ঙসি ভিদিও কনফরেন্সকী খুৎথাংদা প্রধান মন্ত্রী শ্রী নরেন্দ্র মোদীনা ইন্দিয়া তোই ফিয়ার ২০২১ হৌদোকখ্রে। থৌরম অদুদা রোদ ত্রান্সপোর্ত অমসুং হায়ৱেজ অমসুং মাইক্রো, স্মোল অমসুং মেদিয়ম ইন্তরপ্রাইজেসকী য়ুনিয়ন মিনিস্তর শ্রী নিতিন গাদকরি অমসুং তেক্সতাইলগী য়ুনিয়ন মিনিস্তর শ্রীমতি ইরানিশু শরুক য়াখি। শান্নপোৎকী মেলা অসি ফেব্রুৱারি ২৭দগী মার্চ ২, ২০২১ ফাওবা পাংথোক্কনি। মেলা অসিদা একজিবিতর ১,০০০ হেন্না শরুক য়ারি।

কর্নাতকাগী চান্নপাতনা, উত্তর প্রদেসকী বরানাসী অমসুং রাজস্থানগী জয়পুরগী শান্নপোৎ শাবা মীওইশিংগা প্রধান মন্ত্রীগা ৱারি শানখি। মসিগী শান্নপোৎকী মেলা অসিগী খুৎথাংদা, কমদৌনা ভারতনা তুংদা মালেমগী শান্নপোৎ শাফম অমা ওইবা য়ানবা অমসুং হিরম অসিদা শেন থাদরক্নবা লম্বী শেম্নবা শান্নপোৎশিং পুথোক্নবা অমসুং মপান্দা থাদোক্নবা সরকার অমসুং ইন্দস্ত্রি অনি পুন্দুনা ৱা খন্নগনি।

থৌরম অদুদা প্রধান মন্ত্রীনা হায়খি ভারত্তা শান্নপোৎ শাবগী ইন্দস্ত্রিগী লোত্তুনা লৈরিবা থৌনা ফুদোক্কদবনি অমসুং অত্মানির্ভর ভারতকী খোঙজংগী অচৌবা শরুক অমা ওইনা শান্নপোৎ শাবগী মশক অমা তাক্কদবনি। অহানবা শান্নপোৎকী মেলা অসি শুপ্নগী ললোন-ইতিক নত্রগা শেন-থুমগী থৌরম অমা নত্তে। মসি চহিচা কয়া কুইরবা শান্ন-খোৎনবা অমসুং হরাও-তয়াম্বগী লৈবাক অসিগী চৎনবী মপাঙ্গল কনখৎহন্নবগা মরী লৈনবা থৌরম অমনি। শান্নপোৎকী মেলা অসি কনাগুম্বা অমনা শান্নপোৎকী দিজাইন, অনৌবা পুথোকপা, তেক্নোলোজি, য়োনবা অমসুং য়োম্বগী মতাংদা খন্ননবা মফম অমনি অমসুং মসিদা মখোয়না খঙজবশিং শরুক য়াবশু য়াগনি। ইন্দস ভেল্লি সিবিলাইজেসন, মোহেঞ্জো-দারো অমসুং হরাপ্পা মতমগী শান্নপোৎশিং মালেমগী লৈবাকশিংনা থিজিল্লে।

প্রধান মন্ত্রীনা হায়খি থায়না মমাংঙৈদা লমকোয়বশিংনা ভারত্তা লাকপা মতমদা, মখোয়না ভারত্তা শান্ন-খোৎনবা তমখি অমসুং শান্নবা অদু মখোয়না পুদুনা চৎখি। হৌজিক মালেমদা মমিং চৎলবা চেস অসি থায়না ভারত্তা ‘চাতুরঙ্গা নত্রগা চাদুরঙ্গা’ হায়না শান্নরমখি। ঐখোয়গী অরিবা লাইরিকশিংদা বাল রামগী শান্নপোৎ য়াম্না লৈরমখি হায়না ফোঙদোকখি। গোকুলদা, গোপাল কৃষ্ণনা মহাক্কী মরুপশিংগা লোয়ন্না য়ুমগী মপান্দা বেল্লুন অমদা শান্নখি। ঐখোয়গী অরিবা লাইশঙশিংদা গেমশিং, শান্নপোৎশিং অমসুং ক্রাফশিং হকলমখি।

প্রধান মন্ত্রীনা হায়খি হিরম খুদিংমক্তা অঙাংশিং ফহনবদা শান্নপোৎশিংনা মতেং পাংলি। অমুক হন্না শীজিন্নবা অমসুং রিসাইক্লিং তৌবা অসি ভারতকী পু্ন্সি মহিংগী শরুক অমনি, মসি ঐখোয়গী শান্নপোৎশিংদশু উরে। ভারতকী শান্নপোৎ অয়াম্বা মহৌশাদা ফংবা অমসুং অকোয়বগী ফিবম কাইহন্দবা পোৎলমশিংনা শাবনি, মখোয় শাবদা শীজিন্নরিবা মচুশিং অসিশু মহৌশাদা ফংবা অমসুং হকচাং শোক্তবা ঙাক্তনি। হায়রিবা শান্নপোৎশিং অসি ঐখোয়গী চৎনবী অমসুং পুৱারিগা মরী লৈনৈ অমসুং খুন্নাইগী ৱাখল্লোলশিং শেমগৎপা অমসুং ভারতকী মিৎয়েং শেমগৎপদশু মতেং পাংলি। লৈবাক অসিগী শান্নপোৎ শাবশিংনা ইকোলোজি অমসুং সাইকোলোজি অনিমক্তা হেন্না ফগদবা শান্নপোৎশিং শাগদবনি। শান্নপোৎশিং শাবদা প্লাস্তিক হন্থনা শীজিন্নগদবনি অমসুং অমুক হন্না শীজিন্নবা য়াবা পোৎলমশিং শীজিন্নগদবনি।

প্রধান মন্ত্রীনা হায়খি ঙসিদি মালেম শীনবা থুংনা হিরম খুদিংমক্তা ভারতকী মিৎয়েং অমসুং ভারতকী ৱাখল্লোলশিংগী মরমদা ৱারি শানরে। ভারতকী শান্ন-খোৎনবশিং অমসুং শান্নপোৎশিংদা য়াওরিবা লৌশিং, সাইন্স, নুংঙাইবা অমসুং সাইকোলোজি অসি অখন্নবা অমনি। অঙাংশিংনা লাত্তু শান্নবা তম্বা মতমদা, মখোয়না গ্রেভিতি অমসুং বেলেন্সকী পারা তমখি। মসিগা মান্নবা মওংদা, অঙাংশিংনা নাউরি কাপ্পা শান্নবা মতমদা, মশা খঙদনা পোতেন্সিএল অমসুং কাইনেতিক ইনর্জিশিংগী মরমদা তম্বা হৌখি। পজল তোইশিংনা অরুবা ৱাখল খনবা অমসুং অৱাবশিং কমদৌনা থেংনগনি হায়বগী লৌশিং ফংহনখি। পোকপতা ঙাইরিবা অঙাংশিংশু মখুৎশিং থেকতোক-থেকচিন তৌদুনা অমসুং লৈদুনা কোইনা চৎপগী মরমদা ইথিল পোকপা হৌখি। 

প্রধান মন্ত্রীনা হায়খি অফবা শান্নপোৎশিংনা অঙাংশিংগী হৈশিংবা হেনগৎহল্লি অমসুং মখোয়গী ৱাখলনা শাগৎপশিংদা মতেং পাংই। মখোয়গী ৱাখলনা শাগৎপশিংগী ঙমখৈ লৈতে। মখোয়না দরকার ওইরিবা অসি মখোয়গী লাংতক্নবা কোকহনবা ঙম্বা অমসুং মখোয়গী ৱাখল-লৌশিং মিকপ থোকহনবা ঙম্বা অপীকপা শান্নপোৎ অমনি। অঙাংশিংগী লাইরিক তম্বদা শান্নপোৎশিংনা মরুওইবা থৌদাং অমা লৌবা মরম্না মমা-মপাশিংনা মখোয়গী অঙাংশিংগা শান্নগদবনি। শান্নপোৎশিংগী সাইন্স অমসুং অঙাংশিং শেমগৎপদা শান্নপোৎশিংনা লৌরিবা থৌদাং মমা-মপাশিংনা খঙগদবনি অমসুং ওজাশিংনা স্কুলশিংদা শান্নপোৎশিং শীজিন্নগদবনি। হিরম অসিদা সরকারনা মপুংফাবা থবকশিং পায়খৎলে অমসুং অনৌবা নেসনেল ইজুকেসন পোলিসিগী খুৎথাংদা অহোঙবশিং পুরক্লে।

অনৌবা নেসনেল ইজুকেসন পোলিসিগী মতাংদা প্রধান মন্ত্রীনা হায়খি পোলিসি অসিদা শান্নবা অমসুং থবক ওইনা পাংথোকপদা য়ুম্ফম ওইবা লাইরিক তম্বগী খুদোংচাবশিং পাক-শন্না য়াওরে। মসি অঙাংশিং মরম চাবা অমসুং অনৌবা ৱাখল খনবা ঙম্নবা অখন্নবা পুক্নিং চঙবা ইজুকেসন সিস্তেম অমনি। শান্নপোৎশিংগী লমদা, অফবা শান্নপোৎশিং শানবা ভারতকী চৎনবী, তেক্নোলোজি, ৱাখল্লোল অমসুং লৌশিং লৈ। ঐখোয়গী সোফৱায়র ইঞ্জিনিয়ারশিং, কম্পুতর গেমশিংনা মালেমদা ভারতকী ৱারিশিং শন্দোকপা ঙম্লবসু, অকোয়বগী ফিবম শোকহন্দবা শান্নপোৎশিংনা ঐখোয়না মালেম অসি অমুক মাইওনশিল্লকপা ঙমহনগনি। পুম্নমক অসি লৈরবশু, হৌজিক দোল্লর বিল্লিয়ন ১০০গী মালেমগী শান্নপোৎকী কৈথেলদা ভারতকী চাকথুং অসি য়াম্না পীক্লি। লৈবাক অসিদা শীজিন্নরিবা শান্নপোৎশিংগী চাদা ৮৫ অসি মপান লৈবাকশিংগীনি। ফিবম অসি অহোঙবা পুরকপা দরকার ওইরে।

প্রধান মন্ত্রীনা হায়খি হৌজিক লৈবাক অসিগী মরুওইবা সেক্তর ২৪গী মনুংদা শান্নপোৎশিং শাবগী ইন্দস্ত্রি য়াওরে। নেসনেল তোই এক্সন প্লান শেম্লে। হায়রিবা ইন্দস্ত্রিশিং অসি চাংদম্ননবা, লৈবাক অসিগী মশাগী ওক্নবা শান্নপোৎশিং পুথোক্নবা অমসুং ভারতকী শান্নপোৎশিং মালেমগী লৈবাকশিংদা য়ৌহন্নবা প্লান অসিদা মিনিস্ত্রি অমসুং দিপার্তমেন্ত ১৫ য়াওরে। শান্নপোৎশিং শাবা মফমশিং শেমগৎনবা রাজ্য সরকারশিংনা চপ মান্নবা থৌদাং লৌরে। হায়রিবা থবকশিং অসিগা লোয়ন্না তোই তুরিজম চাউখৎহন্নবা থবকশিং পায়খৎলে। শান্ন-খোৎনবদা য়ুম্ফম ওইবা ভারতকী শান্নপোৎশিং য়োকখৎনবা তোয়াথোন-২০২১শু শীল্লে অমসুং অনৌবা ৱাখল্লোল ৭০০০ হেন্না কোক চুংশিন্নরে।  

প্রধান মন্ত্রীনা হায়খি করিগুম্বা ভারত্তা শাবা পোৎথোকশিং পাম্নরবদি, ভারত্তা খুৎনা শাবা পোৎথোকশিং পাম্নবশু হেনগৎলক্কনি। ঙসিদি মীয়াম্না শান্নপোৎশিং পোৎশক অমা ওইনা লৈবা খক নত্তনা লৈরিবা শান্নপোৎ অদুগা মরী লৈনবা ৱাফমশিংশু খঙবা পাম্লে। মরম অদুনা ঐখোয়না ভারত্তা খুৎনা শাবা পুক্নিং থৌগৎকদবনি।

***