نئی دہلی،  6/مئی2021 ۔ وزیر اعظم نریندر مودی نے آج ملک میں کووڈ-19 سے متعلق صورت حال کا وسیع جائزہ لیا۔ انھیں مختلف ریاستوں اور ضلعوں میں کووڈ کے پھیلاؤ کے بارے میں تفصیلی جانکاری دی گئی۔ وزیر اعظم کو ان ریاستوں کے بارے میں بتایا گیا جہاں ایک لاکھ سے زیادہ معاملات ہیں۔ دوسری طرف وزیر اعظم کو اس بیماری سے سب سے زیادہ متاثرہ اضلاع کے بارے میں بھی آگاہ کیا گیا۔

وزیر اعظم کو ریاستوں کے ذریعہ صحت خدمات سے متعلق بنیادی ڈھانچے کی تیاری کے بارے میں بھی جانکاری دی گئی۔ وزیر اعظم نے ہدایت دی کہ صحت خدمات کے بنیادی ڈھانچے کو بڑھانے کے لئے اہم اشاریہ جات کے بارے میں مدد اور رہنمائی دی جانی چاہئے۔

اس کے علاوہ فوری اور جامع انسدادی اقدامات کو یقینی بنانے کی ضرورت پر بھی بات چیت کی۔ وزیر اعظم نے اس بات کا ذکر کیا کہ ریاستوں کو ایسے اضلاع کی پہچان کرنے کے لئے ایک ایڈوائزری ارسال کی گئی تھی، جہاں انفیکشن کے معاملات کی تعداد 10 فیصد یا اس سے زیادہ ہے اور آکسیجن سے لیس یا آئی سی یو بیڈ 60 فیصد سے زیادہ پُر ہیں۔

وزیر اعظم نے دواؤں کی دستیابی کا بھی جائزہ لیا۔ انھیں ریمڈیسیور سمیت دیگر دواؤں کے پروڈکشن میں تیز اضافہ کے بارے میں بھی جانکاری دی گئی۔

وزیر اعظم نے آئندہ کچھ مہینوں میں ٹیکوں کا پروڈکشن بڑھانے کے لئے ٹیکہ کاری اور لائحۂ عمل کی پیش رفت کا جائزہ لیا۔ وزیر اعظم کو اس بارے میں بتایا گیا کہ ریاستوں کو تقریباً 17.7 کروڑ ٹیکے کی سپلائی کی جاچکی ہے۔ اس کے علاوہ وزیر اعظم نے ٹیکے کی بربادی سے متعلق ریاست وار رجحانات کا بھی جائزہ لیا۔  دوسری طرف وزیر اعظم کو بتایا گیا کہ 45 سال سے زیادہ عمر کی تقریباً 31 فیصد اہل آبادی کو کم از کم ٹیکے کی ایک خوراک دی جاچکی ہے۔ وزیر اعظم نے کہا کہ ریاستوں کو حساس بنانے کی ضرورت ہے تاکہ ٹیکہ کاری کی رفتار دھیمی نہ ہو۔ لاک ڈاؤن کے باوجود ٹیکہ کاری کے لئے شہریوں کو سہولت دستیاب کرائی جانی چاہئے اور ٹیکہ کاری میں شامل صحت اہلکاروں کو دوسرے کاموں میں نہیں لگانا چاہئے۔

اس میٹنگ میں راج ناتھ سنگھ، امت شاہ، نرملا سیتا رمن، ڈاکٹر ہرش وردھن، پیوش گوئل، من سکھ منڈاویا سمیت دیگر وزراء اور اعلیٰ افسران موجود تھے۔

******

ش ح۔ م م۔ م ر

U-NO. 4245