প্রধানমন্ত্রীগী লোইশঙ

প্রধান মন্ত্রীনা 'অজাদী কা অমৃত মহোৎসব' India@75কী মাংওইনবা থৌরমশিং হৌদোকখ্রে


ভারতনা মাগী নীংতম লান্মীশিংবু কাউথোকলোই: পি.এম.

হৌখিবা চহি তরুক অসিদা মশক খঙবিদ্রবা অথৌবশিংগী পুৱারী য়োকখৎনবা লেপ্তনা হোৎনরি: পি.এম.

ঐখোয়গী সম্বিধান অমসুং ঐখোয়গী মীপুম খুদিংমক মান্নবা মীৎয়েং য়েংবগী চৎনবী অসিগীদমক ঐখোয়না চাউথোকচৈ: পি.এম.

Posted On: 12 MAR 2021 2:15PM by PIB Imphal

প্রধান মন্ত্রী, শ্রী নরেন্দ্র মোদীনা অহমদাবাদকী সাবরমতী আশ্রমদগী ‘পাদ্যত্রা’ (ফ্রীদম মার্চ) লমথাখ্রে অমসুং ‘অজাদী কা অমৃত মহোৎসব’ (India@75)কী মাংঙোইনবা থৌরমশিং হৌদোকখ্রে। মহাক্না India@75কী পাল্লন থৌরমগী অতোপ্পা তোঙান তোঙানবা নাৎকী অমসুং দিজিতেলগী ওইবা থৌরাংশিংসু হৌদোকখ্রে। থৌরম অদুদা গুজরাতকী গভর্নর শ্রী অচার্য়া দেবরাৎ, কেন্দ্রগী এম.ও.এস. (আই/সি) শ্রী প্রহলাদ সিংহ পতেল অমসুং গুজরাতকী মুখ্য মন্ত্রী শ্রী বিজে রুপানিনা শরুক য়াখি।

আজাদী কা অমৃত মহোৎসব অসি ভারতকী নীংতমখিবগী চহী ৭৫শুবগী নিংশিং থৌরম পাংথোক্নবা ভারত সরকারনা শিনবা থৌরমশিংগী পরীং অমনি। মহোৎসব অসি জন-ভাগীদারীগী ৱাখল্লোন্দা জন-উৎসব অমা ওইনা পাংথোক্কনি।

সাবরমী আশ্রমগী মীতিন অদুদা ৱা ঙাংলদুনা প্রধান মন্ত্রীনা ২০২৩গী ওগস্ত ১৫ ফাওবা চত্থগদবা ২০২২গী ওগস্ত ১৫গী মমাংদা চয়োল ৭৫ পাঙথোক্কদবা ‘অজাদী কা অমৃত মহোৎসব’ হৌদোকপগী ৱাফম থমখি। মহাক্না নীংখা তম্বগী ইহৌদা থৱায়না পোন্থা ওইখ্রবা মহাত্মা গান্ধী অমসুং অথোইবা মীওইশিংদা ইকাই খুম্নবা উৎখি।

প্রধান মন্ত্রীনা মরু ওইবা য়ুম্বী মঙা মদুদি নীংতম ইহৌ, ৭৫গী ৱাখল্লোনশিং, ৭৫গী মাইপাকপশিং, ৭৫গী থবকশিং অমসুং ৭৫গী ফীরেপশিং অসিনা মঙলানশিং অমসুং থৌদাংশিংবু ইথিল ওইহন্দুনা মাংলোমদা চংশিন্নবা লমজিং-লমতাক্নবা শাফু ওইগনি হায়না নৌহৌননা ফোঙদোকখি।

প্রধান মন্ত্রীনা হায় অজাদী অমৃত মহোৎসব হায়বগী আর্থদি নীংখা তম্বগী থৌনা-লিংজেলগী অমৃত হায়বনি। মসিগী আর্থদি নীংখা তম্বগী ইহৌগী লান্মীশিংদা ইথিলশিং পীনবা অমৃত হায়বনি; অনৌবা ৱাখল্লোনশিং অমসুং ৱাশকশিংগী অমৃত অমসুং আত্মনির্ভারত্তাগী শীদা হীদাক ওইগনি।

থুমগী মরু ওইবগী মতাংদা ৱা ঙাংলদুনা প্রধান মন্ত্রীনা হায় থুম অসি চুম্নগী মমলদা য়ুম্ফম ওইরগা মগুন লেপ্তে। ভারত মচাশিংগী ওইনদি থুমনা পুকচেল শেংবা, থাজবা, পুকচেল লেপ্পা, পাঙ্গলগী থবক, মান্নবা ৱায়েল অমসুং মরোমদোম লেপচবা হায়বা অসি তাক্লি। মহাক্না হায় মতম অদুদা থুম অসি ভারতকী মরোমদোল লেপচনবগী খুদম অমা ওইখি। ভারতকী মমলশিংগা লোইননা ব্রিতিশনা মরোমদোল লেপচবদা অকাইবা পীখি। ভারতকী মীয়াম্না ইংলেন্দদগী পুশিল্লকপা থুমগী মখা পোনখি। মহাক্না হায় গান্ধীজীনা লৈবাক অসিনা মতম শাংনা খঙদুনা লাকখিবা অৱাবা অসি খঙখি, মীয়ামগী ইহুল খঙখি অমসুং মদুবু ইহৌ অমা ওন্থোকখি।

১৮৫৭তা ভারতকী নীংখা তম্নবগী অহানবা লান হৌখিবা, মহাত্মা গান্ধীনা মীরৈবাক্তগী হল্লকখিবা, জাতিদা সত্যাগ্রহাগী শক্তি নীংশিংহনখিবা, লোকমান্যা তিলক্না মপুং ফানা নীংখা তম্নবা হৌৎনখিবা, নেতাজী সুভাশ চন্দ্র বসনা লুচিংবা অজাদ হিন্দ ফৌজকী দিল্লীগী মার্চ অমসুং দেল্লী চল্লোগী খোলাউ অসিগুম্বা নীংখা তম্বগী মরু ওইবা ইহৌশিং প্রধান মন্ত্রীনা নীংশিংখি। মহাক্না মখা তারদুনা হায় নীংতম ইহৌগী মৈরি অসি মাইকৈ খুদিংদা, লমদম খুদিংদা চুখৎনবা লৈবাক অসিগী কাচিন কোয়া খুদিংদা অচার্য়াশিং, লৌশিং লৈবশিং অমসুং ওজাশিংনা লেপ্তনা হোৎনখি। মহাক্না হায় অমরোমদা ভক্তিগী ইহৌনা লৈবাক শিনবা থুংনা নীংতম ইহৌ হৌনবগী ফম্পাক শেমখি। চৈতন্যা মহাপ্রবু, রামাকৃষ্ণ পরমহন্স, শ্রীমন্ত শঙ্কর দেবকুম্বা লৌশিং লৈবা মীওইশিংনা লৈবাক শিনবা থুংনা নীংতম ইহৌ হৌনবা য়ুম্ফম থোলমখি। মসিগা চপ মান্না কাচিন কোয়া পুম্নমক্তা লৈরিবা লৌশিং লৈবা মীওইশিংনা জাতি অমদি নীংতম ইহৌদা মতেং পাংখি। লৈবাক অসি শিনবা থুংবদগী দালিৎ, অদিবাসী, নুপী অমসুং নহারোল কয়ানা চাউনা কত্থোকখি। তামিল নাদুদগী চহি ৩২ শুরবা কথা কুমারন অসি ব্রিতিশনা মকোক্তা নোংমৈনা কাপ্লবা ফাওবা লৈবাক অসিগী ফীরাল লৈবাক্তা তাহন্দনবা হোৎনখিবা অসিগুম্বা মশক খঙবিদ্রবা অথৌবশিংনা কত্থোকখিবা অদু পাউদমখি। তামিল নাদুগী ভেলু নচিয়র অসি ব্রিতিশ লৈঙাক্কী মায়োক্তা লান শোক্নখিবা অহানবা মহারানী ওইখি।

প্রধান মন্ত্রীনা হায় ঐখোয়গী লৈবাক অসিগী ত্রাইবেলগী খুন্নাইনা মীরৈবাক মচাশিংনা লৈঙাকপা অসি নমথনবা মথৌনা মরিংজেল লৈনা লেপ্তনা হোৎনখি। ঝার্খন্দদ বির্সা মুন্দানা ব্রিতিশবু শীংনখি অমসুং মুর্মু মচিল-মনৌশিংনা সন্থল ইহৌ লমজিংগী। ওরিশাদা চাক্রা বিসোইনা ব্রিতিশকী মায়োক্তা লান হৌখি অমসুং লক্ষমন নায়ক্না গান্ধিয়নগী পাম্বৈশিংগী খুত্থাংদা এৱের্নেস শন্দোকখি। মহাক্না রম্পা ইহৌ হৌখিবা অন্ধ্র প্রদেশককী মন্যম ভিরুদু অল্লুরি সিরারম রাজু অমসুং মিজোরামগী চীংশিংদা ব্রিতিশকী মায়োক্তা চংশিনখিবা পসল্থা খুঙচেরাগুম্বা ব্রিতিশকী মায়োক্তা লান শোক্নখিবা মশক খঙবিদ্রবা অথৌবশিং অদুগী লিস্ত পাথোকখি। মহাক্না লৈবাক অসিগী নীংখা তম্বা ফংহনবদা শরুক য়াখিবা অসাম অমসুং অৱাং নোংপোক্কী গোমধার কোনৱার, লাচিৎ বোর্ফুকন অমসুং সেরৎ সিংগুম্বা অতোপ্পা নীংতম লান্মীশিংসু পনখি। মহাক্না হায় লৈবাক অসিনা গুজরাতকী জম্বুঘোদাদা নায়ক ত্রাইবেলশিংদা কত্থোকখিবা অমসুং মনগাধতা ত্রাইবেল কয়া তমথীনা পুন্না হাৎখিবা অদু কাউবা লৈররোই।

প্রধান মন্ত্রীনা হায় লৈবাক অসিনা রাজ্য খুদিংদা অমসুং লমদম খুদিংদা পৱারী য়োকখৎনবা হৌখিবা চহি তরুক অসিদা লেপ্তনা হোৎনদুনা লাক্লি। চহি অনিগী মমাংদা দান্দী য়াত্রাগা মরী লৈনবা মফম শেমগৎখ্রে। লৈবাক অসিনা নীংখা তমদুনা অহানবা সরকার শেমখ্রবা মতুংদা নেতাজী সুভাশনা অন্দমানদা মচু অহুমগী ফীরাল চিংখৎখিবা মফম অদুসু শেমগৎখ্রে। মহাক্না মখা তারদুনা হায় অন্দমান অমসুং নিকোবরগী ঈথৎশিং অসি নীংতম ইহৌগী মমিং লৌদুনা থোনখিবনি। মহাক্না হায় বাবা সাহেবকা মরী লৈনবা মফমশিং অদু পঞ্চতির্থগী মওংদা শেমৎখ্রে, জালিয়নৱালা বাঘগী নীংশিং খুবম অমসুং পাইকা ইহৌগী নীংশিং খুবমশিংসু শেমগৎখ্রে।

প্রধান মন্ত্রীনা হায় ঐখোয়না কান্না হোৎনদুনা ভারত অমসুং মীরৈবাক অনিমক্তা ঐখোয়না তৌবা ঙম্বা অদু উৎখ্রে। ঐখোয়গী সম্বিধান অমসুং মীপুম খুদিংদা মান্নবা মীৎয়েং য়েংবগী চৎনবীশিং অসিগীদমক ঐখোয়না চাউথোকচৈ। মহাক্না হায় দেমোক্রেসীগী মমা ওইরিবা ভারতনা দেমোক্রেসীগী মপাঙ্গল কনখৎহন্দুনা মাংলোমদা চংশিল্লি। মহাক্না হায় ভারতকী মাই পাকপশিং অসিনা মীওইবা খুন্নাইদা আশা পীরি। মহাক্না মখা তারদুনা হায় ভারতকী চাউখৎ খোঙচৎ অসি আত্মনির্ভারত্তানা থনখি অমসুং মালেম পুম্বগী চাউখৎ খোঙচৎতা শাফু পীরি।

প্রধান মন্ত্রীনা ঐখোয়গী নহারোলশিং অমসুং স্কোলারশিংনা লৈবাক অসিনা ঐখোয়গী নীংতম লান্মীশিংগী পুৱারী ইনবা হোৎনরিবসি মায় পাকহন্নবা থৌদাং লৌগদবনি হায়না অপাম্বা ফোঙদোকখি। মহাক্না মখোয়দা মালেমদা নীংতম ইহৌদা মাই পাকখিবশিং অদু উৎথোক্নবা অপাম্বা ফোঙদোকখি। মহাক্না কলা, সহিত্যা, থিএতরকী খুন্নাই, ফিল্ম ইন্দস্ত্রী অমসুং দিজিতেল এন্তর্তেনমেন্তদা লৈরিবা মীয়ামদা ঐখোয়গী হৌখ্রবা মতমদা থোকখিবা তোপ-তোপ্পা ৱারীশিং খঙদোক্তুনা মখোয়বু পুন্সিদা পুশিল্লক্নবা অপাম্বা ফোঙদোকখি।

***



(Release ID: 1704424) Visitor Counter : 232