প্রধান মন্ত্রী নরেন্দ্র মোদীনা লুচিংদুনা লৈবাক শিনবা থুংবদা ওক্সীজেন পীবা অমসুং ফংহনবগী ফিভম য়েংশিন্নবগীদমক্তা অৱাংবা থাক্কী মীফম অমা ফমখ্রে অমসুং মসি ফংবগী চাং হেনগৎহন্নবা পাম্বৈ কয়া অমসু খন্নখি। ওক্সীজেন পীবগী ফিভম হেন্না ফগৎহন্নবগীদমক্তা ওফিসিএলশিংনা মমাংগী চয়োল খরদা লৌখৎখিবা খোঙথাংশিংগী মতাংদা মহাক্কী মফমদা পাউদমখি।

প্রধান মন্ত্রীনা হীরম কয়াঃ ওক্সীজেন পুথোকপা হেনগৎপা, য়েন্থোকপগী খোঙজেল থুগৎহনবা অমসুং হেল্থ ফেসিলিতীশিংদা ওক্সীজেনগী তেংবাং পীনবা অনৌবা থৌওং শিঞ্জিন্নবনচিংবা থৌওংশিং খোঙজেল য়াঙনা থবক শুবগী মথৌ তাবগী মতাংদা ৱাফম থমখি।

রাজ্যশিংগা তেংবাংমিন্নদুনা ওক্সীজেন ৱাৎপা মফমশিং খঙদোকপা অমসুং মসিগী মতুং ইন্না ওক্সীজেন মরাং কাইনা ফংহন্নবগীদমক্তা অকুপ্পা থৌওং কয়া চত্থরি হায়না প্রধান মন্ত্রীগী মফমদা পাউদমখি। মসিগা লোয়ননা রাজ্যশিংদা ওক্সীজেন পীবগী চাংসু মতৌ করম্না মওং নাইনা হেনগৎলক্লি হায়নসু পাউদমখি। হৌজিক্কী ওইনা রাজ্য ২০দগী নোংমদা লিক্বিদ মেদিকেল ওক্সীজেন এম.তি. ৬৭৮৫গী অপাম্বা লৈবগী মনুংদা ভারত সরকারনা এপ্রিল ২১ ফাওবদা রাজ্যশিং অসিদা নোংমদা এম.তি. ৬৮২২ পীখ্রে।

হৌখিবা নুমিৎ খরনি অসিদা প্রাইভেৎ অমসুং পব্লিক স্তীল প্লান্ত, ইন্দস্ত্রী, ওক্সীজেন পুথোকপশিংদগী পীরকপগা লোয়ননা মথৌ তাদবা ইন্দস্ত্রীশিংদা ওক্সীজেন পীবা থিংবগী খুত্থাংদগী লিক্বিদ মেদিকেল ওক্সীজেন ফংবগী চাংসু নোংমদা এম.তি. ৩৩০০গী চাংদা হেনগৎপগী ফিভমসু লৈখি।

ওফিসিএলশিংনা থবক চলায়বা য়ারবা পি.এস.এ. ওক্সীজেন প্লান্তশিংসু খ্বাইদগী অথুবা মতমদা থবক তৌবা হৌনবা রাজ্যশিংগা লোয়ননা অকনবা থবক পায়খৎলি হায়না মখোয়না প্রধান মন্ত্রীদা পাউদমখি।

প্রধান মন্ত্রীনা ওফিসিএলশিংদা তোঙান-তোঙানবা রাজ্যশিংদা মথৌ তাবা ওক্সীজেনশিংবু মমুৎ তানা অমসুং লেপ্তবা মওংদা শোইদনা পীনবা খঙহনখি। হীরম অসিদা অয়েৎপা লাক্লবসু লোকেলগী লৈঙাক্লোইশিংগা তানদুনা ৱারোইশিন পুরক্নবা থৌদাং লৌনবসু মহাক্না হায়খি। ওক্সীজন পুথোকপা হেনগৎহন্নবা অমসুং মীয়ামদা ফংহন্নবগীদমক্তা মন্ত্রালয়শিংনসু অতোপ্পা অনৌবা থৌওং কয়া পায়খৎনবা মহাক্না মখা তানা হায়খি।

নাইত্রোজেন অমসুং আর্গোন তেঙ্করশিংবু ওন্থোকপা, অনৌবা তেঙ্করশিং শাবা, মীরমদগী লৈদুনা নোংথক্তা পুরকপনচিংবা থৌওং পাংথোক্তুনা ক্রাইওজেনিক তেঙ্করগী মশিং থুনা হেনগৎহন্নবা থৌওং কয়া অমসু হৌজিক পায়খৎলি।

প্রধান মন্ত্রীনা রাজ্যশিংদা ওক্সীজনা খোঙজেল য়াঙনা য়ৌহনবগী মথৌ তাই হায়না ফোংদোকখি। তেঙ্করশিংবু অশাঙবা লম্বীদা থুনা অমসুং লেপ্তনা পুথোক পুশিন তৌবদা রেলৱে শিজিন্নরিবা অসিগী মতাংদসু ৱাফম কয়া খন্নখি। অহানবা রেক্না এম.এম.ও. এম.তি. ১০৫ পুদুনা মুম্বাইদগী লাক্তুনা ভিজাগ য়ৌখ্রে। মসিগা মান্নবা ওইনা, অহাঙবা ওক্সীজেন তেঙ্করশিংসু নোংথক্তা পুদুনা ওক্সীজেন পীবদা চঙবা খোঙচৎ অমগী মতম হন্থহনবা ওইনা ওক্সীজেন পীগদৌরিবা মীওইশিংদা য়ৌহনখ্রে।

তোঙানবা-তোঙানবা মেদিকেলগী খুন্নাইগী মীহুৎশিংনা ওক্সীজেন নীংথিনা শিজিন্নবা অমসুং রাজ্য খরদা নীংথিনা য়েংশিনবগী খুত্থাংদা অনাবশিংগী ফিভমদা অশোকপা লৈহন্দনা ওক্সীজেনগী অপাম্ববু মতৌ করম্না হন্থরকখিবগে হায়বগী মতাংদা ৱাফম কয়া ফোঙদোকখি।

ওক্সীজেন মশিং য়াম্না হেন্না পৈশিনবগী মতাংদা রাজ্যনা অকনবা থবক পায়খৎকদবনি হায়না প্রধান মন্ত্রীনা ফোংদোকখি।

মীফম অদুদা কেবিনেৎ সেক্রেতরী, পি.এম.গী প্রিন্সিপাল সেক্রেতরী, হোম সেক্রেতরী, হেল্থ সেক্রেতরী অমদি কম্মর্স অমসুং ইন্দস্ত্রী মন্ত্রালয়, রোদ ত্রান্সপোর্ত মন্ত্রালয়, ফার্মাস্যুতিকেল্স অমসুং নিতি আয়োগকী ওফিসিলেশিংসু শরুক য়াখি।

***