হর হর মহাদেব!

শ্রী শদগুরু চরন কম্লেভ্যো নমোঃ।

ফম্বাক্তা লেংশিনবীরিবা উত্তর প্রদেশকী রাজ্যপাল, শ্রীমতি অনন্দিবেন পতেলজী, উত্তর প্রদেশকী ইচঙ-থৌরবা কর্ময়োগী মুখ্য মন্ত্রী, শ্রীমান য়োগী অদিত্যনাথজী, সদগুরু অচার্য় শ্রী স্বতন্ত্রদেবজী মহারাজ, সন্ত প্রৱর শ্রী বিগ্যান্দেবজী মহারাজ, কেন্দ্রগী মন্ত্রী-মদোলদা লৈরিবা ঐহাক্কী মরুপ অমসুং লমদমসিগী এম.পি., শ্রী মহেন্দ্র নাথ পান্দেজী, য়োগীজিগী মন্ত্রী মন্দলগী মনুংদা লৈবীরিবা অদোমগী মীহুৎ, শ্রীমান অনিল রাজভরজী, লৈবাক অমসুং মীরমদগী লাকপীরিবা লাইনীংবা অমসুং লৌশিং তানবা লাক্লিবশিং অমসুং ঐহাক্কী নুংশিরবা ইচিল-ইনাওশিং!

কাশিগী শক্তি অসি মতম কুইনদগী লৈরক্লবা অমা ওইবতা নত্তনা মসিনা অনৌবা শক্তম লৌবগী মওংসু লেপ্ত্রি। ঐহাক্না কাশিদা ঙরাংগী নুমিত্তা মহাদেবকী খুয়াখাদা চাউরবা “ভিশ্বনাথ ধাম”বু মীয়ামদা শিন্নজখি অমসুং বিহঙ্গম য়োগ সংস্থানগী মশক থোক্লবা থৌরম অসি ঙসি পাংথোক্লি। অসিগুম্বা লাইরৈবাক অসিদা লাইনীংথৌনা মহাক্কী অপাম্বা কয়া পাংথোক্নবগীদমক্তা শাধুশিংবু মহাক্কী পাম্বৈ ওইনা শিজিন্নৈ অমসুং শাধুশিংগী নীংজবনা মহৈ য়ানবা মতমদা নুংঙাই য়াইফবগী ফিভমসু মথন্নতা লাকচদুনা লৈররি।

ভারত পুম্বগী বিহঙ্গম য়োগ সংস্থান্না ৯৮শুবা মপোক কুমওন পাংথোকপা, সদগুরু সদাফলদেওজীনা নিংতম ইহৌদা তেংবাংখিবগী খোঙচৎনা চহি ১০০ মপুং ফারকপা অমসুং লৈবাক্কী নিংতম্বনা চহি ৭৫ মপুং ফারকপা ঐখোয়না ঙসি উবা ফংলি। ঐখোয় পুনবনা পুম্নমক অসিগী অমত্তা ওইবা শাখি ওইরি। অসিগুম্বা তান চানবা থৌদোকশিংগা লোয়ননা ঙসি অসি গীতা জয়ন্তীগী শেংলবা নুমিৎসু অমুক ওইরি। কুরুক্ষেত্রগী লানফমদা লান্মীশিংনা অমগা অমগা থেংনখিবা ঙসিগী নুমিৎ অসিদা মীওইবা খুন্নাইনা য়োগ, স্পিরিচুএলিতী অমসুং পরামর্থকী খ্বাইদগী মতিক-মগুন লৈরবা লৌশিং ফংজখি। ঐহাক্না গীতা জয়ন্তীগী নুমিৎ অসিদা ভগবান কৃষ্ণগী খুয়াখাদা কোক নোঞ্জদুনা লৈবাক মীয়ামদা থম্মোই শেংনা য়াইফ পাউজেল পীজরি।

ইচিল ইনাওশিং,

সদগুরু সদাফলদেওজীনা খুন্নাই মিৎকপ থোক্নবগীদমক্তা অমসুং ‘বিহঙ্গম য়োগ’বু মীপুম খুদিংদা য়ৌহন্নবগীদমক্তা জৈগ্যা তৌখি অমসুং ঙসিদি, মদুগী মরু হুনখিবা অসিনা ঐখোয় পুম্নমক্কী ইমাঙদা চাউরবা শনা খোঙনাংগুম্না লেপ্তুনা লৈরি। ঙসিদি জৈগ্যা কুন্দ লিশিং মঙাগা চাম্মগা অমগী মালেমগী শান্তি লৈনবা বেদগী মহাজৈগ্যগী মওংদা, অসুক য়াম্না চাউরবা য়োগ আসন তম্ফমগী মওংদা অমসুং লাখ কয়াগী খোংবুরোইগী চাউরবা ইমুং অমগী মওংদা, ঐখোয়না ঙসি লাইওইরবা মীওই অসিগী ৱারেপ অসিগী মহৈগী নুংঙাইবা লৌবা ফংজরি।

ঐহাক্না সদগুরু সদাফলদেওজীবু ইকায় খুম্নজরি, মহাক্কী লাইগী মওং চেল্লবা ৱাখল্লোনগী মফমদা কোক নোঞ্জরি। ঐহাক্না শ্রী স্বতন্ত্রদেভজী অমসুং মহারাজ অমদি শ্রী বিগ্যান্দেভজী মহারাজপু চৎনবী অসিবু হিংদুনা থম্বীবগা লোয়ননা অনৌবা মাইকৈ অমসু পীবীবগীদমক্তা ইকায় খুম্নবা উৎচরি। মসিনা মরম ওইরগা পাক চাউরবা লাইগী মওং চেল্লবা লমদম অমা শেম-শাগৎলি। ঐহাক্না মফমসিবু য়েংজবা ফংজরে। মসিনা লোইশিল্লকপা মতমদা কাশিখক্কী নত্তনা ভারত পুম্বগী য়েংবদা পুক্নিং শুমহৎপা মফম অমা ওইরগনি।

মরুপশিং,

ইরৈবাক অসি অদুক্কী মতিক মতিক মগুন লৈ, মদুদি, ঐখোয়গী লৈবাক্কী খুদোংচাদবা মতম লাকপা খুদিংদা মতমগী খোঙজেলদা অহোংবা পুরক্নবগীদমক্তা শাধু খরা অদুমক থোক্লকই। মালেম্না নিংতম্বগী খ্বাইদগী অথৌববু মহাত্মা হায়না কৌনরিবা অসি ভারতকীনি, নিংতম ইহৌগী মনুংদা ফাওবা স্পিরিচুএল ওইবা ৱাখল্লোন লেপ্তনা চেন্থবা অসিসু ভারত্তনি অমসুং নিংতম্বগী চহি ৭৫ ফারকপগী হরাওবা পাংথোকপগী মরক্তা লৌশিং তানবশিংগী চহিগী কুমওন পাংথোকপা অসিসু ভারতনি।

মরুপশিং,

মখোয়গী গুরুদেবনা লৈবাক্কী নিংতম ইহৌদা মাইকৈ তাকখি হায়বগীদমক্তা মফম অসিগী লৌশিং তানবশিংনা চাউথোকচবা পোকচৈ অমসুং লোইলম লৈঙাক্তা তেংবাংদবগী ইহৌদা খ্বাইদগী অহানবা ওইনা কৈশুমশঙদা চঙখিবা মীওইসু সদাফলদেওজীনি। মহাক্না কৈশুমশঙদা লৈরিঙৈদা ‘স্বরভেদ’গী ৱাখল্লোন লাকখি অমসুং মদুদগী থোক্লক্লবা তুংদা মদুগী মশক-মতৌ পীখি।

মরুপশিং,

চহি চা কয়াগী পুৱারী অসিদা ঐখোয়গী নিংতম ইহৌগী অসিগুম্লবা ৱারী কয়া লৈ অমসুং মখোয়শিংনা লৈবাকপু অমত্তা ওইনা পুন্দুনা থমখি। স্পিরিচুএল ওইবা পুন্সি থাদোক্তুনা নিংতম ইহৌদা মপুন্সি কত্থোকখিবা মখোয়গুম্বা শাধু কয়া অমা লৈ। ঐখোয়গী নিংতম ইহৌগী স্পিরিচুএলগী ইচেল অসি চপ চানা ইথিনফম থোকপা মওংদা পুৱারীদা ইরমদ্রে। ঐখোয়না নিংতম্বগী চহি ৭৫ মপুং ফারকপগী হরাওবা ফোংদোক্লিঙৈ অসিদা মসিগী ইচেল অসিবুসু মাং থানা পুথোকপা অসি ঐখোয়গী থৌদাংনি। মরম অদুনা, লৈবাক্কী নিংতম ইহৌদা ঐখোয়গী গুরু, শাধু অমসুং লাইনীংবশিংনা কত্থোকখিবশিংবু ঐখোয়না নীংশিংলিবনি, লাক্কদৌরিবা চারোন-শুরোন্দা অসিগুম্বা কথহোকখিবশিংবু খঙহল্লিবনি। বিহঙ্গম য়োগ সংস্থান্নসু মসিগী থৌদাং য়াবা অসিদা ঐহাক্না য়াম্না নুংঙাইবা ফাওই।

মরুপশিং,

ঐখোয়গী চৎনবী, লৌশিং অমসুং ৱাখল্লোনবু পাকথোক চাউথোকহনবা তুংগী ভারতপু মপাঙ্গল হেন্না লৈহন্নবগীদমক্তা পাংথোকপা হায়বসি হৌজিক্কী মতমসিগী তঙাই ফদবনি। কাশিগুম্বা ঐখোয়গী স্পিরিচুএল অমসুং নাৎকী ওইবা মফম অসিনা হায়রিবা পান্দমশিং ফংনবা কান্নরবা পাম্বৈ অমা ওইবা য়াই। ঐখোয়গী চাউখৎলকপগী অসিগুম্বা শহরনা মালেমগী লমজিং-লমতাকপা ওইবা য়াই। বনারসকুম্বা শহরশিংনা লুরবা তাঞ্জা ফাওবদা ভারতকী আর্ত, ওন্তোপ্রিনর্শিপকী শক্তাক্কী হৌরকফমবু নীংথিনা ঙাক শেন্দুনা থমখি। মরু অমা লৈবা মতমদা, মদুদগী উজাও হৌরকই। মরম অদুনা, ঐখোয়না ঙসি বনারসকী চাউখৎপগী ৱারী শাবা মতমদা, মসিনা ভারত পুম্বা চাউখৎপগী লম্বী অমসু য়াৎলিবনি।

ইচিল ইনাওশিং,

ঙসিদি, অদোম লাখ কয়ানা মফমসিদা লাক্তুনা লৈরি। অদোম্না তোঙান-তোঙানবা রাজ্য, শহরশিংদগী লাক্লি। অদোম্না ইশাগী থাজবা, পাঙ্গল অমসুং তৌবা ঙম্বগী মতিক কয়া পুদুনা কাশিদা লাকপীরি। অদোম্না মফমসিদগী হনখিবা মতমদা, অনৌবা ৱাখল্লোন, ৱারেপ, থৌজাল, লৌশিং কয়া পুদুনা চৎখিগনি। অদুবু, মমাংদা অদোম্না মফমসিদা লাকপা মতমদা করম্বা ফিভম ওইরম্বগে হায়বা অমুক্তা নীংশিংবীয়ু। অসুক য়াম্না শেংলবা মফম অসিনা মীয়াম কয়াবু নীংবা কাইহল্লম্মি। ঙসিদি, ফিভম অসি হোংলক্লি।

লৈবাক অমসুং মীরৈবাক্তগী মীওই কয়া মফমসিদা লাকই, এয়রপর্ত্তগী থোক্লকপা মতমদা মখোয়না অহোংবা খরা লৈবগুম ফাওই। এয়রপোর্ত্তগী শহর ফাওবা লাকপদা হৌজিক্তি মতম য়াম্না চঙদ্রে। কাশিনা রিংরোদকী থবকসু অমুক্তা পাংথোকখিদ্রিবা তেল্লবা মতমদা লোইশিনখি। অচৌবা অমসুং মপানগী গারীশিং হৌজিক মপান্দা ওইনা চত্থোক্নখ্রে। বনারস্তা লাক্নবা শোরোক কয়া অমা পাকথোক-চাউথোক্লে। শোরোক্কী খোঙচত্তা বনারসতা লাকপা মীওইশিংনা অসিগুম্বা খুদোংচাবশিং অসিনা মরম ওইদুনা খেন্নবা কয়া উরে, ফিভম অসি মখোয়না নীংথিনা খঙলে।

অদোম্না মফমসিদা য়ৌরক্লবা তুংদা, বাবা ভিশ্বনাথ খুরুম্বা চৎপা ওইরো নত্ত্রগা ইমা গঙ্গা তোর্বান্দা চৎপা ওইরো, মফম খুদিং অসি কাশিগী হান্নগী মতিক মঙালগুম্না লংবা হেনগৎলক্লি। কাশিদা মৈগী তরা তিংবশিং হৌজিক্তি লৈনুংদা পুবগী থবক চত্থরি, লিতর লাখ কয়াগী সিৱেজ ত্রিৎমেন্ত তৌবগী থবক হৌজিক চত্থরি। অসিগুম্বা চাউখৎপগী মওং-মতৌ অসিদগী লাইনীংবা অমসুং লমকোয়বা লাকপা মীওই খুদিংনা কান্নবা ফংনরি।

ত্রেদ ফেসিলিতেসন সেন্তর ওইরো, রুদ্রাক্স কনভেন্সন সেন্তর ওইরো, নত্ত্রগা ফিশা-লোনশাবা নত্ত্রগা মখুৎ-মশা হৈবশিংগীদমক্তা চত্থরিবা থবক-থৌরমশিং ওইরো, ঙসিদি, কাশিগী স্কিলনা অনৌবা পাঙ্গল কয়া ফংলে। হকশেলগী সেক্তর কয়াদসু মতমগা চান্নবা খুদোংচাবা অমসুং ইনফ্রআস্ত্রকচরনা মরম ওইরগা অনৌবা মেদিকেল হব অমা ওইনা চোংথোরক্লি।

মরুপশিং,

ঐহাক্না কাশিদা লাকপা মতমদা নত্ত্রগা দিল্লীদা লৈবা মতমদসু বনারসতা পাংথোক্লিবা চাউখৎ-থৌরাংগী থবকশিংবু হেন্না খুমাঙ চাউশিন্নবা হোৎনদুনা লৈ। ঙরাং অহিংগী পুং ১২-১২.৩০গী মতুংদা ঐহাক্না মতম হেক ফংবগা, কাশিদা পায়খৎলিবা থবকশিং অমসুং লোইখ্রবা থবকশিং য়েংনবা থোকখি। গরোলিয়াগী মফমদা মশক ফজহনবগী পাংথোক্লিবা থবকশিং অসি পুক্নিং শুমহৎপা মওং অমা ওইরক্লে। ঐহাক্না মফমদুগী মীয়াম কয়া অমগা ৱারী শাখি। ঐহাক্না মন্দুৱাদিদা লৈবা বনারস রেলৱে স্তেসন্সু য়েংলে। স্তেসন অসি য়াম্না নীংথিজনা শেমদোক্লম্লে। অরিবা বনারসপু তেক্ত-খায়দুনা থম্বগা লোয়ননা অনৌববু তরাম্না ওকপা থৌওংনা ভারত্তা অনৌবা মাইকৈ অমা পীরি।

মরুপশিং,

মসিগী চাউখৎ-থৌরাংশিং অসিনা বনারসকী মীয়াম খক্তদা নত্তনা মফমসিদা লমকোয়বা লাক্লিবা মীওইশিংদসু অফবা ৱাখল্লোন খলহল্লে। করিগুম্বা ঐখোয়না ২০১৯-২০গী ৱারী শারবদি, ২০১৪-১৫গা চাংদম্নবদা মফমসিদা লাকপা লমকোয়বশিংগী মশিংনা শরুক অনি ওইরে। ইং ২০১৯-২০দা, কোরোনাগী মতমদা বাবৎপুর এয়রপোর্তগী মীওই লাখ ৩০ হেনবনা চত্থোক-চৎশিন তৌনখি। কাশিনা অসিগুম্বা অহোংবসিদগী করিগুম্বা তৌগে খল্লবদি, লম্বী অদুমক লাকই হায়বদু তাক্লে।

অসিগুম্বা অহোংবশিং অসি ঐখোয়গী অতোপ্পা লাইনীংফমশিংদসু উবা ফংলে। খুদোংচাদবা কয়া লৈবা কেদর্নাথ, ইং ২০১৩গী অকায়-অতোয়গী মতুংদা মীয়াম চত্থোক-চৎশিন তৌবা হন্থরুরবনি, হৌজিক্তি মফমদুদসু হান্নদগী হেনবা মশিংগী লাইনীংবা লাকপা হৌরে। মসিদগী চাউখৎপা অমসুং থবক পীবগী খুদোংচাবা কয়া অমা লৈহল্লে, নহাশিংনা মশাগী মঙফাওননবা হোৎনবগী পাঙ্গল ফংনরি। অসিগুম্বা থাজবা অসি লৈবাক পুম্বদা উবা ফংলে, অসিগুম্বা খোঙজেলগা লোয়ননা, লৈবাক অসিনা অনৌবা মতমগী মাইকৈদা খোঙ থাংজিল্লি।

মরুপশিং,

সদগুরু সদাফলজীনা স্বরভেদতা অসুম্না হায়বীরম্মিঃ

দয়া করে সব জীব পর, নীচ উঞ্চ নহি জান।

দেখে অন্তর আত্মা, ত্যাগ দেহ অভিমান।।

মসিনা হায়বদি, পুম্নমকপু নুংশিবা, পুম্নমক্কী খনবীবা, অৱাং-অনেম অমসুং তাথী তাওই তৌবদগী নিংতম্বা হায়বনি। লৈবাক্তা ইথিল পীরিবসু মসিমক্নি। ঙসি, ঐখোয়গী লৈবাক্কী মন্ত্রা অসিদিঃ ‘সবকা সাথ, সবকা বিকাস, সবকা বিশ্বাস’। ইশাগী ওইজবা থিবদগী নান্থোক্তুনা ঙসিদি ইরৈবাক অসি ‘সবকা প্রয়াস’কী ৱাখল্লোনগা লোয়ননা মাং থানা তুংলমচৎকীদমক্তা চৎলি।

মরুপশিং,

সদগুরুনা নিংতম ইহৌগী মনুংদা ঐখোয় খুদিংদা স্বদেশিগী মন্ত্রা অমা তাকপীরম্মি। মদুবু ইন্দুনা লৈবাক অসিনা “মরোমদোম লেপচবা ঙম্বা ভারত ওইহন্নবা খোঙথাং” পায়খৎপা হৌরে। ঙসিদি, লৈবাক্কী লোকেলগী কারবার, থবক পীবগী থৌওং অমসুং পোত্থোকশিংনা অনৌবা পাঙ্গল লৈনরক্লি অমসুং লোকেল অসি গ্লোবেল ওইরক্লি। গুরুদেবনা স্বরবেদদা ঐখোয়দা য়োগ, বিহঙ্গমগী লম্বী তাকপীরম্মি। য়োগনা মীপুম খুদিংদা য়ৌবা অমসুং ভারতকী য়োগগী মপাঙ্গল অসি মালেম খুদিংদা লৈহনবা হায়বসি গুরুদেবগী পামজবনি। ঙসিদি, মালেম শিনবা থুংবনা য়োগগী নুমিৎ পাংথোকপা, য়োগগী কাংলোন ইনবা ঐখোয়না উবা ফংবসিদা গুরুজীগী মঙালন অসি মঙফাওনবগুম খনলে।

মরুপশিং,

ঙসি, লৈবাক্কী নিংতম্বগী অমৃতকী মতমসিদা ভারতকীদমক্তা স্বরাজ মরু ওইরিবা অসিগা মান্ননা সুরজ অসিসু মরু ওই। হীরম অসিগী লম্বীদি ভারতকী লৌশিং-বিগ্যান, পুন্সি মহিং  অমসুং থৌওংশিংদগী লাক্কনি। বিহঙ্গম য়োগ সংস্থান্না চহি কয়াদগী ৱাখল্লোন অসিবু খুমাং চাউশিনহন্দুনা লাক্লি হায়বা ঐহাক্না খঙই। অদোমগী খোল্লাওদি- “গাৱো বিস্বসয় মাতর”নি। গাউমাতাগা লৈনরিবা মরীবু মপাঙ্গল কনখৎহন্নবগীদমক্তা লৈবাক অসিদা গো-ধনবু খুঙ্গংশিংগী শেন্মিৎলোনগী য়ুম্বী ওইহন্নবগীদমক্তা থৌরাং কয়া অমা পায়খৎলি।

মরুপশিং,

ঐখোয়গী গো-ধন অসি লৌমীশিংগী শঙ্গোম পুথোকপগী পাম্বৈ অমা ওইবতা নত্তনা শনশিংনা চাউখৎপগী অতোপ্পা মাইকৈশিংদা তেংবাংহন্নবা ঐখোয়না হোৎনগদবনি। ঙসিগী মালেম অসিনা হকশেলদা য়াম্না কন্না মাই ওনশিল্লক্লি, কেমিকেলশিংবু থাদোক্তুনা ওর্গানিক ফার্মিংদা মালেমগী মিৎয়েং চঙনরক্লি, ঐখোয়গী মফমসিদসু শনথী অসিদা ওর্গানিক ফার্মিংনা মখা য়াম্না পোল্লম্মি, ঐখোয়গী মৈগী, ইনর্জীগী তঙাই ফদবশিংবু মসিনা য়াম্না তেংবাংলম্মি। ঙসিদি, লৈবাক অসিনা গোবর-ধন স্কিমগী মখাদা বাইওফুএলবু খুমাং চাউশিনহল্লি, ওর্গানিক ফার্মিংবু খুমাং চাউশিনহল্লি। থৌওংশিং অসিনা মরম ওইদুনা অকোয়বগী ফিভমগী ঙাক-শেনবসু ওই।

ঙসিদগী নুমিৎ নিনিগী মতুংদা, তাং ১৬তা ‘জিরো বজেৎ-নেচরেল ফার্মিং’দা লৈবাক্কী অচৌবা থৌরম অমা পাংথোক্কদৌরি। মসিদা লৈবাক শিনবা থুংবগী লৌমীশিংনা শরুক য়াগনি। ঐহাক্না অদোমসু নুমিৎ অসিদা মহৌশাগী ওইবা লৌউবগী থৌওংগী মতাংদা খঙবা য়াবা লৌশিং কয়া য়ারিবমখৈ লৌশিনবীহৌ অমসুং লৌমীশিংগী ময়ুম-ময়ুমদা কোন্না চত্তুনা তাকপীয়ু হায়জনীংই। মসিগী মিসন অসি মীয়াম খুদিংনা শরুক য়াবা ইহৌ অমা ওইবা য়াগনি অমসুং মসিদা অদোম খুদিংনা মরু ওইবা থৌদাং য়াবা য়াগনি।

মরুপশিং,

নিংতম্বগী অমৃত মহোৎসব অসিদা লৈবাক্কী ৱারেপ কয়াগী মতাংদা থবক তৌরি। বিহঙ্গম য়োগ সংস্থান, সদগুরু সদাফলদেজীগী পাউতাকশিংগী মতুং ইনবা ওইনা শাংলবা মতমদগী খুন্নাইগী য়াইফ থৌরাংগী খোঙথাং কয়া অমা পায়খত্তুনা লাক্লি। ঙসিদগী চহি ২গী মতুংদা, লৌশিং তাল্লিবা অদোম খুদিংনা ১০০শুবা কনভেন্সনগীদমক্তা মফমসিদা অমুক পুনগনি। মসিদি য়াম্না ফরবা চহি ২গী মতম্নি।

ৱাফম অসি খন্নরদুনা, ঐহাক্না অদোম খুদিংদা ৱারেপ খরা লৌমিন্নসি হায়না হায়জনীংই। মসিগী ৱারেপ অসিদি সদগুরুজীগী ৱারেপশিংবু মপুং ফাহনবা ঙম্বা ওইগদবনি অমসুং মসিদা লৈবাক্কী অপাম্বশিংসু মনুং চলহনগদবনি। ৱারেপশিং অসিদি পাংথোকপগী খোঙজেল থুনবা অমসুং মথংগী চহি অনিগী মনুংদা অমত্তা ওইনা মঙফাওনবা ঙমহন্নবা শাফু পীগদবা অমা ওইবা য়াই।

অহানবা ৱারেপ অসিদি ইচানুপীশিংবু মহৈ তম্বীদুনা মখোয়গী মরক্তা স্কিল লৈহনবগী ওইগদবনি। মশাগী ইমুং-মনুংগা লোয়ননা, খুন্নাইদা থৌদাং লৌবা ঙমগদবা মীওইশিংনা লাইরবা ইচানুপী অমা নত্ত্রগা অনিগী স্কিল লৈহনবগী থৌদাংসু লৌগদবনি

অতোপ্পা ৱারেপ অসিনা ঈশিং মাঙহন্দনবগী ওইবা য়াই। ঐখোয়না ঐখোয়গী তুরেল, গঙ্গাজী অমসুং ঈশিং থোকফম খুদিংমক লু-নান্না থমগদবনি। অদোমগী লুপনা মসিগীদমক্তা অনৌবা খোঙজং অমা হৌদোকপা য়াই। ঐহাক্না হান্নসু হায়খ্রবা অদুনি, লৈবাক্না মহৌশাগী ওইবা লৌউবগী থৌওংদা মিৎয়েং চঙলি। মরম অদুনা, লৌমী ইচিল ইনাও লাখ কয়াবু ইথিল পীবদা অদোম পুম্নমক্না য়াম্না চাউনা তেংবাংবা য়াই।

ঐখোয়না ইশাগী মনাক নকপশিংবু লু-নান্না থম্বদা য়াম্না মরু ওইবা মিৎয়েং চঙগদবনি। মীয়ামগী মফম অমত্তদা অমোৎ-অকায় লৈহন্দনবা ঐখোয়না চেকশিনগদবনি। খুন্নাইদা কান্নবা পীগদবা সেবা মখাল খরা ঐখোয়না ইশ্বরগী মইংদা শোইদনা পাংথোকফম থোকই।

ঙসিগী য়াইফরবা নুমিৎ অসিদা শাধুশিংগী য়াইফ-থৌজালদগী ঐখোয়গী ৱারেপশিং অসি শোইদনা মাই পাক্কনি হায়না ঐহাক্না থাজবা থম্মি অমসুং মসিবু মাই পাকহনবদা অনৌবা ভারতনা শোইদনা মতেং পাংগনি।

থাজবা অসিগা লোয়ননা, ঐহাক্না মীয়াম খুদিংবু থাগৎচরি।

ঙসিগী য়াইফ্রবা থৌরম অসিদা ঐহাকপু অদোম খ্বাইগী মরক্তা তিনবা ফংজবগী খুদোংচাবা পীবীবগীদমক্তা ঐহাক্না ইকায় খুম্নরবা স্বামীজীবু ইকায় খুম্নবা উৎচরি। অসিগুম্বা শেংলবা মফমদা লাকপগী তাঞ্জা ফংজরে। ঐহাক্না অদোম খ্বাই পুম্নমকপু অমুক্কা হন্না কোক নোঞ্জরি।

হর হর মহাদেব!

অদোম্বু য়াম্না থাগৎচরি!

*****