফ৪সোসাইতী পোর্তেলগা লোয়ননা এসোসিএৎ তৌনবা হায়খ্রে। ওর্গনাইজেসন লিশিং ৭ হেনবা অমসুং মীওই লাখ ২.২৫না পোর্তেল অসিগা এসোসিএৎ তৌখি।

***



(Release ID: 1793342) Visitor Counter : 165


Read this release in: English , Urdu , Marathi , Hindi , Bengali , Assamese , Punjabi , Gujarati , Odia , Tamil , Telugu , Kannada , Malayalam