আই.আই.তিশিং, এন.আই.তিশিং অমসুং অতোপ্পা তেক্নিকেল ইন্সতিতুসনশিংদা কান্নবা পীনবা তনেল অসি শেমগৎ-শাগৎলকপা মতমদা ফংখিবা লৌশিং কয়া খঙহন্নবা জনুৱারি ১১দা অতল তনেলগী মরমদা ৱেবিনার অমা বোর্দর রোদস ওর্গনাইজেসন্না পাংথোকখ্রে।

নোংমগী ওইবা ৱেবিনার অদু হৌদোক্লদুনা, রক্ষ মন্ত্রী শ্রী রাজনাথ সিংহনা কোবিদ-১৯গী অথিংবশিংগী মরক্তা তেক্নিকেলগী শিংনবা কয়া লৈরবসু ইঞ্জিনিয়ারিংগী অঙকপা অসি শাবগীদমক বি.আর.ওগী ইঞ্জিনিয়ারশিং থাগৎখি। মপান লৈবাকশিংগী ইঞ্জিনিয়ারশিং ফাওবদা অচৌবা খুদোংচাদবা অমা ওইখিবা, ফোল্দ জোন অমা ওইরিবা সেরি নাল্লাগী খুদম মহাক্না পীখি। রক্ষ মন্ত্রীনা হায়খি সেরি নাল্লাগী শিংনবশিং ঐখোয়গী ইঞ্জিনিয়ারশিংনা মাইপাক্লে। অতল তেনেলগুম্বা অচৌবা স্ত্রকচর শাবা অসি অরাইবা থবক অমা নত্তে অমসুং লৈবাক্কী ওইনা চাউথোকচনবগী থৌনা অসি য়াম্না মরুওই। ভারতকী সাইন্তিস্তশিং অমসুং ইঞ্জিনিয়ারশিংনা মমাঙদা থবক কয়া মাইপাক্না পাংথোকখ্রে অমসুং তোঙান-তোঙানবা হিরমশিংদা মখোয়গী তৌবা ঙম্বা মতম পুম্নমক্তা উৎলে।

অত্মানির্ভর ভারতকী মতাংদা শ্রী রাজনাথ সিংহনা হায়খি কোবিদ-১৯গী অৱাবশিং কোকহন্নবা, ঐখোয়গী লৈবাক্কী দরকার ওইবশিং পুথোক্নবা খক নত্তনা অতোপ্পা লৈবাকশিংদসু পীনবা পি.পি.ই কিৎশিং, মাক্সশিং, সেনিতাইজরশিং পুথোকনবা ঐখোয়না য়াম্না অথুবা মতমদা ঐখোয়গী লৈজবা পোৎলমশিং শীজিন্নখি। ঙমখৈগী শরুকশিং চাউখৎনবা সরকারনা মরুওইবা মিৎয়েং চঙলে অমসুং অৱাং থংবা ঙমখৈশিংদা বি.আর.ওনা মসিগী শীন্মীশিংগী চাদা ৬৭ শীজিন্নরে। কোবিদ-১৯গী অথিংবশিং মরক্তা ২০২০ মনুংদা পায়খৎখিবা থবকশিংগীদমক বি.আর.ও থাগৎলদুনা মহাক্না হায়খি, বি.আর.ওগী বজেত ককথবা লৈতে।

মিতর ৩০০০ ৱাংবা মফমদা মালেমদা খ্বাইদগী শাংবা তেনেল(কিলোমিতর ৯.০২০) শেমগৎ-শাগৎপা মনুংদা থেংনখিবা অৱাবশিং অমসুং থৌদোক-ৱাথোকশিংগী খোমজিনবা লাইরিক অমসু শ্রী রাজনাথ সিংহনা ফোঙখি।

ওক্তোবর ৩, ২০২০দা অতল তনেল শঙ্গাবা থৌরমদা প্রধান মন্ত্রী শ্রী নরেন্দ্র মোদীনা ইঞ্জিনিয়ারিং ইন্সতিতুৎশিংগী মহৈরোয়শিং অমসুং শীনফম অসিদা থবক তৌরিবশিংগী কান্ননবা অসিগুম্বা লাইরিক অমা পুথোক্নবা পাউতাক পীখি।

তনেল শাবদা তুংদা থেংনরক্কদবা অৱাবশিং মায়োক্ননবা ওজাশিং, মহৈরোয়শিং অমসুং মরুওইনা অরোইবা তার্ম তম্লিবা মহৈরোয়শিংদা ৱেবিনার অসিনা লৌশিং হেনগৎহল্লগনি। ৱেবিনার অদুদা মীওই ১০০০ হেন্না শরুক য়াখি।

হৌদোকপগী থৌরম অদুদা চীফ ওফ দিফেন্স স্তাফ জেনেরেল বিপিন রৱাত, আর্মি চীফ জেনেরেল এম.এম নারাবানে, দিফেন্স সেক্রেতরি দোক্তর অজয় কুমার অমসুং দি.জি বি.আর.ও লেপ্তনেন্ত জেনেরেল রজিব চৌধুরিশু শরুক য়াখি।

*****