প্রধান মন্ত্রী শ্রী নরেন্দ্র মোদী অমসুং নেদরলেন্দগী প্রধান মন্ত্রী ঐচ.ই. মিস্তর মার্ক রুত্তেগা ঙসি ভর্চুএল সমিত অমা পাংথোকখ্রে। হায়রিবা অসি পি.এম. রুত্তেগী ২০২১গী মার্চতা পাংথোকখিবা জেনেরেল মীখল মতুংদা পাংথোকপা অহানবা অৱাংবা থাক্কী সমিতনি। প্রধান মন্ত্রী মোদীনা পি.এম. রুত্তেবু মহাক্কী মীখলদা মায় পাক্লকপা অমসুং থংন-থংননা মরিরক নেদরলেন্দগী প্রধান মন্ত্রী ওইরকপা অসিদা থাগৎপা ফোংদোকখ্রে।

ভারত অমসুং নেদরলেন্দ অনিগী মরক্তা য়াম্না চেৎপা মরী লৈনৈ, দেমোক্রেসীগী চপ-চাবা মগুন ঙাক্নৈ, মীওইবগী হক্তা ইকাই খুম্নবা অমসুং চৎনবী লৈ অমসুং লৈবাক অনিগী মরক্তা মতম শাংনদগী মরুপ-মপাংগী ওইবা মরী লৈজৈ।

সমিত অসিগী মনুংদা, লুচিংবা অনি অসিনা নাকন অনিগী ওইবা থবকশিং অমসুং মখা তানা মতেং পীনবা অমসুং ত্রেদ অমসুং ইকোনোমীদা, ঈশিং ফংবন্নবা, লৌউ-শিংউবগী লমদা, স্মার্ত সিতী, সাইন্স অমসুং তেক্নোলোজী, হকশেলগী চেকশিন থৌরাং অমসুং স্পেসকী ওইবা অফবা মরী থম্বা অসিদা মরিক চুম্না খন্নখি।

প্রধান মন্ত্রী অনি অসিনা মখা তানা ঈশিংগা মরী লৈনবা লমশিংদা ইন্দো-দতচকী মরী ফগৎনবা অমসুং মিনিস্ত্রীগী ওইবা থাক্তা পুন্না থবক তৌবা হেনগৎনবা ‘স্ত্রেতেজিক পার্তনরশিপ ওন ৱাতর’ অমা লিংখৎপদা য়ান্নখ্রে।

লুচিংবশিং অসিনা মফম-মফমগী ওইবা অমসুং মালেমগী ওইবা অইং-অশাগী অহোংবা, তেরোরিজম মুথৎপা অমসুং কোবিদ-১৯গী লায়চৎ অসিদা মিয়েং থমখি অমসুং ইন্দো-পেসিফিক, রিজিলেন্ত সপ্লাই চেন অমসুং মালেমগী ওইবা দিজিতেল লৈঙাক অসি হেনগৎহনবা হায়না য়াখি।

প্রধান মন্ত্রী মোদীনা নেদরলেন্দবু ইন্তর্নেস্নেল সোলার এলাইয়েন্স (আই.এস.এ.) অমসুং কোলিএসন ফোর দিজাস্তর রিজিলিএন্ত ইনফ্রাস্ত্রকচর (সি.দি.আর.আই.) দা মতেং পাংবগীদমক থাগৎপা ফোংদোকখি। পি.এম. মোদীনা নেদরলেন্দগী ইন্দো-পেসিফিক পোলিসী অমসুং ২০২৩গী জি.২০ প্রসিদেন্সী মনুংদা খুৎশম্ননা পাম্বা অসি তরাম্না ওকখি।

লুচিংবা অনি অসিনা মালেমগী ওইবা শান্তী, নে-তাবা অমসুং চাওখৎপা অসিদা মখোয়গী ৱা ঙাক্না চৎপা অমসুং ২০২১গী মেদা পোর্তুগালগী পোর্তোদা ইন্দিয়া-ই.য়ু. লিদরস মিতিং মায় পাক্না পাকথোক্নবা ঙাইদুনা লৈরি হায়না হন্না ফোংদোক্লি।

*****