ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ

ମାର୍ଚ୍ଚ 9 ତାରିଖରେ ଭାରତ ଓ ବାଂଲାଦେଶ ମଧ୍ୟରେ ‘ମୈତ୍ରୀ ସେତୁ’ର ଉଦଘାଟନ କରିବେ ପ୍ରଧାନମନ୍ତ୍ରୀ

ତ୍ରିପୁରାରେ ବିଭିନ୍ନ ଭିତ୍ତିଭୂମି ପ୍ରକଳ୍ପ ଉଦଘାଟନ ସହିତ ଶିଳାନ୍ୟାସ କରିବେ ପ୍ରଧାନମନ୍ତ୍ରୀ

Posted On: 07 MAR 2021 7:47PM by PIB Bhubaneshwar

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ମାର୍ଚ୍ଚ 9, 2021 ମଧ୍ୟାହ୍ନ 12ରେ ଭିଡିଓ କନଫରେନ୍ସିଂ ଜରିଆରେ ଭାରତ ଓ ବାଂଲାଦେଶ ମଧ୍ୟରେ ‘ମୈତ୍ରୀ ସେତୁ’ର ଉଦଘାଟନ କରିବେ। ଏହି କାର୍ଯ୍ୟକ୍ରମ ଅବସରରେ ପ୍ରଧାନମନ୍ତ୍ରୀ ମଧ୍ୟ ତ୍ରିପୁରାର ବିଭିନ୍ନ ଭିତ୍ତିଭୂମି ପ୍ରକଳ୍ପ ଉଦଘାଟନ କରିବା ସହିତ କେତେକ ପ୍ରକଳ୍ପର ଶିଳାନ୍ୟାସ କରିବେ।

ଏହି ‘ମୈତ୍ରୀ ସେତୁ’ ଭାରତୀୟ ରାଜ୍ୟ ତ୍ରିପୁରା ଏବଂ ବାଂଲାଦେଶର ସୀମା ଦେଇ ପ୍ରବାହିତ ହୋଇଥିବା ଫେନି ନଦୀ ଉପରେ ନିର୍ମିତ ହୋଇଛି। ଭାରତ ଓ ବାଂଲାଦେଶ ମଧ୍ୟରେ ବୃଦ୍ଧି ପାଉଥିବା ଦ୍ୱିପାକ୍ଷିକ ଏବଂ ବନ୍ଧୁତ୍ୱପୂର୍ଣ୍ଣ ସମ୍ପର୍କ ଆଧାରରେ ଏହି ‘ମୈତ୍ରୀ ସେତୁ’ର ନାମକରଣ କରାଯାଇଛି। 133 କୋଟି ଟଙ୍କାର ପ୍ରକଳ୍ପ ମୂଲ୍ୟରେ ଜାତୀୟ ରାଜପଥ ଓ ଭିତ୍ତିଭୂମି ବିକାଶ ନିଗମ ଦ୍ୱାରା ହାତକୁ ନିଆଯାଇଥିଲା। 1.9 କିମି ଲମ୍ବ ସେତୁ ଭାରତର ସବ୍ରୁମ ସହିତ ବାଂଲାଦେଶର ରାମଗଡ଼କୁ ଯୋଡ଼ୁଛି। ଏହା ଭାରତ ଓ ବାଂଲାଦେଶ ମଧ୍ୟରେ ବାଣିଜ୍ୟ ଓ ଜନସମ୍ପର୍କ କ୍ଷେତ୍ରରେ ଏକ ନୂତନ ଅଧ୍ୟାୟର ଆରମ୍ଭ କରିବ। ଏହାର ଉଦଘାଟନ ସହିତ, ତ୍ରିପୁରା ଉତ୍ତର ପୂର୍ବାଞ୍ଚଳର ନୂତନ ପ୍ରବେଶଦ୍ୱାର ହୋଇପାରିବ। ଏହା ବାଂଲାଦେଶର ଚିଟ୍ଟାଗଙ୍ଗ ବନ୍ଦର ସହିତ ସିଧାସଳଖ ଯୋଡ଼ି ହେବ ଯାହାକି ସବ୍ରୁମ ଠାରୁ ମାତ୍ର 80 କିଲୋମିଟର।

ସବ୍ରୁମ ଠାରେ ପ୍ରଧାନମନ୍ତ୍ରୀ ମଧ୍ୟ ଏକ ସମନ୍ବିତ ଚେକ ପୋଷ୍ଟ ପାଇଁ ଶିଳାନ୍ୟାସ କରିବେ। ଏହା ଦୁଇ ଦେଶ ମଧ୍ୟରେ ସାମଗ୍ରୀ ଓ ଯାତ୍ରୀ ପରିବହନକୁ ସହଜ କରିବ, ଉତ୍ତର ପୂର୍ବାଞ୍ଚଳ ରାଜ୍ୟଗୁଡ଼ିକ ପାଇଁ ନୂଆ ବଜାର ସୁଯୋଗ ସୃଷ୍ଟି କରିବ ଏବଂ ବାଂଲାଦେଶ ଓ ଭାରତ ମଧ୍ୟରେ ବାଧାମୁକ୍ତ ଯାତ୍ରୀ ପରିବହନ ସୁନିଶ୍ଚିତ ହୋଇପାରିବ। ଏହି ପ୍ରକଳ୍ପ 232 କୋଟି ଟଙ୍କା ବ୍ୟୟରେ ଭାରତୀୟ ଭୂମି ବନ୍ଦର ପ୍ରାଧିକରଣ ଦ୍ୱାରା ନିର୍ମାଣ କରାଯାଇଛି।

କୈଳାସହାର ଠାରେ ଥିବା ଉନାକୋଟି ଜିଲ୍ଲା ମୁଖ୍ୟାଳୟ ସହିତ ଖୋୱାଇ ଜିଲ୍ଲା ମୁଖ୍ୟାଳୟକୁ ଯୋଡ଼ିବାକୁ ଥିବା 208 ନମ୍ବର ଜାତୀୟ ରାଜପଥ ପାଇଁ ପ୍ରଧାନମନ୍ତ୍ରୀ ମଧ୍ୟ ଶିଳାନ୍ୟାସ କରିବେ। ଏହା 44 ନମ୍ବର ଜାତୀୟ ରାଜପଥ ପାଇଁ ଏକ ବିକଳ୍ପ ମାର୍ଗ ଯୋଗାଇବ। 1078 କୋଟି ଟଙ୍କାର ପ୍ରକଳ୍ପ ମୂଲ୍ୟ ସହିତ 80 କିମି ଲମ୍ବ ଏନ୍ଏଚ୍ 208 ପ୍ରକଳ୍ପକୁ ଜାତୀୟ ରାଜପଥ ଓ ଭିତ୍ତିଭୂମି ବିକାଶ ନିଗମ ଲିଃ ନିର୍ମାଣ କରିବ।

ଏହାଛଡ଼ା ପ୍ରଧାନମନ୍ତ୍ରୀ ମଧ୍ୟ 63.75 କୋଟି ଟଙ୍କାର ଆର୍ଥିକ ବ୍ୟୟବରାଦ ସହିତ ରାଜ୍ୟ ସରକାରଙ୍କ ଦ୍ୱାରା ନିର୍ମିତ ରାଜ୍ୟ ରାଜପଥ ଏବଂ ଅନ୍ୟ ଜିଲ୍ଲା ସଡ଼କଗୁଡ଼ିକୁ ଉଦଘାଟନ କରିବେ। ଏଗୁଡ଼ିକ ତ୍ରିପୁରାର ଲୋକମାନଙ୍କୁ ସବୁଦିନିଆ ସଡ଼କ ଯୋଗାଯୋଗ ସୁବିଧା ଦେବ।

ପ୍ରଧାନମନ୍ତ୍ରୀ ମଧ୍ୟ 813 କୋଟି ଟଙ୍କାର ଆର୍ଥିକ ବ୍ୟୟବରାଦ ସହିତ ନିର୍ମାଣ ଶେଷ ହୋଇସାରିଥିବା 40978 ପ୍ରଧାନମନ୍ତ୍ରୀ ଆବାସ ଯୋଜନା (ସହରାଞ୍ଚଳ) ବାସଗୃହର ଉଦଘାଟନ କରିବେ। ସେ ମଧ୍ୟ ଅଗରତାଲା ସ୍ମାର୍ଟ ସିଟି ମିଶନ ଅଧୀନରେ ନିର୍ମିତ ସମନ୍ବିତ କମାଣ୍ଡ ଏବଂ ନିୟନ୍ତ୍ରଣ କେନ୍ଦ୍ରର ଉଦଘାଟନ କରିବେ।

ଆହୁରି, ପ୍ରଧାନମନ୍ତ୍ରୀ ମଧ୍ୟ ଓଲ୍ଡ ମୋଟର ଷ୍ଟାଣ୍ଡ ଠାରେ ବହୁତଳ କାର ପାର୍କିଂ ଓ ବାଣିଜ୍ୟିକ କମ୍ପ୍ଲେକ୍ସର ବିକାଶ ପାଇଁ ଶିଳାନ୍ୟାସ କରିବେ। ପାଖାପାଖି 200 କୋଟି ଟଙ୍କା ବ୍ୟୟରେ ଏହା ବିକଶିତ କରାଯିବ।  ଲିଚୁବାଗାନ ଠାରୁ ବିମାନବନ୍ଦର ଯାଇଥିବା ବର୍ତ୍ତମାନର ଦୁଇ ଲେନ ସଡ଼କକୁ ଚାରି ଲେନକୁ ସମ୍ପ୍ରସାରିତ କରିବା ପ୍ରକଳ୍ପ ପାଇଁ ମଧ୍ୟ ସେ ଶିଳାନ୍ୟାସ କରିବେ। ଏହି ପ୍ରକଳ୍ପ କାର୍ଯ୍ୟ 96 କୋଟି ଟଙ୍କା ବ୍ୟୟରେ ତ୍ରିପୁରା ସ୍ମାର୍ଟ ସିଟି ମିଶନ ପକ୍ଷରୁ କରାଯିବ।

 

*******

 

P.S.

 



(Release ID: 1703063) Visitor Counter : 236