প্রধানমন্ত্রীগী লোইশঙ

প্রধান মন্ত্রীনা য়ু.এস.এ.গী উপ-রাস্ত্রপতি, মিস কমলা হেরিসকা উন্নবদা থমখিবা হৌদোকপগী ৱারোল

Posted On: 24 SEP 2021 9:14AM by PIB Imphal

ইকায় খুম্নরবশিং,

অহানবমক্তদা, ঐহাক অমসুং ঐহাক্কী কাঙবুবু তরাম্না ওকপীবগীদমক্তা, ঐহাক্না পুমকমকপু থাগৎচরি। ইকায় খুম্নরবশিং, থা খরগী মমাংদা অদোমগা ফোন্দা ৱারী শাবগী তাঞ্জা ফংজখি, মতম অদুদা ঐখোয়না কুপ্না ৱারী শাখি অমসুং অদোম্না চনিং তানা অমসুং ৱারী শাবীরকখিববু ঐহাক্না মতম পুম্বদা নীংশিংদুনা লৈগনি অমসুং মসিগীদমক্তা অদোম্বু অমুক হন্না থাগৎচরি। অদোম্না নীংশিংলবদি, মতমদু য়াম্না ৱারিবা মৎম্নি। ভারতনা কোবিদ-১৯গী অনিশুবা ৱেবকা লান্থেংনরিবা অমসুং ঐখোয়গী ওইনা য়াম্না ৱাবা মতম অমনি। ঐহাক্না মদোমগী মওংবু কৈদৌনুংদা কাওরোই অমসুং ঐহাক্না অদোম্বু থম্মোই শেংনা অমুক্কা হন্না থাগৎচরি। অদোম্না অশেঙবা মরুপ অমা ওইনা থম্মোই শেংনা পুন্না থবক তৌমিন্নবগী ৱাফম থম্লকখি অমসুং মদিগী হেক মথংদা, য়ু.এস. সরকার, য়ু.এস. কোর্পোরেত সেক্তর অমসুং ভারতকী কম্ম্যুনিতীশিংনা ভারত্তা তেংবাংনবা অমত্তা ওইনা থোক্লকখি।

ইকায় খুম্নরবশিং,

রাস্ত্রপতি বাইদেন অমসুং অদোম্না য়াম্না শিংননীংঙাই ওইবা মতমদা য়ুনাইতেদ স্তেৎসকী লুচিংবগী থৌদাং লৌখি অমসুং অতেনবা মতমগী মনুংদা, কোবিদ, ক্লাইমেৎ নত্ত্রগা ক্বাদ ওইরো, হীরমশিং অসিগী মতাং খুদিংদা অদোম্না মাই পাকপা কয়া ফংখি অমসুং য়ুনাইতেদ স্তেৎসনা মরু ওইবা খোঙথাং কয়া অমা পায়খৎখি।

ইকায় খুম্নরবশিং,

খ্বাইদগী চাউবা অমসুং লিবা গনতন্ত্র চৎপা লৈবাক ওইরিবা ভারত অমসুং য়ুনাইতেদ স্তেৎস, ঐখোয় অসি, তসেংনা, মহৌশাগী খোঙলোই অমনি। ঐখোয়গী মান্নবা ভেল্যু, জিওপোলিতিকেল ইন্তরেস্ত লৈ অমসুং ঐখোয়গী মরক্তা লৈরিবা তেংবাংনবা অমসুং খুৎশম্নবগী থৌওংসু লেপ্তনা হেনগৎলক্লি। স্প্লাই চেনশিংবু মপাঙ্গল কনখৎহনবা, অনৌবা অমদি চাউখৎলক্লিবা তেক্নোলোজী অমসুং স্পেসকী মতাং অসি অদোম্না থৱাই চঙবা হীরম্নি অমসুং ঐহাক্নসু মসিদা থৱাই চঙবগা লোয়ননা অখন্ননসু লৌই, অদুনা হীরমশিং অসিদা ঐখোয়না তেংবাংমিন্নবা য়াম্না মরু ওই।

ইকায় খুম্নরবশিং,

ভারত অমসুং য়ু.এস.কী মীয়াম মশেলগী মরক্তা লৈনরিবা অকনবা অমসুং মতিক লৈবা মরীগী মতাংদা অদোম্নসু হেন্না নীংথিনা খঙলে। ভারত্তগী হৌরকপা মীওই মিলিয়ন ৪ হেনবগী ভারতকী খুন্নাইনা ঐখোয়গী লৈবাক্কী মরক্তা থোং অমা ওইরি, মরুপ-মপাংগী থোং অমা অমসুং মখোয়না ঐখোয়গী লৈবাক অনিগী শেন্মিৎলোন অমসুং খুন্নাইশিংদা তেংবাংলিবা অসি তসেংনা য়াম্না থাগৎনীংঙাইনি।

ইকায় খুম্নরবশিং,

অদোম্বু য়ুনাইতেদ স্তেৎসকী উপ-রাস্ত্রপতি হায়না খনখিবা অসি য়াম্না মরু ওইবা অমসুং পু ৱারী ওইরবা পুংফম অমনি। অদোম অসি মালেম শিনবা থুংবগী মীওই কয়াগী ইথিল লৌফম ওইরি। রাস্ত্রপতি বাইদেন অমসুং অদোমগী লুচিং মখাদা, ঐখোয়গী লৈবাক অনিগী মরীনা অনৌবা থাক কয়া য়ৌবা ঙমগনি হায়বগী ঐহাক্না অচেৎপা থাজবা থম্লি।

ইকায় খুম্নরবশিং,

মাই পাকপগী খোঙচৎ অসি মখা চত্থবা ওইনা, ভারত মচাশিংনা অদোমসু ভারত্তা লাক্তুনা খোঙচৎ অসি মখা তাহন্নীংগনি অমসুং মরম অদুনা মখোয়না অদোম্বু তরাম্না ওক্নবা শেম-শাদুনা লৈরি। অদুনা ঐহাক্না অদোমদা ভারত্তা লাক্নবা অখন্নবা পাউজেল অমা পীজরি। ঐহাক্না অদোম খুদিংবু, ঐখোয়বু তরাম্না ওকপগীদমক্তা অমুক্কা হন্না থাগৎপা ফোংদোক্লি।

দিস্ক্লেমরঃ মসিদি প্রধান মন্ত্রীনা থমখিবা ৱারোলগী চাউরাকপা পাউদম্নি। অশেংবা ৱারোলদি হিন্দিদা থম্বীখিবনি।

***



(Release ID: 1757615) Visitor Counter : 68