ব্রহ্মপুত্র ভেল্লি ফর্তিলাইজর কোর্পোরেসন লিমিতেদ, নামরুপ(অসাম)গী য়ুরিয়া শুংনবা য়ুনিতশিং তুংকোইনা মথৌ পাংথোকপা ঙম্নবা কোর্পোরেসন অসিদা লুপা কোতি ১০০গী গ্রান্ত-ইন-এদ পীনবা ফর্তিলাইজর দিপার্তমেন্তনা পুখৎলকপা ৱাফম প্রধান মন্ত্রী নরেন্দ্র মোদীনা লুচিংবা কেবিনেত কমিতি ওন ইকোনোমিক এফেয়ার্সনা ঙসি অয়াবা পীরে।

ব্রহ্মপুত্র ভেল্লি ফর্তিলাইজর কোর্পোরেসন লিমিতেদ, নামরুপ অসি ভারত সরকারগী ফর্তিলাইজর দিপার্তমেন্তগী মখাদা লৈবা কম্পেনিস এক্তকী মতুংইন্না শেমখিবা পব্লিক সেক্তর অন্দরতেকিং অমনি। নামরুপতা লৈবা ব্রহ্মপুত্র ভেল্লি ফর্তিলাইজর কোর্পোরেসন লিমিতেদকী মফমশিংদা হৌজিক প্লান্ত অনি হায়বদি নামরুপ-২ অমসুং নামরুপ-৩ মথৌ পাংথোক্লি। ভারত্তা অহানবা গ্যাসতগী য়ুরিয়া শুংবা য়ুনিত ওইরবসু, অরিবা অমসুং কানদবা তেক্নোলোজিশিং শীজিন্নবদগী হৌজিক লৈরিবা য়ুনিতশিং অসিনা শেন য়াম্না চঙহন্দনা পোৎথোক পুথোকপদা অৱাবা মায়োক্নরি।

প্লান্তশিং অসি অশোই-অঙাম থোক্তনা, তুংকোইনা অমসুং শেন মাঙদনা থবক তৌনবা অকক্নবা মেছিনশিং অমসুং খুৎলায়শিং শিন্দোকপা দরকার ওইরে। প্লান্তশিং ফজনা মথৌ পাংথোক্নবা মেকানিকেল, ইলেকত্রিকেল, ইন্সত্রুমেন্তেসন অমসুং কেতালিস্তকী পোৎলমশিং লৈনবা লুপা কোতি ১০০ রোম চঙগনি হায়না পানরি
অমসুং মরম অসিনা ব্রহ্মপুত্র ভেল্লি ফর্তিলাইজর কোর্পোরেসন লিমিতেদতা লুপা কোতি ১০০গী গ্রান্ত-ইন-এদ পীবদা ভারত সরকারনা অয়াবা পীখিবনি।

ব্রহ্মপুত্র ভেল্লি ফর্তিলাইজর কোর্পোরেসন লিমিতেদ অসি ভারতকী অৱাং-নোংপোক লমদমদা লৈবা ওইবনা, লমদম অসিগী শেন-থুমগী ফিবম ফগৎহনবদা মরুওইবা থৌদাং অমা লৌরি। ব্রহ্মপুত্র ভেল্লি ফর্তিলাইজর কোর্পোরেসন লিমিতেদ, নামরুপতা লুপা কোতি ১০০গী গ্রান্ত পীরিবা অসিনা চহি অমদা য়ুরিয়া মেত্রিক তন লাখ ৩.৯০ অমুক হন্না পুথোকপা ঙমহনগনি অমসুং অসাম য়াওনা অৱাং-নোংপোক রাজ্যশিংদা চাবা থাবগী অমসুং লৌউ-শিংউগী য়ুরিয়া মতম চানা ফংহনবা ঙমগনি। মসিনা হৌজিক লেংদনা লৈরিবা ইমপ্লোয়ি ৫৮০ অমসুং অতোপ্পা এদ-হোক ওইনা লৈরিবা ইমপ্লোয়ি ১৫০০ রোম মখা তানা থবক তৌবা ঙমহনগনি। প্লান্ত অসিনা হৌজিক নাকোইননা মীওই ২৮০০০ রোম কান্নবা পীরি। মসিনা ভারত সরকারগী অত্মানির্ভর ভারতকী খোঙজং মপাঙ্গল কনখৎহনগনি।

*****