ভারত সরকারগী কমর্স অমসুং ইন্দস্ত্রি মিনিস্ত্রিগী প্রোমোসন ওফ ইন্দস্ত্রি এন্দ ইন্তরনেল ত্রেদ দিপার্তমেন্তনা ক্বালিতি কাউন্সিল ওফ ইন্দিয়া, নেসনেল প্রদকতিবিতি কাউন্সিল অমসুং ইন্দস্ত্রিগী লুপশিংগা লোয়ন্না ভারতকী ইন্দস্ত্রিগী পোৎথোক হেনগৎনবা অমসুং মগুন হেনগৎহন্নবা মিৎয়েং থম্বা ৱেবিনারশিংগী মরাথোন “উদোগ মন্থান” অমা পাংথোক্লি। মসি জনুৱারি ৪,২০২১দগী হৌরগা মার্চ ২,২০২১ ফাওবা পাংথোক্কনি।

জনুৱারি ৬, ২০২১দা পাংথোক্কদবা থৌরমদা ভারত সরকারগী কমর্স অমসুং ইন্দস্ত্রিগী মিনিস্তর শ্রী পিয়ুস গোয়াল শরুক য়াগনি।

পরিং নাইনা পাংথোক্কদবা ৱেবিনারশিংদা মেনুফেকচরিং অমসুং সর্বিসকী মরুওইবা হিরমশিং কোনশিনগনি। অকক্নবা হিরম অমদা ইন্দস্ত্রিগী অখঙ-অহৈশিংনা লুচিংদুনা পুং ২গী খন্ন-নৈনবা অমা ৱেবিনার অমদা পাংথোক্কনি। ইন্দস্ত্রিশিংগী, তেস্তিং অমসুং স্তেন্দার্দদাইজেসন বোদিশিংগী মীহুৎশিং শরুক য়াগনি। থৱায় য়াওবশিংনা য়েংবা য়ানবা খন্ন-নৈবা অদু য়ুতুবতা লাইভ স্ত্রিম তৌগনি।

উদোগ মন্থন্না শিংনবশিং, খুদোংচাবশিং, পাম্বৈশিং অমসুং খ্বাইদগী ফবা থবকশিং মশক খঙদোক্কনি। ‘ভোকেল ফোর লোকেল’ য়োকখৎনবা অমসুং ‘অত্মানির্ভার ভারত’কী পান্দম ফংনবা ইন্দস্ত্রিশিং অমসুং সেক্তরশিংগী পোৎথোক হেনগৎহন্নবা অমসুং মগুন লৈবা পোৎথোকশিং পুথোক্নবা খন্ন-নৈনগনি।

ভারতকী ইন্দস্ত্রিশিং পোৎথোক পুথোকপা হেনগৎহন্নবা অমসুং মগুন লৈবা পোৎথোকশিং পুথোক্নবা মিৎয়েং চঙনবা অমসুং হায়রিবা ৱাফমশিং অসিগী মখাদা অৱাংবা থাক্কী মগুন হেনগৎহন্নবা,  মতিক চাবা পোৎ-চৈ পুথোকপা কম্পেনিশিং, ললোনবশিং শেমগৎতুনা লৈবাক অসি মালেমদা মশক খঙনবা খন্ন-নৈনবগী থৌরমশিং পাংথোক্নবা শ্রী পিয়ুস গোয়ালনা তকশিল্লি।

*****