ৱাহে গুরুজীগী খালসা, ৱাহে গুরুজীগী খালসা!!!

গুরুপুরবকী শেংলবা থৌরম অসিদা ঐখোয়না লোয়ননা শুরুক য়ারিবা গুজরাতকী মুখ্য মন্ত্রী শ্রী ভুপেন্দ্র ভাই পতেলজী, গুজাতকী বিধানসভাগী স্পীকর ইচল নীমা আচার্য়জী, নেস্নেল মাইনোরিতীজ কম্মিসনগী চিয়রমেন শ্রী ইকবাল সিংহজী, এম.পি. শ্রী বিনোদ ভাই চাবরাজী, লখপত গুরুদ্বারা প্রবন্ধক সমিতিগূ প্রসিদেন্ত রাজুভাই, শ্রী জগতার সিংহ গিলজী, মফম অসিদা তিনবীরিবা অতোপ্পা মশক নাইবা মীওই পুম্নমক, মীয়ামগী মীহুৎ পুম্নমক অমসুং পুকচেল শেংলবা মরুপ পুম্নমক! ঐহাক্না পুম্নমকপু গুরুপুরবনা লাকপদা য়াইফ পাউজেল পীজরি।

শেংলবা নুমিৎ অসিদা লখপত সাহিবদগী থৌজালশিং নীজবা ফংনবা খুদোংচাবা অমা ফংজবা অসি ঐহাক্কী ওইনা লাইবক ফবনি।

ঐহাক্না থৌজাল অসিগীদমক গুরু নানক দেবজী অমসুং গুরুশিংগী খুয়া-খাদা খুরুমজরি।

মরুপশিং,

গুরু লখপত অসি সাহিব অসি মতমগী খোঙচৎ খুদিংমক্কী শাখি অমা ওইখি। ঙসি ঐহাক্না শেংলবা মফম অসিদা শম্নবা ফংজবা অসিদা ঐহাক্না লখপত সাহিবনা হৌখিবা মতমদা অৱা-অনা জয়াম থেংনরকখিবগে নীংশিংহল্লি। মতম অমদা মফম অসি অতোপ্পা লৈবাকশিংদা চৎনবা, ললোন-ইতিক তৌনবগী অচৌবা মফম অমা ওইরমখি। মরম অসিনা গুরু নানক দেবজীগী খুভম মফম অসিদা লৈরিবনি। গুরু নানক দেবজীনা মরিশুবা উদাসী মনুংদা মফম অসিদা নুমিৎ খরনি লৈরমখি। অদুবু মতমগা ইরোইননা শহর অসি খুন্তাকলান শীখি। সমুদ্রনা নাথৈদুনা চৎখি। সিন্ধ তুরেলনসু মসিসু হন্না য়েংলকখিদে। ইং কুমজা ১৯৯৮কী নোংলৈ-নুংশিৎনা মরম ওইরগা  গুরুদ্বারা লখপত সাহিবনা মফম অসিদা অৱাবা কয়া মায়োক্নখি। অমসুং ইং কুমজা ২০০১গী য়ুহার হাখিবা অদু কনানা কাওগনি? মসিনা চহি ২০০ শুরবা গুরুদ্বারা সাহিবকী বিল্দিংদা চাউনা অমাং-অতা থোকহনখি। অদুবু ঙসিসু ঐখোয়গী গুরুদ্বারা লখপত সাহিবনা হান্নগুম্না মশেক-মঙাল থোক্না ঙানথোইরি।

গুরুদ্বারা অসিগা লোয়ননা ঐহাক্কী মমল য়াম্লবা ৱারী কয়া অমা লৈ। ইং কুমজা ২০০১গী য়ুহার হাখিবগী মতুংদা ঐহাক্না গুরুগী থৌজালদগী শেংলবা মফম অসিগী থৌগাল তৌনবা খুদোংচাবা ফংজখি। ঐহাক্না নীংশিংলি মতম অদুদা লৈবাক অসিগী তোঙান-তোঙানবা শরুকশিংদগী লাকপদা খুৎশা হৈবা অমদি আর্তিসেনশিংনা মফম অসিগী অশেংবা মশেক-মঙাল অদু লেংদনা থম্নবা হোৎনখি। অরিবা মতমদা ইনরম্বা মওং-মতৌ অদুদা ফকলাংশিংদা গুরুবানী হক্তুনা ইখি। মতম অদুগী য়ুনেস্কোনা প্রোজেক্ত অসিবুসু থাগৎখি।

মরুপশিং,

গুজরাত্তগী দিল্ল্লীদা লাক্লবা মতুংদসু ঐহাক্নসু লেপ্পা লৈরনা ঐহাক্কী গুরুশিংবু থৌগল তৌজনবা খুদোংচাবা ফংলি। ইং কুমজা ২০১৬-১৭ অসি গুরু গোবিন্দ সিংহজীগী প্রকাশ উতসবকী শেংলবা চহি ৩৫০শুবা চহি তাখি। ঐখোয়না লৈবাক অসিদা অমদি মপাল লৈবাকশিংদা মসি মপুং ফানা পালন তৌখি। ইং কুমজা ২০১৯দা গুরু নানক দেবজীগী প্রকাশ পর্বকী চহি ৫৫০ মপুং ফাবগী থৌরম অসিদা ভারত সরকারনা থৱায় য়াওনা শরুক য়াখি। অনৌবা ইথিলগা লোয়ননা মালেম শিনবা থুংবদা গুরু নানক দেবজীগী পাউজেল অসি থাক খুদিংমক্তা য়ৌহন্নবা খোঙথাংশিং পাইখৎখি। কতারপুর সাহিব কোরিদোর অসি দিকেদ কয়া ঙাইদুনা লাকখি, ইং কুমজা ২০১৯দা ঐখোয়গী সরকারনা মসি শাবা লোইশিনকি। অমসুং হৌজিক ২০২১দা ঐখোয়না গুরু তেঘগ বহাদুরজীগী চহি ৪০০ শুবগী প্রকাশ উতসব পাঙথোক্লি।

অদোম্না উবীরম্লগনি হন্দক্তা ঐখোয়না অফগানিস্তানদগী ভারত্তা ইকাই খুম্নরবা গুরু গ্রান্থ সাহিবকী স্বারুপশিং মাইপাক্না পুরকপা ঙমখি। মসিদগী হেনবা করম্না গুরুগী থৌজালবু লৈরুগনি? থা খরগী মমাংদা ঐহাক্না অমেরিকাদা চৎপা মতমদা হুরানদুনা মখোয়বু পুখিবা ভারতকী পুৱারীগী লন ওইরিবা ১৫০ হেনবা মফম অদুদা অমেরিকানা ভারত্তা খুৎশিন্নরকখি, ঐখোয়না পুরারীগা মরী লৈনবা পোৎলম ১৫০ হেন্না পুরকপা ঙমখি। মদুদা পেশকবজ হায়বদি অপীকপা থাং, মসিদা পারসীয়ন্দা গুরু হরগোবিন্দ সিংহজীগী মমিং ইরমখি। হায়বদি ঐখোয়গী ইশাগী সরকারনা লাইবক ফদুনা মসি অমুক হন্না পুরকপা ঙমখি।

ঐহাক্না নীংশিংলি মদুদি চহি অনিগী মমাংদা জামনগরদা ফমুং ৭০০ থাবা মতমগা চুনরবা হোস্পিতাল অমা শাখিবা অদু গুরু গোবিন্দজীগা মমিং লৌদুনা থোনখি। অমসুং হৌজিক্তসু ঐখোয়গী মুখ্য মন্ত্রী ভুপেন্দ্র ভাইনা মদু কুপ্না হায়বীখ্রে। অমরোমদা খালসা পন্থ লিংখৎপদা মরু ওইবা থৌদাং লৌখিবা মরিশুবা গুরসিখ, ভাই মোকহম সিংহজী অসিসু গুজরাত্তগী ওইখিবা অসিদা মতম চুপ্পদা গুজরাতনা চাউথোকচপা পোকই। গুরুদ্বারা বেত দ্বারকা ভাই মোহকম সিংহ অসি দেবভুমি দ্বারকা মহাকপু নীংশিংবা ওইনা শাখি। লখপত সাহিব গুরুদ্বারা অমসুং গুরুদ্বারা বেত দ্বারকাগী চাউখৎ-থৌরাংগী থবকশিং হেনগৎহনবদা গুজরাতকী সরকারনা মপুং ফানা মতেং পাংই অমসুং শেলগী মতেংসু পাংলি হায়না ঐঙোন্দা তাকপীখি।

মরুপশিং,

গুরু নানক দেবজীনা মহাক্কী ৱাহৈদা অসুম্না হায়-

গুর পরসাদি রতনু হরি লাভৈ,

মিতে অগিআন হোই উজিআরা।।

হায়বরি, গুরুগী থৌজালশিংগী খুত্থাংদা হরি-লাভ ফঙবা ঙমখি, হায়বদি নাপল মাংহল্লবা মতুংদা ঈশ্বর ফংখি অমসুং মঙাল শন্দোকপা ঙম্মি। ঐখোয়গী সিখ গুরুশিংনা ভারতকী খুন্নাই অসিদা মঙাল অসিনা থলহন্নবা থবক মতম চুপ্পদা তৌদুনা লাকখি। অদোম্না খন্দুনা য়েংবীয়ু, গুরু নানক দেবজীনা ঐখোয়গী লৈবাক অসিদা লাইপোক ওইনা পোক্লকপা মতমদা, ওন্নতৈনবা অমসুং খেন্নবা লৈবা পুম্নমক অসি মায়োক্নরিঙৈদা মতম অদুদা খুন্নাই অসি করি ফীভমদা লৈরমখি? মতম অদুদা মপালদগী লান্দারকপা অমসুং মীওৎ-মীনৈনা ভারতনা মশাদা মশানা থাজবা থম্বা অদু মাংখি। মেতরিএল অমসুং স্পিরিচ্যুএলগী মালেম অসি লমজিংলমখিবা ভারত মশামক অৱাফমদা তাখি। ঐখোয়না ফীভমশিং অসি উবা মতমদা ঐখোয়না খনখি করিগুম্বা গুরু নানক দেবজী মতম অদুদা মহাক্কী মঙাল অসি ফংহল্লমদবা তারবদি করি থোক্লমগনি? গুরু নানক দেবজী অমসুং মহাক্কী মতুংদা ঐখোয়গী তোঙান-তোঙানবা গুরুশিংনা ভারতকী পুক্নিংদা ফাওবা অদু মুৎহন্দনা থম্বা খক্তা নত্তনা ভারতপু শাফনা থম্নবা লম্বী অমসু য়াৎকি। অদোম্না য়েংবীয়ু, লৈবাক অসিনা জাৎ-ইজাৎ অমসুং কাংলুপকী মিংদা মপাঙ্গল শোন্থরকপা মতমদা গুরু নানক দেবজীনা হায়খি -

“জানহু জোতি ন পুছহু জাতী, আগে জাত ন হে”।

হায়বদি, পুম্নমক্তা ঈশ্বরগী মঙাল অদু য়েংঙু, মহাকপু মশক খঙউ। কনাগুম্বগী জাৎ-বিজাৎ হঙগনু। মরম অসিনা কনাগুম্বা অমত্তা জাৎ-বিজাৎনা মশক তাক্তে অমসুং পুন্সি লোইরবা মতুংগী খোঙচৎতা কনাগুম্বা অমত্তগী জাৎ-বিজাৎ লৈতে। মসিগা মান্ননা, গুরু অর্জুন দেবজীনা লৈবাক পুম্বগী শাধুশিংগী খোল্লাওশিংবু অমত্তা ওইনা পুন্সিন্দুনা লৈবাক অসিদা অমত্তা ওইবগী ইথিল পুরকখি। গুরু হরকিশনজীনা ভারতকী আইদেন্তিতীগা ঈশ্বরদা থাজবা থম্বা অসিগী মরী লৈনহনখি। মহাক্না দিল্লীগী গুরুদ্বারা বঙ্গলা সাহিবধা মীওইবগী অৱাবা কোহনবগী মীওইবা খুন্নাইদা উৎপীরম্বা লম্বী অসিনা সিখ অমসুং মীওইবা খুন্নাইবু হৌজিক হৌজিক লমজিংলি। কোরোনাগী অৱাবা মতমশিংদা ঐখোয়গী গুরুদ্বারাশিংনা শেবা তৌনবা লৌখিবা থৌদাংগী মওং অদুনা গুরু সাহিবকী থৌজাল অমদি মহাক্কী ৱাখল্লোনশিং অদুগী খুদম অমা ওইখি। হায়বরি নাকল অমরোমদা গুরু খুদিংমক্না মহাক্কী মতমদা লৈবাক অসিনা মথৌ তাবা মওংদা লমজিংখি অমসুং ঐখোয়গী চারোন-শুরোনশিংবু লমজিং লমতাকখি।

মরুপশিং,

ঐখোয়গী গুরুশিংনা লৌখিবা থৌদাং অসি খুন্নাই অমসুং স্পিরিচুএলিতী খক্তদা অকক্নবা নত্তে। ঐখোয়গী লৈবাক, লৈবাক অসিগীদমক্তা মুন্না খল্লুবা মতমদা উরিবা ফীভম, লৈবাক অসিগী থাজবা অমসুং অপুনবগী শক্তম্না ঙসি শাফরিবা অসিগী মপুং ওইবা মরমদি ঐখোয়গী সিখ গুরুশিংগী শিংথানীংঙাই ওইরবা ‘তপস্যা’ অসিননি। গুরু নানক দেবজীগী মতমদগী অদোম্না উখি, থাং পাইদুনা মীতোপশিংনা ভারতকী শক্তি অমদিং লম মুন্নবা হোৎনরকখিবা মতমদা গুরু নানক দেবজীনা অসুম্না হায়খি -

পাপ কী জন্ছ লে কাবলহু ধাইৱা জোরী মঙ্গে গানু বে লালো।

হায়বরি পাপ অমসুং মীওই-মীনৈগী থাং পাইদুনা কবুলদগী বাবরনা লাকখি, অমসুং য়াম্না ওৎপা নৈবগা লোয়ননা ভারত সরকারগী মচানুপী পীয়ু হায়খি। মসি গুরু নানক দেবজীগী ময়েক শেংবা, ভিজন অদুনি। মহাক্না হায়খি -

খুরাসান খসমানা কীৱা হিন্দুসতান দরাইৱা।।

হায়বদি, খুরাসান লৌশিল্লবা মতুংদা বাবরনা হিন্দুসতানবু ইহল্লি। মসিগী মতাংদা মহাক্না মখা তারদুনা হায়খি -

এতী মার পই করলানে তেন কী দরদু ন আইৱা।

হায়বরি, মতম অদুদা মীওৎ মীনৈ কয়া চত্থখি, মীয়ামগী মরক্তা খোলাও লাওখি। মরম অসিনা গুরু নানক দেবজীগী মতুংদা লাকখিবা ঐখোয়গী সিখ গুরুশিংনা লৈবাক অসিগী অমদি ধর্ম অসিগীদমক মখোয়গী থৱায়শিং থাবদা চীংনবা লৈখিদে। হৌজিক লৈবাক অসিনা গুরু তেগ বহাদুরগী ৪০০শুবা প্রকাশ উসতব পালন তৌরি। মহাক্না পুন্সি অসিমক ‘লৈবাক হান্না’ হায়বা অচেৎপা ফীরেপ অসিগী খুদম অমনি।

গুরু তেগ বহাদুরজীনা মীওইবা খুন্নাইগীদমক্তা খনবগী মতাংদা খোঙফম চেৎনা মতম পুম্বদা লৈখিবগুম্না মহাক্না ভারতকী থৱায়গী মতৌবু ঐখোয়দা উহনখি। লৈবাক্না মহাক্কী মফমদা ‘হিন্দ কী চাদর’ হায়বা মিংথোন পীবগী মওং অসিদা ভারত মচা খুদিংনা সিখকী চৎনবীদা পুক্নিং চঙবগী মমি তাবা ফংই। গুরু তেগ বহাদুরগী মথৌনা অমসুং ঔরাঙ্গজেবকা মাইয়োক্নবদা কত্থোকখিবা অসিনা লৈবাক্না অকী-অখঙ অমসুং ধর্মগী মিংদা কা-হেনবা লিচৎ চৎপগী মাইয়োক্তা করম্না থেংনখি হায়বা ঐখোয়দা তাক্লি।  

মসিগা মান্নবা ওইনা, তরশুবা গুরু, গুরু গোবিন্দ সিংহ সাহিবকী পুন্সিগী খোঙথাং খুদিংমক্তা ৱাখল চেৎপা অমসুং কত্থোকপগী অচঙবা খুদম অমনি। লৈবাক অসিগীদমক, লৈবাক অসিগী তঙাই ফবা ৱাখল্লোনশিংগীদমক তরাশুবা গুরুনা মহাক্কী পুম্নমক কত্থোকখি। মহাক্কী সাহিবজাদা অনি, জোরাবর সিংহ অমসুং ফতেহ সিংহ অসি ফকলাংদা হিংনা ফুমখি। অদুবু গুরু গোবিন্দ সিংহজীনা লৈবাক অসিগী মথৌনা মরিংজেল অদু হলহনখিদে। সাহিবজাদা মরিবু নীংশিংবা ওইনা ঐখোয়না থৱায় থাখিবগী চয়োল পালন তৌরি, অমসুং মসি হৌজিকসু চত্থরি।

মরুপশিং,

তরাশুবা গুরুগী মতুংদসু মসিগী কত্থোকপগী সাইকল অসি লোইবা নাইখিদে। বীর বাবা বন্দা সিংহ বহাদুরনা মহাক্কী মতমগী খ্বাইদগী শক্তি লৈবা সরকার অদুবু নমথুখি। সিখ মিসলাশিংনা নাদির শাহ অমসুং অহমদ শাহ অব্দালীনা লান্দরকপা থিংনবা লিশিং কয়া কত্থোকখি। পুৱারীগী চেমাইশিংদা পঞ্জাবতগী বনারাস ফাওবা লৈবাক অসিগী মপাঙ্গল অমদি লন অদুবু মহারাজা রঞ্জিত সিংহনা হিংগৎহনখিবগী মওং অদু ইশিনখি। ঐখোয়গী সিখ ইচিল-ইনাও অমসুং ইচে-ইচলশিংনা ব্রিতিশ লৈঙাক্কী মখা পোন্না লৈজরবসু লৈবাক্কী নিংতম ইহৌগীদমক্তা লান্থেংনবা ঙম্বগী থৌনা লৈববু থাগৎপা ফোংদোকখি অমসুং ঐখোয়গী নিংতম ইহৌ অমসুং জালিয়ানৱালা বাঘকী মীহাৎ অসিনা হায়রিবা কত্থোকখিবশিং অসিগী ঙসিসু শাখি ওইরি। মসিগী চৎনবী অসিদা চহিচা কয়াগী মমাংদা ঐখোয়গী গুরুশিংনা মখোয়গী পুন্সি হিংলমখি অমসুং ঙসিমকসু মসি পুক্নিংদা অদুমক চেল্লি।

মরুপশিং,

মসিগী মতম অসি আজাদী কে অমৃত মহোতসবনি। ঙসি লৈবাক অসিনা মাগী হৌখিবা মতম, মাগী মনিং-মখা তম্বগী ইহৌদগী ইথিল লৌরিবা মতম অসিদা ঐখোয়গী গুরুশিংগী ৱাখল্লোনশিং অসি ঐখোয়দা হেন্না মরু ওইরক্লি। ঙসি লৈবাক অসিনা হোৎনরিবশিং, মানা লৌরিবা ফিরেপশিং অসি লৈবাক অসিনা চহিচা কয়া থুংহন্নবা হোৎন্দুনা লাকখিবা চপ মান্নবা মঙলানশিং অদু য়াওরি। গুরু নানক দেবজীনা ঐখোয়দা ‘মানব জাত’কী পরা তাকপীখি, ঙসি লৈবাক অসিনা ‘সবকা সাথ, সবকা বিকাস, অমসুং সবকা বিশ্বাস’কী লাইৱা অসিগী মাংদা চংশিল্লি।  লাইৱা অসিগা লোয়ননা ঙসি লৈবাক অসিনা ‘সবকা প্রয়াস’না মাগী মপাঙ্গল ওইহল্লি। কশ্মীরদগী কন্যাকুমারী ফাওবা, কচ্ছতগী কোহিমা ফাওবা, লৈবাক অপুনবনা পুন্না মঙলান শাগৎমিন্নরি, পুন্না হোৎনমিন্নদুনা মঙফাওনহন্নবসু হোৎনমিন্নরি। ঙসি, ঐখোয়গী লৈবাক্কী লাইৱা অসিদি – ‘এক ভারত, শ্রেস্থ ভারত’না ওইরি।

ঙসি লৈবাক অসিগী পান্দম অসি – অনৌবা তৌবা ঙম্বা ভারত অমা হিংগৎহনবনি। ঙসি লৈবাক অসিগী থৌশিল-থৌরাং অসি - লাইরবা খুদিংগী সেবা তৌবা, নমহৎপীরবশিংদা অহানবা মিৎয়েং চঙবনি। য়েংবীয়ু, কোরোনা অসিগুম্বা অৱাবা মতম অমদা লাকখি অদুবু লৈবাক অসিনা লাইরবা অমত্তা চরা হেল্লগা তুমহনখিদে। ঙসি লৈবাক অসিগী মফম খুদিংমক্তা খোঙথাং খুদিংমক্কী কান্নবা ফংলি, লৈবাক অসিগী স্কীম খুদিংমক চপ মান্ননা ফংহল্লি। খোঙথাংশিং অসিনা মাইপাকপনা ভারত অসি মপাঙ্গল কনখৎহনগনি অমসুং গুরু নানক দেবজীনা তাকপী-তম্বীরম্বা অদু থুংহনগনি।

মরম অসিনা অসিগুম্বা অৱাবা মতমশিংদা মসি মীপুম খুদিংমক্কী থৌদাং ওইরি, ঐখোয়গী মঙলানশিং, লৈবাক অসিগী অমত্তা ওইবা শক্তমদা কনা অমত্তনা অকাইবা পীবা ঙম্লোই। ঐখোয়গী গুরুনা মঙজরম্বা মঙলানশিং, মহাক্কী পুন্সিবু কত্থোকখিবা মঙলানশিং, মসু থুংহন্নবা ঐখোয়না অমত্তা ওইনা পুনশিল্লসি, ঐখোয়গী মরক্তা অমত্তা ওইবগী ৱাখল্লোন চেনবা তঙাই ফদে। ঐখোয়গী গুরুনা লৈবাক অসিদা অকাইবা পীরকপা য়াবা খুদোংথিবদগী চেকশিন্নবা ঐখোয়দা হায়বীরম্বা অদু ঙসিসু অদুমক চপ হোংদ্রি। মরম অসিনা ঐখোয়না মীৎনা শিংনা লৈবা অমসুং লৈবাক অসিবু ঙাক শেনবা মথৌ তাই।

গুরু নানক দেবজীগী থৌজালশিংগা লোয়ননা ঐখোয়না মসিগী ফিরেপশিং অসি শোইদনা থুংহনবা ঙমগনি, অমসুং লৈবাক অসিনা অনৌবা পন্দোল লোম্বা ঙমগনি হায়না ঐহাক্না থাজৈ। অরোইবদা ঐহাক্না লখপত সাহিব অসিদা লাকপীরিবা ভক্তাশিংদা ৱাফম অমা হায়জনীংই। হৌজিক কচ্ছতা রন-উতসব পাঙথোক্লি। অদোম্না মতম কাইথোকপীদুনা রন-উতসব অসিদা শোইদনা চৎপীয়ু।

મુંજા કચ્છી ભા ભેણ કીં અયો ? હેવર ત સી કચ્છમે દિલ્હી, પંજાબ જેડો પોંધો હુધો ન ? ખાસો ખાસો સી મે આંજો અને આજે કુંટુંબજો ખ્યાલ રખજા ભલે પણ કચ્છ અને કચ્છી માડુ મુંજે ધિલ મેં વસેતા તડે આઉ કેડા પણ વાં- જેડા પણ વેના કચ્છકે જાધ કરે વગર રહીં નતો સગાજે પણ ઈ ત આજોં પ્રેમ આય ખાસો ખાસો જડે પણ આંઉ કચ્છમેં અચીધોસ આ મણી કે મેલધોસ આ મેડી કે મુંજા જેજા જેજા રામ રામ....ધ્યાન રખીજા.

মরুপশিং,

রন-উতসবকী মনুংদা, হৌখিবা থা অমা মখাই অসিদা কচ্ছকী নীংথিজরবা, হাংলবা অতিয়া অসি য়েংনবা লমকোইবা লাখ অমা হেন্না লাকখি। অখাং কল্লবা মীয়াম্না হোৎনরবা মতমদা পৃথিবী অসি করম্না অওনবা পুরকপগে হায়বা ঐহাক্কী কচ্ছকী হোৎনবা কনবা মীওইশিংনা উৎখি। মতম অমদা কচ্ছকী মীয়াম্না হিংনবগী লম্বীগীদমক মালেমগী অতোপ্পা মফমদা চৎনরম্মি, ঙসিদি মালেম পুম্বদগী মীয়ামগী পুক্নিং কচ্ছনা চিংশিল্লি।

হন্দক্তা ধৌলাবীরা অসি য়ুনেস্কোনা ৱর্ল্দ হেরিতেজ সাইৎ অমা ওইনা লাউথোকখি। মসিনা মরম ওইরগা মফম অসিগী তুরিজম চাউখৎলগনি। গুজরাত সরকারনা মফম অসিদা অচৌবা তেন্ত সিতী অমসু শাখি। মসিনা লমকোইবশিংদা খুদোংচাবা পীবা হেনগৎলগনি। হৌজিক রনকী ময়াইদা ধোরদোদগী ধৌলাবীরা ফাওবা অনৌবা লম্বী অমা খোঙজেল য়াংনা শেম্লি। লাক্কদৌরিবা মতমশিংদা মসিনা ভুজ অমসুং নোংচুপ কচ্ছতগী খদীর অমসুং দৌলাবিরা এক্সেন্সন ফাওবা চত্থোক-চৎশিন তৌবদা খুদোংচাহল্লগনি। মসিনা কচ্ছকী মীয়াম, ওন্তপ্রিনোরশিং, লমকোইবশিংদা কান্নবা ফংহল্লগনি। খাবদাদা শারিবা রী-ন্যুএবল ইনর্জী পার্ক অসিসু খোঙজেল য়াংনা শারি। মমাংদা নোংচুপ কচ্ছ অমসুং ভুজতগী ধৌলাবীরা য়ৌনবা হোৎনবদা কনাগুম্বা অমনা ভচাউ-রাপর ফাওদুনা চৎনরম্মি। হৌজিক্তি অদোমনা খাবদাদগী ধৌলাবীরাদা চুম্না চৎপা য়ারে। তুরিজম থৌগৎনবা নারায়ন সরোবর, কোতেশ্বর, মাতা কা মন্দ, ধোরাদো তেন্ত সিতী অমসুং ধৌলাবীরা, মফমশিং অসিদা লায়না চৎপা য়াহল্লগনি।

মরুপশিং,

ঙসি অসি ঐখোয় পুম্নমক্কী ইকাই খুম্নরবা অতলজীগী মপোক কুমওনসু তারি। অতলজীনা কচ্ছতা অখন্নবা মীৎয়েং চংলমখি। অতলজীনা য়ুহর হাখ্রবা মতুং গুজরাত্তা পাইখৎখিবা চাউখৎ-থৌরাংগী থবকশিংদা অমত্তা ওইনা পুন্না লেপ।ও। ঙসি কচ্ছ অসি চাউখৎ লম্বীদা লাকপা অসি উবদা অতলজীনা শোইদনা অপেনবা পোক্লমগনি, মহাক্না হরাওবা পোক্লমগনি। ঐখোয়গী মশখ নাইবা মীওইশিং অমসুং ইকাই খুম্নরবা কচ্ছকী মীয়ামগী থৌজালশিং অসি অসুম্না অদুমক লেংদনা ফংগনি হায়না ঐখোয়না থাজৈ। অমুক হন্না ঐহাক্না ময়ামদা গুরুপুরবকী য়াইফ-পাইজেল পীজরি।

হন্না-হন্না থাগৎচরি!

***