খাদি এন্দ ভিলেজ ইন্দস্ত্রিজ কম্মিসন (কে.ভি.আই.সি.) অমসুং ত্রাইবেল এফিয়র্স মন্ত্রালয়না হয়েং লৈবাকপোকপা নুমিৎ (জানুৱারী ১৯)দা এম.ও.য়ু. অনি খুয়েক পীনরগনি। মসিগী মনুংদা এম.ও.য়ু. অমনা ত্রাইবেল মহৈরোইশিংগী খাদিগী ফীরোল লৈবনি অদুগা অতোপ্পা এম.ও.য়ু. অমনা প্রাইম মিনিস্তর ইম্প্লোইমেন্ত জেনেরেসন প্রোগ্রাম (পি.এম.ই.জি.পি.)গী ইম্প্লিমেন্তিং এজেন্সী অমা ওইনা ত্রাইবেল এফিয়র্স মন্ত্রালয়না কে.ভি.আই.সি.গা পার্তনর ওইবনি।

এম.ও.য়ু.শিং অসি এম.এস.এম.ই.গী ইকাই খুম্নরবা মন্ত্রী শ্রী নিতিন গদকরী অমসুং ত্রাইবেল এফিয়র্সকী মন্ত্রী শ্রী আর্জুন মুন্দা য়াওনা খুয়েক পীনগনি। মখোয়না খাদি আর্তিসেনশিং অমসুং লৈবাক শিনবা থুংনা লৈরিবা মশিং য়াম্লবা ত্রাইবেল মীয়ামদা ইনোৎ হাপতুনা মফম অদুগী মীয়ামদা থবক পীবগী পান্দমদা ইকাই খুম্নরবা প্রধান মন্ত্রীগী “আত্মানির্ভর ভারত”কী খোলাওগী তুং ইল্লি।অহানবা এম.ও.য়ু.গী শরুক ওইনা ত্রাইবেল এফিয়র্স মন্ত্রালয়না ২০২০-২১দা মন্ত্রালয় অসিনা চল্লাইবা একলব্যা রেসিদেন্সিএল স্কুলশিংগী মহৈরোইশিংগীদমক্তা লুপা করোর ১৪.৭৭গী খাদিগী ফীগী মিতর লাখ ৬ হেন্না লৈশিল্লগনি। সরকারনা চহি খুদিংগী একলব্যা স্কুলশিংগী মশিং হেনগৎলকপা অসিদা খাদিগী ফী লৈবগী চাং অসিসু চান্নবা মওংদা হেনগৎলগনি।

অনিশুবা এম.ও.য়ু.গী মখাদা ভারত্তা লৈরিবা ত্রাইবেলশিংগী শেন্মীৎলোন চাউখৎহন্নবা থৌদাং পুরিবা ত্রাইবেল এফিয়র্স মন্ত্রালয়গী এজেন্সী অমা ওইরিবা নেস্নেল সেদ্যুল্দ ত্রাইব ফাইনান্স দেবেলপমেন্ত কোর্পোরেসন (এন.এস.তি.এফ.দি.সি.)না পি.এম.ই.জি.পি. স্কীম ইমপ্লিমেন্ত তৌনবা পার্তনর ওইরগনি। এন.এস.তি.এফ.দি.সি.না শেন্মীৎলোনগী সেক্তর পুম্নমক্তা হৌগৎলক্লিবা সেদ্যুল্দ ত্রাইবশিংগী ওন্তপ্রিনোরগী ভেঞ্চরশিংগী শেন্থং পীনবা কনসেস্নেল লোন স্কীমশিং ফংহল্লি। এম.ও.য়ু. অসিনা ত্রাইবেলশিং তোঙান তোঙানবা প্রদক্সনগী থবক-থৌরমশিং তৌহনদুনা অমসুং মশানা মশা থবক পীজনবা খুদোংচাবশিং ফংহনদুনা কান্নবা পীরগনি। এন.এস.তি.এফ.দি.সি. অমসুং কে.ভি.আই.সি.গী এলাইয়েন্স অসিনা এস.তি.শিংদা পি.এম.ই.জি.পি. স্কীমনা কোনশিনবগী চাং হেনগৎহল্লগনি।

*************