২০২২গী অহানবা মীফমনি। অহানবদা ময়াম পুম্নমক্তা লোহরীনা লাকপদা য়াইফ-পাউজেল পীজরি। মকর সঙ্ক্রান্তি, পোঙ্গল, ভোগলী বিহু, উত্তরায়ন অমসুং পোশ কুহ্মৈগী মাংওইননা য়াইফ-পাউজেল পীজরি। ভারতনা চহি ১০০দা থোকপা খ্বাইদগী চাউবা লাইচৎ অসিগী অহুমশুবা চহিদা চংশিল্লক্লি। হোৎনবা কনবা অসিনা ঐখোয়গী অমত্তা ঙাইরবা লম্বীনি অমসুং মাই পাকপা অসিনা ঐখোয়গী অমত্তা ঙাইরবা পাম্বৈনি। ভারতকী মীওই করোর ১৩০ অসিনা ঐখোয়না হোৎনরিবশিং অসিগা লোয়ননা কোরোনাদগী শোইদনা মাইপাকপা ঙমগনি, অমসুং ময়াম পুম্বদগী ঐহাক্না তাজবা ফংলিবা ৱাফমশিং অসিদসু মসিগী থাজবা অসি পোকহল্লি। হৌজিক ওমিক্রোনগী শক্লোন্দা অনৌবা শীংনবশিং লাক্লিবা, কেসশিংগী মশিং হেনগৎলক্লিবা অসিগী মতাংদা হেল্থ সেক্রেতরীগী মাইকৈদগী ঐখোয়দা ময়েক শেংনা পাউদম পীখ্রে। হৌরকপদা অমিত শাহজীনসু ৱাফম খরা ঐখোয়গী মাংদা থম্বীখ্রে। ঙসি মুখ্য মন্ত্রীশিংগী মাইকৈদগী ঐখোয় পুম্নমক্কী মাংদা মরু ওইবা ৱাফম কয়া মদুসু ভারতকী তোঙান-তোঙানবা মফমশিংদগী থম্বীখ্রে।

মরুপশিং,

ওমিক্রোনগী মতাংদা হান্না লৈরম্বা চীংনবশিং অদু হৌজিক্তি তপ্না-তপ্না কোকলক্লি। ওমিক্রোন ভেরিয়েন্ত অসিনা হান্নগী ভেরিয়েন্তশিং অদুদগী য়াম্না হেন্না য়াংনা মীয়ামদা শন্দোরক্লি। অমমেরিকাগুম্বা লৈবাক অমদা নোংমদা অনৌবা কেস লাখ ১৪ ফাওবা রিপোর্ত তৌখি। ভারত্তা লৈরিবা ঐখোয়গী বিজ্ঞানিক অমসুং হেল্থ এক্সপর্তশিংনা ফীভম খুদিংমক অমসুং দেতা লেপ্তনা স্তদী তৌরি। ৱাফম অসিদি ময়েক শেংলে, ঐখোয় মীৎ-না শিংনা লৈগদবনি, চেকশিন্না লৈগদবনি, অদুবু ঐখোয়না পাখৎপগী ফীভম অদু থোকহন্দনবসু হোৎনগদবনি। কুহ্মৈগী পন্থা অসিদদি, ঐখোয়না মীয়ামগী অমসুং এদমিনিস্ত্রেশনগী এলর্তনেস অদু মফম অমত্তদা হন্থহল্লোইদবনি। কেন্দ্র অমসুং রাজ্য সরকারশিংনা প্রি-এমপ্তিব, প্রোএক্তিব অমসুং কলেক্তিব এপ্রোচ লৌখৎখিবগী মওং অসি, তানফম অসিদদি মাইপাক্নবগী মন্ত্র অদুগা চপ মান্নৈ। ঐখোয়না কোরোনা ইনফেক্সন হন্থহল্লিবমখৈ, ঐখোয়গী অৱাবসু হন্থগনি। এৱের্নেসকী হীরমদা সাইন্সতা য়ুম্ফম ওইবা লৌশিংদা মীৎয়েং থম্বগা লোয়ননা ঐখোয়গী মেদিকেল ইনফ্রাস্ত্রকচর, মেদিকেল মেনপাৱর ঐখোয়না হেনগৎহনবা তাই।

মরুপশিং,

মালেমগী অয়াম্বা অখঙ-অহৈশিংনা ভেরিয়েন্ত অমা হেক্তা ওইরবসু, কোরোনাগী মায়োক্তা লান্থেংনবদা খ্বাইদগী অফবা খুৎলাই অসি ভেক্সিননা ওইরি হায়না ফোঙদোকখি। ভারত্তা শাবা ভেক্সিনশিংনা মালেম শিনবা থুংনা ময়ামদগী হেন্না ফবগী মতিক অদু উৎলি। ভারতনা ঙসি এদল্ত পোপুলেশনগী চাউরাক্না চাদা ৯২দা অহানবা দোজ কাপখ্রে হায়বসি ভারতমচা খুদিংমক্কীদি য়াম্না চাউথোকচনীংঙাইনি। লৈবাক অসিদা অনিশুবা দোজকী কোবরেজসু চাউরাক্না চাদা ৭০ য়ৌরে। অমসুং ভেক্সিনেস কেম্পেন অসি চহি অমা মপুং ফারক্কদবা শুপ্নগী নুমিৎ হুম খক্তা ঙাইরে। নুমিৎ ১০নিগী মনুংদা, ভারতনা ইংখৎলক্লিবা অঙাং চাউরাক্না মিলিয়ন ৩০দসু ভেক্সিন কাপথোকখ্রে। মসিনা ভারতকী তৌবা ঙম্বা উৎলি, শিংনবা অসি লাকশিন্নবা শেম-শাদুনা লৈ তাক্লি। ঙসি রাজ্যশিংদা ভেক্সিন মরাং কাইনা ফংলি।  ফ্রন্তলাইন ৱার্করশিং অমসুং সেনিয়র সিতিজনশিংদা প্রেকোশন দোজ অসি য়াংনা কাপথোক্লিবমখৈ, ঐখোয়গী হেল্থকেয়র সীস্তেমগী কেপাসিতীদা হেন্না হেনগৎলক্কনি। ১০০% ভেক্সিনেশন তৌনবগীদমক্তা হর ঘর দস্তক হেন্না কনখৎহনগদবনি। অৱাবা খুদোংচাদ্রবা নোংজু-নুংশাগী মতমদা ভেক্সিনেসন কেম্পেন খোঙজেল য়াংখৎহন্নবা হোৎনরিবা ঐখোয়গী হেল্থকিয়র ৱার্করশিং, ঐখোয়গী আশা ইচে-ইচলশিংবু ঙসি ঐহাক্না থাগৎচরি।

মরুপশিং,

ভেক্সিনেসনগী মতাংদা মখল অমত্তগী চীংনবা পোকহন্নবা হোৎনবা ঐখোয়না য়ারোইদবনি। ভেক্সিন কাপ্লবসু লাইনা অসি শন্দোরক্লি, মসিগী কান্নবা অসি করিনো? হায়না কয়ারক হন্না ঐখোয়না তাখ্রে। মাস্কনা কান্নবা পীদে হায়বা তোকঙসু শন্দোক্লি। অসিগুম্বা তোকঙা লাকশিন্নবা চাউনা মথৌ তারি।

মরুপশিং,

কোরোনাগী লান্থেং অসিদা ঐখোয়না ৱাফম অমগা চেকশিনবা তাই। হৌজিক কোরোনাগী লান্থেং অসিদা ঐখোয়না চহি অনিগী এক্সপরিয়েন্স লৈরে, লৈবাক শিনবা থুংবদসু শেম শাদুনা লৈরে। লালোং অমা য়াৎপা মতমদা, মীচম প্রজাগী হিংননবগী লম্বিদা, শেন্মীৎলোনগী থবক-থৌরমশিংদা য়রিবমখৈ শোকহল্লোইদবনি অমসুং ইকোনোমীগী মোমেন্তম কায়হনদনা থমগদবনি হায়বসি ঐখৌয়না খঙজিনগদবনি। মসি য়াম্না মরু ওই। মরম অদুনা লোকেল কন্তেনমেন্তদা হেন্না মীৎয়েং থম্বনা হেন্না ফগনি। কেস হেন্না লাকপা মফম অদুদা তেস্ত য়াম্না অমসুং খোঙজেল য়াংনা তৌবা মথৌ তাই। মসিগী মথক্তা, ঐখোয়না হোম আইসোলেশনদা লৈরিবশিংদা খ্বাইদগী হেন্না ত্রীতমেন্ত ফংহনবা ঙমগদবনি। মসিগীদমক্তা হোম আইসোলেশনগা মরী লৈনবা গাইদলাইনশিং ঙাক্না চৎপা, প্রোতোকল ঙাক্না চৎপা অমসুং ফীভমগী মতং ইন্না ইম্প্রোভাইজ তৌবা য়াম্না মরু ওই।  হোম আইসোলেসনগী মনুংদা ত্রেকিং অমসুং ত্রীৎমেন্তগী অফবা সিস্তেম লৈবনা হোস্পিতালশিংদা চৎপগী মথৌ তাহন্দে। লাইনা অদু খঙলকপা মতমদা মীয়াম্না কন্ত্রোল রুমদা পাও ফাওরকই। মরম অসিনা মতম চানা রেস্পোন্স তৌবা অমসুং মখা তানা অনাবা মীওই ত্রেকিং তৌবনা থাজবা অসি হেনগৎহনবদা চাউনা মতেং ওইগনি।

রাজ্য সরকারশিংনা মাইকৈ অসিদা য়াম্না অনৌবা খোঙশিংবু লৌখৎপা অসিদা ঐহাক্না নুংঙাইবা পোকই। কেন্দ্র সরকারশিংনা তেলিমেদিসিনগীদমক ফেসিলিতী কয়া অমা দিবেলপ তৌখি। মসি নীংথিনা শীজিন্নবা অসিনা কোরোনা নাবা মীওইশিংদা চাউনা মতেং ওইরগনি। তঙাই ফদবা হীদাক-লাংথকশিং অমসুং তঙসি ফদবা ইনফ্রাস্ত্রকচরগী ওইনা কেন্দ্র সরকারনা মতম চুপ্পদা, রাজ্য খুদিংমক্কা পুন্না লেপ্লি। রাজ্য কয়ানা থা ৫-৬কী মমাংদা পীখিবা অখন্নবা লুপা করোর ২৩০০০গী পেকেজবু শিজন্নদুনা হেল্থ ইনফ্রাস্ত্রকচরবু ফগৎহনখ্রে। মসিগী মনুং চন্না লৈবাক শিনবা থুংনা মেদিকেল কোলেজ অমসুং দিস্ত্রিক্ত হোস্পিতালশিংদা অঙাংশিংগীদমক্তা স্পেসিএল পেদিয়াত্রিক কিয়র য়ুনিৎ ৮০০ হেন্না অয়াবা পীখ্রে, ওকইজেন, আই.সি.য়ু. অমসুং এছ.দি.য়ু. ফমুং ১.৫ লাখকী ময়াদা লৈহনখ্রে, লিশিং ৫দগীসু হেনবা স্পেসিয়েল এম্বুলেন্স, লিক্যুইদ মেদিকেল ওক্সিজেন স্তোরেজ তেঙ্ক ৯৫০গী কেপাসিতিদগীসু হেন্না হেনগৎহনখ্রে। ইমর্জেন্সী ইনফ্রাস্ত্রকচরগী কেপাসিতী হেনগৎহন্নবা অসিগুম্বা খোঙথাং কয়ামরুম লৌখৎখ্রে। অদুবু ঐখোয়না ইনফ্তাস্ত্রকচর অসি মখা তানা চাউথোকহনবা মথৌ তাই।

কোরোনাবু মাইথিবা পীনবগীদমক ঐখোয়না ঐখোয়গী থৌরাংবু কোরোনাগী ভেরিয়েন্ত খুদিংমক্তগী মাং থানা থম্বগী মথৌ তাই। ওমিক্রোনবু লাকশিনবগা লোয়ননা তুংদা লাক্কদবা ভেরিয়েন্ত কয়াগীদমক্তসু হৌজিক্তগী হৌনা থৌরাং তৌবা হৌগদবনি । ঐখোয় পুম্নমক্কী ম্যুচ্যুএল কোওপরেসন, সরকার অমগা অমগী মরক্তা কোওর্দিনেসন লৈবা অসিনা কোরোনাগী মায়োক্তা লৈবাক অসিনা লান্থেংনবদা পাঙ্গল হাপকনি হায়না ঐহাক্না থাজৈ। ঐখোয় পুম্নমক্না ৱাফম অমদি য়াম্না ময়েক শেংনা খঙলে মদুদি লৈবাক অসিগী য়ুমথোং খুদিংদা মসি চৎনবী অমা লৈ, হায়বা অসি আয়ুর্বদিক্কী মতাংদনি, মদুদি কারা অসিনচিংবা থকপগী চৎনবী অসিনি। মসিগী তানফম অসিদা মসি য়াম্না কান্নৈ, মসি হীদাক অমনি হায়না কনা অমত্তনা হায়দে অদুবু মসিগী কান্নবা লৈজৈ। অমসুং ঐহাক্না লৈবাকমচাশিংদা হায়জনীংবদি ঐখোয়গী য়ুমদা লৈরিবা চৎনবী অসিনা ঐখোয়বু অসিগুম্বা মতমদা মতেং য়াম্না পাংই। মসিদা ঐখোয়না মীৎয়েং চংশি। 

মরুপশিং,

ময়াম্না মতম কাইথোকপীদুনা, ঐখোয়গী ৱাখল্লোনশিং ফোঙদোক্নখ্রে। অমসং খুদোংথিবা অসিনা ফনা চাউরবসু ঐখোয়না অমত্তা ওইনা থবক তৌখি, ঐখোয়গী থৌরাং, ঐখোয়না লাইচৎ অসি মায়োক্নবদা লৈরিবা থাজবা অমসুং অখাং কনবা অসিনা পুম্নমক্তগী মাইপাকপা ঙম্বা ওইবা ঙমহল্লি, অমসুং মসিনা মীচম প্রজাদা থাজবা পোকহল্লি। অমসুং মীচম প্রজাশিংগী মতেংগা লোয়ননা ঐখোয়না ফীভম অসি মাইপাক্না লাকশিনবসু ঙমগনি। ময়াম পুম্নমক্না মতম কাইথোকপীবগীদমক ঐহাক্না থমোয় শেংনা থাগৎচরি। হন্না-হন্না থাগৎচরি।

***