প্রধান মন্ত্রী, শ্রী নরেন্দ্র মোদীনা ‘মহাবাহু-ব্রক্ষপুত্র’ হৌদোকখ্রে অমসুং অসামদা থোং অনিগী উরেপ-উয়ুং তমখ্রে। থৌরম অদুদা রোদ ত্রান্সপোর্ত অমসুং হায়ৱেজকী কেন্দ্রগী মন্ত্রী; লো অমসুং জস্তিস, কম্ম্যুনিকেসন্স অমসুং ইলেক্ত্রোনিক্স এন্দ ইনফোর্মেসন তেক্নোলোজীগী কেন্দ্রগী মন্ত্রী; পোর্তস, শিপ্পিং অমসুং ৱাতরৱেজকী এম.ও.এস. (আই/সি) অমসুং অসাম অমদি মেঘালয়গী মুখ্য মন্ত্রীনা শরুক য়াখ্রে।

‘মহাবাহু-ব্রক্ষপুত্র’ হৌদোকপা ওইনা মহাক্না নীমাতি-মাজুলি ইথৎ, অৱাংথংবা গুৱাহাতি-খা থংবা গুৱাহাতি অমসুং ধুব্রি-হাতসিঙ্গিমারিগী মরক্তা রো-পেক্স বেসেল ওপরেসনশিং শঙ্গাখ্রে। মহাক্না জোগিঘোপাদা লৈবা ইন্দলেন্দ ৱাতর ত্রান্সপোর্ত (আই.দবল্যু.তি.) তর্মিনেল অমসুং ব্রহ্মপুত্র তুরেলগী মখল কয়াগী তুরিস্ত জেত্তিশিংগী উরেপ-উয়ুং তমখ্রে অমসুং ইজ-ওফ-দুইং-ব্যুজিনেসকী দিজিতেলগী সোল্যুসনশিং হৌদোকখ্রে।

থৌরম অসিদা ৱা ঙাংলদুনা প্রধান মন্ত্রীনা ঙরাং পাঙথোকখিবা লৌউ-শিংউগা মরী লৈনবা অলি-অয়ে লিগাং কুক্ষৈ অসিগা ইরোইননা মিসিং কাংলুপতা য়াইফ-পাউজেল পীখ্রে। মহাক্না হায় শেংলবা তুরেল অসি চহি কয়াদগী খুন্নাইগী ওইবা থবক-থৌরমশিং অমসুং কন্নেক্তিবিতীগা পাঙ্খক ওইদুনা লাকখি। মমাংদা ব্রক্ষপুত্রদা কন্নেক্তিবিতীগা মরী লৈনবা থবক পাইখৎলমখিদবা অসিদা মহাক্না নুংঙাইতবা ফোঙদোকখ্রে। মহাক্না হায় মসিনা মরম ওইরগা অসাম মনুংদা অমদি অৱাং নোপোক্কী অতোপ্পা মফমশিংদা কন্নেক্তিবিতীদা চাউনা খুদোংচাদবা থোকহনখি। মহাক্না হায় হৌজিক্তি প্রোজেক্তশিং অসিনা লমদম অসিগী লমগী অমসুং চৎনবীদা খেৎন্নবা অমদি অরাপ্পা লৈরম্বা অসি খোঙজেল য়াংনা হন্থহল্লগনি। মহাক্না মখা তারদুনা হায় অসাম য়াওনা অপুনবা অৱাং নোংপোক্কী লম অমসুং চৎনবীগী অপুনবা শক্তম অদু হৌখিবা চহি খরা অসিদা মপাঙ্গল কনখৎহনবা ঙমখ্রে।

প্রধান মন্ত্রীনা হায় ঙসি দা. ভুপেন হজারিকা সেতু, বোগিবীল থোং, সরাইঘাৎ থোং অসিগুম্বা থোংশিংনা অসামদা পুন্সি মহিংদা খুদোংচাহল্লি। মহাক্না হায় মসিনা লৈবাক অসিগী ঙাকশেলগী মপাঙ্গল কনখৎহনখি অমসুং ঐখোয়গী লান্মীশিংদা চাউনা খুদোংচাবা ফংহনখি। অসাম অমসুং অৱাং নোংপোক ফাওননবা কেম্পেন অসি ঙসি মাংলোমদা চংশিনহনখ্রে। প্রধান মন্ত্রীনা অসামগী মুখ্য মন্ত্রী অমসুং মহাক্কী সরকারনা মাই পাকপা অসি পুরকপা ঙম্বগীদমক থাগৎখ্রে। মাজুলীদা অসামগী অহানবা হেলিপাদ লৈখ্রে অমসুং মসিনা থুগদবা অমসুং শাফগদবা চৎনবগী পাম্বৈ ওইরি মরমদি কালিবরি লোইননা জোর্হাৎকি ফাওনহল্লিআ কি.মি. ৮ শাংবা থোংগী ভুমি পুজনগা লোইননা মতম শাংনা ধাবি তৌদুনা লাকখিবা অসি থুংহনখ্রে। প্রধান মন্ত্রীনা হায় “মসিনা খুদোংচাবা অমসুং ওইথোকপা কয়া পুরক্কদবা থোং অমা ওইরগনি”।

মসিগা চপ মান্না ধুব্রিদগী মেঘালয়দা লৈবা ফুলবারি ফাওবা কি.মি. ১৯ শাংবা থোং অসিনা বরাক তম্পাক্তা কন্নেক্তিবিতী ফগৎহল্লগনি অমসুং মেঘালয়, মনিপুর, মিজোরাম অমসুং অসামগী মরক্তা লৈরিবা অরাপ্পা অসি হন্থহল্লগনি। প্রধান মন্ত্রীনা হায় ঙসি মেঘালয় অমসুং অসামগী মরক্তা লৈরিবা অরাপ্পা অসি লম্বীদা চৎলবদি কি.মি. ২৫০ ওই; হায়রিবা অসি শুপ্নগী কি.মি. ১৯-২০দা হন্থহল্লগনি।

‘মহাবাহু-ব্রক্ষপুত্র’ প্রোগ্রাম অসিগী মতাংদা ৱা ঙাংলদুনা শ্রী মোদীনা হায় মসিনা হিথাংফমদা য়ুম্ফম ওইবা চাউখৎ-থৌরাংগী খুত্থাংদা ব্রক্ষপুত্রগী ঈশিংনা ৱাতর কন্নেক্তিবিতীগী মপাঙ্গল কনখৎহল্লগনো। ঙসি হৌদোকখিবা রো-পেক্স সর্ভিস অহুম অসিনা অসাম অসি রো-পেক্স সের্ভিস চাউনা লৈবগা লোইননা কন্নেক তৌবা মাংজিল থারিবা রাজ্য অমা ওইহনখ্রে। মসিগা লোইননা তুরিস্ত জেতী মরি অসিনা অৱাং নোংপোক অমদি অসামগী কন্নেক্তিবিতী চাউনা ফগৎহল্লগনি।

প্রধান মন্ত্রীনা রাজ্য অসিদা চহি কয়া কন্নেক্তিবিতী অসি নাথৈদুনা থম্বনা চাউখৎপা ফংহনদ্রিবা অসিদা নুংঙাইতবা ফোঙদোকখ্রে। ইনফ্রাস্ত্রকচর ফৎচিল্লক্তবা অমসুং ৱাতরৱেজ লৈশিল্লক্তবা অসিনা প্রধান মন্ত্রীবু নুংনাংবা পোকহনখি। হায়রিবশিং অসি চুমথোরকপা হৌরকপা অসি হান্নগী প্রধান মন্ত্রী অতল বিহারি বাজপয়ীগী মতমদগী হৌরকখি হায়না শ্রী মোদীনা ফোঙদোকখ্রে। হৌখিবা চহিশিংদা অসামদা অমুক হন্না মল্তি-মোদেল কন্নেক্তিবিতী লিংখৎনবা থৌরাংশিং পাইখৎখি। অসাম অমসুং অৱাং নোংপোক অসি অতোপ্পা নোংপোক থংবা এসিয়ন লৈবাকশিংগা লোইননা ঐখোয়গী চৎনবী অমসুং বিজিনেসকী মরীশিং অসিগী হব ওইহন্নবা হোৎনরি।

প্রধান মন্ত্রীনা হায় ইন্দলেন্দ ৱাতরৱেজকী থবক-থৌরম অসিনা মফম অসিদা অচৌবা শাফু অমা পীরগনি। মহাক্না হায় হন্দক্তা বাঙ্গলদেশকা লোইননা ৱাতর কন্নেক্তিবিতী ফগৎহন্নবা য়ান্না চে অমা খুৎয়েক পীনখি। হূগ্লী তুরেলগী ইন্দো-বাঙ্গলদেশ প্রোতোকল রুৎতা ব্রক্ষপুত্র অমসুং বরাক তুরেল ফাওনহন্নবা থবক পাইখৎলি। অৱাং নোংপোকপু ভারতকী অতৈ লমদমশিংগা ফাওনহন্দুনা লমদম অসিনা লম্বী মশিং য়ামদনা লৈরিবা অসি হন্থহল্লগনি। মহাক্না মখা তারদুনা হায় জোগিগোপা আই.দবল্যু.তি. তর্মিনেল অসিনা অসাম অসি হলদিয়া পোর্ত অমুং কোলকাতাগা ৱাতরৱেজ অমগী খুত্থাংদা ফাওননবা অতোপ্পা লম্বেল অমা পীরগনি। তর্মিনেলশিং অসিদা লৈরিবা ভুতান অমসুং বাঙ্গলদেশ কার্গোশিং অমসুং জোগিঘোপা মল্তি-মোদেল লোজিস্তিক্স পার্কতা লৈরিবা কার্গোশিং অসি ব্রক্ষপুত্র তুরেলগী খুত্থাংদা তোঙান তোঙানবা মফমশিংদা পুবদা খুদোংচারগনি।

প্রধান মন্ত্রীনা হায় অনৌবা রুৎশিং অসি মীচম প্রজা অমসুং লমদম অসিগী চাউখৎ-থৌরাংদা খুদোংচানবা শেমখিবনি। মহাক্না মখা তারদুনা হায় মাজুলি অমসুং নীমাতিগী মরক্তা লৈরিবা রো-পেক্স সর্ভিস অসি কি.মি. ৪২৫তগী শুপ্নগী কি.মি. ১২তা হন্থহনগদবা অসিগুম্বা রুৎ অমনি। লম্বেল অসিদা জহাজ অনি চেলহনখি মসিনা পেসেঞ্জর ১৬০০রোম অমসুং গারি কয়া অমুক্তদা পুথোক-পুশিন তৌগনি। মহাক্না হায় মসিগা চপ মান্ননা গুৱাহাতিদা অৱাং থংবা গুৱাহাতি অমসুং খা থংবা গুৱাহাতিগী মরক্তা লৈরিবা অরাপ্পা অসি কি.মি. ৪০দগী কি.মি.৩দা হন্থহনখ্রে।

প্রধান মন্ত্রীনা হায় য়ুজরশিংনা মরি চুম্বা ই-পাউ লৌনবা ই-পোর্তেলশিং ঙসি হৌদোকখ্রে। কার-দি পোর্তেলনা নেস্নেল ৱাতরৱেজতা লৈরিবা কার্গো পুম্নমক অমসুং ক্রুজ ত্রাফিক দেতাগী রিএল-তাইম ওইবা ই-পাউ পীবদা মতেং পাংগনি। মসিনা ৱাতরৱেগী ইনফ্রাস্ত্রকচরগা মরী লৈনবা ই-পাউসু ফংহনগনি। মহাক্না মখা তারদুনা হায় জি.আই.এস. দা য়ুম্ফল ওইবা ইন্দিয়া মেপ পোর্তেল অসিনা বিজিনেসকী তৌনবা লাকপা পাম্বা মীওইশিং মতেং পাংগনি।

প্রধান মন্ত্রীনা হায় অসাম অমসুং অৱাং নোংপোক্কী ৱাতরৱেজ, রেলৱেজ, হায়ৱে কন্নেক্তিবিতী অসিগা লোইননা ইন্তর্নেৎ কন্নেক্তিবিতীসু চপ মান্না মরু ওই অমসুং হিরমশিং অসিদা লেপ্পা লৈতনা থবক পাইখৎলি। মহাক্না হায় লুপা করোর কয়াগী ইনবেস্তমেন্তগা লোইননা অৱাং নোংপোক্কী অহানবা দেতা সেন্তর গুৱাহাতিদা শারগনি। দেতা সেন্তর অসিনা রাজ্য ৮গী দেতা সেন্তর হব অমা ওইনা মথৌ তৌগনি অমসুং অসাম য়াওনা অৱাং নোংপোক্কী আই.তি. সর্ভিসতা য়ুম্ফম ওইবা ইন্দস্ত্রীম বি.পি.ও. ইকোসিস্তেম অমসুং স্তার্ত-অপশিং ই-গভর্নান্সকী খুত্থাংদা মপাঙ্গল কনখৎহনগনি।

প্রধান মন্ত্রীনা হায় সরকারনা সবকা সাথ, সবকা বিকাস অমসুং সবকা বিশ্বাসকী ৱাখল্লোনগা লোইননা অৱাং নোংপোক য়াওনা লৈবাক অসিদা থবক তৌরি। মহাক্না মাজুলি রিজনগী ফজরবা চৎনবী, অসামীজকী চৎনবী অমসুং লমদম অদুগী বাইওদাইভর্সিতী অদুবু থাগৎখি। প্রধান মন্ত্রীনা কলচরেল য়ুনিভর্সিতী লিংখৎপা, মাজুলিদা বাইওদাইভর্সিতী হেরিতেজ সাইৎকী স্তেতস পীবা, তেজপুর-মাজুলি-সিবসাগরদা হেরিতেজ সর্কিৎ অসিগুম্বা খোঙথাংশিং অমসুং নামামি ব্রক্ষপুত্র, নামামি বরাকগুম্বা পাল্লন থৌরমশিং পনখি। খোঙথাংশিং অসিনা অসামগী মশক তাকপা হেনগৎহল্লি হায়না প্রধান মন্ত্রীনা ফোঙদোকখ্রে। মহাক্না হায় ঙসিগী কন্নেক্তিবিতীগা মরী লৈননা হৌদোক্লিবশিং অসি তুরিজমগী অনৌবা লমশিং হাংদোক্লগনি অমসুং অসাম অসি ক্রুজ তুরিজমগী মরু ওইবা লমথুংদম অমা ওইরক্লগনি হায়না আশা থমখ্রে। ঐখোয়না অসাম, অৱাং নোংপোক অসি আত্মানির্ভর ভারতকী মপাঙ্গল লৈবা য়ুম্বী অমা ওইহন্নবা পুন্না হোৎনমিন্নবা তাই হায়না ফোঙদোক্লদুনা প্রধান মন্ত্রীগী ৱারোল লোইশিনখি।

***