প্রধান মন্ত্রী, শ্রী নরেন্দ্র মোদীনা ঙসি লোক কলয়ান মার্গতা লৈবাক্কী ভেক্সিন শাবশিংগা ৱারী শাখ্রে।

প্রধান মন্ত্রীনা ভারতনা ভেক্সিন দোজ করোর ১০০ কাপ্পা ঙম্বগী মশক থোক্না মাই-পাকপা ঙমহনখিবা ভেক্সিন শাবশিংগী হোৎনজমনবু থাগৎপগা লোয়ননা মখোয়না ভারতকী মাই-পাকপগী ৱারী শেম্বদা মরু ওইবা থৌদাং লৌখি হায়নসু ফোংদোকখ্রে। মখোয়না লাইচৎ মনুংদা হোৎনবা কনখিবা অমসুং থাজবগী ইথিল পীখিবগীসু মহাক্না থাগৎপা ফোংদোকখি।

চহি অমগা মখায়গী মনুংদা খঙখিবা খ্বাইদগী ফবা থৌওংশিংবু লৈবাক অসিনা কাংলোন অমা ওইনা শেম্বগী মথৌ তাই অমসুং তাঞ্জা অসি লৌদুনা ঐখোয়গী থৌওংশিংবু মালেমগী থাক্কা চান্নহন্নবা শেমদোকপগী খুদোংচাবা অমনি হায়নসু প্রধান মন্ত্রীনা ফোংদোকখি। তীকা থাবগী খোঙজংনা মাই পাকপদগী মালেম শিনবা থুংবনা ভারত্তা ইকায়খুম্ননা য়েংনরি হায়নসু মহাক্না মখা তানা ফোংদোকখি। তুংদা লাক্কদবা শিংনবা কয়া থেংনবা ঙম্নবগীদমক্তা ভেক্সিন শাবশিংনা লেপ্তনা তেংবাংমিন্নদুনা থবক তৌমিন্নগদবনি হায়নসু মহাক্না ফোংদোকখি।

ভেক্সিন শাবশিংনা প্রধান মন্ত্রীগী মিৎয়েঙ অমসুং মতিক লৈনা লুচিংবগী থৌওংগা লোয়ননা মহাক্না ভেক্সিন শাবগী থৌওংশিংদা লেপ্তনা পাউতাক পীবিবা অমসুং শৌগৎপগীদমক্তা থাগৎপা ফোংদোকখি। মখোয়না সরকার অমসুং ইন্দস্ত্রীগী মমাংদা অমুক্তা উখিদ্রিবা খুৎশম্নবগী থৌওংবুসু থাগৎপগা লোয়ননা থবক তৌবগী কাংলোন্দা অহোংবা পুরকপা, থবক-থৌরম লাইথোকহনবা, মতম চানা অয়াবা পীবা অমসুং থৌওংশিং অসি পাংথোক্লিঙৈদা সরকারগী থৱাই য়াওবা অমসুং শৌগৎনীংবগী মওং-মতৌবুসু থাগৎপা ফোংদোকখি। লৈবাক অসিনা অরিবা কাংলোন ইন্দুনা অদুম চৎলম্লবদি, মখোয়গী থৌওংশিংনা কা-হেন্না থেংথরম্বা য়াই অমসুং হৌজিক ফংলিবা তীকা থাবা ঙম্বগী থাক অসি য়ৌরমদবা য়াই হায়না মখোয়না মখা তানা ফোংদোকখি।

থবক তৌবগী কাংলোনশিংদা সরকারনা অহোংবা পুরকখিববু শ্রী অদার পুনাৱালানা থাগৎপা ফোংদোকখি। লাইচৎ মনুংদা প্রধান মন্ত্রীনা লুচিংবগী থৌদাং পাংথোকখিবগী মওংবু শ্রী সাইরস পুনাৱালা থাগৎখি। দাঃ কৃষ্ণ এল্লানা প্রধান মন্ত্রীবু কোভেক্সিন কাপখিবা অমসুং মসিবু পুথোকপগী মনুংদা লেপ্তনা শৌগৎপীখিবগীদমক্তা থাগৎপা ফোংদোকখি। শ্রী পঙ্কজ পতেলনা প্রধান মন্ত্রীবু য়ু.এন. জেনেরেল এসেমব্লীদা দি.এন.এ.দা য়ুম্ফম ওইবা ভেক্সিনগী মতাংদা ৱাফম ফোংদোকখিবগীদমক্তা থাগৎপা ফোংদোকখি। কুমারী মহিমা দতলানা লৈবাক অসিনা ভেক্সিন কাপ্পগী মশক থোকপা মাই-পাকপা ফংবা ঙমহনখিবা প্রধান মন্ত্রীগী মিৎয়েংবু থাগৎখি। দাঃ সঞ্জয় সিংহনা ভেক্সিন শাবগী হীরমদা অনৌবা থৌওং পাংথোকপা অমসুং বেকৱার্দ ইন্তিগ্রেসনগী মরু ওইবগী মতাংদা ৱাফম থমখি। শ্রী সতিশ রেদ্দীনা থবকশিং অসি পাংথোকপদা সরকার অমসুং ইন্দস্ত্রীনা তেংবাংমিন্নখিববু থাগৎখি। দাঃ রাজেশ জেন্না লাইচৎ অসিগী অপুনবা মনুংদা সরকারনা লেপ্তনা ই-পাউ ফাওখিবগীদমক্তা থাগৎপা ফোংদোকখি।

ৱারী শাবগী থৌরমসিদা শ্রী সাইরস পুনাৱালা অমসুং শ্রী অদর পুনাৱালা, সীরম ইন্সতিত্যুৎ ওফ ইন্দিয়া; দাঃ কৃষ্ণ এল্লা অমসুং কুমারী সুচিত্রা এল্লা, ভারত বাইওতেক ইন্তর্নেস্নেল লিমিতেদ; শ্রী পঙ্কজ পতেল অমসুং দাঃ শেরভিল পতেল, জাইদস কেদিলা; কুমারী মহিমা দাতলা অমসুং শ্রী নরেন্দর মন্তেলা, বাইওলোজিকেল ই-লিমিতেদ; দাঃ সঞ্জয় সিংহ অমসুং শ্রী সতিশ রমনলাল মেহতা, জেন্নোভা বাইওফার্মাস্যুতিকেল্স লিমিতেদ; শ্রী সতিশ রেদ্দী অমসুং শ্রী দীপক সাপ্রা, দাঃ রেদ্দী’স লেব অমসুং পেনাসিয়া বাইওতেক লিমিতেদকী দাঃ রাজেশ জেন অমসুং শ্রী হর্শিত জেন; কেন্দ্রগী হকশেল মন্ত্রী, এম.ও.এস. হেল্থ অমসুং এম.ও.এস. কেমিকেল্স অমসুং ফর্তিলাইজরনা শরুক য়াখি।

***