ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦି ଆଜି ଭିଡିଓ କନଫରେନ୍ସିଂ ମାଧ୍ୟମରେ ଅଖିଳ ଭାରତୀୟ ଚିକିତ୍ସା ସଂସ୍ଥା (ଏମ୍ସ) ନୂଆଦିଲ୍ଲୀର ଝାଜ୍ଜର ପରିସରରେ ରାଷ୍ଟ୍ରୀୟ କ୍ୟାନସର ସଂସ୍ଥାନରେ ଇନଫୋସିସ ଫାଉଣ୍ଡେସନ ବିଶ୍ରାମ ଗୃହର ଉଦଘାଟନ କରିଛନ୍ତି ।

କାର୍ଯ୍ୟକ୍ରମକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି ଯେ, ଏହି ଐତିହାସିକ ଦିନରେ ଆଜି ଭାରତ ୧ଠଠ କୋଟି ଭ୍ୟାକସିନ ଡୋଜର ଅଙ୍କ ପାର କରିଛି । ସେ କହିଛନ୍ତି ଯେ, ୧ଠଠ ବର୍ଷରେ ଆସିଥିବା ସବୁଠାରୁ ବଡ଼ ମହାମାରୀର ମୁକାବିଲା କରିବା ପାଇଁ, ଦେଶରେ ବର୍ତ୍ତମାନ ୧ଠଠ କୋଟି ଭ୍ୟାକସିନ ଡୋଜର ମଜବୁତ ସୁରକ୍ଷା କବଚ ରହିଛି । ପ୍ରଧାନମନ୍ତ୍ରୀ ଜୋର ଦେଇ କହିଛନ୍ତି ଯେ, ଏହି ଉପଲବ୍ଧି ପୁରା ଭାରତର ଏବଂ ଭାରତର ନାଗରିକମାନଙ୍କର ଅଟେ ।

ପ୍ରଧାନମନ୍ତ୍ରୀ ଦେଶର ଭ୍ୟାକସିନ ତିଆରି କରିଥିବା ସମସ୍ତ କମ୍ପାନୀମାନଙ୍କୁ, ଭ୍ୟାକସିନକୁ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନ ପର୍ଯ୍ୟନ୍ତ ପହଞ୍ଚାଇଥିବା କର୍ମଚାରୀଙ୍କୁ, ଭ୍ୟାକସିନ ଦେବାରେ ଜଡ଼ିତ ଥିବା ସ୍ୱାସ୍ଥ୍ୟକ୍ଷେତ୍ରର ବୃତ୍ତିଧାରୀଙ୍କୁ ଧନ୍ୟବାଦ ଜଣାଇଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ, ଆଜି ଏମ୍ସ ଝାଜ୍ଜରରେ କ୍ୟାନସର ଚିକିତ୍ସା କରିବା ପାଇଁ ଆସିବାକୁ ଥିବା ରୋଗୀମାନଙ୍କୁ ଏକ ବଡ଼ ସହାୟତା ମିଳିଛି । ସେ କହିଛନ୍ତି ଯେ, ରାଷ୍ଟ୍ରୀୟ କ୍ୟାନସର ସଂସ୍ଥାରେ ନିର୍ମିତ ଏହି ବିଶ୍ରାମ ଗୃହ, ରୋଗୀ ଏବଂ ତାଙ୍କର ପରିଜନଙ୍କର ଚିନ୍ତାକୁ କମ କରିବ ।

ପ୍ରଧାନମନ୍ତ୍ରୀ ବିଶ୍ରାମ ଗୃହର ଭବନ ନିର୍ମାଣ କରିବା ପାଇଁ ଇନଫୋସିସ ଫାଉଣ୍ଡେସନ ଏବଂ ତା' ପାଇଁ ଜମି, ବିଜୁଳି ତଥା ପାଣି ଉପଲବ୍ଧ କରାଇବା ପାଇଁ ଏମ୍ସ ଝାଜ୍ଜରର ପ୍ରସଂଶା କରିଛନ୍ତି । ସେ ଏହି ସେବା କାର୍ଯ୍ୟ ପାଇଁ ଏମ୍ସ ପ୍ରବନ୍ଧନ ଏବଂ ସୁଶ୍ରୀ ସୁଦ୍ଧା ମୂର୍ତ୍ତିଙ୍କ ଦଳକୁ ଧନ୍ୟବାଦ ବ୍ୟକ୍ତ କରିଛନ୍ତି ।

ପ୍ରଧାନମନ୍ତ୍ରୀ କହିଛନ୍ତି ଯେ, ଭାରତର କର୍ପୋରେଟ ସେକ୍ଟର, ନିଜସ୍ୱ କ୍ଷେତ୍ର ଏବଂ ସାମାଜିକ ସଂଗଠନଗୁଡ଼ିକ ନିରନ୍ତର ଭାବେ ଦେଶର ସ୍ୱାସ୍ଥ୍ୟସେବାକୁ ମଜବୁତ କରିବାରେ ନିଜର ଯୋଗଦାନ ଦେଇଛନ୍ତି । ସେ କହିଛନ୍ତି ଯେ ଆୟୁଷ୍ମାନ ଭାରତ - ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ଏହାର ଏକ ବଳିଷ୍ଠ ଉଦାହରଣ ଅଟେ ।

ପ୍ରଧାନମନ୍ତ୍ରୀ କହିଛନ୍ତି ଯେ, ଯେତେବେଳେ ରୋଗୀଙ୍କୁ ଆୟୁଷ୍ମାନ ଭାରତ ଯୋଜନା ଅନ୍ତର୍ଗତ ମାଗଣାର ଚିକିତ୍ସା ମିଳେ, ତାହା ସେବା ହୋଇଥାଏ । ସେ କହିଛନ୍ତି ଯେ ଏହା ସେବା ଭାବ ହିଁ ଅଟେ, ଯାହା ପାଇଁ ଆମ ସରକାର, କ୍ୟାନସର ପାଇଁ ପ୍ରାୟତଃ ୪ଠଠ ଔଷଧର ମୂଲ୍ୟକୁ କମ କରିବା ପାଇଁ ପଦକ୍ଷେପ ନେଇଛନ୍ତି ।

NS / MB