ভারতকী উপ-রাস্ত্রপতি, শ্রী এম. ভেঙ্কয়া নাইদুনা ঙসি ভারতনা মালেমগী ওইনা নুপী এস.তি.ই.এম. গ্রেজুএৎকী চাদা খ্বাইদগী য়াম্বা মশিং পুথোক্লবসু মখোয়গী এস.তি.ই.এম.গী থবক তৌবগী শরুক অসিদি ১৪% ওইদুনা য়াম্না নেম্না লৈরি অমসুং মসি ফগৎহনবগী তঙাই ফদবা লৈরে হায়না হায়খি। পোস্ত-গ্রেজুএৎ অমসুং দোক্তরগী ওইবা মহৈ-মশিংদা মখোয়গী শরুক য়াম্না নেম্লিবা অসিসু হেনগৎহনবগী তঙাই ফদবা লৈ হায়না মহাক্না মখা তানা হায়খি।

হীরম অসিগী মতাংদা, শ্রী নাইদুনা আই.আই.তি.শিংদা নুপী মহৈরোইগী মশিং হেনগৎহন্নবা সরকারনা হোৎনরিবা অসিগী মহৈ ওইনা ইং ২০১৬তা ৮% ওইরম্বা অদুদগী হৌজিক্তি চাউরাক্না ২০% ওইবা ঙম্লে হায়না হায়খি। নুপীশিংনা সাইন্স অমসুং অঙ্কদা মখোয়গী কেরিয়র শেম্নবা পুক্নিংগী ইথিল পীরিবা সাইন্স অমসুং তেক্নোলোজী বিভাগকী ‘ৱিমেন সাইন্তিস্ত প্রোগ্রাম’ অসিবু থাগৎলদুনা খোঙথাং অসি হেন্না শীংথনিংঙাই ওইবনি হায়খি। ঐখোয়না ঐখোয়গী নুপী সাইন্তিস্তশিং অসিগীদমক্তা হরাওবা ফোংদোক্কদবনি অমসুং সাইন্সকী হীরমদা মখোয়বু নুপীমচাশিংগী রোল মোদেল ওইহনগদবনি হায়না মখা তানা হায়খি।

চেন্নৈগী ইন্সতিত্যুৎ ওফ মেথমেতিকেল সাইন্সস (আই.এম.এস.সি.)তা ৱা ঙাংবদা, উপ-রাস্ত্রপতিনা এস.তি.ই.এম.গী চৎনবী অমসুং দেতা সাইন্সকী ইহৌ অসিগী মতিক অসিবু শিজিন্নদুনা থবক পীবা ঙম্নবা মতৌ করম্না হোৎনগদগে হায়বগী মতাংদা হায়খি। শ্রী নাইদুনা দেতা অসিনা কারবার তৌবগী মওংদা অহোংবা কয়া পুরক্লে অমসুং ঐখোয়গী হৌজিক চৎনরিবা ইঞ্জিন্যারিংগী করিক্যুলম অসিদগী হেন্দোক্না য়েংদুনা ঐখোয়গী নহা ওইরিবা গ্রেজুএৎশিং অসিদা হায়রিবা অনৌবা স্কিল সেৎশিং অসি পীনবা হোৎনগদবনি হায়খি। অসুম্না তৌরবা মতমদা, ঐখোয়না হৌজিক্কী ইন্দস্ত্রীশিংনা লৈরিবা অপাম্বশিং অসিগা চান্ননা লৈবা ঙমগনি হায়না মখা তানা হায়খি।

আই.আই.তি.গুম্বা লৈবাক্কী থাক্কী ইন্সতিত্যুৎশিং অসিনা দিস্তেন্স এজুকেসন কোর্স মশিং য়াম্না পীবা হেনগৎলকপা অসিদা হরাওবা ফোংদোক্লদুনা মহাক্না তেক্নিকেল কোর্শিং অসিসু লম-লমগী ওইবা লোলশিংদা ফংহন্দুনা মহৈরোই মশিং হেন্না য়াম্না কান্নবা ফংহনবগী অপাম্বা ফোংদোকখি।

মফম-মফমগী লোলশিংদা সাইন্সকী এজুকেসন অসিবু ফংহনবগী কান্নবগী মতাংদা মিৎয়েং চঙলদুনা, উপ-রাস্ত্রপতিনা হায়রিবা থৌওং অসিনা মহৈরোইশিংদা সবজেক্ত অসিবু হেন্না ভাব তানা খঙহনবদা তেংবাংগনি অমসুং মসিনা অনৌবা থৌওং পুথোকহনবদা তেংবাংবসু হেনগনি হায়খি। লোল অমতবু চৎনদবা য়াদে হায়বদি লৈরোই হায়রদুনা মহাক্না মীয়াম্না য়ারিবমখৈ লোল য়াম্না তমশিন্নবা অদুবু মমালোন্দবুদি হেন্না মরু ওইবা পীনবা হায়খি।

অঙ্কগী মরু ওইবা অমসুং সবজেক্ত অসিদা লৈরিবা ভারতকী ইনাক-খুল্লবা চৎনবী অসিগী মতাংদা পল্লদুনা, শ্রী নাইদুনা ভারতকী অঙ্কগী হীরমদা ফাওরবা স্রিনিভাসা রামানুজন্না হীরমসিদা পীরম্বা মমল নাইদ্রবা তেংবাং অসিগী মতাংদা মহাক্না মিৎয়েং চঙখি। অঙাংশিংগী মনুংদা লোত্তুনা লৈরিবা হৈ-শিংবা অসিবু খঙদোক্নবা হোৎনসি হায়না হায়রদুনা, উপ-রাস্ত্রপতিনা অঙাংশিংগী মরক্তা হৈ-শিংবগী অৱাৎপা লৈতে অমসুং মসিবু মশক খঙদোক্তুনা য়োকখৎপা অসি য়াম্না মরু ওইবনি হায়খি।

লমদম অসিদা কোবিদ-১৯গী ভেক্সিন শাবদা মাই পাকহল্লিবা সাইন্তিস্তশিংবু থাগৎলদুনা, শ্রী নাইদুনা মসিগী থৌওং অসি ভারতনা সাইন্সকী হীরমদা অচৌবা খোঙথাং অমা থাংবনি হায়খি। ঐখোয়গী সাইন্তিস্তশিং অমসুং নহা ওইরিবা থৱাই য়াওবা রিসর্চরশিং অসিনা হোৎনরিবা অসি য়েংলুরগা মহাক্না লৈবাক অসিগী তুংদা লাক্কদবা মতমদসু য়াম্না থাজবা থম্মি হায়খি। আর. অমসুং দি. পুম্নমক অসিগী পান্দমদি মীয়ামগী পুন্সিবু হেন্না ফগৎহনবনি হায়বা অসি মহাক্কী ৱাখল্লোন্নি হায়খি।

হৌজিক চৎলিবা কোবিদ-১৯গী লাইচৎ অসিগী মতাংদা পল্লদুনা, উপ-রাস্ত্রপতিনা মহৌশাবু ইকায়-খুম্ননা চৎপগী তঙাই ফদবগী মতাংদা মিৎয়েং চঙখি। অইং-অশাদা অহোংবা লাক্লিবা অসি তসেংবনি হায়না চেকশিনৱা হায়রদুনা মহাক্না মসিগী পামদবা চৈথেংনা ঐখোয়গী পুন্সিদসু পামদবা চৈথেং পীগনি হায়খি। মহৌশাগা নীংথিজনা লোয়নদুয়া লৈবগী তঙাই ফদবগী মতাংদা পল্লদুনা, শ্রী নাইদুনা মীয়ামদা য়োগ তৌদুনা অমসুং নীংথিজনা থোংদোক্লবা অমসুং মচি ওইবা চিঞ্জাক চাদুনা হকশেল ফবা পুন্সি মহিং অমা হিংনবা হোৎনবীয়ু হায়খি।

নহাশিংনা মোবাইল ফোনবু তঙাই ফদবগী চাংদগী হেনগৎনা শিজিন্নবগী চৎনবী অমা লৈরক্লিবা অসিনা পামদবা ৱাখল চাইথোকপগী থৌওং লৈহল্লক্লিবা অসিদা পাখৎপগী ৱাখল্লোন ফোংদোকখি। মহৈরোইশিংগী মপুং ওইবা চাউখৎপা অমা পুরক্নবগীদমক্তা স্কুলশিংনা য়োগ, লৈ থাবা অমসুং মীয়ামগী থবক তৌবগী হীরমশিং অসিসু মখোয়গী করিক্যুলমগী মনুং চলহনবগী তঙাই ফদবগী মতাংদা ৱাফম থমখি।

অঙাং কয়ানা অঙ্কদা হৈনদবা ফাওবা অমসুং সবজেক্ত অসি তমগনি খনবদা অকিবা নত্ত্রগা পাখৎপগী মওং কয়া লৈরিবা অসিবু য়েংলদুনা মহৈ-তম্বীরিবশিংনা চিনফা পুবগী থৌওংবু অনৌবা ক্রিএতিক ওইবা থৌওংনা মহুৎ শিলহন্নবা অমসুং অঙাংশিংনা মশিংগা হৈনবা ফাওহন্নবা থৌওং কয়া শেম্নবা শ্রী নাইদুনা হায়খি।

পান্দম অসি ফংবগীদমক্তা, অনৌবা এজুকেসন পোলিসীদা য়াওরিবা খুদোংচাবশিং অসি নীংথিনা শিজিন্নবা অমসুং প্রাইমারী এজুকেসন্দা পেদাগোজিগী অহোংবা কয়া পুরক্কদবনি হায়না উপ-রাস্ত্রপতিনা হায়খি। মহৈরোইশিংদা সাইন্সকী হীরমদা কেরিয়র শেম্নবা পুক্নিং থৌগত্তুনা এস.তি.ই.এম.গী অকনবা য়ুম্ফম অমা লৈহনগদবনি হায়না মহাক্না মখা তানা হায়খি। মহাক্না প্রাইভেৎ সেক্তরশিংনা একাদেমিক ইন্সতিত্যুৎশিংগা খুৎশম্নদুনা এস.তি.ই.এম.গী রিসর্চ তৌবগী মওং অসিগী মপাঙ্গল কনখৎহন্নবসু হায়খি।

আই.এম.এস.সি.না ফন্দামেন্তল রিসর্চকী মগুন হেনগৎহন্নবা, মরু ওইনা মখোয়না অচৌবা সাইন্স প্রোজেক্ত অমা ওইরিবা ইন্দিয়া বেজ ন্যুত্রিনো ওবজর্ভেতরী (আই.এন.ও.)দা শরুক য়ারিবা, পাংথোক্লিবা খোঙথাংশিং অসিবু থাগৎপা ফোংদোকখি। মসিগী মিৎয়েং শানবা প্রোজেক্ত অসিনা সাইন্তিফিক রিসর্চকী লমদা ভারতপু মালেমগী লুচিংবগী মফমদা য়ৌহনবা ঙমগনি হায়বগী থাজবা লৈ হায়না মহাক্না ফোংদোকখি।

শ্রী নাইদুনা ইন্সতিত্যুৎ অসিনা তমিল নাদুদা সাইন্স আউৎরিচ প্রোগ্রাম পাংথোকপগী থাগৎলদুনা হৌজিক্কী মতমগী খ্বাইদগী তঙাইফদবদি মীয়ামদা, মরু ওইনা অঙাংশিংদা, সাইন্তিফিক ওইবা ৱাখল্লোন লৈহনবা অসিনি হায়না মিৎয়েংসু চঙখি।

থৌরম অসিদা উপ-রাস্ত্রপতিনা চেন্নৈগী পল্লাভরম, দি.এ.ই. নোদেল সেন্তরদা লৈরিবা আই.এম.এস.সি.গী মী লৈননবা অনৌবা শরুক অমসু ভর্চুএলগী খুত্থাংদা শঙ্গাখি।

তমিল নাদুগী হাইয়র এজুকেসনগী মন্ত্রী, শ্রী কে.পি. অনবালাগন; আই.এম.এস.সি.গী দাইরেক্তর, প্রোফঃ ভি. অর্বিন্দ; এতোমিক ইনর্জী বিভাগ, কালপক্কমগী আই.জি.সি.এ.আর.গী দাইরেক্তর দাঃ অরুন কুমার ভাদুরি; তমিল নাদুগী হাইয়র এজুকেসন বিভাগকী প্রিন্সিপল সেক্রেতরী (সরকারগী) শ্রীমতি সেল্বী অপুর্ভা; আই.এম.এস.সি.গী রেজিস্ত্রার। শ্রী এস. বিষ্ণু প্রসাদ; মহৈরোইশিং অমসুং স্তাফশিংনা থৌরম অসিদা শরুক য়াখি।

মহাক্কী ৱারোলগী অপুনবা পাউদম মখাদা পীরিঃ

 “ঐহাক্না চেন্নৈগী ইন্সতিত্যুৎ ওফ মেথমেতিকেল সাইন্সতা লাকপা অসিদা তসেংনা হরাওবা ফাওই। লেমজনিংঙাই ওইরবা ইন্সতিত্যুৎ অসিগী ফেকলতী অমসুং মহৈরোইশিংগা হকথেংননা পাউ ফাওনবা ফংবা অসি তসেংনা য়াম্না পুক্নিং থৌগৎনীংঙাইনি। ঐখোয়না কোবিদকা লেপ্তনা লাংথেংনরিবা অমসুং তেক্ত কায়দনা দিস্তেন্সিং তৌরিবা অসিগা লোয়ননা ঐখোয়না ঐখোয়গী পুন্সিগী মরক্তা লৈনরিবা মরী অমসুং পুদুনা লৈমিন্নরিবা অসিগী অসেংবা ভেল্যুসু ঐখোয় পুম্বনা খঙনরে। ঙসিগী থৌরম অসিনা তুংদা লাক্কদবা অফবা থবকশিংগী ইঙ্গিৎ অমা ওইরগনি হায়বগী ঐহাক্না থাজবা থম্মি। ঐহাক্না নখোয় পুম্নমকপু নুংঙাই-য়াইফবা, তেক্ত-কায়দবা অমসুং মরু ওইবা ওইনা হকশেল শাফবা অনৌবা চহি অমা ওইরসনু হায়না য়াই-পাউজেল পীরি”।

নুংশিরবা ইচিল ইনাওশিং,

জর্মনগী ফাওরবা অঙ্কগী মীওই, গোসনা য়াম্না তোয়না হায়রম্মি, “অঙ্ক অসিনা সাইন্সকী মহারানীনি”। অঙ্ক অসি তসেংনা সাইন্সকী মতাংদা অনৌবা কয়া খঙলক্লিবা অসিগী মরু ওইবা শাফুনি। চহি কয়াদগী মীওইবগী চাউখৎপগী তাঙ্ককশিং অসি মতমদুগী অঙ্কগী ৱাখল্লোন অমসুং অনৌবা থৌওং খঙলকপশিং অদুনা ওনবা য়াগনি।

ভারতনা মতম কুইনদগী হৌনা অঙ্কগী চৎনবী লৈরকপগী ইনাক খুল্লবা পুৱারী কয়া লৈরি। ঐখোয়গী আর্য়ভত্তা, ভারাহামিহিরা অমসুং ব্রহ্মগুপ্তগুম্বা ফাওরবা মীওই কয়া অমা লৈরি। অমসুং মখোয়না মালেমগী মীওইশিংদগী হেন্না মমাং থাবা অনৌবা হীরম কয়া খঙদুনা অলজেব্রাগী থৌওং কয়া অমা শিজিন্নদুনা লাকখি। ভারতকী অঙ্কগী মতাংদা খ্বাইদগী ঙনবা হৌরকফমদি ভেদগী মতমগী সুল্বাসুত্রাশিংনি। অপাস্তম্বা অমসুং বৌধায়ানাগুম্বা সুত্রাশিংদা সেক্রিফিসিএল অলতার অমসুং অতোপ্পা লাই-লাৎপগী মওং-মতৌ শাবগী জিওমিত্রীগী অকুপ্পা ৱারোলশিং য়াওরি।

ঐখোয়গী লৌশিং অসিসু “শেয়র অমসুং কেয়রগী” ৱাখল্লোনগী মতুং ইন্না অমগা অমগদা পীথোক পীশিন তৌনরম্মি। ঐখোয়গী মশিংশিং অসি অরাবকী লল্লোনবশিংনা শিজিন্নরম্মি অমসুং মতুং তারকপা মতমশিংদা মেদিএভেল য়ুরোপ্তা শন্দোকখি অমসুং মসিবু হৌজিক ‘হিন্দু-অরাবিক মশিংগী পথাপ’ হায়রগা খঙনরি। মসিগী তেংবাংবা অসিবু শকখঙলদুনা, অল্বর্ত আইন্সতাইন্না অসুম্না হায়রম্মি, “ঐখোয়না ভারত মচাশিংদা লমল য়াম্না তোল্লি, মখোয়না ঐখোয়দা মশিং থীবা তাকপিরম্মি অমসুং ইসি য়াওদনদি সাইন্সকী মশক নাইবা অনৌবা থৌওংশিং অসি পুথোকপা ঙম্লম্লোই”।

অঙ্কগী হীরমদা ইনাক খুনবগী চৎনবী অসি হৌজিক্কী মতমদসু মখা তানা অদুমক লৈরমখি। ভারতকী ফাওরবা অঙ্কগী মীওই, রামানুজন্না মালেমগী মীওই খুদিংগী পুক্নিং চীংশিনখি। ফোর্মেল ত্রেনিং অমত্তা য়াওদনা, মহাক্না মেথমেতিকেল এনালাইসিস অমসুং নম্বর থ্যোরীদা মরু ওইবা হীরম কয়া অমা পীবিরমখি। থবক তৌদনা অমসুং মীচম-মীয়ামগী পুন্সি মহিংদা হিংদুনা মহাক্না মহাক্কী থবকশিংবু লেপ্পা লৈতনা পাংথোকখি। ইংলিশকী অঙ্কগী মীওই, জি.ঐচ. হারদীনা মহাক্কী থবকপু কোন্নথংদা শকখঙল্বা তুংদা রামানুজম্না ইংলেন্দগী কেম্ব্রিজতা চৎখি অমসুং রোয়ল সোসাইতীগী খ্বাইদগী নহা ওইবা ফেল্লো ওইখি। হার্দীনা রামানুজনগী হৈথোই-শিংথোইবা অসি শক্নাইরবা লিওনার্দ ইউলরখক্তগা চাংদম্নবা য়াই হায়না খনখি। অতেনবা অদুবু মশক থোকপা পুন্সিদা, রামানুজম্না ঙক্নিংঙাই ওইরবা অশেংবা রিজল্ৎ ৪০০০ ফোংখি। মহাক্কী থ্যোরেমশিংদা অতোপ্পা অঙ্কগী হৈশিংলবশিংনা চুম্মি হায়না তাকপদা চহি কয়া চঙগদবা অহানবা ওইবা থ্যোরেম কয়া অমা য়াওখি। মহাক্কী ৱাখল্লোন অমসুং হৈ-শিংবা অসিদি কনা অমত্তগা লম্বা পাবা য়াবা নত্তে।

ইথিল পীনিংঙাই ওইরবা মহাক্কী পুন্সি ৱারী অসিনা অসিনা ঐখোয়গী অঙাংশিংদা অহেনবা রামানুজম কয়া অমা থীবগী ইথিল পীরি। মতম পুম্বদা নীংশিংউ – হৈথোই শিংথোইবগী অৱাৎপা লৈতে, মখোয়বু খঙদোকপা অমসুং য়োকখৎপদা অৱাৎপা লৈবনি।

অঙ্ক অমসুং সাইন্সকুম্বা মীওইবগী ৱাখল্লোনবু নুংঙাইহনবা অমসুং ৱাখল লৈহনবা হীরম অমত্তা লৈতে হায়না চিংনদনা হায়বা য়াগনি। মখোয়না মশিং অমসুং অনৌবা থৌওং খঙদোকপগী খুৎলায় অমা ওইবতা নত্তনা মখোয়না মীওইবা খুন্নাই চাউখৎপগী চংদ্রবা য়াদ্রবা পাম্বৈ ওইদুনা লাক্লি।

ইচিল ইনাওশিং,

ঐখোয়গী স্কুলগী করিক্যুলমদা অঙ্ক অসি য়াম্না ঙন্না য়াওরকই হায়বসি ঐখোয় লোইনা খঙনরবনি। মসি অঙাং অমগী প্রাইমরী এজুকেসনগী তঙাই ফদবা শরুক অমনি হায়না ঐখোয়না খন্নৈ। অদুবু লাইবক থীবদি, অঙাং কয়া অমনা মসিদা কিবা অমসুং পাখৎপা ফাওনৈ। মসিগী অকিবা অসি সবজেক্ত অসিবু অঙাংশিংদা পামহনবা অমা পোকহন্দুনা কোকহনবা য়াগনি। মরম অদুনা, লাইরিক তাকপীবগী থৌওংনা অঙাংশিংদা অঙ্ক পামহনবগী মরু ওইবা থৌদাং অমা লৌই। অঙ্কবু চিনফা পুহনবগী থৌওং অসিদা ঐখোয়না মরু ওইবা মিৎয়েং চঙফম থোকই। অঙাংশিংনা অয়াম্বা মতমদা লাইরিক্তা য়াওরিবা পাউখুমশিংবু চিনফা পুদুনা পরিখাগী মতমদা ইবগী চৎনবী লৈ। মসি লেপহনগদবনি অমসুং অঙাংসিংদা অনৌবা থৌওংগা লোয়ননা ৱাখল খলহনগদবনি। মরম অদুনা অফবা ওজা অমসুং শেমদোক্লবা করিকলম অসি প্রাইমরী এজুকেসনবু হেন্না ফগৎহন্নবা মথৌ তাই। খ্বাইদগী মরু ওইরিবা অমনা, মহৈ তম্বীরিবশিংনা অনৌবা থৌওং শিজিন্নদুনা মহৈ তম্বীগদবনি।

অনৌবা এজুকেসন পোলিসী অসিনা আর্ত অমসুং সাইন্স, করিক্যুলার অমসুং এক্সত্রা-করিক্যুলার অমসুং বোকেস্নেল অমসুং একাদমিক স্ত্রীমগী মরক্তা লৈরিবা খেৎনবা অসি লৌথোকপগী ৱাফম য়াওরি। ঐখোয়না মসিগী ভিজন দোক্যুমেন্ত অসি চৎনহনগদবনি অমসুং পেদাগোজীদা অহোংবা পুরক্তুনা অঙ্কগুম্বা সবজেক্ততা নহা ওইরিবা মহৈ তম্লিবশিংগী অপাম্ববু হৌহৌননা ইনোৎ পীগদবনি।

ফাউন্দেস্নেল মেথমেতিক্স অমসুং সাইন্সনা এস.তি.ই.এম. (সাইন্স, তেক্নোলোজী, ইঞ্জিন্যারিং অমসুং মেথমেতিক্স) এজুকেসনগী য়ুম্ফম অমা ওইরিবনি। ঐখোয়না অঙাংশিংনা সাইন্সতা কেরিয়র শেম্নিংবগী ইথিল অসি য়োকখৎপীগদবনি। মীওইবগী লৌশিংগী মতাংদা মমাং থানা চৎনিংবা লৈবাক অমনা অঙ্ক য়াওবা ফন্দামেন্তেল সাইন্তিফিক রিসর্চকী হীরমদা মিৎয়েং চঙগদবনি।

এস.তি.ই.এম. এজুকেসনবু মপাঙ্গল লৈহন্নবগীদমক্তা ঐখোয়না সরকারনা শেল থাদবগী থৌওংদগী হেন্দোক্তুনা য়েংগদবনি। প্রাইভেৎ সেক্তরদা ইন্সতিত্যুসনশিংগা খুৎশম্ননা চৎমিন্নবা অমসুং এস.তি.ই.এম. প্রোজেক্তশিংদা পুন্নবা চৎমিন্ননবগী মান্নবা খুদোংচাবা অমসুং থৌদাং লৈ। মসিগী থৌওং অসি মালেমগী ওইনা পাংথোকপা চৎনবীনি অমসুং মসিনা শেল থাদবশিংদসু কান্নবা কয়া অমা পীরি। অরায়বা আই.পি. অমসুং পেতেন্ত তৌবগী চৎনবী অসিনা এস.তি.ই.এম. রিসর্চপু খুমাং চাউশিলহনবদা য়াম্না তেংবাংগনি অমসুং সরকারনসু হীরম অসিদা থবক কয়া অমা পাংথোক্লি।

নুংশিরবা ইচিল ইনাওশিং, এস.তি.ই.এম.গা মরী লৈনবা থবক্কী মতাংদা য়াম্না চাউনা খন্নগদবা ৱাফমদি নুপীশিংগী চাং হন্থবা অসিনি। ভারতকী এস.তি.ই.এম. গ্রেজুএৎকী ৪০% মালেমগী খ্বাইদগী য়াম্বা ওইনা নুপীনা ওইরবসু ভারতকী এস.তি.ই.এম.গী থবকশিংদা নুপীগী শরুক অসি য়াম্না নেম্বা ওইনা ১৪% খক্তমক লৈ। মসিদগী হেন্না ৱানিংঙাই ওইরিবদি, নুপীশিংনা পোস্ত-গ্রেজুএৎ অমসুং দোক্তরগী ওইবা মহৈ-মশিংদা মশিং য়াম্না নেম্বা অসিনি। এস.তি.ই.এম.গী হীরমদা তোঙানবা লৈবা অসি য়াম্না তঙাই ফদবনি অমসুং হৌজিক্কী মতমগী খ্বাইদগী তঙাই ফদবা অসিসু থবক তৌবগী মতাংদা জেন্দরগী খেৎনবা লৈবা অসিনি। হীরম অসিদা করিগীদমক্তা নুপীগী মশিং য়ামদ্রবনো হায়বসি ঐখোয়না খঙদোক্কদবনি অমসুং মসিগা মরী লৈনবা থবক পায়খৎকদবনি।

আই.আই.তি.শিংদা নুপী মহৈরোইগী মশিং হেনগৎহন্নবা সরকারনা হোৎনরিবা অসিগী মহৈ ওইনা ইং ২০১৬তা ৮% ওইরম্বা অদুদগী হৌজিক্তি চাউরাক্না ২০% ওইবা ঙম্লে খঙবদা ঐহাক্না য়াম্না নুংঙাইবা ফাওই। নুপীশিংনা সাইন্স অমসুং অঙ্কদা মখোয়গী কেরিয়র শেম্নবা পুক্নিংগী ইথিল পীরিবা সাইন্স অমসুং তেক্নোলোজী বিভাগকী ‘ৱিমেন সাইন্তিস্ত প্রোগ্রাম’ অসিবু থাগৎলদুনা খোঙথাং অসি য়াম্না শীংথনিংঙাই ওইবনি। ঐখোয়না ঐখোয়গী নুপী সাইন্তিস্তশিং অসিগীদমক্তা হরাওবা ফোংদোক্কদবনি অমসুং সাইন্সকী হীরমদা মখোয়বু নুপীমচাশিংগী রোল মোদেল ওইহন্দুনা অসিমা চেত্তর্জী, জানকী অম্মাল অমসুং শকুন্তলা দেবীগুম্বা হৈথোই-শিংথোইবা কয়া অমা পুথোকপা য়াগনি।

মেথমেতিক্স অমসুং স্তেতিস্তিক্স অসি রিসর্চকী হীরমদা খ্বাইদগী পাম্নবনি হায়না খন্নরম্মি অমসুং মসি য়াম্না পাম্বা কেরিয়রগী লম ওইরমদে। অদুবু চহি খরা অসিদা অহোংবা কয়া অমা লৈরে। দেতা সাইন্স অমসুং দেতাদা য়ুম্ফম ওইদুনা ৱারেপ লৌবগী থৌওং হৌদোরকপদগী কারবার তৌবগী মতাংদা অহোংবা কয়া অমা লাক্লে। মসিগী ফিভম অসি কম্প্যুতিংগী ফেসিলিতীদা খুমাং চাউশিনলকপা অমসুং আর্তিফিসিএল ইন্তেল্লিজেন্স থোক্লকপদগীনি। হৌজিক্তি, মেথেমেতিকেল মোদেল্লিং অমসুং স্তেতিস্তিকেল এনালাইসীস অসি ইন্দস্ত্রী কয়া অমদদি চঙদ্রবা য়াদ্রবা স্কিল-সেৎ ওইরক্লে। মসিগী লম অসি লাক্কদৌরিবা মতমশিংদা চাউখৎলক্কদবনি অমসুং কারবার কয়া অমা, সরকার অমসুং অতোপ্পা লুপশিংনা দেতাগী মতিক অসি শিজিন্ননবা ঙাইদুনা লৈনরিবনি।

ঐখোয়গী নহা ওইবশিংগী দেমোগ্রাফী অমসুং চাউখৎলক্লিবা শেন্মিৎলোন অসিনা থবক অমসুং স্কিল লৈবা থৌমীশিংগী অপাম্বা য়াম্না হেনগৎলে হায়বা তাক্লি। হীরম অসিগা মরী লৈননা, থবক লৈহন্নবগীদমক্তা ঐখোয়না দেতা সাইন্সকী মতিকপু য়াম্না মরু ওইনা কান্নবা লৌদুনা শিজিন্নগদবনি। ঐখোয়গী হৌজিক চৎনরিবা ইঞ্জিন্যারিংগী করিক্যুলম অসিদগী হেন্দোক্না য়েংদুনা ঐখোয়গী নহা ওইরিবা গ্রেজুএৎশিং অসিদা হায়রিবা অনৌবা স্কিল সেৎশিং অসি পীনবা হোৎনগদবনি। নত্ত্রবদি, মখোয়শিং অসি মতমগা চান্নদবা ওইরক্কনি অমসুং মখোয়গী দিগ্রীশিং অসি চেদা খক্তা লৈবা ওইরক্কনি। মসিগীদমক্তা, নখোয়গী অমসুং অতোপ্পা ইন্সতিত্যুৎকুম্বা অসিনা স্তেতিস্তিক্স, কম্প্যুতর সাইন্স অমসুং মরী লৈনবা সবজেক্তশিংগী মাইক্রো কোর্স পীবা য়াই। আই.আই.তি.গুম্বা লৈবাক্কী থাক্তা লৈবা ইন্সতিত্যুৎশিংনা দিস্তেন্স এজুকেসন কোর্স পীবা হেনগৎলক্লিবা অসি য়াম্না শীংথানিংঙাই ওইবনি। ঐখোয়না কোর্সশিং অসি লম-লমগী লোলশিংদা ফংহন্দুনা অহেনবা মহৈরোইশিংনা মসিগী খুদোংচাবা ফংহনফম থোকই।

ইচিল ইনাওশিং,

মসিগী ইন্সতিত্যুৎ অসি ইং ১৯৬২দা হাইয়র লর্নিংগী নেস্নেল ইন্সতিত্যুৎ ওইনা মগুন লৈবা ফন্দামেন্তেল রিসর্চ পাংথোক্নবগীদমক্তা লীংখৎখিবনি। মসিনা রিসর্চকী লমদা মশক থোক্না থবক তৌই হায়না ঐহাক্না হায়নিঙই অমসুং মসিবু লৈবাক্কী অমসুং মালেমগী থাক্তা মীয়াম্নসু শকখঙনরে।

মসিগী ইন্সতিত্যুৎ অসিনা ইন্দিয়া বেজ ন্যুত্রিনো ওবজর্ভেতরী (আই.এন.ও.) হায়রিবা চাউরবা সাইন্স প্রোজেক্ত অসিগা মরী লৈনৈ হায়বা ঐহাক্না খঙই। মসিগী প্রোজেক্ত অসিনা ন্যুত্রিনো কৌবা একজোতিক অমসুং ইল্যুসিব পার্তিকল অসিবু নৈননবা মালেমগী থাক্তা লৈবা লৈনুংগী লেব অমা মদুরাইগী মনাক্তা শাবগী পান্দম থম্লি। মসিদা লৈগদৌরিবা দিতেক্তর অসি ইন্দস্ত্রীশিংনা থৱাই য়াওনা শরুক য়াদুনা লৈবাক অসিদা শাগনি। মসিগী মিৎয়েং শানবা প্রোজেক্ত অসিদগী কান্নবা লৌবা কয়া অমা লৈগনি অমসুং মসিনা ভারতপু সাইন্তিফিক রিসর্চকী লমদা মালেমগী লুচিংবগী থাক্তা পুখৎকনি। ক্বান্তম কম্প্যুতিং, কন্দেন্স মেত্তর ফিজিক্স অমসুং হাই ইনর্জী ফিজিক্সকুম্বা মরু ওইবা হীরম কয়াদা আই.এম.এস.সি.না রিসর্চকী থবক পাংথোক্লি হায়বা তাবদা ঐহাক্না য়াম্না হরাওবা ফাওই।

ইন্সতিত্যুৎ অসিনা তমিল নাদুদা সাইন্স চাউখৎনবা তোঙান-তোঙানবা রিসর্চ কোল্লাবোরেসন অমসুং ‘সাইন্স এত দি সভা’গুম্বা সাইন্স আউৎরিচ প্রোগ্রাম কয়া অমা পাংথোক্লিবা অসিগীদমক্তা ঐহাক্না থাগৎনিঙই। মসিগী থৌওংসিং অসি হৌজিক্কী মতমগী তঙাই ফদবা ঙাক্তনি – মীয়াম অমসুং অঙাংশিংদা সাইন্সকী ৱাখল্লোন চেলহনবা। ঐহাক্না ইন্সতিত্যুৎ অসিনা মাগী তৌফম থোকপশিংদা নীংথিনা পাংথোকপা অমসুং ভারতকী মনুংদা মেথমেতিকেল সাইন্সপু চাউখৎহন্নবগীদমক্তা মাংজিল থারিবা অসিগীদমক্তা ঐহাক্না থাগৎফম থোকই।

ঐহাক্না ঙসি নখোয় ময়ামগা পুনবা ফংবা অসিদা য়াম্না নুংঙাইবা ফাওই। ঐহাক্না ভর্চুএলগী খুত্থাংদা আই.এম.এস.সি. কেম্পসকী মী লৈনবা অনৌবা শরুক অমা শঙ্গাবা অসিদসু য়াম্না নুংঙাইবা ফাওই।

ঐহাক্না আই.এম.এস.সি.গী ফ্রেতর্নীতিশিংদা মখোয়গী তুংগী থবকশিংদা মাই পাকপা ওইসনু হায়না য়াইফ-পাউজেল পীরি।

নখোয়না নমবরদা লেপ্তনা মেজিক তৌবা ঙম্বা ওইসনু।

লৈবাক অসি সাইন্স অমসুং অচুম্বা ৱাখল্লোন্না লমজিংদুনা চাউখৎপা ওইসনু।

ঐখোয়না অনৌবা মালেম অসিদা অপুনবা ওইনা নুংঙাই য়াইফনা লৈবা ওইসনু।

জয় হিন্দ !”

****