ঐহাক্কী নুংশীজরবা লৈবাক মীয়ামশিং,

খুরুমজরি!

মীয়াম খুদিংগী মফমদা মালেমগী খ্বাইদগী চাউবা অমসুং মগুন লৈবা গনতন্ত্রগী ৭২শুবা গনতন্ত্রা দিবস নুমিৎকী মাংওইননা খুরুমজরি। তোঙানবা মওংনা মগুন হাপ্পা, হরাও-কুমহৈ য়াম্বা ঐখোয়গী লৈবাক অসিদা ঐখোয়গী লৈবাক্কী ওইবা কুমহৈশিং অসি মীয়াম খুদিংনা লৈবাক নীংবগী ইথিলগা লোয়ননা হরাওবা ফোংদোকই। ঐখোয়না লৈবাক্কী কুমহৈ ওইরিবা গন্তন্ত্রগী নুমিৎ অসিসু থৱাই য়াওনা পাংথোকই অমসুং ঐখোয়না ঐখোয়গী সংবিধান, জাতিগী ফিরালদা ইকায় খুম্নবসু উৎলি।

মসিগী নুমিৎ অসিবু লৈবাক অসিদা অমসুং মপান্দা লৈরিবা ভারত মচা খুদিংমক্না য়াম্না লুনা লৌনরক্লি। চহি ৭১গী মমাংগী ঙসিগী নুমিৎ অসিমক্তদা, ভারত মচা ঐখোয়না য়াম্না তোপ-তোপ্পা সংবিধান অমা শেমদুনা ইশাদা পীজখি। মতম অদুদা ঐখোয় খুদিংমক্কী ওইনা ঙসিগী নুমিৎ অসি ঙৈহাক্তা ওইরবসু লেপ্তুনা ঐখোয়গী সংবিধান্না হায়রিবা মরু ওইবা ভেল্যুশিং অসিগী মরমদা খন্থগদবা নুমিৎনি। অচুম্বা ৱায়েল পীবা, অপাম্বা তৌবা য়াবা, মান্নবা থাক অমসুং নুংশী-চানবগী ভেল্যুশিং অসি ঐখোয়গী সংবিধানগী ৱাহৌদোক্তা য়াওরিবনি অমসুং ঐখোয়গী পুম্নমক্কী য়াম্না শেংলবা পোৎশক অমনি। মসিগী কাঙলোনশিং অসি লৈঙাক্লিবা মীওইশিং খক্তা নত্তনা মীয়াম খুদিংনা ইনগদবনি।

সংবিধান অসিবু শেম্বীরম্বা খঙ-হৈরবা নুপা, নুপীশিং অদুনা ৱাহৈ মরি অসিবু সংবিধানগী খ্বাইদগী অহৌবা মকোক্তা থম্বীরম্লিবা অসি য়াম্না চাউবা মরম অমা লৈবগীনি অমসুং মসিদা য়ুম্ফম ওইদুনা ঐখোয়গী গনতন্ত্রা অসিসু লৈরিবনি। তসেংনমক, মসিগী ৱাখল্লোনশিং অসিনা ঐখোয়গী নিং-তম লান্দসু লমজিংবীখিবনি। বাল গঙ্গাধর ‘তিলক’, লালা লাজপৎ রাই, মহাত্মা গান্ধী অমসুং সুভাস চন্দ্র বোসকুম্বা শক্নাইরবা লুচিংবা অমসুং ৱাখল লৈবা মীওইশিংনা ঐখোয়গী নিং-তম লান্দা ইথিল পীখি। মখোয়দা ঐখোয়গী ইমা লৈবাক অসিনা তুংদা ওইরকপগী মতাংদা তোঙান-তোঙানবা ৱাখল লৈরমখি, অদুবু মখোয় পুম্নমক্কী মান্নবা অপাম্বদিঃ অচুম্বা ৱায়েল পীবা, অপাম্বা তৌবা য়াবা, মান্নবা থাক অমসুং থবক পুনবা অসিনি।

মসিগী ৱাখল্লোনশিং অসিনা ঐখোয়গী লৈবাকপু শেম্বীরম্বা মীওইশিংদা মতৌ করম্না ইথিল পীরম্বগে হায়বদু খঙনবা ঐখোয়গী পুৱারী নৈনহন্নীংই। অদুগা মসিগী পাউখুমদি ঐখোয়না খঙলবা অদুনিঃ মসিগী লমদম, লৈরিবা মীওইশিংনা ৱাখল্লোনশিং অসিদা নীংশিংবা থোক্ত্রবা মতমদগী পাম্নদুনা লাক্লিবনি। অচুম্বা ৱায়েল পীবা, অপাম্বা তৌবা য়াবা, মান্নবা থাক অমসুং থবক পুনবা অসি ঐখোয়গী পুন্সিগী মতম কুইনদগী চেল্লক্লবা ৱাখল্লোন্নি। মখোয়শিং অসি কায়বা য়াদ্রবা মরী অমগী খুত্থাংদগী ঐখোয়গী চাউখৎপা অসিনা হৌরকপদগী লাকপনি। মসিগী মতমগী ওইবা অশেংবা ৱাহন্থোক খঙনবা হোৎনবা অসি চারোন-শুরোন খুদিংমক্কী পাংথোকফম থোকপা থবক্নি। নিং-তম লান্মীশিংনা মখোয়গী মতমদা পাংথোক্লম্বগুম, ঐখোয়না ঐখোয়গী মতম অসিদসু পাংথোক্কদবনি। মসিগী মরু ওইরবা ৱাখল্লোনশিং অসিনা ঐখোয়গী চাউখৎপগী লম্বীবু ঙালহনগদৌরিবনি।

নুংশীরবা লৈবাক মচাশিং,

ভারত মচা খুদিংনা ঐখোয়গী মীশিং য়াম্লবা লমদম অসিবু হৱাই-চেংৱাই অমসুং শঙ্গোমগী পোত্থোকশিংদা মরোমদোম লেপচবা ঙমহল্লিবা লৌমীশিংবু ইকায় খুম্নরি। মহৌশাগী খুদোংচাদবা, তোঙান-তোঙানবা অতোপ্পা শিংনবশিং অমসুং কোবিদ-১৯গী লাইচৎ লৈরবসু, ঐখোয়গী লৌমীশিংনা লৌউ-শিংউগী পোত্থোকশিং ৱাৎহনখিদে। ৱা খঙবা লৈবাক অসিনা মখোয়গী য়াইফ-য়ুম্বালগীদমক্তা খোঙফম চেৎলি।

ঐখোয়গী লৌমীশিংনা লৈবাক অসিদা চানবা চিঞ্জাক ৱাৎহন্দনবা কন্না হোৎনবগুম্না, আর্ম্দ ফোর্সকী থৌনা ফরবা লান্মীশিংনা ঐখোয়গী লৈবাক্কী ঙমখৈবু শাথিরবা ফিভমশিংগী মরক্তা ঙাক-শেন্দুনা থম্লি। উনমুক ইঙলবা সিয়াচেন অমসুং মাইনস ৫০দগী ৬০গী দিগ্রী সেলসিয়সকী অইং-অশাগী মতৌ লৈবা লদাখকী গলৱান তম্পাক্তগী দিগ্রী সেলসিয়স ৫০ ফাওবগী চাংদা শাবা জয়শলমের ফাওবদা, কংফালদা, নোংথক্তা অমসুং পাক-চাউরবা সমুদ্র মপানগী মফমশিংদা ঐখোয়গী লান্মীশিংনা মীকুপ খুদিংগী মিৎ-না শিংনা লৈরি। লৈবাক মীয়াম খুদিংনা ঐখোয়গী লান্মীশিংগী মরক্তা লৈরিবা থৌনা ফবা, লৈবাক নীংবা অমসুং কত্থোকপগী ইথিল অসিগীদমক্তা চাউথোকচবা ফাওনরি।

মখোয়না চিঞ্জাক ৱাৎহন্দবা, লৈবাকপু ঙাক-শেনবা, লায়নাগী মাইয়োক্তগী ঙাকথোকপা অমসুং অমাং অতা থোকপদগী কনবীবা অমসুং চাউখৎপগী অতোপ্পা লমশিংদা তেংবাংবীবদগী ঐখোয়গী সাইন্তিস্তশিংনা ঐখয়গী লৈবাক্কী খোঙথাংশিংবু মপাঙ্গল লৈহল্লি। স্পেতগী লৌফমশিং ফাওবদা, মহৈ তমফমশঙশিংদগী হোস্পিতাল ফাওবা, সাইন্তিস্তশিংগী খুন্নাই অসিনা ঐখোয়গী পুন্সি অমসুং থবকশিংবু হেন্না নুংঙাইহল্লি। ঐখোয়গী সাইন্তিস্তশিংনা অহিং-নুংথিন খঙদনা কোরোনা ভাইরসকী মতাংদা খঙনবা হোৎনদুনা অপিবা মতমগী মনুংদা ভেক্সিন মাই পাক্না পুথোকপা ঙমখ্রে। মসিগী মাই-পাকপা অসিগা লোয়ননা, ঐখোয়গী সাইন্তিস্তশিংনা মীওইবা খুন্নাইনা নুংঙাইনা লৈনবা তেংবাংবগী শীংথানিংঙাই ওইরবা তাঙ্কক অমা হাপ্পীরে। ঐখোয়গী সাইন্তিস্তশিংনা, দাক্তর, লৈঙাক্লোই অমসুং পুন্সিগী হীরম খুদিংগী মীওইশিংগা লোয়ননা ভাইরস অসিবু লাকশিনবদা থাগৎনিংঙাই ওইনা তেংবাংদুনা অতোপ্পা চাউখৎলবা লৈবাকশিংগা চাংদম্নবদা লৈবাক অসিগী মী শিবগী চাং হন্থহল্লি। মতৌ অসুম্না, ঐখোয়গী লৌমী, লান্মী অমসুং সাইন্তিস্তশিং অসিবু অখন্ননা থাগৎফম থোকই অমসুং ৱা খঙবা লৈবাক অসিনা মখোয়বু শেংলবা গনতন্ত্রা নুমিৎ অসিদা থাগৎচরি।

নুংশীরবা লৈবাক মীয়ামশিং,

মমাংগী চহিদা, পাক চাউরবা অৱা-অনা অমগী মমাংদা মীওইবা খুন্নাই অসি চপ লেপখিবগুম্বা অদুদা ঐহাক্না সংবিধান্দা য়াওরম্লিবা নুংগী মরু ওইবা ৱারোলগী মতাংদা তত্তনা খনখি। ঐখোয়গী সংবিধান্দা য়াওরিবা “থবক পুনবগী” ৱাখল্লোন অসি লৈরমদ্রবদি ঐখোয়না লাইচৎ অসিবু নীংথিজনা থেংনরম্লিবা অদু ঙম্লম্লোই। ভারতমচাশিং অসি অচেৎপা ইমুং-মনুংগী মীওইশিংগুম্না, মান্নবা য়েক্নবা “কোরোনাভাইরস”কী মাইয়োক্তা কত্থোকপগী থৌওং কয়া পাংথোক্তুনা অমনা অমবু ঙাক-শেন্দুনা লাক্লি। মতাং অসিদা ঐহাক্না মশাগী পুন্সিবু খুদোংথীবদা থমদুনা কোবিদ-১৯ নারবশিংগী সেবা তৌরিবা দাক্তর, নর্স, পেরামেদিক্স, হেল্থকেয়র এদমিনিস্ত্রেতর অমসুং সেনিতেসনগী থৌমীশিংগী মতাংদা খল্লি। মখোয়গী মরক্তগী খরদি, মপুন্সি ফাওবা মাঙবা য়াওরিবনি। মখোয়শিংগা লোয়ননা, মীওই লাখ ১.৫ রোম্না লাইচৎ অসিগী অৱা-অনা নঙখি। ঐহাক্না লৈখিদ্রবশিংগী ইমুং মনুংগী অৱাবদা শরুক য়ারি। ঐখোয়গী ফ্রন্তলাইনগী কোরোনাগী লান্মীশিং অসি অচমবা মীয়ামশিংনি অমসুং মখোয়না মীয়ামগা মান্নদবা মীওইশিং ওমখ্রিবনি। মসিগী লাইবক থীবা তাঙ্কক অসিগী পুৱারী, হৌজিক্কী ওইনদি ইদ্রিবা, ইবা মতমদা তুংগী চারোন-শুরোন্না মখোয়বু মখোয়না মীওই অমত্তনা শেম-শাদুনা লৈররোইদবা অসিগুম্বা ইরাং অসিবু থেংনখিবদগীদমক্তা থৌনা ফবা মীওইশিং হায়না নীংশিংলগনি।

ঐখোয়গী লমগী পাক-চাউবা, মী কুঙনা তাবা, নাৎ অমসুং চৎনবীগী খেৎনবা নায়বা, মহৌশা অমসুং লম-তুগী ওইবা শিংনবশিং অসি য়েংলদুনা কোবিদ-১৯দগী ঙাকথোক্নবা চেকশিন থৌরাং লৌবা অসি য়াম্না অরুবা থবক অমা ওইখি। অদুবু, ঐখোয়না মদুবু পাংথোক্তুনা ভাইরস অসি য়াম্না পাক চাউবা মওংদা লাকশিনবা ঙমখি।

মসিগী লুরবা থৌদোকশিং অদু লৈখ্রবসু, ঐখোয়না হীরম কয়াদা থবক থৌরম কয়া মাই-পাক্না পাংথোকপা ঙমখি। লাইচৎ অসিনা নহা ওইরিবশিংনা মহৈ-তম্বগী থৌওংদা অয়েৎপা পীনবা হোৎনখি, অদুবু ইন্সতিত্যুসনশিং অমসুং ওজাশিংনা অনৌবা তেক্নোলোজী শিজিন্নদুনা মহৈ তম্বা লেপহনখিদে। মীওই মশিং য়াম্না অমসুং কুঙনা তাবা বিহার অমসুং য়ৌশিনবদা ৱাবা অমসুং অতোপ্পা শিংনবা কয়া লৈবা জম্মু অমসুং কশ্মির অমদি লদাখকী য়ুনিয়ন তেরিতরীদা তেক্ত কায়দবা অমসুং কাঙলোন ইনবা মীখল পাঙথোকখিবা অসিসু মসিগী তোপ-তোপ্পা থবকশিং অসিগী মনুংদনি। জুদিসিএরীনা তেক্নোলোজীগী মতেং লৌরগা মথৌ লেপ্তনা পাংথোক্তুনা অচুম্বা ৱায়েল কয়াসু পীবা ঙমখি। মসিগী পরিং অসি য়াম্না শাঙগনি।

মীয়ামগী পুন্সিবু খুদোংথিবদা থমদনা শেন্মিৎলোন হিঙ্গৎহন্নবা হোৎবগীদমক্তা, অনলোক তৌবগী থৌওংশিংসু য়াম্না নীংথিনা য়েংশিন্দুনা পাংথোকখি। থৌওং অসি মাই-পাকপা ওইখি অমসুং হান্না খন্নরম্বা চাংদগী হেন্না থুনা-য়াঙনা শেন্মিৎলোন অসি অমুক হিঙ্গৎখি। মাংদা অমুক হন্না থোকখিদ্রিবা জি.এস.তি. খোমজিনবগী থৌওং অমসুং ভারতনা মীরমগী লমকোয়বশিংগী খ্বাইদগী পাম্নবা মফম ওইরকখিবা অসিনা ঐখোয়গী শেন্মিৎলোন্না খোঙজেল থুনা ফগৎলকপগী খুদম অমনি। সরকারনা অপিকপা অমসুং ময়াই ওইবা ইন্দস্ত্রীশিংদা অরায়বা লোন পীদুনা অমসুং কারবারগী ওইবা অনৌবা ৱাখল্লোন পুথোকপগী পুক্নিং থৌগত্তুনা ওন্তোপ্রিনরগী ইথিল লৈহনখি।

নুংশীরবা লৈবাক মীয়ামশিং,

মমাংগী চহিদা থেংনখিবা খুদোংচাদবশিং অসিনা ঐখোয়না মতম কুইনদগী থম্মোইনুংদা থাজদুনা লাক্লবা ৱাফম – “মীওইবা খুন্নাইবু চেকশিন্না অমসুং থৱাই লুম্না লৌবা অমসুং মান্নবা থবক পাংথোকমিন্নবগী ৱাখল্লোন অসিনা ঐখোয়বু চহি চা কয়াদগী অমত্তা ওইহন্দুনা লাক্লিবনি” অসি অমুক্কা হন্না ঐখোয়দা নীংশিনহনখি। ভারতনা হীরম খুদিংমক্তা মাং-থানা থোক্লক্তুনা মীয়ামগী খ্বাইদগী মমাংদা থমজখি। ঐখোয় ভারত মচাশিংদি মীওইবা খুন্নাইগীদমক্তা হিংবনি অমসুং শিবনি। মসিগী ভারতকী নীংথিরবা ৱাখল্লোন অসি শক্নাইরবা কবি, মাইথিলি শরন গুপ্তনা মখাগী ৱাহৈশিং অসিদা ফোংদোক্লম্মিঃ

উসি উদার কি সদা, সজিৱ কির্তী কুজতী;

তথা উসি উদার কো, সমস্ত সৃস্তী পুজতী।

অখন্দ আত্মভাৱ জো, অসিম বিস্ব মে ভরে,

ৱহি মনুস্য হে কি জো, মনুস্য কে লিএ মরে।

ৱাহৈশিং অসি মনিপুরীদা অসুম্না ৱাহন্থোক পীবা য়াগনিঃ

মতম নাইদ্রবা ঈশৈদা হিংবা মখোয়গী পুন্সিনি,

মালেম্না ইকায় খুম্নবা পুকচেল চাউবা মখোয়নী।

মখোয়গী অমত্তা ওইবগী ইথিলনা য়ুনিভর্সপু থনহল্লি,

মখোয়দি অতোপ্পা মীওইগীদমক্তা শিজবা অশেংবা মীওইনি।

ঐখোয়গী অসিগুম্লবামীওইবা খুন্নাইবু নুংশীবগী ইথিল অসিনা ঐখোয়বু অৱাংবা থাক্তা পুগনি হায়বগী ঐহাক্না থাজবা থম্মি।

তমজনবা ওইনা ঐখোয়না ইং ২০২০বু য়েংশি। মীওইবা খুন্নাইদা অপিকপা অসিনা লোইবা নত্তে, মসিদি অচৌবগী মখা পোনবনি হায়বা অচৌবা পরা অমা তম্বীখিবা মহৌশা ইমাবু অমুক্কা হন্না তগৎ-তগৎ তেকহনবগী থৌওং থোকখি। অসিগুম্বা লাইচৎ থোকপা অসিবু হন্থহন্নবা হায়দুনা অইং-অশা হোংবগী শিংনবা অসি মালেমগী থাক্তা খ্বাইদগী হান্না তৌগদবা থৌওংনি হায়না খন্নরগনি হায়বগী ঐহাক্না হৌজিক থাজবা লৈরে।

নুংশীরবা লৈবাক মীয়ামশিং,

ইরাং অমবু খুদোংচাবদা ওন্থোকপা ওইনা, প্রধান মন্ত্রীনা “মরোমদোম লেপচবা ঙম্বা ভারত অভিয়ান’ নত্ত্রগা ‘মরোমদোম লেপচবা ভারত মিসন’গী খোল্লাও লাউখি। ঐখোয়গী মতিক-মগুন লৈরবা গনতন্ত্রা, হৈ-শিংলবা লৈবাক মীয়ামশিংনা, মরু ওইনা নহাশিং, ঐখোয়না মরোমদোম লেপচবা ঙম্বা ভারত অমা শেম্বা অসিদা পাঙ্গল হাপ্পীরি। লৈবাক অসিদা লৈরিবা পোত্থোক অমসুং সেবাগী অপাম্বা লৈরিবা, মসিবু থেংনবা ঙম্নবা লমদম অসিদা হোৎনরিবশিং অমসুং অসিগুম্বা থৌওংশিং অসিদা তেক্নোলোজী শিজিন্নবা অসিনা পুক্নিং য়াম্না ‘আত্মানির্ভর অভিয়ান’বু থৌগৎপীরি। মিসন অসিগী মখাদা, শেন্মিৎলোনগী শাহৌ অমসুং মাইক্রো, স্মোল অমসুং মেদিয়ম ইন্তর্প্রাইসশিংবু খুমাং চাউশিলহন্দুনা থবক পীবগী খোঙথাং কয়া অমা পায়খৎলি অমসুং মসিগা লোয়ননা স্তার্ত-অপ ইকোসীস্তেমসু য়াম্না পাকথোক চাউথোকহল্লে। মসিগী থৌওং অসি মীয়াম মশানা থৱাই হাপচবা ইহৌ অমা ওইরক্লে।

 ‘আত্মানির্ভর ভারত অভিয়ান’ অসি ইং ২০২২ ফাওবগী মনুংদা ঐখোয়গী লৈবাক অসিনা চহি ৭৫ শুরকপা ওইনা অনৌবা ভারত অমা শেম্বগী অপাম্বা লৈরিবা অসিগা মরী লৈনবনি। ঐখোয়না অচৌবা পান্দম অমা তানবগী লৈবাক্কী ওইবা খোঙচৎ অসিদা মসি য়াম্না শীংথনিংঙাই ওইবা মাই-পাকপা অমা ওইগনি। ঐখোয়গী পান্দমশিং অদুদি- ইমুং-মনুং খুদিংদা তঙাই ফদবা খুদিংমক য়াওবা য়ুম পীবদগী হৌদুনা লৌমীশিংগী চাগাসু শরুক অনি থোক্না হেনগৎহনবনি। মীয়াম পুন্না শরুক য়ামিন্নবা  অনৌবা ভারতকী খুন্নাই অমা শেম্নবগীদমক্তা, ঐখোয়না এজুকেসন, হকশেল, ন্যুত্রিসন, শোত্থরবশিংবু চিংখৎপা অমসুং নুপীশিংগী য়াইফ-য়ুম্বালগী হীরমশিংদা অহেনবা মিৎয়েং চঙলি।

অৱা-অনা তাবগী থৌদোকশিং অসিনা করিগুম্বা মতমদা অফবা ওজা অমগী থৌদাং লৌই। মসিনা ঐখোয়বু পাঙ্গল হেন্না কনহল্লি অমসুং ইশাদা থাজবসু হেনগৎহল্লি। মসিগী থাজবা অসিগা লোয়ননা, ভারতনা সেক্তর কয়াদা মাই-পাকপা থবক কয়া পাংথোকপা ঙম্লে। শেন্মিৎলোনগী শেমদোকপা কয়া অমসু পাংথোক্লি অমসুং মতম কয়াদগী পন্দুনা লৈরুরবা লেবর, লৌউ-শিংউগী শেমদোকপশিংনা মসিবু লেজিএলেসনগী খুত্থাংদা অমুক তেংবাংলি। শেমদোকপগী থৌওংশিং অসিনা হৌরকপদদি মীয়াম্না থাজবা খরা ৱাৎনরম্মি। অদুবু, সরকার অসিনা লৌমীশিংগী য়াইফ-য়ুম্বালগীদমক্তা খোঙফম চেৎলি হায়বসিদি য়েৎপা য়াররোইরদবা ৱাফম্নি।

চপ মান্নবা অদুবু মীওইবগী পুন্সিদা হকথেংননা কান্নহনবা অসিদি মতম কয়াদগী পাংথোক্তনা লাক্লবা মহৈ-তম্বগী মতাংদা পাক-চাউবা শেমদোকপনি। চৎনবী অমসুং তেক্নোলোজীদা মিৎয়েং চঙবা ‘নেস্নেল এজুকেসন পোলিসী ২০২০” অসিনা মালেমগী থাক্তা লৈবা লৌশিংগী তুংফম অমা ওইনা থোক্নিংবগী অপাম্বা লৈরিবা অনৌবা ভারতকী য়ুম্ফম থোনগনি। মসিগী শেমদোকপা অসিনা মহৈরোইশিংগী নুংগী হৈ-শিংববু শেমগত্তুনা মখোয়গী ৱাখল্লোনশিংবু পুন্সিগী শিংনবা কয়া থেংননবগীদমক্তা হৌদোক্কনি।

হোৎনরিবা ময়াম অসিগী অপুনবা মহৈ অদো ঐখোয়গী মাংদা তাদুনা লৈররে। অসিগুম্বা তম্বা ঙমদবা অৱাবা চহী অমরোম হেন্না খাঙলবা মতুংদা ঙসিদি ভারতনা নিংহন্নবা লৈতনা থৌনা লৈনা লেপ্পা ঙম্লে। তপথখিবশিং অদু মতম খরখক্তগী ওইদুনা হৌজিক্তি শেন্মিৎলোন অমুক মাইকৈ থুংনা ফগৎলে। মরোমদোম লেপচবা ঙম্লবা ভারতনা ঙসিদি মশাগী ওইবা কোবিদ-১৯গী তিকা পুথোকচবা ঙম্লে, অমসুং হৌজিক্তি পাক শন্না তিকা থাদোকপগী দ্রাইব অমা চত্থরি হায়রিবসিসু পুৱারীদা অসিগুম্বা ৱারীশিংগী মনুংদা অহানবা ওইগদৌরি। এদমিনিস্ত্রেসন অমসুং হকশেলগী সর্বিসশিংনা অসিগুম্বা এক্সর্সাইস অসিবু মাই পাক্নবগীদমক মপুং ফানা হোৎনরি। ঐহাক্না লৈবাক মচাশিংদা চৎনকাংলোনগী মতুং ইন্না পুন্সিগী ইরিক অসিবু লৌশিনবীয়ু অমসুং তিকা থাদোকপীনবা পুক্নিং চিংশিঞ্জরি। অদোমগী হকশেলনা অদোমগী চাউখৎপগী মাইকৈদা পুগনি।

ঙসিদি ভারতপু য়াম্না চুম্না "মালেমগী ফার্মাসী" হায়না কৌনরে মরমদি মালেমগী তোঙান-তোঙানবা লৈবাক কয়াদা লাইচৎ অসিদগী কন্নবগীদমক হিদাক লাংথক অমসুং হকশেলগী পোৎলম কয়া য়েল্লি। হৌজিক্তি ঐখোয়না অতোপ্পা লৈবাকশিংদা তিকা পীরিবনি।

নুংশিরবা লৈবাক মীয়ামশিং,

হৌখিবা চহী অদু অৱাবগী মতম্নি অমসুং মদু তোঙান তোঙানবা মাইকৈদগী চঙলকখি। ঐখোয়না ঐখোয়গী ঙমখৈদা ঙমখৈ খোপচিনবশিংগা মাইওক্নখি, অদুবু ঐখোয়গী থৌনা লৈরবা লান্মীশিংনা ঙাকথোকখি। অসিগুম্বা পান্দম অসি ফংনবগীদমক, মখোয়গী মনুংদগী ২০দি থৱাই থাখি। লৈবাক অসিনা মতম চুপ্পদা থৌনা ফরবা লান্মীশিং অদুগী মফমদা লমন তোনশিল্লগনি। ঐখোয়না শান্তি পুরক্নবগীদমক ৱাশকখিবা তারবসু ঐখোয়গী ঙাকশেলগী ফোর্সশিং – আর্মী, এয়র ফোর্স অমসুং নেভীনা ঐখোয়গী মনুংগী ওইবা সেক্যুরিতীদা অকাইবা পীরকপশিংবু মতম চানা ঙাকথোক্নবগীদমক হোৎনরি। ঐখোয়না ভারতকী অচেৎপা ফিরেপ অসিবু মালেমগী লৈবাকশিংদা পাক শন্না খঙহল্লি।

ভারত হৌজিক মাংজিল থানা চৎলি অমসুং মালেমদা মানা লেপকদবা মফমদা মতীক চানা মফম কল্লি। হৌখিবা চহী খরসিদা, মসিগী তৌবা ঙম্বা শক্তি অদু পাকথোক চাওথোক্লি অমসুং মালেমগী মফম কয়া অমদা শন্দোক্লি। ভারতনা মালেমগী খুন্নাইদগী হন্দক চহীদা সেক্যুরিতী কাউন্সিলগী নোন-পার্মনেন্ত মেম্বর অমা ওইনবগী মতেং ফংলিবগী মওং মতৌ অসি  য়াম্নমক মশক থোকপা অমনি। মালেমগী থাক্তা লৈবা লুচিংবশিংগা ঐখোয়গা লৈনরিবা মরী অসি মগুন হেনগৎলক্লি। ভারতনা মতীক চাবা গনতন্ত্র অমগা লোইননা মতীক চানা ইকাই খুম্নবা ফংলি অমসুং থাজবা য়াবা লৈবাক অমা হায়বদু ওইরি।

ঐখোয়না ঐখোয়গী সংবিধানগী মন্ত্রশিংবু নিংশিংজদুনা লৈগদবনি। ঐহাক্না মসি মমাংদসু হায়জখ্রে, অদুবু অমুক্কসু হন্না হায়জগে মদুদি ঐখোয়না ঐখোয়গী পুন্সিদা চংবা নোংমগী ইথৌশিংদা ঐখোয়গী লৈবাক অসিগী মপা ওইরিবসিগী পুন্সি অমসুং ৱাখল্লোন য়াওহনগদবনি। মীৎলু খুদিংদগী পিরাং তৈথোকপীনবা হোৎনমিন্নগদবনি। ঐখোয়গী রিপব্লিক্কীদি থোং মান্নবা হায়বসিনা খ্বাইদগী চাওবা প্রোজেক্ত অমনি। মান্নবা খুন্নাই অমনা ঐখোয় খুদিংমক্কী, খুঙ্গংদা লৈরিবা মীয়াম, নুপী, ঐখোয়গী খুন্নাই অসিগী শোত্থরবা কাংলুপ, মমিং ওইনা পল্লবদা সেদ্যুল কাস্ত অমসুং সেদ্যুল ত্রাইব, নাম্ম শোইরবা কাংবু অমসুং অহল ওইরবশিংবু ইকাই খুম্নবা পীবি। শেন্মিৎলোন্দা মান্নবা হায়বসিনা শোত্থরবশিংগা খুৎশম্ননা চৎমিন্নবা ফংবগী খুদোংচাবা পীরি। ঐখোয় মীওইবা অমনা অমবু মতেং পাংনবনা নুংশিবগী লিপুন হেনগৎহল্লি। মাংদা তারিবা ঐখোয়গী অপুনবগী লম্বী অসিদা, ফ্রেতর্নিতীনা ঐখোয়গী ৱাখলবু য়োমশিনবী। ঐখোয় পুম্নমক্না 'কন্সতিত্যুসনেল মোরালিতী' হায়বা বাবাসাহেব দা. ভিম্রাও অম্বেদকারনা নবেম্বর ৪, ১৯৪৮তা সংবিধানগী দ্রাফ তৌবদা কন্সিতিত্যুএন্ত এসেম্বলীদা পীখিবা মহাক্কী ৱারোলদা পল্লিবা অসিগী লম্বীদা চৎমিন্নসি। মহাক্না 'কন্সতিত্যুসনেল মোরালিতী ' হায়রগা সংবিধান্দা লংনা ঙাল্লিবা ভেল্যুশিংগী শক্তিদুবুনি হায়না ময়েক শেংনা তাকপীরম্মি।

নুংশিরবা লৈবাক মীয়ামশিং,

ঐখোয়না ঐখোয়গী রিপব্লিক্কী মপোক কুম্মোন পালন তৌগদৌরিবনা, ঐহাক্না মপান্দা লৈরিবা ঐখোয়গী ইনাও অমসুং ইচলশিংবুসু নিংশিংলি। মপান্দা লৈরিবা ঐখোয়গী দাইস্পোরাশিংনা ঐখোয়বু চাওথোকচহল্লিবনি। মপান্দা লৈরিবা ভারত মচাশিংনা তোঙান তোঙানবা হীরমশিংদা মাই পাকপা কয়া  অমা পুরকখ্রে, কনাগুম্বা খরনা রাজনিতীগী লমদা থাক ৱাংখিবা, কনাগুম্বা খরনা সাইন্স, আর্তস, একাদেমিক, সিবিল সোসাইতী অমসুং কর্বারদা শরুক য়াবা, মখোয় খুদিংমক্না মখোয়গী অনৌবা য়ুম্ফমদুদা মাই পাকপা পুরক্লি অমসুং ভারতকীসু মাই পাকপা পুরক্লি। অদোমগী ইপা ইপুগী লমদগী রিপব্লিক দেগী য়াইফ-পাউজেল পীজরি! মখোয়গী ইমুং মনুংশিংদগী লাপনা লৈদুনা কুম্মৈ পাঙথোকচরিবা আর্ম্দ ফোর্সেস্কী মীহুৎশিং, পেরামিলিতরী ফোর্স অমসুং পুলিসশিংগী মফমদা য়াইফ-পাউজেল পীজরি। জৱানশিংগী মফমদা ঐহাক্কী অখন্নবা য়াইফ পাউজেল পীজরি।

অমুক্কা হন্না ঐহাক্না পুম্নমক্কী মফমদা রিপব্লিক দেগী হরাও তয়াম্বা ফোংদোকচরি।

থাগৎচরি,

জয় হিন্দ!

*****