প্রধান মন্ত্রী শ্রী নরেন্দ্র মোদীনা থৌরম মপু ওইদুনা পাঙথোকপা কেবিনেত কম্মিতী ওন ইকনমিক এফ্যার্সনা দিপার্তমেন্ত ওফ ফর্তিলাইজরনা থাঙ্গৎলকপা ২০২১-২২গী ওইনা (চৎলিবা থারুক ফাওবা) পি. এন্দ কে. হারগী ন্যুত্রিএন্ত বেজ সবসিদীগী (এন.বি.এস.) মমল লেপ্পগী ৱাফম অয়াবা পীখ্রে‍। খঙহন ৱারোল থোকপা তারিখতগী চৎনবা হৌগদবা অয়াবা পীরবা এন.বি.এস.কী মমল মখাদা পীরি:

ভারত লৈঙাক্না হারশিং, মমিং ওইনা য়ুরিয়া অমসুং ২২ গ্রেদকী পি. এন্দ কে. হার (দি.এ.পি. য়াওরগা), লৌমীশিংদা হার পুথোকপা/পুশিল্লকপশিংগী খুত্থাঙদা অতাবা মমলদা ফংহল্লি‍। পি. এন্দ কে. হারদা পীবা সবসিদী অসি ০১.০৪.২০১০ দগী হৌরগা এন.বি.এস. স্কিমনা লেপ্পি‍। লৌমীশিংগা চুনবা থৌশিলগী মখাদা লৈঙাক অসিনা লৌমীশিংদা মখোয়না পু-থাংবা ঙমগদবা মমলদা পি. এন্দ কে. হারশিং ফংহন্নবা খোঙফম লেপ্লি‍। কম্পেনীশিংনা লৌমীশিংদা অতাবা মমলদা হার ফংহনবা ঙম্নবগীদমক সবসিদী অসি হার পুথোকপা কম্পেনীশিংদা এন.বি.এস. মমলগী মতুং ইন্না থাদোকই‍।

হৌখিবা থা খরসিদা দি.এ.পি. অমসুং অতৈ পি. এন্দ কে. হারশিং পুথোকপদা চঙবা মচাকশিংগী মালেমগী ওইবা মমল খংহেন হেনগৎখ্রে‍। শেম শাবা লোইরবা দি.এ.পি.গী মমলসু মালেমগী কৈথেলদা হেনগৎখ্রে‍। মমল খংহেন হেনগৎলক্লবসু হৌরকপা মতমদা ভারত্তা দি.এ.পি.গী মমল কম্পেনীশিংনা হেনগৎলমদে, অদুম ওইনমক চৎলিবা শেনবা চহিসি হৌগৎলকপদা কম্পেনী খরনা দি.এ.পি.গী মমল হেনগৎখ্রে‍।

লৈঙাক অসিনা লৌমীশিংনা মিপাইরিবা অসি মপুং ফানা খংই অমদি পি. এন্দ কে. হার (দি.এ.পি. য়াওনা) মমল হেনগৎলকপগী চৈথেংদগী লৌমীশিংবু ঙাকথোক্নবগীদমক ফীভমসি লাকশিন্নবা খোঙথাঙশিং মাঙজৌননা লৌখৎখ্রে‍। মসিগী মতুং ইন্না অহানবা খোঙথাঙ অমা ওইনা লৈঙাক্না হার পুথোকপা কম্পেনীশিংদা লৌমীশিংগীদমক হারশিং অসি কৈথেলদা মরাং কায়না ফংহন্নবা ৱাফম থমখ্রে‍। লৈবাকসিদা হার ফংবা ফংদবগী ফীভম লৈঙাক্না য়েংশিন্দুনা লৈরি‍।

দি.এ.পি. মমল লেপ্পগী মতাঙদা, লৈঙাক্না হার পুথোকপা কম্পেনীশিংদা মখোয়গী দি.এ.পি.গী অরিবা স্তোকশিং হান্নগী মমলদা অদুমক য়োন্নবা হান্ননা খঙহনখ্রে‍। মসিগী মথক্তা, লৈবাক অসিনা অমদি মসিগী মীয়াম্না (লৌমী য়াওনা) কোবিদ লাইচৎকী অনিসুবা ইথক্না খঙহৌদনা হায়গৎলকপনা মরম ওইরগা খুদোং চাদ্রবা ফীভম অমা লৈরিবা হায়বা ৱাফমসু লৈঙাক অসিনা য়াখি‍। কোবিদ-১৯ লাইচৎ মনুংসিদা মীয়াম্না থেংনরিবা খুদোং চাদবা ফীভম অসিগী য়েংলগা ভারত লৈঙাক্না হান্ননা তোঙান তোঙানবা অখন্নবা পেকেজ কয়া লাউথোকখ্রে‍। মসিগা মান্নবা মওং অমদা লৈবাকসিদা দি.এ.পি.গী মমল লেপ্পগী ৱাথোক অসিবু অখন্নবা ৱাফম্নি হায়না লৌবগা লোয়ননা লৌমীশিংনা থেংনরিবা অৱাবসিগী য়েংলগা ভারত লৈঙাক্না দি.এ.পি.গী (অতৈ পি. এন্দ কে. হার য়াওনা) এম.আর.পি. চৎলিবা খারিফ লৌরোক লোইবফাওবা মমাঙ চহিগী চাংদা থমবা য়াননবা মওংদা লৌমীশিংগী অখন্নবা থৌরাং অমা ওইনা এন.বি.এস. স্কিমগী মখাদা পীবা সবসিদিগী মমল হেনগৎহল্লে‍। মসি লৌমীশিংনা থেংনরিবা খুদোংচাদবা ফীভমসি হন্থহন্নবগীদমক কোবিদ-১৯গী অমুক্তংগী ওইবা থৌরাং অমা ওইনা লৌখৎপনি‍। মালেমগী মমল থা খরসিদা হন্থরকপা য়াই হায়না লৌবগা লোয়ননা ভারত লৈঙাক্না ফীভমগী মতুং ইন্না অমুক হন্না নৈনদুনা মতম অদুদা লৈরিবা ফীভমগী মতুং ইন্না সবসিদীগী মমলগী মতাংদা ফিরেপ লৌরকপা য়াই‍। থৌরাং অসিগীদমক চঙগদবা অহেনবা সবসিদীগী পোৎলুম অসি চাউরাক্না লুপা করোর ১৪,৭৭৫ ওইরবা য়াই‍।

******