কেমিকেল্স অমসুং ফর্তিলাইজর মন্ত্রালয়

সরকারনা ম্যুকোর্মাইকোসিস থেংননবগীদমক্তা এম্ফোতেরিসিন-বি. ফংবগী চাং হেনগৎহন্ননবা থবক পায়খৎলগনি

Posted On: 12 MAY 2021 12:10PM by PIB Imphal

কোবিদকী মতুংদা নাবা লাইনা, ম্যুকোর্মাইকোসিসকী অনাবশিংদা দাক্তরশিংনা হৌজিক য়াম্না কন্না ইরিবা হিদাক, এম্ফোতেরিসিন-বি.গী অপাম্বা লৈবা খঙহেন হেনগৎলকপগী ফীভম অমা রাজ্য কয়াদা উবা ফংলে। মরম অদুনা, ভারত সরকারনা হিদাক শাবশিংগা পুন্দিনা হিদাক অসি পুথোকপা হেনগৎহন্নবা থবক কয়া অমা পায়খৎলি। মীরমদগী হিদাক অসিবু লৈশিনবগী থৌওংগা লোয়ননা লৈবাক অসিদা পুথোকচবগী চাংসু হেনগৎহন্দুনা হিদাক অসি ফংবগী চাং হেনগৎলগনি হায়বগী থাজবা লৈরি।

হিদাক পুথোকপশিং/ইম্পোর্তরশিংদা লৈরিবা হিদাক মশিং অমসুং হিদাক অসিগী অপাম্বা লৈবগী ফীভম য়েংশিল্লবা তুংদা, ফার্মা বিভাগনা মে ১০দগী ২০ ফাওবদা লৈগদবা হিদাক মশিংদা য়ুম্ফম ওইরগা রাজ্য/য়ু.তি.শিংদা য়েন্থোকপগী পথাপ অমা মে ১১, ২০২১দা শেমখ্রে। রাজ্যশিংনা হিদাক অসিবু সরকার অমসুং লন্নাইগী হোস্পিতালশিংগা লোয়ননা হেল্থ এজেন্সীশিংদা মান্নবা চাংদা য়েন্থোক্নবা থৌরাং অমা য়াত্তুনা থম্নবা খঙহনখ্রে। হিদাক য়েন্থোকপগী পথাপ অসিগী মতুং ইন্না রাজ্যশিংনা মখোয়গী সরকার অমসুং লন্নাইগী হোস্পিতালশিংনা হিদাক অসিগী লৌফম ওইগদবা ‘পোইন্ত ওফ কন্তেক্ত’ খঙহন্নবা হায়খ্রে। হান্ননা পীখ্রবা অমসুং পীরক্কদবা হিদাকশিংবু নীংথিজনা অমসুং কাংলোন নাইনা শিজিন্নহন্নবা রাজ্যশিংদা হায়খ্রে। হিদাক য়েন্থোকপগী থবকশিং অসি নেস্নেল ফার্মাস্যুতিকেল্স প্রাইসিং ওথোরিতী (এন.পি.পি.এ.)না য়েংশিনগনি।

লৈবাক অসিনা লাইচৎ অসিগী শাথীরবা মতৌ অমা থেংনবগা লোয়ননা মসিনা লৈবাক্কী তোঙান-তোঙানবা মফমশিংদা খুদোংচাদবা কয়া থোকহল্লি। ভারত সরকারনা কোবিদকী তঙাই ফদবা হিদাকশিং মরাং কাইনা ফংহন্নবা অমসুং মখোয়বু মান্নবা অমসুং নুং-পান ফাওনা উবা থৌওংগী খুত্থাংদা রাজ্য সরকার অমসুং য়ু.তি.শিংদা ফংহন্নবা থৌওং কয়া লেপ্পা লৈতনা পাংথোক্লি।

*****



(Release ID: 1718135) Visitor Counter : 112